أنواع الأمراض الجنسية

الأمراض الجنسية لها أنواع علشان كدة عاوزة أكلمكم عن أنواعها لأنه كل نوع له أعراض مختلفة وعلاج مختلف علشان كدة عاوزة ألفت انتباهكم للموضوع دا. إحنا بنقول عدوى جنسية وبنقول مرض جنسي- في فرق بين الاتنين. يعني إيه عدوى جنسية؟ يعني أنت أصبت أو أنتِ أصبتِ بحاجة نتيجة الاتصال الجنسي. الحاجة دي موجودة في الجسم لكن مش شرط عاملة أي أعراض فبنقول إن الشخص عنده عدوى جنسية- أصيب بعدوى جنسية- يعني عنده الفيروس أو البكتيريا أو الفطر أو أي حاجة طفيلية ومش ظاهر عليه الأعراض. لكن لما نقول عنده مرض جنسي، يعني عنده العدوى خلاص حصلت وكمان ظهرت عليه الأعراض، معنى كدة إن في فرق كبير بين إن الواحد يبقى عنده عدوى جنسية وعنده المرض مثال على كدة مثلا مرض بيجي من فيروس اسمه HPV المرض دة Human Papillomavirus  بينتقل الفيروس دة للرجل مثلا وبيبقى ماعندوش أعراض واضحة وينقله لسيدات كتيرة عمل معاهم علاقات والسيدات دول برضه ماتحصلش أعراض واضحة لكن بعد 20 سنة يصابوا بسرطان عنق الرحم مثلا فالمشكلة إن الأعراض ممكن ماتظهرش لكن المرض يكون كامن يعني العدوى موجودة لكن المرض مش واضح على الشخص ومن هنا مشكلة الأمراض الجنسية أي ممارسات حميمة بدءا بالتقبيل ممكن تنقل أمراض جنسية يعني في أنواع من السرطانات بتنتقل بالتقبيل لأنها هي في الأصل مش انتقال السرطان لكن انتقال الفيروس اللي بيسبب السرطان عن طريق التقبيل طبعا أنواع الجنس المختلفة بقى جنس مهبلي جنس شرجي أو فموي كل الحاجات دي بتنقل أمراض جنسية في خطوط عامة حسب نوع الشيء اللي سببلك المرض بنصنف الأمراض فا بنقول أمراض بكتيرية فيروسية فطرية أو طفيلية الأمراض البكتيرية زي مثلا الـ Clamydia Gonorrhoea Syphilis والأمراض فيروسية زي HPV وممكن دة ينتقل بالتقبيل أيضا Herpes الكبد الوبائي  يعني التهاب الكبد الوبائي ممكن ينتقل عن طريق الجنس وفي الحالة دي نسميه مرض جنسي وطبعا AIDS HIV اللي بينتقل برضه بالجنس الفطريات زي الـ Candida  مثلا بتنتقل من الزوج لزوجته أو من الزوجة لزوجها وممكن هو ينقله لزوجة تانية من الطفيليات زي مثلا القمل اللي بيصيب المنطقة التناسلية الجرب والـ Trichomonas مشكلة الـ Trichomonas إنه ممكن ينتقل للطفل اللي بتلده الأم طبعا أمراض كتير ممكن تنتقل للطفل عن طريق الأم إيه أعراض الأمراض التناسلية أو الجنسية ها أتكلم عنها للجنسين في لسته واحدة حرقان في البول للسيدات أو الرجال وألم مع الجماع بالذات للسيدات لو السيدة عندها مشكلة ما عدوى وهي مش عارفة عنها ممكن تكون مقرونة بنزيف بين الدورات أو بالذات مع الاتصال الجنسي هتلاقي برضه إفرازات لونها غريب من الشرج أو من المهبل أو من القضيب يعني ماتنسوش إن إفرازات الشرج ممكن تحدث كعلامة للأمراض الجنسية ممكن تلاحظوا رائحة كريهة من المنطقة التناسلية حكة غريبة جدا مؤلمة جدا حوالين المنطقة التناسلية طفح جلدي موجود على كل المنطقة التناسلية حتى منطقة الشرج ألم في البطن عموما ألم غريب في أسفل البطن مستمر ممكن بقى الأمراض اللي زي HIV تكون مصحوبة مثلا بواحد يجيله عدوى كتير معينة على طول أو مع الـ Hepatitis تلاقي المريض عنده مثلا الصفرة يعني تلاقي الأعراض ممكن تكون في جزء تاني من الجسم مش شرط المنطقة التناسلية مهم جدا أول ما تعرف إن عندك أعراض غريبة في المنطقة التناسلية أنك تتجه فورا لطبيب أمراض جلدية وتناسلية مش من حق الطبيب إنه يسألك عن حياتك الجنسية من واجبه فقط مساعدتك إذا الطبيب سألك عن تفاصيل أنت شايف إنها محرجة أو تدخل في حياتك ممكن ترفض الإجابة إحنا واجبنا إن إحنا نساعدك ونساندك مهما كانت تصرفاتك إحنا مالناش دعوة مش هانديك محاضرات أخلاقية أنت حر في حياتك مادمت مش قاصد تؤذي حد أتمنى لكم كل الصحة وفي الـفيديوز  اللي جاية ها نتفرج على الأعراض بتاعة كل مرض على حدة وهاوريكم من الكتاب صور الأعراض الغريبة اللي بتظهر مع كل مرض فا هنكون عارفين بقى واعيين كل مرض إيه أعراضه بحيث يعني تحسن الوعي الصحي بتاعنا وطبعا صديقي العزيز Google ممكن يساعدكم أكتر بالإنجليزي وبالعربي

أتمنى لكم كل الصحة