الصرع (التفسير الطبي للجن والعفاريت) مقدمة

بنسمع أحيانا عن ناس بيقولوا إنهم بيشوفوا عفاريت أو بيسمعوا أصوات أو بيشموا روائح  أو بيحسوا حاجات ماشية على جسمهم وساعات بنسمع أطباء بيشخصوا ناس بأنهم عندهم كهرباء زيادة في المخ يعني إيه الموضوع دة أنا عاوزة أكلمكم في الفيديو دة عن مرض الصرع لو فهمنا مرض الصرع هايفهمنا حاجات كير بتحصل لناس كتير حوالينا ويمكن مع نفسنا مرض الصرع هو زيادة في كهرباء المخ يعني إيه الموضوع دة علشان نفهم موضوع الصرع لازم نفهم شوية تشريح و وظائف أنسجة المخ المخ لو تشوفوا معايا الجمجمة دي بيتكون من نصفين نص يمين ونص شمال فا أنا هاخد واحد من نصفي المخ وأوريهلكوا كدة هنا المخ والمخيخ والنخاع المستطيل أجزاء من الجهاز العصبي المركزي المنطقة اللي أنا عاوزة أتكلم عنها في السياق دة هي المنطقة دي من المخ هانبص عليها كأننا بنبص بالميكروسكوب على الأجزاء دي منها الوحدة الواحدة منها هي الخلية العصبية يعني أصغر وحدة من المخ اسمها الخلية العصبية الخلية العصبية بتتكون من الأجزاء اللي هاقولها دي بتتكون من جسم هي شبه الشجرة شوية وساق كدة الساق دة بنسميه المحور والمحور دة متغطي بغطاء كأنه غطاء بلاستيك حواليه بيتكون من دهون الحقيقة والنهايات بتاعة الخلية العصبية لها كدة فروع زي الشجرة من الناحيتين بنقول عليها تفرعات شجرية يبقى الجسم حواليه تفرعات شجرية زي ما يكون شعر وبعدين الساق دة اسمه المحور وفي نهايته أيضا نهايات كدة  متفرعة حوالين المحور في مادة دهنية بتحيطه كدة بشبه الخلية العصبية بجهاز كهرباء ليه لأنها بتشتغل بالكهرباء يعني وظيفتها إنها بتنقل المؤثرات الحسية من خلالها عن طريق الكهرباء فا أنا بشبهها بأنها الجهاز دة هو كأنه بيولد كهرباء والكهرباء بتمشي جواه تدخل في الجهاز اللي بعده والكهرباء تمشي جواه برضه وهكذا لحد ما توصل مكانها يبقى الجهاز العصبي مبدئيا بيشتغل بالكهرباء والكهرباء بتمشي في اتجاه واحد فيه يعني بتبدأ من جسم الخلية وتمشي كدة في المحور على الخلية اللي بعدها على اللي بعدها وهكذا المخ كمان بيشتغل بالكيمياء بين الخلية العصبية والتانية هتلاقي كيمياء يعني تفاعل كيميائي حدث علشان الكهرباء تبتدي في الخلية اللي بعدها وهكذا يبقى المخ محتاج حاجتين يشتغل بهم كهرباء وكيمياء في حالة مرضى الصرع المشكلة في توليد الكهرباء وفي مكان انتشارها تعالوا نشوف خريطة للمخ في الخريطة دي إحنا مقسمين المخ لمناطق لها وظائف كل منطقة في المخ لها وظيفة مثلا في منطقة بنشوف بيها منطقة بنسمع بيها منطقة بنحس بيها منطقة مشاعرنا منطقة للكلام وهكذا المناطق دي كل واحدة لها وظيفة بيحصل في بعض الناس إنهم يصابوا بزيادة كهرباء نتيجة أسباب معينة هاقولها بعدين زيادة في كهرباء المخ وبعدين يحصل إيه بعد كدة بسبب كدة إنه بدل ما خلية واحدة تبقى نشطة لنشاط معين يبقى 10 نشطا  وبعدين يحصل إيه بعد كدة لو أنا محتاجة خلية واحدة في مثلا منطقة النظر عندي في المخ علشان أشوف حاجة وبعدين زادت الكهرباء أوي في الخلايا دي بقيت أنا شايفة الحاجة دي 10 أضعاف يعني أحيانا ألاقي إنه بسبب زيادة كهرباء في المخ إن أنا شايفة حاجات كتير أوي مش موجودة لو النوبة دي أو الكهرباء دي حصلت في منطقة السمع بدل ما أسمع صوت حد بيكلمني أسمع مثلا صوت 100 شخص بيكلمني أو حد بيزعقلي وأصلا مافيش حد بيتكلم ممكن يحصل إنه المشكلة تنتشر في المخ كله لو إنتشرت في المخ كله بيجيلي أعراض تانية غير إني أسمع وأشوف حاجات هابتدي أنتفض وأغيب عن الوعي وتظهر صورة الصرع اللي إحنا كلنا عارفنها يبقى معنى كدة إن الصرع دة نوع من زيادة كهرباء في المخ وحسب ما فين المكان في المخ تحصل الأعراض معنى كدة إنه كل شخص مننا ممكن يحصل له نوع مختلف من الصرع كلنا حصلنا نوبة صرع قبل كدة لما العين ترف دي نوبة صرع بس خفيفة طبعا في نوبات صرع مابتعملش مشكلة مثلا دراعي ينتفض شوية كدة أو صباعي أو رجلي أو عيني ترف وفي نوبة صرع تخلي الواحد يقع من طوله مثلا أو يفقد الوعي أو يسمع أصوات غريبة لدرجة يتخض أوي ويبقى بيتصرف تصرفات مش طبيعية فا حسب نوبة الصرع إحنا بنتكلم عن مدى خطورة المرض على العيان في الحلقة الجاية هاشرحلكم أنواع نوبات الصرع بناء على المعلومات دي

تمنياتي لكم بكل الصحة