C-Section الولادة القيصرية

الولادة القيصرية أو بنقول عليها Caesarean، هي عملية جراحية نفتح فيها جدار البطن عند الأم وجدار الرحم علشان نستخرج الجنين. أغلب الأحيان بنكون متفقين مع الأم إن إحنا نعمل ولادة طبيعية وبعدين ممكن تتغير الخطة ساعة الولادة ونقرر إنها تبقى قيصرية، وفي بعض الأحيان بنبقى ناوين نعمل ولادة قيصرية من الأول. إمتى الحالات دي؟ في حالة الولادة المهبلية الطبيعية لو في انقباضات في الرحم لكن عنق الرحم مش راضي يفتح في الحالة دي بنضطر نعمل ولادة قيصرية، لكن في بعض الأحيان الطفل نفسه ممكن يكون في عنده مشكلة إنه مثلا مش حاصل على كمية كفاية من الأكسجين، أو الحبل السري حصله عقدة أو ضغط عليه من رأس الجنين، فا في الحالة دي لازم ننزل الجنين بطريقة تانية غير الولادة المهبلية.
ساعات بنتفق مع الأم قبلها بفترة على ولادة قيصرية، لو مثلا الطفل مش في مكانه الصح يعني رأسه مش تحت، ولو أنتِ حامل في توائم أو لو المشيمة متقدمة عن الـ Baby فا منقدرش نولد المشيمة قبل الـ Baby، ماينفعش بنقول عليها مشيمة متقدمة لازم في الحالة دي قيصرية. لو عندك مشاكل صحية زي مثلا تسمم الحمل لازم ولادة قيصرية، أو عندك أي أمراض زي مثلا ارتفاع ضغط الدم مشاكل في القلب عدوى في الجهاز التناسلي ممكن تنتقل للـ Baby عن طريق الولادة الطبيعية في الحالات دي كلها لازم ولادة قيصرية. أحيانا بيكون الطريق مسدود للولادة، يعني مثلا عندك ورم ليفي سادد الطريق على الـ Baby إنه يتولد، أو رأس الـ Baby كبيرة أوي لدرجة مش قادرة تخرج من المهبل. لو عملتِ قيصرية قبل كدة ممكن يحصل مشاكل من الولادة الطبيعية بعد كدة فا احتمال يقولوا لك لأنك عملتِ قيصرية قبل كدة مضطرة تعملي قيصرية تانية، مش ضروري مش شرط لكن بعض الأطباء بحسب حالتك قد يقترحوا عليكِ كدة.
لازم تعرفي إنه اختيار القيصرية من غير سبب ممكن يعمل لكِ مشاكل في المستقبل في الولادات اللي بعدها، فا أنتِ لو مقررة تعملي قيصرية علشان أسهل أو يعني مش عاوزة تتألمي مع الولادة أو عاوزة المعاد بالظبط الـ Baby يتولد فيه، كل الحاجات دي لازم تعرفي إنه في المستقبل ها تؤثر على الحمل الذي يليه والذي بعده، فا بنقول للأم اللي عاوزة تولد قيصرية من غير سبب طبي أنك لازم تبقى مخططة أنك تولدي طفلين بالكتير أو يمكن 3 على أقصى حد.
لو إحنا قررنا نعمل ولادة قيصرية قبل الولادة بفترة ها نعمل كمان تحاليل دم علشان نتأكد من الـ Group بتاعتك، يعني فصيلة الدم والـ Haemoglobin يعني كمية الحديد في الدم وكدة. دة ها يساعدنا علشان إذا احتاجتِ نقل دم أثناء العملية، إن إحنا نساعدك بسرعة. لو الولادة أو يعني القيصرية خططناها قبل الأسبوع الـ 39 من الحمل، لازم ناخد عينة من السائل اللي حوالين الـ Baby السائل الأمنيوسي، علشان نعرف إذا رئة الـ Baby جاهزة للولادة لأن لو اتولد ورئته مش ناضجة كفاية ممكن يحصله مشاكل في التنفس وتبقى خطر عليه. حتى لو ها تولدي ولادة طبيعية، استعدي نفسيا إنه ممكن احتمال تعملي قيصرية، لازم تبقي واخدة دة في الاعتبار وعارفة عن القيصرية حتى لو أنتِ مخططة 100% أنك تولدي طبيعي. العملية نفسها بتختلف من سيدة لأخرى، مثلا في طريقة فتح الجرح أو في طريقة التخدير، لكن أغلب الولادات القيصرية ها نطلب من السيدات إنهم يعملوا حاجات معينة. أولاً في البيت خدي حمام وأغلسي الجسم كويس بالذات المنطقة التناسلية، لا تزيلي شعر المنطقة التناسلية لأنه لما يبقى مزال من جزوره ممكن يعمل عدوى مع العملية وتكون خطر عليكِ، فا إحنا ها نتصرف ها نعمل حلاقة لشعر المنطقة التناسلية قبل العملية.
في المستشفى ها ننظف البطن بسائل مطهر، وها نحط قسطرة في المثانة البولية، وها نضع كمان Intravenous Line يعني خط وريدي حقنة في الوريد علشان توصلك سوائل وأدوية أنتِ محتاجها في الدورة الدموية. احتمال نديكِ دواء مضاد للحموضة علشان ما تتعبيش من التخدير. أغلب الجراحات القيصرية ها نديكِ حقنة في الظهر للتخدير، وها تبقي فايقة يعني ها تبقي شايفة وسامعة اللي بيحصل، لكن فقط الجزء الأسفل من جسمك هو اللي مش حاسس بالألم. في بعض الحالات ممكن نضطر نستعمل التخدير الكامل لما تبقى حالات طوارئ. سيبدأ الجراح بعدها في عمل قطع في جدار البطن، بيكون أفقي في أغلب الحالات وبنقول عليه قطع البيكيني يعني خط البيكيني، في حالات الطوارئ أو لو الطفل محتاج قطع كبير علشان نطلعه منه أحياناً بنعمل قطع رأسي من تحت الصرة لحد خط العانة، بعد كدة ها يقطع الطبيب الطبقات اللي تحت الجلد من الدهون لحد ما يدخل للرحم ويعمل قطع في الأغلب أفقي. أحياناً بنعمل قطع مختلف شكله شوية بحسب وضعية المشيمة وحجم ووضعية الـ Baby. بعد كدة ها نستخرج الـ Baby، والدكتور ها ينظف وجه وأنف الـ Baby وبعد كدة هانحط مشبك على الحبل السري علشان نقفله ونقطعه، وبعد كدة ها نقفل الجروح ونخيطها.
لو أنتِ واخدة تخدير نصفي ها تخدي الـ Baby بعد الولادة، وها تقدري ترضعيه فورا بعد الولادة. بعد التخدير الكامل محتاجة فترة علشان تفوقي. ها تقعدي في المستشفى يومين أو 3 أيام، مهم أوي تخدي مسكنات علشان الألم ها يمنع أنك تعملي هرمون اسمه Exotoxin، والهرمون دة بيزود إدرار اللبن للـ Baby. كمان ها يطلبوا منك تشربي أو تأكلي بأسرع ما يمكن، وها يشوفوا كمان إذا عندك امساك أو عدم قدرة على التبول أو أي علامات لإن عندك حمى، كل العلامات دي ها يتابعوكِ فيها في اليومين اللي ها تكوني فيها في المستشفى. ها يطلبوا منك كمان الحركة بأسرع ما يمكن لمنع حدوث جلطة وريدية في الساق، وها يدوكِ حقن علشان برضه منع الجلطة دي.
لما توصلي البيت استريحي قد ما تقدري، وخلي حد يساعدك ويجيب لك كل حاجة ما تمشيش كتير أو تعملي حركات غريبة كتير، أتمشي بس لما تبقي قادرة ومستريحة، ما تشيليش أي حاجة أثقل من الـ Baby لعدة أسابيع بعد الولادة. حافظي على أن الجرح ما يكونش عليه ضغط شديد من جوة، يعني مثلا لما تعطسي أو تحزقي أو تشيلي الـ Baby خدي بالك إنه الجرح ما يكونش بيتضغط عليه لبرة، فا أنتِ مثلا لو أنتِ حاسة إنه أحسنلك أنك تضغطي على الجرح لما تيجي تعطسي يكون أحسن، خلي جنبك دايما مخدة وأضغطي بيها على الجرح كل ما تحسي إن في ضغط جاي من جوة، زي مثلا ساعات لما تروحي الحمام أو تعطسي أو تكحي. أشربي مياه وسوائل قد ما تقدري، دة مهم جدا لإدرار اللبن وكمان علشان يمنع الإمساك اللي ممكن يحصل بعد العملية. أغلب الأدوية اللي ها تخديها علشان الألم مهمة ومش بتعمل حاجة للـ Baby، بس ماعدا الأسبرين هو اللي مشكلة. تجنبي ممارسة العلاقة الحميمة لمدة 4-6 أسابيع بعد الجراحة، لكن افتكري إن دايما زوجك برضه محتاج اهتمامك ما تنسيهوش، فا أهتمي أوي أنك تكوني بتعبري عن حبك وحنانك له علشان ما يحسش إن الـ Baby خدك منه وطبعا دة ها يزعله.
أتصلي فورا بطبيبك لو عندك أي علامات إن في عدوى في الجرح أو في الرحم، يعني عندك مثلا حمى 38 درجة أو أعلى، أو عندك ألم فظيع في البطن أو احمرار أو يعني صديد خارج من مكان الجرح. لو عندك ألم في الصدر واحمرار وحمى وحاسة إنه في كلاكيع جامدة بتوجعك أوي في الصدر. لو عندك التبول مؤلم أو النزيف لا يتوقف وثقيل جدا. أو لو عندك علامات الاكتئاب ما بعد الولادة، ودة ممكن يسبب لك أنك تبقي عصبية جدا ومش عاوزة تاكلي ورافضة الـ Baby وحاسة أنك تعبانة أوي مش قادة تعملي أي حاجة، في الحالة دي أتصلي بطبيبك يمكن تكوني محتاجة مساعدة طبية.
أتمنى لكِ تشافي سريع من العملية وحياة سعيدة جميلة مع طفلك الجديد، تحياتي.

Preparing for Surgery 2 – التحضير للجراحة

ها يجيلك جواب من المستشفى أو الطبيب ها يتصل بك يفهمك مواعيد إن أنت تيجي أمتى للعمليات، ولازم توصل في معادك طبعا يعني أعمل حسابك على زحمة المرور لأنه بيبقى في جدول عمليات. وها يفهموك أي قسم تروحه، وها يستقبلك موظف يوديك للأوضة تستنى فيها لحد ما يجي معاد العملية. هتلاقي موظفين كتير يعني مثلا ممرضة وطبيب وجراح وطبيب تخدير، ناس كتير جم سألوك نفس الأسئلة. ليه؟ لأن التمريض له ملف والتخدير له ملف كل تخصص له ملف، ولازم كل المعلومات تكون عندهم صح منك، يعني مش ها ينقلوا من بعض لأنهم احتمال يكون حد سمعك خلط والغلطة تنتقل لهم كلهم، فلازم كلهم يسألوك نفس الأسئلة أحيانا لزيادة تأكيد سلامتك. لو هما ناسيين حاجة عن مثلا سؤالك عن أكلك أو خدت إيه من أسبرين أو كدة أنت دلوقتي واعي، وتقول لهم أنا أخدت مثلا أسبرين أمبارح لأن دة ممكن يؤثر على العملية وممكن يكون خطر على حياتك. فا أفتكر إن أنت تقولهم أي حاجة خدتها فكرهم يعني. لو الطبيب قال لك تاخد دواء قبل العملية خده، يعني تأكد من أنك خدت مثلا أو مطلوب تاخد مضاد حيوي خده قبل العملية، لو ماخدتهوش أو لو خدته لازم تقولهم يعني في الحالتين لازم تقولهم عملت إيه، علشان هما يظبطوا الجرعة اللي ها يدوها لك في الوريد بحسب أنت أخدت ولا لا.
لو أنت مريض سكر، أذكر ذلك بوضوح لكل العاملين اللي ها يشتغلوا معك. لو أنت عندك حساسية من التخدير، لازم تقول كدة لدكتور التخدير، بالذات لو لك تاريخ لكدة قبل كدة يعني حصل مثلا أنك بعد العملية قبل كدة رجعت كتير أو حد قريبك حصل له مشكلة صحية بعد العمليات والدتك والدك أخوك، فهم طبيب التخدير إيه اللي ممكن يكون حصل لك أو لقرايبك بعد العمليات الجراحية علشان يبقى هو مستعد يعني بالأدوية الصح المناسبة لك.
ها يلبسوك يعني Gown بتاع المستشفى، وها يشرحوا لك إجراءات العملية، وها يدوا لك تقرير موافقة منك تمضي عليه فيه مكتوب أنك تأذن لهم بعمل العملية. حسب نوع العملية كبيرة ولا صغيرة ها نقرر التخدير، يعني لو العملية كبيرة ها تحتاج تخدير كامل، يعني ها تبقى نايم تماما طوال فترة العملية، لو عملية صغيرة ممكن نختار تخدير موضعي، يعني الجزء بس اللي ها نعمل فيه العملية هو بس اللي مش ها تبقى حاسس فيه بالألم لكن أنت صاحي وواعي، أو تخدير نصفي يعني نصفك الأسفل أو الأعلى هو اللي مخدرين وغالبا أنت فايق يعني. اختيار التخدير غالبا حسب نوع العملية، بس كمان ممكن يكون حسب اختيارك أنت مع طبيب التخدير، فا أنت أتكلم مع طبيب التخدير في احتمالات أو الاختيارات الممكنة لحالتك.
بعد العملية ها تتنقل من غرفة العمليات لغرفة اسمها غرفة الإفاقة، ها تفضل هناك تحت الملاحظة لعدة ساعات للتأكد من إن التخدير خلص من جسمك وأنت فايق تماما. في غرفة الإفاقة ها تحس ببعض الدوخة، ولو حسيت إن أنت عاوز ترجع أو حسيت إن أنت عندك حرقان في الحنجرة أو فم جاف دي كلها حاجات طبيعية بعد التخدير. هتلاقي الممرضة دخلت كل شوية تطمئن عليك وتقيس لك الضغط وتاخد درجة الحرارة.
من أول ما تفوق بعد العملية، وكل ما تحاول تتحرك أسرع كل ما يكون أحسن. ليه؟ لأن الناس اللي بيتحركوا بسرعة بعد العملية بيقللوا فرصة إصابتهم بجلطة في الساق، جلطات الساق بعد العمليات ممكن تكون قاتلة. فعلشان كدة ضروري أوي إن إحنا نتحرك بسرعة بعد العمليات، علشان ننشط الدورة الدموية والجلطة دي ما تحصلش. نعمل إيه وإحنا في السرير؟ ونتحرك إزاي؟ لما أنت تبقى فايق وقادر تحرك القدمين، حرك القدمين بحيث يكونوا بيقتربوا لأعلى وحاول تثني الساقين قد ما تقدر. كرر الحركة دي باستمرار طول ما أنت نايم في السرير. أحيانا ممكن يدوك شرابات بتقلل احتمال الإصابة بالجلطة، أو يدوك حقن بتخلي الدم أكثر سيولة علشان ما تجيلكش الجلطة دي. في كل الحالات الحركة دائماً كويسة.
قبل ما تسيب المستشفى ها يدوك فريق التمريض أو الأطباء أو الاتنين نصائح عن إزاي تعتني بالجرح، واستعمالك للأدوية كل قد إيه؟ اسأل الأسئلة اللي أنت عاوزها، ودي اقتراحات ببعض الأسئلة اللي ممكن تسألها للطبيب قبل ما تمشي.
لما ترجع البيت هتلاقي نفسك مرهق أغلب اليوم، ودة حاجة طبيعية لأنه التخدير الكامل بالذات وعموماً التعافي وتجديد الأنسجة بياخد طاقة كبيرة من جسمك. فا استرح قد ما تقدر، بس برضه حاول تمشي شوية، لأن المشي بيقلل فرص حدوث الجلطة اللي في الساقين دي اللي ممكن تكون قاتلة. حاول ترجع للروتين اليومي بتاعك في أسرع فرصة، ودة ها يساعدك عليه أنك تأكل أكل صحي وتمارس المشي قليلاً إذا مسموح أو إذا مش مسموح تحاول بعض الحركة بنصف الجسم الأعلى إذا ممكن. وتوقف عن التدخين لأن التدخين بيعطل عملية تجديد الأنسجة عندك، فا التدخين أسوأ حاجة ممكن تعملها بعد عملياتك. بعد ما تخرج من المستشفى في فترة النقاهة في البيت مطلوب أنك تلاحظ على جسمك علامات معينة لأنها لو حصلت ممكن تكون خطر كبير على حياتك، لو لاحظت العلامات دي أتصل فورا بطبيبك وتوجه إلى المستشفى. إيه العلامات دي؟ أول حاجة في الساقين، لو لاحظت أنه في ألم في أحد الساقين أو تورم والألم بيزيد لما تثني قدمك باتجاه الركبة. كمان لاحظت أنه جلد الساق تغير لونه، يعني بقى مثلا أبيض أو أحمر أو أزرق كل دي علامات مش كويسة. كمان لو لاحظت إنه درجة حرارة ساق غير التانية، يعني واحدة سخنة أوي عن التانية. لو الأوردة في الساق بقت مليانة دم وقربت كدة من الجلد برضه دي علامة غلط. العلامات دي كلها علامات لحاجة اسمهاDVT ، يعني جلطة في أوردة الساق، لو أهملتها ممكن تحصل حاجة اسمها Pulmonary Embolism اللي هو كرة من جلطة راحت من الساقين إلى الرئة وسدت عندك القدرة على التنفس، فا هايحصل إيه بعدها؟ ها تبقى عندك علامات أنك مش قادر تتنفس، بالذات لما بتحاول تاخد نفس عندك ألم في الصدر بيزيد لما تعمل شهيق، واحتمال تفقد الوعي فجأة. فا دي علامات كلها بتبقى خطر، ومطلوب فوراً الاتصال بالمستشفى.
الطبيب ها يقولك على فترة النقاهة تستمر قد إيه، دة بيختلف بحسب العملية، يعني لو عملية صغيرة زي المرارة يمكن تحتاج أسبوع لو عملية كبيرة زي تغيير مفصل الفخذ مثلا ها تحتاج أشهر علشان تتعافى. في جميع الحالات مطلوب منك أنك تستمر شوية في الحركة علشان تقلل المضاعفات، وتأكل أكل صحي وتنام كفاية وتريح نفسك من الضغط العصبي.
أتمنى لك كل الصحة والتوفيق. تحياتي.

Preparing for Surgery التحضير للجراحة- 1

الخضوع لعملية جراحية قد تكون تجربة مخيفة عند الكثير من الناس، ودة بسبب إن عندكم مخاوف وأسئلة مش عارفين تسألوها لمين. لكن لما تزول المخاوف دي وتعرفوا الإجابات مش ها تكونوا خايفين من العملية، ومش بس كدة الأبحاث أثبتت إن الناس اللي عارفين ها يحصلهم إيه بيكونوا مستعدين نفسيا وجسديا للعمليات التشافي عندهم أو يعني التعافي بيكون عندهم أسرع من الناس اللي مش عارفين وداخلين عملية من غير استعداد. الحلقة دي علشان أشرح لكم فيها إيه المتوقع منكم واللي ها يحصل قبل وأثناء وبعد العمليات الجراحية بصورة عامة يعني.
أول حاجة بنكون مستعدين نفسياً طبعاً بأنه يعني إذا كان في حاجات لازم نعملها مع الأسرة ترتيبات مع الأسرة وفي البيت وكدة. لكن كمان الاستعداد جسمانيا بأنك عدة أسابيع قبل العملية يعني قول مثلا أسبوعين ثلاثة قبل العملية تستعد بحاجات معينة. تعمل إيه؟ توقف عن التدخين وشرب الكحوليات -لو بتشرب- كل أكل صحي يعني يكون مليء بالخضراوات والفاكهة الصحية. أمتنع تماما عن استعمال الأسبرين أو أي حاجة فيها Aspo زي أسبوسيد أو كدة. فيتامين E استعمال الفيتامينات والأوميجا 3 والحاجات دي، لأن كل الأدوية اللي ذكرتها ممكن تؤثرعلى تجلط الدم، فتسبب سيولة شوية في الدم، ودة يسبب إن جرح العملية ينزف أكتر ودة مش مطلوب. اتكلم مع طبيبك عن أي أدوية بتستعملها باستمرار إذا مسموح تستعملها قبل العملية أو التوقف عنها. مارس بعض الرياضة ها يفيدك أوي في التماثل للشفاء. عدة أيام قبل العملية ها يتصل بيك الدكتور علشان تتكلم مع طبيب تخدير أو الطبيب بتاعك اللي بيعالجك وها ياخدوا منك شوية معلومات، ها يسألوك شوية أسئلة، ويكشفوا عليك وممكن ياخدوا منك دم أو تحاليل بول أو حاجات حسب بقى المطلوب من العملية.
فهم طبيبك عن كل الأدوية اللي بتستعملها أو المهدئات أو المكيفات حتى الفيتامينات والأعشاب اللي بتستعملها، يعني حتى لو بتاخد مثلا زنجبيل كل يوم قل للطبيب برضه، دة بيؤثر على حالة يعني سيولة الدم عندك. الطبيب ها يفهمك معلومات عن الحاجات اللي ها تأكلها مسموحة أو ممنوعة، كمان إذا بتاخد أدوية ممنوع تستعملها ولا لا، يعني بيدوك معلومات عن أدوية لازم تاخدها وأدوية لازم تتوقف عنها، وكمان ها يقولوا لك هتاخد قد إيه وقت في المستشفى، ومحتاج تقعد كام يوم بعد العملية، تجيب معاك إيه للمستشفى، وكمان إذا محتاج حد يوصلك البيت بعد ما تخلص العملية لأنه في أغلب الأحيان مش ها تقدر تسوق بنفسك. لو الطبيب قال لك لازم تصوم قبل العملية، يبقى لازم تصوم قبل العملية. لأنه ممكن يكون خطر على حياتك لو حتى شارب شوية مياه قبل العملية. ليه؟ لأنه لما تكون في معدتك حاجة قبل العملية مع التخدير الكامل في فرصة أنك ترجع، فرصة عالية جدا، فا لو رجعت السوائل أو الأكل ممكن يدخلوا في الرئة ودي كارثة ممكن تسبب الوفاة. علشان كدة ضروري كل الجهاز الهضمي عندك يكون فاضي قبل العملية. فا ضروري أوي حتى لو بتاخد أدوية سكر طبيبك يكون عارف، ويقولك تأكل وما تأكلش إيه، بس غالبا برضه ها تكون صايم قبل العملية.
مطلوب من السيدات إنهم يشيلوا كل الـ Piercings في جسمهم، يعني مثلا الحلق زي كدة ومثلا الإكسسوارات الخواتم والسلاسل وكدة، وتروحي المستشفى من غير Makeup ولا طلاء أظافر. ليه؟ لأنه دكتور التخدير ضروري يكون قادر يشوف لون الوجه والأظافر عندك أثناء العملية، لأنه بيقرر منهم إذا كانت حالة الأكسجين في جسمك كويسة من لون جلدك ولون الأظافر. وضروري أوي تكوني مش حاطة Makeup ولاNail Polish . لو أنتِ قاعدة في المستشفى أو أنت لعدة أيام خدوا معكم شنطة فيها الحاجات اللي ها تحتاجوها الحاجات الشخصية يعني، علشان تبقوا جاهزين ما يبقاش بقى في طوارئ كل شوية حد رايح البيت يجيب حاجة. كمان اسألوا المستشفى إذا مسموح استعمال التليفونات أو الأجهزة الالكترونية زي الـ Computers ، لأن في بعض الأقسام ممنوع استعمالها لأنها بتؤثر على وظائف الأجهزة اللي حولك كمريض، وطبعا الزوار ممنوع يستعملوها كمان.
قبل العملية بيومين ثلاثة لو لاحظت إن عندك كحة أو حمى يعني زيادة في الحرارة أو إصابة بالبرد أعلم المستشفى أو الطبيب ضروري فورا، لأنه دة ممكن يخليهم يؤجلوا العملية، لأنه مطلوب تدخل العملية وأنت صحتك تمام.
اليوم اللي قبل العملية مسموح لك تأكل حاجات معينة وحاجات معينة تمتنع عنها، فا الطبيعي إن إحنا نقول إن الأكل اللي فيه ألياف أكل صحي معادا في اليوم اللي قبل العمليات. أشرب بس حاجات بنقول عليها شفافة، يعني شاي خفيف مثلا لكن أمتنع عن الحاجات اللي فيها ألياف كتير زي عصير البرتقال أو حاجة تقيلة على المعدة زي اللبن أو القهوة بكريمة. وكمان تأكد أنك مش بتاخد أي حاجة مثلا فيتامينات أو مواد بتسبب سيولة الدم زي ما قولت الأسبرين أول حاجة والفيتامينات زي فيتامين E.

Bartholin Gland التهاب غدة بارثولين

يصلني عدد كبير من الرسائل بسؤال من بنات شابات عن حاجة بتطلع لهم عند فتحة المهبل ومش عارفين إيه هي بيخافوا تكون سرطان أو حاجة فا أنا عاوزة أكلمكم في الحلقة دي عن مسألة الـ Bartholin Glands يعني إيه؟
غدد بارثولين غدد بارثولين غدتين موجودين على مدخل المهبل وظيفتهم إفراز سائل يلطف المنطقة اللي حوالين المهبل فا اللي بيحصل إنه الغدة دي ممكن تتسد بالسائل اللي جواها وتلتهب وأنتِ تلاحظي إن في ورم كدة وماتبقيش عارفة إيه هو في أغلب الأحيان التهاب غدة بارثولين ممكن ما تلاحظيهوش أبدا وأحيانا تلاحظي ورم عامل زي البسلاية وأحيانا تكبر أوي تبقى قد مثلا البلية قد الكرة الزجاجية وأحيانا تبقى كأنها يعني خراج كبير ومؤلم جدا لكِ اللي تلاحظ على جسمها إنه الخراج تكون وجالها حرارة وكدة مضطرة تروح للدكتور لكن اللي عندها الالتهاب بسيط ويعني بس ورم كدة مضايقها جربي أنك تقعدي في حمام مياه سخنة الحمام دة مثلا تملي البانيو مياه سخنة وتقعدي فيه 10 دقايق أو تملي الـ Bidet ها يساعد على خروج السائل من الغدة لخارج الجسم ويقل الورم فا كل ما تجيلك أعملي كدة لكن لو أستمر دائما وجه الالتهاب دة بصديد مضطرين نزور دكتور علشان يحاول إذا يخرج الصديد دة أو   يعمل عملية في الغدة بحيث يتخلص من المشكلة دي بأنه مثلا يقفل الغدة تماما
.السيدات كبار السن قد تكون علامة لورم سرطاني فعلشان كدة لازم دكتور يشوف عينة من الغدة دي علشان نعرف إذا كان سرطان أو لا وفي الحالة دي مضطرين نشيلها
.على أي حال ما تخافيش وما تتكسفيش من جسمك واعرفي إيه الطبيعي وإزاي نحل المشكلة؟ علشان تبقي مستعدة لها لو حصلت
.أتمنى لكِ كل التوفيق, تحياتي

Hypertension ارتفاع ضغط الدم

مرض ارتفاع ضغط الدم أو ضغط الدم المرتفع هو حالة مرضية مزمنة نجد فيها أن الدم ضغطه على جدران الأوعية الدموية مرتفع طول الوقت مشكلتنا مع ارتفاع ضغط الدم المرضي إنه في أغلب الأحيان مالهوش أي أعراض ودي للأسف مشكلة كبيرة في الطب المشكلة بتحصل بقى إنه لما بعد كدة تبتدي تحصل منه مضاعفات ليه ممكن يحصل منه مضاعفات؟ زيادة ضغط الدم على جدران الأوعية الدموية باستمرار قد يسبب انفجارها في لحظة ما في مكان ما في الجسم وعليه بتنتج مضاعفات ممكن تكون قاتلة في أغلب الناس 90-95% من البشر اللي عندهم ارتفاع ضغط الدم بيكون السبب مش واضح غير إنهم أسلوب حياتهم غير صحي بنقول عليه أولي ارتفاع ضغط أولي في ارتفاع ضغط ثانوي يعني في سبب آخر مسبب الارتفاع الضغط دة يكون مرض مزمن آخر يعني مثلا مرض مزمن في الكلى مشاكل في الغدد يعني الهرمونية فا المشكلة بتكون سبب آخر مسبب ارتفاع ضغط الدم دة وعاوزين نحله في الثانوي دة للأسف في ناس بيفتكروا مثلا إن الواحد لما يبقى عصبي أو يعرق كتير أو عنده صعوبة في النوم أو وشه يحمر دي كلها أعراض لارتفاع ضغط الدم مش دايما في أحيان كتير أوي العيان بيبقى ماعندهوش أي حاجة علشان كدة قياس الضغط باستمرار مرة في السنة أو كل سنتين مهم علشان نعرف أخبار الضغط عندك إيه
لا تحاول تشخيص نفسك دايما روح لدكتور باطنة أو حتى قيسه في الصيدلية ضغط الدم عندك يوم عيد ميلادك مثلا واعرف إن الأعراض مش بالضرورة لها علاقة بضغط الدم لكن في بعض الأحيان في علامات خطر بتقولك لازم تروح فورا للدكتور تشوف إيه الموضوع لأنه احتمال يكون ارتفاع شديد في ضغط الدم أو ممكن يكون حاجة تانية زي مثلا لو شوفت علامات حمراء زي ذباب أحمر في العين كدة معنى كدة إن غالبا في مشكلة في الشبكية محتاجة علاج وقد يكون سببها ارتفاع شديد في ضغط الدم لو لاحظت إنه وشك بيحمر كتير من غير سبب ممكن يكون سببها ارتفاع في ضغط الدم ولو إنه مش دايما لكن كويس لو تقيس الضغط مع الحالة دي لو لاحظت أنك دايخ فجأة وفقدت توازنك ومش قادر يعني تحرك إيديك يعني زي ما أنت عاوز أو رجليك أو مش قادر تمشي بسهولة ممكن تكون دي علامات لسكتة دماغية نتيجة ارتفاع ضغط الدم
لو قيسنا ضغطك ولقيناه أكتر من 180 اللي فوق وأكتر من 110 اللي تحت أو واحد منهم دي حاجة اسمها أزمة ارتفاع ضغط دم حادة ومحتاجة ضروري تروح للدكتور أو المستشفى بالذات لو معها صداع فظيع أو لو فجأة بقيت خايف ونفسك قصير ومعك نزيف من الأنف دي علامات كلها لإن في مشكلة  محتاجة طوارئ في المستشفي
يبقى أهم حاجة إن إحنا نعيش حياتنا من وإحنا صغيرين وشباب وإن إحنا بنحرص على عدم حدوث ارتفاع ضغط الدم عندنا يعني مطلوب مننا إن إحنا نحافظ على وزننا الصحي أهم حاجة مارس الرياضة نصف ساعة في اليوم مثلا مشي أغلب أيام الأسبوع على قد ما تقدر لو كل يوم يبقى عظيم زود الأكل الطبيعي زي الفواكه والخضار وإن أنت تقلل الصوديوم في الأكل بتاعك يعني ملح المائدة قلله لو إحنا حافظنا على الحاجات دي لو أصبنا بضغط الدم المرتفع ممكن مانحتاجش أدوية بس بأسلوب الحياة الصحي ممكن نعالج المشكلة ودة كمان لمنع حدوثه في الأساس في بعض الحالات عندهم حاجة اسمها ضغط دم مرتفع مقاوم للعلاج يعني بندي له الأدوية وبرضه مش نافع ضغط الدم عنده لسة عالي في الحالة دي العيان غالبا عنده سبب وإحنا مش قادرين نكتشفه بسهولة يعني لازم نكشف على هرمونات تنظيم الضغط عنده في الجسم دي أول حاجة تاني حاجة لازم نشوف إذا عنده حاجة في شريان مسدودة يعني انسداد أو ضيق في شريان ما ودة بيرفع ضغط الدم زيادة حتى مع استعمال أدوية وفي حالة دي لازم جراحة علشان نحل المشكلة اللي في الشريان دي سبب ثالث إنه العيان ممكن يكون عنده اختناق أثناء النوم دة بيزود الضغط برضه زيادة الوزن وشرب الكحول برضه بتخليك مهما استعملت أدوية الضغط مش بينزل لأنه لازم  تقلل وزنك
.يبقى أهم حاجة نعرفها إنه ضغط الدم المرتفع لا نكتشفه بالأعراض بل نكتشفه بالكشف المنتظم يمكن الوقاية منه ومن مضاعفاته بأسلوب حياة صحي فا أهم استثمار في صحتك للوقاية من أمراض تسببها ارتفاعات ضغط الدم المرضية دي إن أنت تكشف باستمرار وتعيش أسلوب حياة صحي
.أتمنى لكم كل الصحة والتوفيق, تحياتي

Tips for Healthy Eyes الحفاظ على صحة العيون

لما بنكون نظرنا سليم شايفين كويس وما عندناش أي التهابات في العيون عمر ما بيجي في بالنا إن إحنا نروح لدكتور نطمئن على النظر عندنا ودي للأسف غلطة كبيرة لأنه مشاكل النظر لما بتبتدي أعراضها بيكون معنى كدة إنه عدى وقت طويل على بدأ المشكلة وبيكون من الصعب علاجها.
علشان كدة عندي لكم 7 نصائح علشان نحمي نظرنا من مشاكل النظر أول حاجة إن إحنا نعمل كشف على العيون بانتظام نبتديه من أول ما الطفل سنه 6 شهور لسنة نبتدي أول كشف نظر للطفل وفي سنين المدرسة كل سنة يروح يعمل كشف نظر علشان نكتشف إذا كان في تغيرات في النظر وفي الحالة دي محتاج نظارة بدري علشان ما تأخرش يعني قدرته في التحصيل الدراسي بعد سن الأربعين محتاجين نعمل كشف دائما على النظر وعلى قاع العين علشان في مشاكل صحية ممكن تسبب مشاكل في قاع العين للأسف ممكن في الآخر تؤدي إلى الإصابة بفقدان النظر يعني دايما قل لطبيب العيون عن لو عندك مشاكل أمراض مزمنة في الجسم كله عامة يعني أو في العيلة لو مثلا عندك سكر أو ارتفاع الضغط عندك أنت شخصيا أو في العيلة بلغ طبيب العيون أثناء الكشف عليك لأنه الأمراض دي بالذات بتعمل مشاكل في الأوعية الدموية في قاع العين وعدم اكتشافها بدري ممكن يؤثر على نظرك بصورة سيئة جدا كل ما تكبر في السن كمان لو بتشوف حاجات زي مثلا نقط سوداء أو أضواء أو حاجات طايرة في مجال نظرك كدة لازم تفهم طبيبك إن الأعراض دي موجودة علشان ممكن تكون أعراض لمشاكل صحية في البيت وفي الشغل لو أنت عندك تكييف أو تدفئة في الحالتين ممكن الجو يكون جاف ودة يؤذي العيون يخيلها جافة دائما ودة مضر بالنظر فا علشان كدة لو أنت قاعد في مكان مكيف أو في تدفئة دائمة أحرص إنه يكون في رطوبة كفاية مثلا خلي عندك جهاز بيعمل بخار مياه شوية أو استعمل نقط دائما اللي هي اسمها الدموع الصناعية دي كويسة لو عندك قطة أو كلب في البيت الشعر بتاعهم ممكن يكون مسبب لتهيج العيون فا التنظيف دائما باستمرار مهم أوي علشان مايبقاش له تأثير سيئ على العيون لو بتستعمل الكمبيوتر لفترة طويلة طول اليوم محتاج تعمل شوية حاجات أول حاجة أنك لو بتلبس نظارة أو عدسات أنهم يكونوا مظبوطين دائما بنقول عليه يعني Up to date يعني متقاس نظرك قريب والنظارة مظبوطة على مقاسك علشان ما تتعبش لو بتتعب من الانعكاس أو اللمعة اللي في الكمبيوتر يمكن تكون محتاج نظارة تحميك من المشكلة دي وضع الكمبيوتر في مستوى بحيث يكون عينك مش تعبانة مش منخفض أوي أو عالي أوي على العيون بحيث تبقى العيون مستريحة لو في انعكاس في الشاشة من شباك وراك مثلا أو أي ضوء مهم أوي إنه ما يكونش موجود فا حرك الكمبيوتر بحيث يكون مافيش انعكاس نازل عليه أو حط شاشة تحميك من اللمعة دي لو حاسس إن عينيك ناشفة أقفل عينيك وافتحها كدة في تمرينات عد لحد 10 وكل 20 دقيقة بص بعيد 20 متر لمدة 20 ثانية وكل ساعتين خد Break 15 دقيقة يعني أبعد عن الكمبيوتر وأعمل حاجة تانية كل أكل صحي مناسب لصحة العينين زي مثلا الخضراوات الورقية الخضراء والتوت البري والأسماك زي الأسماك المياه الباردة بيقولوا عليها والمكسرات زي عين الجمل كويسين أوي على الحفاظ على صحة العين أحمي عينيك من أشعة الشمس لو أنت قاعد في مكان مشمس فترة طويلة أستعمل نظارات شمس كويسة وكمان أحرص على أن أولادك أطفالك الصغيرين يكونوا برضه لابسين نظارات كويسة أو على الأقل لابسين Cap بيحمي عينيهم من الشمس القوية أحرص على نظافة العلبة اللي أنت بتحط فيها العدسات بتاعتك علشان العلبة دي لو مش نظيفة ها تبقى مركز لتجمع البكتيريا المضرة بالعدسات واللي ها تضر بعينيك فا بعد كل مرة تحط فيها العدسات في عينك فضي المحلول من العلبة وأغسلها كويس وحط محلول جديد السيدات استعملوا Makeup من أنواع كويسة وما تحطهوش في العينين جوة العينين أبدا ولو بتستعملوا ماسكارا اعملوها يعني أعرفوا إنه التاريخ عليها أكتبي تاريخ امتى فتحتيها وبعد 3 شهور ارمي الماسكارا واستعملي ماسكارا جديدة لو بتسافروا كتير الطائرة بتتعب العينين فا حطوا قطرة في العينين قبل السفر دي ها تساعد شوية على تحمل الجفاف اللي في الطائرة لو أنتم مسافرين وبتستعملوا نظارة أو Lenses خدوا معكم نظارة دائما ونظارة إضافية ممكن و Lenses إضافية لو أنتم رايحين مكان ها تعوموا فيه مثلا ما تعوموش أبدا بالـ Lenses في عينيكم علشان ممكن تجمع الكيماويات والبكتيريا اللي في المياه ودة مضر بعينيكم
أتمنى لكم كل الصحة والتوفيق. تحياتي

Cognitive Behavioural Therapy (CBT) العلاج المعرفي السلوكي

حابة أكلمكم عن العلاج المعرفي السلوكي أو Cognitive Behavioural Therapy لما تروح لدكتور أمراض نفسية أو معالج نفسي مش شرط يدوك أدوية تاخدها البيت وتكون كدة اتعالجت من المشكلة لا أحيانا في أنواع من العلاجات بنسميها علاجات كلامية يعني تقعد تتكلم مع المعالج وفي الآخر توصل لحل لمشكلتك النفسية الـ CBT هو أحد العلاجات دي العلاج المعرفي السلوكي هو مش ها يخلصك من المشكلة لكن ها يعلمك طرق أنك تتخلص بها من مشاكلك النفسية

المبدأ بتاع العلاج المعرفي السلوكي أنه بيغير أفكارك ومشاعرك وأحاسيسك العضوية وتصرفاتك لأنه لما تبقى أفكارك سلبية ها تسبب مشاعر سلبية وبالتالي تصرفات تضايقك أو تضايق الآخرين ودي بتبقى دائرة مغلقة كدة أنت مش عارف تطلع منها فا العلاج ها يحاول يساعدك فا إحنا بنغير أفكارك وبنعلمك طرق إيجابية للتعامل مع الناس أو المواقف اللي بتضايقك أو بتسبب لك اكتئاب
العلاج المعرفي السلوكي بنستخدمه في علاج مشاكل نفسية متعددة زي مثلا الاكتئاب المزمن القلق المزمن بنقول عليه OCD يعني الوساوس القهرية مشاكل في مثلا نوبات الفزع اضطراب ما بعد الصدمة الخوف المرضي مشاكل الشهية مشاكل النوم إدمان الكحول وأحيانا كمان بنعالج به مشاكل عضوية زي مثلا الناس اللي عندهم ألم مزمن من مشكلة ما زي القولون العصبي

لما تروح لدكتور يديك جلسات علاج معرفي سلوكي ها تاخد عدة جلسات بمعدل 10 جلسات 10 لـ 20 جلسة تقريبا جلسة في الأسبوع أو كل أسبوعين الجلسة تستغرق 30 لـ 60 دقيقة يعني نصف ساعة لساعة وأثناء الجلسة دي ها تقعد مع الدكتور ويقعد يتكلم معك عن يعني أفكارك تحاول تسجلها وأحاسيسك والتصرفات اللي بتعملها

طيب ها نعمل إيه في الجلسات دي الحقيقة إن المعالج ها يعلمك تواجه الحياة بطريقة أكثر إيجابية يعني في ناس بيقولوا إنهم أعادوا تربيتهم بالعلاج دة يعني إزاي تواجه الحياة بطريقة ما اتعلمتهاش زمان فا أول حاجة المعالج ها يعلمك إزاي تحدد أهدافك في الحياة الناس اللي عايشين من غير هدف في الحياة دة من أهم أسباب التعاسة فا علاج الاكتئاب ممكن يساعدك أوي أنك تحدد هدف للحياة وتسعى إليه كمان ها يعلمك إزاي تواجه مشاكلك وتحلها بطريقة إيجابية ها يعلمك إزاي تتعامل مع مواقف الضغط العصبي والقلق وإزاي تتصرف بطريقة صح وها يعالجك من المواقف اللي أنت بتكون خايف منها افرض مثلا أنت بتخاف من الكلاب مثلا ممكن العلاج دة يساعدك إنه تتخلص من الخوف ها يعلمك كمان إزاي تستغل وقتك صح بأنشطة إيجابية بحيث آخر اليوم تقدر أنت تكون فخور بنفسك ودة ها يعزز إحساسك الإيجابي ناحية نفسك ها يزود مشاعرك الإيجابية نحو نفسك وبالتالي تصرفاتك الخارجية ها تبقى أكثر يعني لطفا تجاه نفسك والعالم

طيب هناك صور من العلاج النفسي المعرفي السلوكي ممكن أنت تاخد جلسات علاجية فردية أنت والمعالج لوحدكم في جلسات علاج جماعية تبقى أنت في مجموعة من البشر عندهم نفس المشكلة وبيحاولوا يعالجوها بنقول عليها Group Therapy وممكن تشتري كتاب تطبق يعني التمرينات اللي فيه على نفسك وتتحل المشكلة ودة طبعا اختيار غير  مكلف وكمان ممكن تشوف مواقع أو تطبيقات كمبيوتر أو موبايل هتلاقي عليها تمرينات تساعدك برضه وطبعا دي أرخص الإمكانيات المتاحة

أقترح على الجميع محاولة تطبيق العلاج دة على نفسهم أو مع معالج علشان ها يفرق كتير أوي في مشاعركم وتصرفاتكم
. أتمنى لكم كل الصحة والتوفيق تحياتي

Bedwetting التبول اللاإرادي الليلي

التبول اللاإرادي هو مشكلة تعني إن الطفل أو الشخص المصاب به غير قادر على السيطرة على المثانة بحيث يخرج البول بدون أن يقصد هو بنقول عليه Enuresis بالإنجليزية الطبية ساعات يحصل التبول دة بالليل فا نقول عليه Nocturnal Enuresis تبول لاإرادي ليلي وساعات بيحصل بالنهار تبول لاإرادي نهاري بنقول عليه Diurnal Enuresis ساعات كمان بنصنفه بطريقة تانية بنقول عليه إنه Primary or Secondary يعني أولي أو ثانوي إزاي يعني؟ لو هو أولي معنى كدة إن الطفل عمره ما أتعلم يسيطر على البول يعني هو دايما من أول ما أتولد وهو بيعمل على نفسه وهو نايم ماعرفش أبدا يتعلم السيطرة على البول أثناء النوم أو التحكم في البول يعني النوع التاني أو الثانوي يعني بيكون طفل أتعلم خلاص وبقت كل حاجة كويسة وجه على سن متأخر يعني مثلا 10 سنين أو سن المراهقة أو حتى البلوغ و ابتدئ يعمل على نفسه وهو نايم في الحالة دي يعني في الحالتين دول السببين دول مختلفين أو الأسباب مختلفة ولازم نعرف إيه الأسباب طيب إيه اللي بيسبب مشكلة التبول اللاإرادي الليلي بالذات؟ في ناس كتير عندهم مشاكل مثلا في الهرمونات بالذات هرمون اسمه Antidiuretic Hormone أو الهرمون المضاد أو المقاوم للتبول إن الإنسان مايعملش سوائل كتير في الكلية ويخرجها الهرمون دة بيمنع كدة فا لما يقل الهرمون دة فا إحنا نروح الحمام كتير وبالليل مانقدرش نسيطر على التحكم يعني في المثانة بعض الناس المثانة عندهم صغيرة أو فيها تقلصات لاإرادية فا بيحصل كدة برضه بعض الناس عندهم عامل وراثي هتلاقي الطفل مامته أو باباه كان عندهم نفس المشكلة وهما صغيرين في ناس عندهم مشاكل في النوم نومهم عميق جدا لدرجة أنهم ما بيقدروش يصحوا لما تيجي لهم الرغبة في التبول في حالات طبية زي الإصابة بمرض السكر الإمساك المزمن الالتهابات يعني اللي في المثانة البولية أو أي إصابة حصلت في النخاع الشوكي أسفل الظهر كل الحاجات دي عندها مشكلة في التحكم في البول عاوزة ألفت انتباهكم من فضلكم لأهم سبب في نظري للمشكلة دي وهو السبب النفسي تعريض الأطفال لضغط نفسي رهيب سواء من معاملتهم بقسوة أو حدوث حالة طلاق في العيلة أو وفاة أو أنكم تنقلوا بيت أو مدرسة جديدة أو يتعرض للتحرش مثلا من شخص في المدرسة أو Online كل الأسباب دي ممكن تسبب إنه التبول اللاإرادي يحصل فا معنى كدة إنه العلاج بيعتمد إن الحالة النفسية للطفل تكون كويسة يقال إن الأولاد فرصة إصابتهم بالتبول اللاإرادي تزيد مرتين عن البنات وبالذات اللي عندهم مشكلة في نقص التركيز وفرط الحركة لما نيجي نعالج المشكلة نعالجها إزاي؟ نروح لدكتور باطنة أو أطفال يكشف على الطفل أو الشخص البالغ ويشوف تاريخه المرضي والأسري وكمان ها نعمل كشف عام وتحليل بول علشان نعرف إذا في أي التهابات في المثانة دي أول حاجة وناخد يمكن عينة دم علشان نشوف الهرمونات اللي عنده طيب نعالج المشكلة إزاي؟ أول خطوة بقى إن إحنا نعرف إذا كان في أي سبب عضوي يعني إذا كان المريض مصاب بأي مرض زي مثلا السكر أو أي مرض تاني ونعالج المشكلة وها يروح معها التبول اللاإرادي لما نعالج المشكلة لكن في حاجة ضرورية جدا نعملها برضه إن إحنا نعمل العلاج السلوكي الإدراكي دة أو الإدراكي السلوكي دة اللي بيخلي الطفل يتحسن نفسيا ومعاه تتحسن الوظيفة بتاعة السيطرة أو التحكم في خروج البول نعمل كدة إزاي؟ أول حاجة إنه يتعلم يروح الحمام قبل ما ينام وممنوع أي حاجة فيها كافيين بالليل زي الشاي والقهوة والشكولاتة والحاجات اللي يعني الكولا أي حاجة فيها كافيين ممنوع في ناس بيستعملوا منبه يصحيهم الساعة مثلا 3 يروح الحمام في ناس بيستعملوا منبه طبي بيشعر بأن السرير ابتدئ يتبل فا يضرب فا أنت تصحى تكمل الحمام في الـ Toilet يعني الناس اللي عندهم نوم عميق أوي وعندهم مشكلة في أنهم يصحوا ممكن حد من الأسرة يساعدهم يصحوا المنبهات الطبية دي بتاخد وقت على ما نتعود عليها فا ماتشعرش بالإحباط إنه بعد أسابيع ولسة ما إتعودتش هو محتاج يعني وقت يعني ها يساعدك تصحي بالليل تروح الحمام وترجع تنام في الحالات اللي إحنا مش لاقيين منها نتيجة كويسة الأطباء بيكتبوا أدوية بس مهم أقول لكم إن الأدوية دي نتيجتها بس بفترة استعمالها طول ما أنت بتستعمل الدواء جايبة نتيجة ومش دة الهدف أنك تفضل تستعمل الدواء على طول فا مهم أوي العلاج النفسي من الأدوية دي أدوية مثلا تساعد الهرمون اللي اسمه Antidiuretic Hormone دة تخليه يعني في مستويات كويسة في الدم فا تقلل من كمية البول الخارج في بعض الأدوية بتخلي المثانة يعني Relaxed يعني مسترخية أكتر الناس اللي نومهم يعني عميق أوي أو يعني مابيقدروش يصحوا بسهولة مع المنبه ممكن حد من الأسرة يساعدهم يصحيهم وطبعا مايخضهومش مهم أوي إن إحنا نكون لطاف جدا معهم لأن الحالة النفسية هي سبب رئيسي في المشكلة دي عاوزة أؤكد مرة تانية إنه علاج الطفل بأنك توديه عند دكتور باطنة نشوف إذا فيه أي أسباب عضوية وبعد كدة نركز على الجانب النفسي أؤكد إنه الأطفال اللي بيتعاملوا بقسوة أو في حد بيضايقهم في المدرسة أو Online ممكن يكون عندهم المشكلة دي بسبب النفسي دة فا الحل مش أبدا أنك تعاقب الطفل إنه عمل على نفسه دة ها يزود مشكلة الـ Stress دة الضغط العصبي فا يزود المشكلة أكتر فا الحل إن الطفل هنا محتاج الكثير من الحب والحنان والاهتمام علشان المشكلة تتحل بعض الأولاد أو يعني الأطفال بس الأولاد بالذات بيكونوا متأخرين في الكلام ودة بيكون مضايقهم أوي ودة بيخليهم يعملوا على نفسهم بالليل فا يعني بالكثير من الحب والصبر والحنان المشكلة ها تتحل 15% من الأطفال اللي عندهم المشكلة دي بتروح لوحدها بالوقت من غير أي أدوية بس مهم أوي يكون صبورين وحبوبين أوي معهم علشان تتحسن المشكلة
أتمنى لكم كل الصحة والسعادة تحياتي

Child Rage نوبات غضب الٰأطفال

نوبات الغضب المدمرة عند الأطفال والمراهقين هي واحدة من أصعب المواقف اللي ممكن نتحط فيها كأهالي كآباء وأمهات ها يحصل إن إحنا نلاقي أولادنا بيصرخوا وبيكسروا حاجات وبيعملوا حاجات عنيفة في البيت إزاي نكون رد فعلنا؟ عندنا خطة من 7 خطوات لازم نلتزم بيها أول حاجة أطفالنا عندهم طاقة هائلة والطاقة دي لازم تطلع في اتجاه صح علشان كدة لازم يعملوا رياضة كل يوم خليهم ينضموا لنادي أو يعملوا رياضة في البيت وتأكدوا إنه الأوضة بتاعتهم والمكان حواليهم يعني أمان لو بيكسروا حاجات أو كدة هاتوا لهم حاجات بلاستيك يأكلوا فيها وكدة وهاتوا لهم كمان حاجة في أوضتهم يضربوها مثلا زي الـ Punching Bag بتاعة الملاكمة أرفضوا تكلموهم وهما عصبيين سيبيهم خالص يعملوا اللي هما عاوزينه بشرط إنهم يكونوا ما بيؤذوش حد لو شتموكوا أو قالوا لكم حاجات تضايقكم ما تردوش عليه سيبوهم خالص لحد ما يخلصوا الموقف اللي هما فيه لأن العنف ها يزود العنف يعني ها تبقى عنيف وتضربه احتمال ينتهي بكم المطاف إن هو يضربك أديهم أوامر أو طلبات محددة وقصيرة وهادية أنت ها تبطل صريخ ها أكلمك ها تفضل تصرخ مش ها أرد عليك روح أوضتك لحد ما تهدئ حاجات كدة يعني أتكلموا بعدين لما الطفل يهدئ أتكلموا اسأل الطفل أول حاجة تسألها له إيه اللي كان مضايقك وخلاك عصبي كدة؟ لازم تعرف ليه علشان عاوزه يعرف ويقول لأنه لما يعرف إيه اللي حصل ها يرد عليك بيعني السبب وتحاولوا تحلوه مع بعض بحيث ما يتكررش التصرف السيئ العصبي دة يبقى لازم هو يفهم إنه كل سبب للعصبية لازم نعرفه ونحاول نتعامل معاه قبل ما نوصل للموقف يعني الموقف المتفجر دة لو كسر حاجة لازم يدفع ثمنها لو كسر التليفزيون مثلا لازم يشتغل حاجة علشان يرجع ثمن التليفزيون سواء في البيت عندكم أو تشوفوا له شغل في مكان قريب لو أتكررت المسألة دي مهما حاولتم تكونوا لطاف معاه وتفهموه إن كدة ما ينفعش يبقى في حاجة صحيا غلط ومحتاج معالج نفسي فا مضطرين ترجعوا ليعني معالج نفسي تشوفوا إيه المشكلة وإذا علاجها محتاج علاج أدوية أو علاج نفسي اسمه سلوكي علاج سلوكي لكن المهم إن إحنا نلتزم بالخطة دي لو التزمنا بيها باستمرار في الأول مش ها تحسوا بفرق لكن لو فضلتم دايما ملتزمين بخطوات الخطة ها يهدئ الطفل ويتعلم إنه مايبقوش عندهم ثورات الغضب المدمرة دي لكم ولهم
أتمنى لكم كل التوفيق تحياتي