المذاكرة الذكية

 

عاوزة أقول لكم 10 نصايح علشان تعرفوا تذاكروا. الفكرة من المذاكرة الناجحة أنك تذاكر بطريقة ذكية، مش بعدد ساعات المذاكرة

النصايح اللي هاقولها لكم بناء على دراسات علمية بالإضافة لخبرتي في المذاكرة

.١-     امشي او اتحرك في المكان أو اعمل أي رياضة في البيت لمدة ٢٠ دقيقة في اليوم. دا هينشط الدورة الدموية ويخليك قادر تستوعب أكتر علشان هيوفر أكسجين أكتر لمخك

٢- كل أكل صحي وامتنع تماما عن الچنك فوود. فاكهة وخضار مش حلويات ودهون. من الأكل الصحي سندوتش فول أحسن من هامبرجر على فكرة

خد أوميجا-٣ في صورة مكسرات بس ما تكترش (ملء كف اليد) أو سمسم أو كبسولات

اشرب مياه أو عصير مخفف كتير

٣- خلي مكان المذاكرة هادي ومرتب ومافيش حاجات تشتت انتباهك زي مجلات وفيديوز وكومبيوتر وموبايل. حط سماعة على ودنك واسمع موسيقى هادية، موتسارت أحسن حاجة

حط كمان زرعة في المكان اللي بتذاكر فيه علشان تنقي لك الجو وتزود الأكسجين، بس بالليل خرج الزرعة في البلكونة علشان بتعمل ثاني .أكسيد كربون. لو تقدر خد شاور واغسل أسنانك والبس حاجة مريحة قبل ما تذاكر

٤- اعرف أنت ذاكرتك من أي نوع سمعية ولا بصرية، وحاول تذاكر بالطريقة الأنسب لذاكرتك. يعني مثلا لو ذاكرتك سمعية سجل لنفسك الكلام واسمعه في الموبايل وأنت ماشي، ممكن تغنيه شوية علشان يبقى مش ممل. لو ذاكرتك بصرية يبقى اتفرج على فيديوز عن موضوع مذاكرتك في يوتيوب أو ارسم رسوم توضيحية على كروت (فلاش كاردز) وعلقها في كل مكان بتروحه بالذات فوق مكتبك وفي الحمام. ممكن تعمل الحاجتين، سمعية وبصرية

٥- لو مدمن إنترنت وشبكات تواصل، دور على جروبس مذاكرة للمواد اللي بتذاكرها وشجعوا بعض في الكلام عن الموضوع اللي بتذاكروه كل يوم. اتناقشوا فيه واكتبوا رأيكم وتعليقاتكم ونكت في الموضوع. هتفتكروا النكت أكتر من المادة آه بس هتفتكروا المادة برده

٦- اتعلم تعمل “نيمونيكس” – دي حاجات بتساعدك على تذكر المعلومات، ودا موضوع طويل محتاج فيديو منفصل. ممكن تدور على الكلمة في جوجل

٧- لو مدمن مواقع غير مفيدة، إباحية مثلا، في أبليكيشنز بتعمل بلوك للمواقع دي

٨- دور في جوجل ويتوتيوب كل يوم على موضوع مفيد لدراستك وشوفه. كل يوم كل يوم واجمعهم في ملف عندك

٩- اتعلم القراءة بهدف. هناك أنواع للقراءة بتركيز حسب هدفك منها، دا موضوع يطول شرحه

١٠ – جرب تذاكر لوحدك أو مع أصحابك في المكتبة إذا ممكن علشان مايبقاش في فرصة تتكلموا بصوت عالي

افتكر: ساعة كل يوم تحضر فيها الرسوم وتشوف فيها فيديوز للمواضيع اللي تهمك طول السنة هتوفر عليك رعب كتير آخر السنة

  • افتكر أن مذاكرة آخر السنة مش بتنفع cramming
  • التطبيق من غير نوم أسوأ حاجة ممكن تعملها في نفسك

مرض سكلر – فقر الدم المنجلي

أورام الرحم الليفية – رسالة هامة لجميع السيدات

اورام الرحم الليفية او بنقول عليها بالانجليزية Myomas Fibroids هى اورام موجودة فى الطبقة العضلية من الرحم  الرحم بيتكون من 3 طبقات طبقة داخلية وطبقة وسطى اللى هى متكونة من عضلة كبيرة وطبقة خارجية يعنى طبقة داخلية هنا بطانة الرحم والعضلة وطبقة خارجية والاورام دى بتحدث فى الطبقة العضلية منها علشان كدة بنقول عليها اورام ليفية لانها بتنمو فى الياف العضلة اللى هى بتكون طبقة الرحم الوسطى دى

هى ليست سرطان هى اورام حميدة ولا تتحول لسرطان.

المشكلة فيها انها بتسبب مشاكل للسيدة بحسب حجمها ومكانها فى الجسم علشان كدة عاوزة اشرحلكم ايه اللى ممكن يحصل منها

مين اللى بتجيله الاورام دى ؟ مين من السيدات ؟

حوالى نصف السيدات عند سن الثلاثين بيكون عندهم الاورام دى وحوالى 90% من السيدات حول سن الخمسين بيكون جالهم الورم دة ورم او اكتر منهم فامعنى كدة ان تقريبا كل السيدات لازم نتاكد ان ماعندهمش المشكلة دى فى مرحلة ما من حياتهم وعاملة لهم مشكلة تانية هما فاكرين انها حاجة تانية خالص

مين اللى عندهم فرصة اكتر ان تنمو الاورام دى عندهم فى الرحم ؟

الحقيقة ان السبب فى وجود الاورام دى ونوموها اكتر هو هرمون الـ Estrogen اللى هو هرمون الانوثة فا معنى كدة ان كل السيدات معرضات للاصابة به لكن فى سيدات عندهم فرصة اكبر شوية مين دول ؟  اللى عندهم عامل وراثى يعنى لو والدتك او اختك او خالتك جالها اورام فى الرحم اورام عضلية فى الرحم يبقى احتمال تصيبك انت ايضا يعنى الاحتمال اعلى ايضا السيدات اللى عندهم مشاكل فى الوزن زيادة الوزن ممكن تعمل مشاكل فى هرمون Estrogen ودة بيزود الاصابة او فرص الاصابة بالاورام الرحمية

يقال ايضا ان الاكل اللى فيه لحوم حمراء كتير بتزود الاصابه به

طيب الاعراض بتاعة الاورام دى بتختلف حسب ايه ؟ حسب حجم الورم وحسب مكانه فى اورام منهم بيكون حجمها مللى مترات صغيرة ودة عمرك ماهتلاحظى منه اى مشاكل  وفى منهم بيكبرو وبيبقو قد البطيخة قد كرة القدم فى الحالة دى طبعا هتلاقى مشاكل وبالذات لما يكون مكانهم يعنى فى موقع مؤثر على وظيفة عضو تانى  تعالو نشوف هنا على الرسمة من Dr. Frank Netter

هنا مثلا الرحم دة صغير اوى فيه ورم فا مش عامل اى مشاكل وموجود على قمة الرحم

الورم دة هنا فى المنتصف وبرضه مش عامل مشكلة هومتوسط الحجم

لكن لاحظو دة كبير وكمان سادد المجرى بتاع قناة فالوب اللى بتوديلنا البويضة للرحم فا معنى كدة انو ها يؤثر على خصوبتك ممكن يكون سادد قنوات فالوب

لاحظى دة متعلق من اعلى الرحم ونازل سادد الرحم فا معنى كدة انه ها يؤثر على حمل لو هو موجود ممكن يحصلك اجهاض وممكن ما يحصلش ان البويضة تنزرع فى جدار الرحم

لاحظى دة كمان سادد الفتحة اللى رايحة على المهبل فا معنى كدة انو ممكن يؤثر على ولادتك لو بتولدى تصبح الولادة غير ممكنة

لاحظى الورم دة خارج خالص من المهبل ومتعلق لبرة طبعا دى كارثة تؤثر على العلاقة الزوجية

لاحظى دة خارج من الطبقة الخارجية للرحم فى داخل تجويف البطن وعامل كرة كبيرة ممكن تعملك بطن والام فى الظهر

لاحظى هنا الورم دة كبير اوى لدرجة انه مخلى الـ Baby مش قادر يكبر وممكن كمان يسد قناة المهبل مايقدرش يتولد ممكن يضغط عليه لحد ما يفعصه خالص

لاحظى دة تحجر وملى مكان الـ Baby المفروض يكبر فا الـ Baby مش قادر يكبر خالص ممكن يموت الـ Baby

لاحظى دة حصلو التواء حول نفسه وعمل غرغرينة  دة ممكن تقتل السيدة

لاحظى دة خرج من جدار البطن فى فتاء وممكن يعمل كارثة تهدد حياتك

طيب تعالو نشوف على اللوحة دى ازاى ممكن الاورام تؤثر عليكى بطريقة كمان لو الورم هنا وكبير اوى هايؤثر على المستقيم ممكن يسد المستقيم فايبقى عندك مشكلة فى امساك مزمن ودة طبعا ممكن يؤثر على القولون بطريقة مزعجة جدا على مر السنين

لو الورم هنا وكبير خالص ممكن يضغط عندك على المثانة البولية فا يجيبلك رغبة فى التبول دائمة وكمان يمكن التهابات فى المثانة البولية

ممكن كمان لما يكبر هنا اوى كدة يعملك بطن كبيرة مهما حاولتى تخسى هاتفضل البطن شكلها مش حلو كمان بيؤثر على العلاقة الزوجية اولا بيعمل الم اثناء الاتصال الجنسى وكمان ممكن يزود الام الظهر لانه ثقل الرحم بيكون متعلق على الظهر بحزام فاثقل الرحم بيخلى الرحم يشد على الظهر فا يجيبلك الام فى الظهر احيانا بتكون قاسية جدا

غير طبعا ان اثناء الدورة الاورام دى مليانة شعيرات دموية فابشفط الدم من جسمك وتخرجه فى الدورة فا تعمل ايه ؟ هاتنزفى كتير اوى سبعة ايام او اكتر وكميات دم مهولة فا دة يجيبلك انيميا اللى هو فقر دم بسبب نقص الحديد سواء انيميا نقص الحديد هى اللى هاتحصلك فا هيحصلك بقى حاجات تانية مشاكل بقى يعنى ارهاق وقصر نفس وعدم قدرة على ممارسة اعمالك الطبيعية ويمكن يؤثر على القلب كل دى مشاكل بسبب حاجة موجودة فى الرحم وانت مش عارفة

تعالى بقى نلخص الاعراض اللى ممكن تحصلك من الاورام الليفية

لو هى صغيرة اوى مللى مترات قد العدساية ممكن مايكونش فى اى اعراض لو ابتدت تكبر حسب مكانها ممكن تعملك نزيف جامد مع الدورة ودورة طويلة تؤدى الى اعراض نقص الحديد يعنى نقص الحديد هايكون عندك مشكلة والانيميا دة فقر الدم دة هايعملك مشاكل تانية يعنى اعراض فقر دم بسبب دورة طويلة

مشاكل فى الامعاء هايكون عندك غازات وتعب ويمكن امساك مزمن وهكذا وتفتكرى انه عندك القولون بس انت عندك اصلا مشكلة فى الرحم

الحاجة التانية ان ممكن يجيبلك مشاكل فى القناة البولية انك تحتاجى تروحى الحمام كتير او التهابات فى القناة البولية وانت عمالة تعالجى الالتهابات لكن مش عارفة ان السبب فى الرحم ولو خلصتى من الرحم المشكلة اللى فيه هاتحلى مشكلة التبول وطبعا البطن الكبيرة الكرش وانت فاكرة انو بالرياضة مثلا وعمالة تخسى والكرش مش راضى ينزل ومكتئبة

آلام مع العلاقة الزوجية ودة يعملك مشاكل مع جوزك لانك مش عاوزة ونافرة من الجنس بينما المشكلة هى ممكن تتحل بسهولة

طيب علشان كدة انا بقول لكل السيدات والبنات اللى هايتجوزوا او فى اول الجواز من فضلكم بالذات فى الدول العربية لازم تروحوا تعملو الكشف عند طبيبة النساء علشان نعرف اذا عندكم الاورام دى ولا لأ ها تقيكم من مشاكل كتير فى العلاقة الزوجية ومع الحمل ومع الرغبة فى الحمل ممكن تتعطل بسببها فا دائما لازم من فضلكم تعملو الاختبار دة هايكون اختبار سهل ومش بيؤثر على عذريتك قبل الجواز

ازاى نشخص الاورام الليفية ؟ الاعراض ممكن تخلى الطبيب يعرف ان عندك مشكلة فى الرحم لكن بنتاكد بتشخيص عن طريق الموجات فوق الصوتية الطبيب بيحط الجهاز على البطن بالذات للسيدات او البنات غير المتزوجات واحيانا بيحتاجوا الاطباء لاستعمال الجهاز عن طريق المهبل فايعنى حسب الظروف علشان يشوفوا اكتر

احيانا لما بنكون شاكين ان فى حاجة محتاجة تتشاف اكتر يعنى نقول احتمال مايكونش ورم عضلى بس ممكن نكون شاكين انو مثلا سرطان فا بيطلبوا عينة من الرحم  من جدار الرحم او بيعملوا منظار بالصبغة يعنى حسب الظروف الدكتور هايقرر معاكى

ما هى العلاجات المتوفرة لاورام الرحم الليفية ؟ احيانا لما يكون الورم صغير ومش عامل مشاكل جبارة الطبيب ها يقولك نستنى شوية وبالذات لو انت فوق الـ 45 او 50 هايقولك يمكن مع اقتراب سن انقطاع الطمث هاينكمش لوحده لانه هايقل الـ Estrogen فى الجسم اللى هو هرمون الانوثة اللى بيكبرو لكن لو انت عندك مشاكل عندنا اختيارين ممكن نعملهم اول اختيار ان احنا ندى ادوية الادوية دى تحتوى على هرمونات وبالذات هرمونات الحمل يعنى Progesterone اللى هى موجودة فى مثلا حبوب منع الحمل فا يمكن الطبيب يديكى حبوب منع الحمل او يديكى الـ IUD اللى هو اللولب اللى بيحتوى على هرمونات هايؤثر فى نموهم فى احتمال تانى انك تكونى مصابة بانيميا شديدة بسبب نقص الحديد اللى سببو الـ Fibroid دة او الورم الليفى دة فايمكن الطبيب يكتبلك حديد اما ادوية يعنى حبوب او حقن حسب الظروف دى مهمة اوى فى اصلاح ما افسده تاثير الورم كمان ممكن يديكى مسكنات للالم لانه ممكن يكون عندك الام فى الظهر او مشاكل فى العلاقة الزوجية فالمسكنات يمكن تفيد

طيب السيدة بقى اللى عندها مشاكل جبارة من الاورام دى مثلا بطنها كبرت جدا او عندها امساك مزمن او مش قادرة تتنفس منهم او علاقتها الزوجية متاثرة وهكذا  او الورم خارج لبرة او مثلا عاوزة تكون حامل والاورام سادة الطريق خالص كل دول لازم نعملهم عمليات جراحية

فى عندنا اختيارين يا اما نشيل الرحم كله ودة طبعا للسيدات اللى مش عايزين يخلفو تانى او للسيدات اللى عايزين يجيبو اطفال تانى هانشيل الاورام بس فا العملية دى اسمها Myomectomy يعنى نشيل بس الاورام الرحمية دى يا اما عن طريق عملية من برة جدار البطن هانفتح فتحة شوية صغيرة زى القيصرية بس صغيرة او بالمنظار فتحات صغيرة جدا على جدار البطن يا اما عن طريق ادخال الجهاز عن طريق المهبل ونعمل العملية

فى اخر تطورات هذه العمليات عملية اسمها Uterine Artery Embolization يعنى احداث جلطات فى الشرايين اللى رايحة للاورام دى الجلطات الصغيرة دى بتخلى الورم ينقص الدم اللى رايحله وبالتالى فى الاخر يموت الورم يعنى من قلة الدم اللى جايلو

بعض السيدات بيلجئوا للطب البديل الطب الصينى البديل الابر الصينية والاعشاب من المعالجين بالبر الصينية بس عاوزة اقولكم ان العلاجات دى بتنفع بس لو الورم صغير اوى لكن لو كبير وعامل مشاكل مش هايحصل منه حاجة العلاج دة ولازم اللجوء لعلاج جراحى

اورام الرحم الليفية تؤثر على نوعية حياتك ممكن تجيبلك مشاكل كتير اوى فى حياتك وانت مش عارفة انها هى السبب علشان كدة بقترح بشدة ان اى سيدة فى سن الانجاب انك تروحى للدكتور وتكشفى للتاكد من خلوك من الاورام دى علشان تكون حياتك يعنى نوعيتها كويسة وتعملى كدة كمان باستمرار يعنى مش مثلا مرة واحدة تقولى لا ما عنديش وممكن يكبروا فجأة فا انت تروحى كل سنة تقريبا للكشف عند طبيب النساء علشان تشوفى ايه الاخبار وتفضلى دائما متطمنة على صحتك

اتمنالك كل الصحة والتوفيق تحياتى

الدودة الدبوسية

الدودة الدبوسية او الدودة الخيطية او الدودة بتاعة قاعدة الحمام او الدودة اللى بتخلينا نهرش فى الـ popo كلها اسماء لنفس الدودة اسمها Enterobius vermicularis  الاسم العلمى او الـ Oxyuris دى دودة بتعيش فى امعاء الانسان وبتسببله مشاكل فى النوم فى اغلب الاحيان هى دى اهم مشكلة انها بتضايقه فى النوم وبتصحيه من النوم هانعرف ازاى دلوقتى هى بتصيب اغلب اطفال المدارس واحيانا بتعملهم مشاكل فى العملية التعليمية علشان بتضايقهم فى النوم فا بيبقوا صاحين تانى يوم ناقصهم نوم المشكلة كمان انها بتصيب الطفل وبتصيب اخواته ويمكن اهله مامته وباباه وكمان الاهل يعدوا ناس تانين والطفل يجيبها من المدرسة او يوديها المدرسة وينشرها كمان فى المدرسة فا المشكلة منتشرة فى البيت وفى المدرسة ويمكن فى بيوت الناس اللى احنا بنزورهم وهكذا فا احنا عايزين نعالج الدودة مش بس فى الطفل كمان فى كل العيلة والمدرسة فى فترة واحدة اللى بيحصل ان الطفل بياخد اكل فيه بيض الدودة او بيشرب من كوباية عليها البيض او بيقعد على تواليت عليه بيض الدودة وتعديه تدخل بقى فى فمه او هو يحط صباعه اللى فيه البيض لما حط ايده على قاعدة التواليت حط صباعه فى بقه وعادته البيضة

البيضة بتروح للامعاء وتفقس وتطلع ديدان صغيرة  Larval اللى هما Baby دودة الـBaby  دودة بيتعلق على الحائط بتاع الامعاء ويعيش بقى حياته ياكل بقى وبتاع ويعنى يكبر لحد اما يتحول لدودة بالغة

الدودة البالغة دى بتعمل ايه ؟ بتخرج بقى تبقى حامل وتخرج تمشى كدة لحد اما تروح على المستقيم والشرج بتاع الطفل وفى الحالة دى الحركة بتاعة الدودة دى هى اللى بتعمله بتجننه بقى بالليل لانها بتروح تعمل كدة بالليل بس بالذات يعنى فا تلاقيها خارجة حوالين الشرج علشان تضع البيوض بتاعتها فا اللى بيحصل ان الطفل بيصحى من النوم يعيط ويحكيلك انو عندوا كابوس ان فى ثعبان ماشى عليه هايقولك كدة غالبا يعنى احيانا كمان تلاقيها راحت على منطقة المهبل عند البنت وعملت التهاب وافرازات مهبلية ونبتدى بقى نشك ان حصل للبنت اعتداء جنسى او حاجة لكن تأكدوا الاول انه مش هى الدودة دى اللى عاملة المشكلة فا بتعمل التهاب بقى والطفل بيكون يعنى مش قادر ينام وعمال يعيط واحيانا كمان من كتر العياط يجيله حاجة اسمها Hyperventilation ان هو ما يبقاش قادر يتنفس من كتر الرعب

طريقة للاهالى ممكن يعملوها علشان يشوفوا اذا الديدان دى موجودة يجيبو كشاف صغير بالليل فى الضلمة والطفل نايم او صاحى بيعيط ويشوفوا بالكشاف كدة حوالين منطقة الشرج هتلاقوا الديدان الصغيرة احتمال يعنى هى حجمها حوالى نصف سنتى لو كبيرة اوى تبقى حجمها سنتى رفيعة اوى ولونها ابيض احتمال برضه ما تلاقوهاش بعض الاهالى بنطلب منهم يجيبوا شريط لاصق ويحطوه على منطقة الشرج عند الطفل وغالبا هايستلموا الدودة عليه ممكن ياخدوها للدكتور يوريهاله يشوفها تحت المايكروسكوب

يبقى الفكرة ان احنا نقدر نشخص المشكلة بان احنا نشوف الدودة ومن الاعراض كمان اللى على الطفل وبنشوف الدودة على الشريط اللاصق دة

طيب الطفل عمال يعيط باليل وانت مش عارفة تعملى ايه مافيش دكتور وعمال يعيط تعملى ايه ؟ اول حاجة يكون عندك دايما كريم اسمه Zinc Oxide او كريم زنك اطلبيه من الصيدلية خليه دائما عندك فى الصيدلية بتاعتك او كريم نيفيا الكريم السميك دة تاخدى منه شوية كريم وتحطيه حوالين منطقة الشرج كدة وجوة شوية بكمية وفيرة علشان الطفل يهدى شوية الالتهاب وكمان الدودة بتتلخبط فيه بتدخل فى الكريم وماتبقاش عارفة تمشى كويس على الجلد فا دة بيقلل الشعور بالحكة اللى بتيجى من زحف الدودة عليه دى هاتهديه وتخليه ينام على طول

لكن كدة الموضوع ما اتحلش احنا محتاجين نعالج الطفل علشان يخلص من الديدان اللى لسة جوة فى الامعاء مش كدة ؟

عند الدكتور او فى الصيدلية اسأليهم على دواء للديدان الدبوسية يستحسن طبعا انك تكونى واخدة تشخيص من الدكتور ان دة فعلا المشكلة اللى عند الطفل هاتدى الطفل الدواء وكل العيلة لازم تاخده كمان لان غالبا لو واحد عنده فى البيت هتلاقى كل العيلة عندها وكمان تعملى ايه اهم حاجة قص اظافر الطفل بأستمرار لان الظوافر الطويلة هى المركز اللى بيتجمع فيه البيض لانه بيهرش فى المؤخرة وبعدين يروح ياكل او ياكل مثلا ظوافره يعض ظوافره فلازم دائما تقصيها كويس وكمان ظوافرك انت الام بالذات الام واى حد بيعتنى بالطفل كمان ترشى بمطهر قاعدة التواليت ولعب الطفل دائما بالذات اللى بيمسكها بصوابعه الصغيرة مثلا الـ Lego وكدة دائما رشى كل يوم قاعدة التواليت وباستمرار او بانتظام الالعاب بتاعته كمان الملابس الداخلية من  فضلكم غيروها كل يوم والفوط وملايات السراير لازم تتغسل بأستمرار على الاقل مرتين فى الاسبوع على درجة حرارة عالية

طيب احنا حلينا المشكلة فى البيت وهتكررى الدواء يا تاخديه مرة واحدة وبعدين بعد اسبوعين هاتكرريه لكى وللطفل ولباقى العيلة كمان فى المدرسة لازم يحصل دة كلو فى نفس الاسبوع كمان يعنى ايه ؟ تبعتوا رسالة للمدرسة انو حصل العدوى دى وانكم بتحبوا تبلغوهم انهم يرشوا قواعد الحمام واللعب بالمطهر دة ويبعتوا رسالة لباقى الاهالى كمان اذا يحبوا يشوفوا اطفالهم اذا عندهم المشكلة انت بتعملى ايه ؟ انت بتساعدى اطفال تانيين انهم ما يعدوش طفلك تانى فا التعاون فى الموضوع دة يعنى روح الفريق كدة مطلوب

المشكلة دى منتشرة اوى واحنا مش عارفين بالظبط ايه تأثيرها على الاطفال على المدى الطويل يعنى احتمال يكون لها تأثير على الزنك فى جسم الطفل فا انا باقترح تدولوا اطعمة غنية الزنك وتقللوا الاطعمة السكريات و الحاجات الـ Junk Food  وكمان يقال انه الثوم لو اكل ثوم كتير بيطرد الدودة فا ثوم فى الاكل احنا بنحب نحط ثوم فى الاكل فى مصر فا دى حاجة كويسة اوى وغسل اليدين بعد الحمام دائما دائما وقبل الاكل اهم حاجة للقضاء على الدودة دى وعدم انتشارها ان احنا نغسل ايدينا دائما قبل الاكل وبعد الحمام وهايكونوا بخير

اتمنالكم كل الصحة تحياتى

الإمساك في الرضّع

التعامل الصحيح مع القمامة

المضادات الحيوية- مقدمة

عاوزة اكلمكم عن استعمال المضادات الحيوية  الخاطئ علشان دة عامل كارثة فى الطب ومسبب مشاكل فى العالم كله بسبب سوء فهم من المرضى ويمكن اهمال وقلة ضمير يمكن من بعض الممارسين  للطب

المضادات الحيوية هى ادوية بنستعملها  لقتل البكتيريا  فى جسمنا البكتيريا الضارة منها  المشكلة ان احنا لما بنستعملها غلط بتعمل كوارث لنا وللناس اللى بنحبهم ويمكن لناس تانيين ما نعرفهمش

الفيديو دة هايوضحلكم طريقة عمل المضادات الحيوية  وامتى ممكن يحصل منها مشكلة بطريقة مبسطة

هابتدى معاكم بشرح بعض الـ Physiology  يعنى وظائف الاعضاء فى جسمنا  احنا عندنا فى جسمنا خطوط دفاعية ضد الحاجات المضرة الغريبة  اللى بتيجى لجسمنا  ايه الخطوط الدفاعية ى ؟

اهمها طبعا جلدنا وبعدها الخلايا البيضاء فى الدم (كرات الدم البيضاء ) وبعدين عندنا بكتيريا صديقة موجودة فى الامعاء وعلى الجلد البكتيريا الصديقة دى لها وظيفتين اساسيتين انها تحمينا من البكتيريا الوحشة ومن الفطريات وانها اللى فى الامعاء بتساعد وظيفة الامعاء وبتنتج كمان فيتامين K اللى هو المسئول عن تنظيم تجلط الدم عندنا فا معنى كدة ان البكتيريا الصديقة دى اى مشكلة فيها بتعملنا كوارث فى باقى جسمنا يعنى مشاكل فطرية اومشاكل فى تجلط الدم ومشاكل فى القولون كمان

خط الدفاع اللى بعدهم هو الكبد لانه بيعمل فلترة للسموم اللى بناخدها من الادوية دى احد وظائفه ويعنى بيكسر الحاجات اللى ناتجة من استعمال ادوية قد تضر باعضائنا فا تخيلو لو الكبد ان وظيفته متاثرة بمرض ما الوظيفة دى بتقل يعنى كدة انو مش قادر يحمينا من السموم دى

طيب على جسمنا كمان على جلدنا وفى بعض الاعضاء زى مثلا عند المهبل فى فطريات عايشة مابتعملش اى مشاكل الا لما مناعتنا تقل فى الحالة دى بتعملنا التهابات فطرية بتعمل اعراض زى الهرش و الريحة الوحشة وهكذا

فاتخيلو معايا ان المضاد الحيوى احنا اخدناه وهو بس بس قادر على قتل بكتيريا وبعض خلايا الجسم ربما لكنه مابيقدرش يقتل الفيروسات مثلا فاتخيلو معايا واحد اخد مضاد حيوى والمضاد دة راح  قتل البكتيريا اللى المفروض تقتلها بس هو مش فاهم وكمان علشان كدة راح كمان قتل البكتيريا الصديقة بتاعتنا اللى هى فى الامعاء وعلى الجلد طيب ايه اللى هايحصل من بعد كدة كنتيجة لما البكتيريا الصديقة تموت هايتاثر طبعا وظيفة القولون عندنا ويمكن يحصل التهابات فطرية لان الفطريات بنقول عليها انتهازية يعنى عدوى انتهازية جاية من الفطريات دى خلت احنا عندنا التهابات فطرية بسبب ان احنا استعملنا المضادات الحيوية فى حاجة تانية كمان المضاد الحيوي بعد استعماله بنلاحظ  انو عدد كرات الدم البيضاء بتقل فا معنى كدة ان مناعتنا هتقل كمان اكتر لحاجات بتقتلها خلايا الدم البيضاء زى ايه ؟  هى مسئولة عن عمل الاجسام المضادة ضد الفيروسات فا انت عمال تاخد مضادات حيوية عمال على بطال بتضعف جهازك المناعى بكل خطوطه تقريبا كمان الكبد بيبقى مرهق من كتر السموم اللى عمال تاخدها دى كل جهازك المناعى عمال يضعف وبالتالى فرصة الفيروسات انها تزيد فى جسمك تعمل  تعيا كتير بقى تجيلك Flu كتير انفلونزا  كتير والالتهابات الفطرية تحصل كتير تلاقى مثلا عندك ريحة وحشة  او قشرة او هرش اوالتهابات فطرية عموما

كمان عندنا مشكلة تانية بتحصل من سوء استخدام المضادات الحيوية لو انت مش عارف النوع الصح عندك يعنى لو انت عندك بكتيريا ( أ ) محتاجة مضاد حيوى مناسب لبكتيريا ( أ ) لو استعملت مضاد حيوى مناسب لبكتيريا ( ب ) مش هايقتلها فا مش كل المضادات الحيوية بتنفع لكل البكتيريا دى حاجة مهمة فامش تروح تشتريها انت كدة بنفسك غلط كمان لما ماتخدش المضاد الحيوى فى ميعاده بيحصل الاتى انت بتروح بالمضاد الحيوى مثلا الساعة 12 تقتل به الصف الاول من البكتيريا  دى وبعدين المفروض مثلا تاخده الساعة 6 لو هو كل  6 ساعات وانت اتأخرت فا تقوم البكتيريا دى تتكاثر تيجى انت تاخدها فى ميعاد مختلف متاخر شوية فاتقتل برضه الصف دة تانى الاولانى دة وتفضل البكتيريا دى موجودة ولما توقف انت او ماتكملش الجرعة مثلا 5 ايام كاملة  تقول لا انا حاسس بعد 3 ايام كويس فا هابطله دى هاتخلى البكتيريا اللى لسة ما ماتتش تعمل نوع جديد من البكتيريا اسمه الـ Super Bug بكتيريا مضادة للمضادات الحيوية الـ Super Bug دى قاتلة بتخرج منك ممكن تقتلك انت فى المستقبل لان احنا مش لاقيين دواء يقتلها او ممكن تقتل اطفالك او تخرج من جسمك تروح مثلا فى المجارى وتروح فى الزراعة وتتصدر للعالم حصلت فى المانيا من سنة او اثنين حوالى 30 شخص ماتو بسبب بكتيريا مقاومة للمضادات الحيوية جاتلهم من مصر كانت جاية فى الحلبة فاتخيلو ممكن نعمل ايه بسوء استخدام المضادات الحيوية يعنى سلاح فتاك دة

فى حاجة تانية عايزة اقولكم عليها مسالة البكتيريا لو مش موجودة خالص وانت عمال تاخد مضادات حيوية للفيروسات الفايروس مش بيموت هو اللى بيحصل انك انت عمال تضعف مناعتك خطوط المناعة دى والفيروس عمال يتكاثر لانهم دول اللى مثلا خلايا الدم البيضاء اللى بتساعد انها تقتله مضعفة من المضاد الحيوى اللى انت عمال تاخده فا انت عمال تضعف نفسك ضد الفيروسات وعمال تصاب بانفلونزا طول الوقت ومشاكل فى القولون ومشاكل نزيف من مناخيرك مثلا  بسبب قلة فايتامين K وكل الحاجات دى انت عمال تاخد العامل المسبب لها اللى  هو المضاد الحيوى  وما بتقتلش الفيروس يعنى بتضيع فلوسك وصحتك وبتزود الفيروسات عليك وانت مش عارف

يبقى مهم جدا تعرف ان المضادات الحيوية ناخدها فى ميعاد صح ونكمل الجرعة كاملة لازم ولا نكررها ومانخدش اى حاجة كدة يعنى مش كل المضادات تنفع لكل البكتريا كمان الكريمات غير النقط غير الكبسولات يعنى فى استعمالات معينة للكريم غير النقط غير الكبسولات ماينفعش تاخد واحد تبدل مكانه

امتى ممنوع على الاطلاق انك تستعمل مضادات حيوية ؟  مع الاطفال من غير اشراف طبى لانه بياثر على نموهم وبالذات نوم المخ والسمع احيانا  الحوامل ممنوع يستعملوا مضادات حيوية لانها قد تسبب تشوهات جنينية لازم اشراف طبى ايضا ممنوع تستعمله لو انت عندك انفلوانزا لانها مابتعملش حاجة بالعكس دى ممكن تكون سبب فى اضعاف مناعتك اكتر وبالتالى وفاتك ممنوع مع التهاب الجيوب الانفية فى ناس كتير فاهمين ان انا عندى التهاب جيوب انفية يبقى لازم اخد مضادات حيبوية  لا حوالى 90% من التهابات الجيوب الانفية سببها فيروس فامبيعملش حاجة المضاد الحيوى  لو عندك التهاب فى العين فيروسى او فى الاذن الخارجية برضه ماينفعش تاخد مضادات حيوية كدة من غير اشراف طبى لازم الاول نعرف ان الالتهاب اذا بكتيرى او لا ونديك على اساسه ولو عندك اعراض حساسية حصلت منه يعنى مثلا قيئ اسهال اغماء رشح طفح وهكذا الحالة دى لازم تتصل بالطبيب وتوقف المضاد الحيوى

خدو بالكم من استعمال المضادات الحيوية علشان  صحتكم وصحة اولادكم والعالم كله كمان

تحياتى  شكرا لكم

سن انقطاع الحيض (سن اليأس)

Menopause  هو سن توقف الطمث هى فترة من حياة السيدة حول سن الخمسين تبتدى الدورة الشهرية تتغيب عنها واذا تغيبت لمدة 12 شهر متتالية نقول عليها دخلت فى سن انقطاع الطمث هى بتحدث طبيعيا حول سن الخمسين لكن ممكن تحدث قبل كدة قبل سن الاربعين بنقول عليه سن انقطاع الطمث مبكر وممكن يكون له سبب وراثى ممكن يكون مرض ما ممكن تكون السيدة تعرضت لاشعاع علاجى اوقف وظيفة المبايض عندها او ازالت الرحم والمبايض نتيجة سبب ما يبقى ممكن سن انقطاع الطمث دة يحدث للسيدة فجأة بعد مرض ما بس بنقول عليه دة مبكر او مع سن طبيعى حول سن الخمسين فى الحالتين ها تعانى من مشكلة اعراض معينة تحدث نتيجة نقص هرمون الـ Estrogen اللى هو هرمون الانوثة يبقى المشكلة مع سن انقطاع الطمث هو ان غابت وظيفة المبيض الاساسية اللى هى انتاج الـ Estrogen وكمان طبعا الوظيفة الثانية المهمة جدا اللى هى عمل البويضات فا انت غير قادرة على الانجاب مرة اخرى اللى بيحصل انه المبيض بينكمش وبالتالى تقل قدرته على اداء وظائفه

المشاكل الصحية المتعلقة بسن انقطاع الطمث تكون فى ثلاثة خطوط عريضة المشاكل العضوية اللى بتحصل يعنى انت حاسة اعراض ظاهرة عليكى والمشاكل النفسية متضايقة او مكتئبة او عندك رغبة اقل فى ممارسة العلاقة الحميمة وايضا المضاعفات اللى ممكن تحصل بسبب سن انقطاع الطمث

تعالوا نتكلم الاول فى الاعراض اول الاعراض اول اللى هاتبتدى تلاحظيها انه الدورة الشهرية ابتدت تتلخبط يعنى بقت تيجى مثلا مرتين فى الشهر بدل مرة او تغيب ثلاثة شهور او الكمية اكثر بكتير او اقل بكتير لخبطة كدة غريبة

العلامة الثانية المهمة انك تلاحظى حاجة اسمها Hot Flashes يعنى تحسى انك حرانة فجأة كدة هبات حرارية على جسمك وجلدك احمر وعرقانة وبتيجى ساعات بالليل بنقول عليها Nights Sweats عرق او تعرق ليلى هايقومك من النوم وطبعا دة ها يسببلك ارق وممكن يضايقك فى شغلك تانى يوم ممكن برضه تلاحظى مشاكل فى المهبل يعنى يكون اكثر جفافا من السابق او فى حرقان او حكة او الم اثناء العلاقة الحميمة كمان ممكن تلاقى مشاكل فى سلس البول يعنى تلاقى انه فقدتى شوية بول مع الكحة او العطس الحقيقة ان دة سببه انه الاعضاء الداخلية فى الجسم بتهبط شوية لتحت مع تقدم السن وبالتالى بتضغط على قناة مجرى البول اللى بتخرج البول لتحت فا كل ما تضغطى انت مثلا بالكحة او العطس يزيد الضغط عليها وتسربى نقط من البول

فى مشكلة ثانية ممكن تحصل انك وزنك هتلاقيه بيزيد شوية- ليه؟ الجسم بيحاول يخزن هرمونات الانوثة فى مكان ما ودة ممكن يتعمل فى الخلايا الدهنية فا هتلاقى ان دهون البطن ابتدت تتجمع جوه البطن دى ما بتتحلش بشفط الدهون على فكرة وهتلاقى كدة ظهر بطن وجناب وحاجات جديدة ما اتعودتيش عليها فى جسمك

فى حاجة ثانية ممكن تلاحظيها انه يمكن تلاحظى زيادة فى الشعر فى منطقة الذقن وحوالين منطقة الشنب ويمكن تلاحظى حبوب جديدة ظهرت على الوجه دة بسبب اختلال الهرمونات بحيث هرمونات الذكورة بيبان اثرها اكتر عليكى احنا برضه السيدات عندنا هرمونات ذكورة

هتلاحظى برضه انك عصبية شوية زيادة عن اللزوم وعاطفية اوى بتعيطى فجأة من غير سبب او صبرك اقل من زمان وتركيزك كمان فى القراءة اقل بكتير عن زمان قد تلاحظى ايضا مشاكل نفسية زى انك مصابة بأكتئاب يعنى قوى او ضعيف المهم انك تحسى انك زعلانة او فى حاجة مضليقاكى طول الوقت فى كمان حاجة انك بتفقدى الرغبة الجنسية احيانا مش فى كل السيدات لكن دى برضه اسباب نفسية ممكن تسببلك مشاكل فى حياتك الزوجية

المضاعفات اللى ممكن تحصل مع سن اليأس او سن انقطاع الطمث كما احب ان اسميه هى متعلقة بان احنا بتقل كثافة العظام عندنا فا هشاشة العظام من اهم المشاكل اللى ممكن نواجهها ودى لازم نتعامل معاها طبيا الحاجة الثانية اننا بنعانى من مشاكل فى الجهاز الدورى اللى هو القلب والاوعية الدموية احنا معرضات اكثر للاصابة بمشاكل فى القلب و فى الاوعية الدموية عموما زى امراض الضغط والجلطة اوالسكتة الدماغية دى كلها ممكن تزيد فرصتنا فيها بعد سن انقطاع الطمث

ازاى نعرف ان السيدة فى هذا السن ؟ مافيش تحليل دم ممكن نعمله احنا بنخلى السيدة تقولنا على اللاعراض واحنا نتخيل او نتوقع ان هى دى اعراض سن انطاع الطمث يعنى ما تقدريش تعملى تحليل دم علشان تعرفى اذا كانت الهرمونات عندك كويسة ولا لأ لانه هى عمالة بتختلف كل يوم حاجة عن التانية فا مش بنقدر نميزه من تحليل دم

علاج سن انقطاع الطمث بنتكلم فى خطين الحقيقة انا بجدهم متكاملين والمفروض تنظرى فيهم هما الاثنين الاول هو الخط الطبى انك تروحى عند الطبيب وتاخدى حاجة تعوضلك الهرمونات زى فى سيدات بياخدوا هرمونات بنوع اللى بنقول عليها هرمون الـ Replacement Therapy (HRT) لكن مش كل السيدات مسموح لهم ياخدوا العلاج دة بسبب تاريخهم المرضى يعنى لو عندك تاريخ فى الاسرة الاصابة بالسرطان او امراض معينة مش مسموح ان انت تاخدى الهرمونات دى فى سيدات بياخدوا حاجة اسمها Oral Contraceptive Pills او يعنى Birth Control Pills او يعنى حبوب منع الحمل الحبوب دى فيها هرمونات برضه فا ممكن تكون بتعوض الهرمونات المفقودة بس مش كل السيدات بيكونوا سعيدات بالنتيجة

بعض السيدات بتكتفوا باستعمال كريمات تحتوى على هرمون الـ Estrogen ويتعملوه حوالين منطقة المهبل وممكن دى فكرة كويسة والسيدات اللى بيعانوا من مشاكل نفسية ممكن يستعملوا مضادات اكتئاب والسيدات اللى بيعانوا من سلس البول فى عندنا اقتراح اننا نستعمل عند الدكتور حقن اسمها حقن Collagen الطبيب بيدخل فى منطقة قرب المثانة البولية ويحقن Collagen اللى بيحصل انه المنطقة دى بتبقى اضيق شوية فا تسرب البول بيقل يعنى مع استعمال الحقن دى

العلاجات البديلة اللى ممكن نستعملها بنفسنا هى استعمال اى حاجة تحتوى على هرمونات Estrogen او هرمونات الانوثة طبيعية من مصادر نباتية زى ايه ؟

اى حاجة فيها صويا زى كبسولات فيها صويا يعنى او اكل زى فول الصويا او الحمص او العدس كل دى تحتوى على Estrogen او اسمهم Isoflavones  دول هرمونات انوثة طبيعية بس بكمية اقل بكتير من اللى بيديهالك الدكتور فى الدواء بعض السيدات ممكن يكون عندهم مشاكل صحية سابقة تستدعى انك تتكلمى مع طبيبك الاول قبل استعمال  الحاجات دى بكميات كبيرة يعنى لو انت بتروحى للدكتور علشان دكتور النساء علشان تشوفى اعراض الطمث او انقطاعه كلميه برضه عن اى حاجة طبيعية بتاخديها اذكريها للدكتور

المشكلة الثانية ان احنا متعرضين اكثر للاصابة بمشاكل فى العظام علشان كدة مهم اوى ان انت تاخدى فيتامين D3 بتاع الشمس او تقعدى فى الشمس وتاخدى منتجات البان او كالسيم وفيتامين D3 فى كبسولة واحدة او حباية واحدة ممكن برضه بعض السيدات بيقولوا انا بحب اخد فيتامينات متعددة برضه دى فكرة كويسة الحاجة الثالثة المهمة هى فيتامين E فيتامين E دة كويس اوى علشان بيخليكى جلدك طرى اكتر يعنى ممكن تحطيه على جلدك وممكن تاخديه كبسولات وهو الحقيقة موجود كمان فى كبسولات الاوميجا 3 فا انت لو اخدى كبسولات اوميجا 3 فا دى حاجة كويسة يعنى محتوية على فيتامين E كمان وصديقك بقى كل الزيوت المحتوية على فيتامين E من الطبيعة اللى هى من اصول نباتية يعنى زيت الزيتون مثلا والمكسرات والحبوب اللى هى زى السمسم كلها تحتوى على فيتامين E ودة كويس اوى بس خدى بالك من السعرات طبعا لو كلتى جنزبيل او زنجبيل دة كويس للدورة الدموية وبينشط عندك نشاط كل الانسجة فا دى حاجة كويسة علشان تحسنى من انتاج الهرمونات عندك

فى حاجات بقى زى مثلا عشبة اسمها Black Cohosh او Wild Yam اليام البرى بعض السيدات سعيدات بالنتيجة بيستعملوه كا كريم او كبسولات جربيه يمكن يعجبك النتيجة

بعض السيدات بيقولوا انا شايفة تأثير الابر الصينية كويس اوى الابر الصينية بتشتغل على مستويات تحفيذ انتاج هرمونات وفى سيدات بيقولوا لما بستعمل الابر الصينية مع الرياضة بشوف نتيجة ممتازة

بنقول بقى اسلوب الحياة الصحى اللى هو انك تعملى رياضة وتاكلى كويس كل الحاجات الصحية فاكهة وخضار وزيوت نباتية كل دة ممتاز جدا لتحفيز انتاج الـ Estrogen عندك بطريقة طبيعية توقفى عن التدخين لان دة هاينقذ قلبك من مضاعفات مش كويسة ممكن تجربى تمارين اسمها كيجل انك تعملى انقباض للعضلة اللى فى قاع الحوض بأستمرار هاقوللكم عنها فى فيديو تانى ازاى بنعملها بس دى يعنى مقدمة لها

فى اليابان لاقوا ان السيدات اليابانيات بيعانوا اقل بكتير من اعراض سن انقطاع الطمث عن السيدات الغربيات واستنتجوا انه سبب كدة قد يكون فى انه اكلهم بيحتوى على حاجات طبيعية وصويا ونباتية اكتر وكمان بيتحركوا اكتر وان الثقافة اليابانية تحترم جدا دور المرأة حتى بعد التوقف عن الانجاب يعنى هى مش وظيفتها بس انها بتخلف لا دى عندها وظائف تانية كتير والثقافة اليابانية بتحترم دة جدا فا الحالة النفسية المتعلقة بفكرة انا غير قادرة على الانجاب اللى بتديهالنا ثقافتنا ممكن تكون سبب عندك كبير للأكتئاب الحياة بعد سن انطاع الطمث هى مرحلة جديدة ممكن نعمل منها حاجات كتير نتعلم تعليم جديد نفتح شركة جديدة مشروع جديد الحياة جميلة واحنا مش موجودين بس علشان ننجب اطفال عندنا وظائف اخرى كتير فى الحياة

استمتعى بحياتك وبكل سن بتمرى بيه واتمنى لك كل الصحة والسعادة تحياتى

حديث البلوغ مع طفلتك

اطفالنا بيكبروا بسرعة بين يوم وليلة وبنلاقيهم تحولوا من اطفال لبالغين الفيديو دة عن تحضير بنتك لمرحلة البلوغ اهم حاجة تعرفيها ان الاستعداد لمرحلة البلوغ يبدأ من سن صغير جدا يمكن من 4 سنين تبتدى تقولى لبنتك ان فى فروق بين البنت والولد تشريحيا فى شكلهم وبالتدريج بقى ايه تخدى العملية كل فترة تتكلمى مع الطفلة عن حاجات معينة مثلا توريها صور بنات وصور ولاد وبعدين اما تكبر شوية اما يبقى عندها 7-8 سنين تبتدى تكلميها عن امكانية حدوث الدورة الشهرية لازم تكلميها عن ان الدورة الشهرية هاتحصل قبل ما تحصلها ليه ؟  لأن ممكن الدورة لو حصلت وهى مش عارفة عنها حاجة تجيبلها صدمة نفسية كبيرة هى فجأة لاقيت دم فا مش عارفة حصل ايه وهاتحس بالرعب والخوف وتكون مكسوفة منك احسن تعاقبيها او خايفة منك فامهم اوى انك تفهمى طفلتك انك عارفة هايحصل ايه وتخليها هى مستعدة بحيث تكون جاهزة واعصابها هادئة خليكى جادة فى الحديث عن الموضوع خليكى صادقة ودقيقة واستعملى تعبيرات علمية ومحترمة لجسمها خليكى متفتحة يعنى ماتقوليلهاش مثلا ان الحاجات دى عيب هى دة جسمها ودى وظيفته ولازم تعرف عنها خليكى عملية كمان اول ما تبتدى تلاحظى مثلا انه الثدى ابتدى يكبر دى علامة ان البلوغ هايحصل قريب وعلامة كمان انك لازم تروحى تشترى لها ملابس داخلية جديدة

مرحلة شراء الملابس والفوط الصحية والحاجات دى ممكن تعمليها فى صورة هدية انك تجيبيلها هدية معاكى باسكت كدة او شنطة وفيها الحاجات اللى ممكن تساعدها انها تدخل فى مرحلة النضوج اللى هى يعنى البلوغ ونبتدى بقى ندخل فى المراهقة وكدة دايما فكريها كل يوم انك بتحبيها وان انت بتشجعيها على تقبل شكلها الجديد لانها هاتكون حاسة دايما انها مختلفة عن صحباتها ساعات يمكن يكون فى فرق لانه البلوغ بيحصل فى اعمار مختلفة عند البنات فا هتلاقى مثلا هى كبرت بسرعة اكتر من صحباتها او العكس فا هتلاقيها دايما غير واثقة فى شكلها فا انت دايما تأكدى لها ان هى على شكلها دة جميلة وهتبقى سيدة او آنسة صغيرة حلوة وهكذا كمان فهميها انه التغيرات الهرمونية اللى بتحصل دى بتحصل فى كل السيدات او فى كل البنات علشان يبقى لهم وظيفة الحمل والولادة اللى هاتحصل فى المستقبل

اوجدى يعنى Balance يعنى اتزان بين وظيفتك كأم وصديقة يعنى ماتكونيش صديقة يعنى متباسطة معاها اوى بحيث تفقد الشعور بان انت ليكى سلطة معينة وفى نفس الوقت ما تتدخليش اوى فى امورها وتتصلتى عليها بحيث تكرهيها او تبعديها عن الثقة فيكى او تخليها مش عاوزة تكلمك او عاوزة تخبى عنك حاجات

اتكلموا مع بعض فى مناسبات منتظمة يعنى خدى دايما الفرصة ان انت مثلا لو انت قاعدة معاها فى العربية ولوحدكم اتكلموا فى حاجات عن مثلا الحياة والحب والاغانى والافلام وكدة او لو انت مكسوفة تتكلمى فى الموضوع اشترى لها كتاب ممكن مثلا زى كتب زى كتب التشريح كبداية تتكلمى فيها مثلا دة اسمه Human Body فى كلام عن جسم الانسان وبيحصل ازاى الحمل وتطور السيدة والرجل وهكذا

طيب جهزى فيها الاحساس بأنها انسانة مستقلة يعنى لها مشاكلها تقدر تحلها بالتعاون معاكى او لوحدها جهزى فيها الاحساس بأنها بتكبر وبتنفصل عنكم كأنسانة مستقلة بذاتها عززى فيها الاحساس بأنها واثقة فى نفسها ما تقوللهاش انتى اقل من الولاد او انت ضعيفة او الحاجات دى لا خليها فخورة بنفسها كأنسانة قائمة بذاتها خلى بينك وبيها نوع من العلاقة اللى فيها نوع من الممارسات المعينة اللى هى متعودة عليها بنقول عليها Ritual زى تقاليد بينك وبينها انك مثلا تخرجوا مع بعض تروحوا تشتروا حاجات للبنات يعنى مثلا تروحوا تشتروا حمالات الصدر جديدة او تروحوا تشتروا لبس وتفهميها ايه اللبس المناسب لها او لو هى عايزة تتعلم تحط Makeup الاول فهميها انه فيه كيماويات كتير ويعنى مش لازم كل اللى بيعملوه البنات هى تعمله وعلميها يمكن مثلا تعمل منتجات تجميل طبيعية لنفسها فهميها ان الجمال الاصلى بيجى بالرياضة وبالاكل الصحى وبعدين اطبخوا مع بعض اكل صحى يعنى اتعودوا انكم مثلا تطبخى يوم الجمعة مع بعض مثلا حاجة صحية وتفهميها ايه مكونات الاكل الصحى فهميها ان الاكل الكويس بينعكس على جمالها وعلى شكلها وفهميها برضه انها لازم تاخد اطعمة معينة مثلا زى اوميجا 3 مفيد لصحتها

دخول الطفلة فى مرحلة البلوغ له جوانب معينة لازم نركز عليها مش بس الجوانب الجسدية يعنى هما فيه 3 جوانب رئيسة فى جوانب جسيدة وفى جوانب عاطفية وجوانب اجتماعية

تعالى نشوف الجوانب الجسدية البنت جسمها بيتغير تحت تأثير الهرمونات فا انت تقدرى توضحي لها التغيرات الللى هاتحصل فى جسمها بأنك توريها مثلا فى كتاب عن التغيرات اللى بتحصل على جسم الانثى التوقيت انك تختارى تكلميها امتى حرج جدا ولازم محتاج يعنى فن يعنى انت يعنى تقعدى مثلا تكلميها تلاقيها اتكسفت او مش عاوزة تتكلم خلاص التزمى بمشاعرها او احترميها فى انها مش عاوزة تتكلم وانتهزى فرصة ثانية كمان لو انت مكسوفة ممكن تديلها كتاب وتقوليلها اقريه وتقريه انت كمان الام وتتناقشوا فيه بعدين لو انت مكسوفة ممكن كمان تتكلموا وانتوا بتتفرجوا على التلفزيون او قاعدين فى العربية مافيش تواصل بالعينين تتكلموا عن حاجة انتم شايفنها مثلا شوفى البنت دى كبرت ازاى وبقت آنسة وطلعلها صدر وجناب وخلاص بقى هاتبقى ماما قريب مثلا

عززى فى طفلتك المشلاعر الانثاوية بانها فخورة بنفسها كانثى هى مش جريمة ولا هى عيب ولا جسمها عار هى انثى ومساوية للرجل فى كونها انسانة

لا تشعريها بانها مخطئة لانها بتحتفل بجسمها او تحتفل بشبابها خليها تحتفل وتسعد لو حابة ترقص ترقص مافيهاش حاجة التغيرات الجسمانية فى جسم البنت هاتحسسها لفترة انها مش واثقة فى نفسها لما تشوف البنات حواليها جسمهم بيتغير بطريقة مختلفة بدرجات مختلفة ممكن تحس بأنعدام الثقة فى نفسها لان الاعمار دى بتتغير ها ؟ فا انتى تبتدى تتكلمى معاها عن الدورة الشهرية مثلا من سن 9 سنين وتلتزمى بانك دائما تكلميها عن التغيرات اللى هاتحصل دى طول ما هى داخلة فى سنوات المراهقة لحد مثلا سن 16 او 18 تفضلى تتكلمى معاها عن التغيرات دى فا بالتدريج كل ماتنتهزى فرصة تكلميها فيها وتلاقيها هى متقبلة استمرى فى الكلام

مهم ايضا تعرف منك عن العلاقة الجنسية وكيف يحدث الحمل علشان ماتعرفهاش من مصادر برة تكون سيئة او خاطئة المعلومات اللى انت هاتديهالها عن الجنس هاتفضل معاها طول عمرها فا فهميها بطريقة ايجابية انه الجنس تعبير عن الحب بين الزوجين وانها حاجة مش عيب علشان تبقى علاقتها بجوزها كويسة مهم كمان ما تخوفيهاش من موضوع غشاء البكارة لان فى بعض الناس بيفهموا اولادهم انه حتى الرياضة بتأثر على غشاء البكارة وبالتالى بتخلى البنت تفقد يعنى الرغبة فى انها تتحرك او تعمل رياضة مع ان دى حاجة كويسة خوفا على غشاء البكارة وبالتالى كمان فى ناس بيروحوا يمارسوا مثلا الجنس الشرجى علشان يحافظوا على غشاء البكارة مع ان دة غلط خالص وخطر يبقى من الافضل انك تفهمى بنتك عن الامراض الجنسية اللى بتنتقل بالجنس احسن ما تخوفيها من حاجة يعنى قد يتحايلوا عليها او مالهاش اى معنى فى مدلول حياتها لانه من الاحوط انها تخاف من العدوى الجنسية حتى اللى بتنتقل بالتقبيل عن انها تخاف من تأثير اى حاجة على غشاء البكارة وتجيبلها وساوس عن حاجة مش موجودة يعنى هو طبعا موجود لكن مسألة انه بيتأثر بسهولة كدة من الحركة دة مش صحيح

عندنا بقى المشكلة الثانية فى مسألة تطور جسمها هتلاقيها بتقع منها حاجات كتير يعنى بتتحرك حركات ساعات غريبة كدة دة كلو لان جسمها بيكبر اكبر من قدرتها هى على استيعاب النمو دة فا ماتغضبيش لو هى وقعت حاجات او كانت بتطبخ ويعنى وقعت الحلة وبتاع فا انت خليكى حنونة معاها وتفهمى ان جسمها بيتغير وهى مش قادرة فعلا لسه تستوعب الـ Dimensions يعنى المقايس الجديدة لجسمها ماتكونيش عصبية معاها

الجوانب العاطفية من مرحلة البلوغ عند البنات هتلاقى فيها ان الطفلة مزاجها بيتغير 180 درجة فى عدة دقائق ساعات تبقى مبسوطة اوى وفجأة  تبقى زعلانة اوى وفى حاجات زعلتها انت مش شايفاها تزعل خالص وتلاقيها حساسة زيادة عن اللزوم وهكذا فا التغيرات دى بنقول عليها Mood Swings هتلاقيها واضحة اوى فى السن دة بسبب الهرمونات استحمليها وتقبليها واحتضنيها وحبيها هى دة اكتر حاجة محتاجاها

احيانا قد يقعوا فى مشاكل نفسية زى الاكتأب او مشاكل مثلا امراض فيما يتعلق مثلا بالشهية خدى بالك دائما راقبى ايه الموضوع علشان تعرفى اذا فى حاجة محتاجة تدخل منك او تدخل طبى مسألة الهوية احساسها بكونها انثى وتطورها من طفلة لأمرأة هى دى المرحلة اللى بتبتدى فيها خليها تفخر بكونها انثى وبوظيفتها فى المجتمع وانها هاتكون نصف المجتمع هاتكون مدرسة او طبيبة او ممرضة او انسانة عاملة فى المجتمع وممكن هاتكون ام يعنى كل الحاجات الوظائف اللى بتقوم بيها السيدة او الانسانة او الانثى مهم جدا للمجتمع فهميها وظائف الانثى دى كمان اديها الكثير من الحب احضنيها كتير وبوسيها كتير هى محتاجة الكثير من الحب فى المرحلة دى هتلاقيها كمان ابتدت تعلق صور مثلا نجوم السينما او متعلقة عاطفيا بحد لما تكتشفى مثلا انها بتكلم حد معاها فى المدرسة بطريقة معينة او ابن الجيران او بتاع ماتكونيش عصبية دة طبيعى امال هى هاتعمل ايه هاتحب طبعا فا انت احسنلك انها تحب قدامك بدل ما تعمل حاجات عجيبة من وراكى

مهم كمان انك تفهميها انها قادرة على حل مشاكلها بنفسها يعنى لما تحصل مشكلة تساليها رأيها بدل ما توبخيها وتعنفيها تقوليلها رأيها ونحلها مع بعض ازاى المهم تحلوا المشاكل مع بعض عند شعورك بأنك مش قادرة تفهمى طفلتك كويس وحاسة انك محتاجة مساعدة ممكن تقرأى كتب او تروحى لمعالج نفسى او مدرب يساعدك على فهم اطفالك اكثر ممكن تقرى كتب دة لاقيته مثلا فى معرض البحرين للكتاب كان جميل اوى (المراهقون المزعجون) كتاب ممتاز ممكن تقرأى فيه ازاى ممكن تتعاملى مع اولادك والشرح فيه بسيط والصور لطيفة اوى يعنى اقرأى اكثر فى الموضوع وانت هاتعرفى اكثر

الجوانب الاجتماعية من مرحلة البوغ تقتدى مننا اننا نفهن الطفل او الطفلة انها عضو فى مجتمع وفى قوانين للمجتمع فا المفروض ان انت تفهميها هو مطلوب منها ايه ؟ ايه هما القوانين فى البيت والقوانين للمجتمع اللى انت متوقعاها منها بحيث ماتبقاش عايشة على طول فى ضغط عصبى مش عارفة اذا كنتى هاتغضبى منها علشان هى عملت كدة ولا لا يعنى لو تقولى مثلا الاصحاب مسموح يتصلوا لحد الساعة 8 بالليل بالتليفون بعد كدة ممنوع طبعا لوحصل ان حد اتصل بعد 8 باليل مش تعمليها بقى مأساه طبعا تفهميها ان دة غلط ودة ازعاج وكدة وتفهميها ان دة ماينفعش تانى فا هى تبقى عارفة القوانين عارفة انها مش هاتغضبك وفى نفس الوقت كمان مش خايفة منك مش خايفة من غضبك بل خايفة على مشاعرك او بتحبك وبتحافظ عليها المهم اوى مسألة احترامها وتعليمها احترام القوانين من غير ارهاب طبعا الضرب مرفوض تماما وحدف الحاجات وبتاع مرفوضة الحاجات دى كلها

من الافضل ان البنت تتعامل مع اولاد لانها لو يعنى اتربت منفصلة خالص عن الاولاد لا فى المدرسة ولا فى النادى ولا فى البيت ولا فى الشارع هتلاقيها مش قادرة تتعامل معاهم فى المستقبل فا لما تكبر وتروح الشغل مثلا او الجامعة هاتبقى مش عارفة تتعامل معاهم صح فا مهم ان احنا نمرن الاطفال فى مرحلة البلوغ على التعامل بطريقة صحية مع الجنس الاخر يعنى مثلا لما يبقوا فى النادى تحت اشرافك الولاد والبنات بيلعبوا مع بعض او بيمارسوا رياضة مع بعض مافيهاش حاجة انهم يتعلموا ان الجنس الاخر دة مش Aliens مش جاى من الفضاء دول ناس زينا زيهم بنتكلم معاهم بطريقة عادية محترمة وكل حاجة

فى حاجة كمان هاتتعرضى لها من تأثير المجتمع هو تأثير الاصدقاء على الاطفال يعنى الاصدقاء ممكن يعرفوهم حاجات سيئة مثلا يتفرجوا على افلام سيئة او يقولوا كلام مش كويس فى المدرسة وفى كمان تأثير من التليفزيون من برة يعنى لما بيشوفوا حاجات مؤثرات خارجية مهم تكونى متابعة ايه اللى بيحصل ومهم تفهميهم ان قوانين البيت مختلفة مثلا عن قوانين البيت الثانى وان لو تخالفت القوانين دى او تعارضت فا احنا نحب نلتزم بقوانين بيتنا فا مهم ان الانسان يفهم ان فى مجتمع وله قوانين عامة وفى بيت وله قوانين خاصة لما الطفل يبقى فاهم القوانين كويس مش هايتخطاها بسهولة لكن لما يبقى كل شوية نتخانق معاه ويفهم بعد خناقة ان دة كان مش مسموح هتلاقى ان البيت فى تنشنة مش محتاجينها يعنى ممكن يكون فى ضغط عصبى اقل بكتير لما الطفل يكون فاهم انه عضو فى البيت وفى قوانين هو بيحترمها زيكم زيه

كونوا قدوة كويسة لاولادكم كلوا كويس اعملوا رياضة ما تتخانقوش عبروا عن حبكم لبعض وبالهدوء والمحبة والاحترام هتطلعوا انسان ناجح وكمان فترة المراهقة دى هتعدى على خير

اتمنى لكم ولبناتكم كل الصحة والحب والسعادة تحياتى

فيتامين د- مقدمة

الفيتامين هو مادة مهمة جدا لحياتنا فيتا يعنى حياه امين يعنى بروتين الفيتامينات مواد اساسية للعمليات الحيوية فيتامين D او د اللى هو فيتامين الشمس من اهم البروتينات اللى مسؤولة عن تنظيم عمليات حيوية كتير فى جسمنا وعلشان كدة الفيديو دة هايوضحلكم دور فيتامين D فى صحة ووقاية جسمنا من الامراض فيتامين د يذوب فى الدهون وبالتالى احنا محتاجين دهون علشان نتعامل بيه بطريقة صح فى الجسم علشان كدة افتكروا كويس انه لو احنا بناكل اكل قليل دهونه او عندنا مشاكل فى هضم الدهون او بناخذ ادوية بتمنع امتصاص الدهون فى الاخر هايعملنا دة مشاكل فى فيتامين د

للاسف فيتامين د موجود بكميات قليلة جدا فى الاكل اهم مصادره هى السمك وزيوت الاسماك لكن مصدره الرئسى يعنى هو الشمس لو احنا مش بناكل كفاية فيتامين د ومش بنتعرض للشمس عندنا اختيار تالت هو الاطعمة المضاف لها فيتامين د هتلاقى مثلا فى السوبر ماركت لبن مكتوب عليه Fortified يعنى مضاف له حاجة زيادة احيانا بيبقى فيتامين D Fortified يعنى مضاف ليه فيتامين D احيانا برضه دة مش بيكون كفاية فابنضطر نستعمل كبسولات او نقط او شراب او حقن لفيتامين د بنقيس فيتامين د بالوحدات الدولية يعنى International Units فتلاقى العبوة مكتوب عدد الوحدات الدولية فى الكبسولة العبوة فا العبوة بتعتمد او الجرعة بتاعتك بتعتمد على سنك واحتياجاتك وظروفك الصحية ومكتوب على كل علبة اد ايه فى الكبسولة كام International Unit كام وحدة دولية فى كل كبسولة عاوزة اوضحلكم هنا ازاى فيتامين د بيتكون وبيشتغل فى الجسم تخيل ان انت قاعد فى الشمس فى اجازة لطيفة ومعرض اجزاء كفاية من جسمك زى الصدر والظهر والذراعين للشمس مش حاطط Sun Block كريم حماية وقاعد فى وقت مناسب مثلا الصبح بدرى او بعد الظهر وبتاكل كميات صحية من اوميجا 3 واوميجا 6 لانهم بيحموا جلدك من الحرق وكمان بيساعدوا على تكوين فيتامين د لو عملت كل الحاجات دى هاتبتدى تكون فيتامين د بكميات صحية طيب فيتامين د اللى بيتكون فى الجلد الحقيقة مالوش قدرة انه يعمل حاجات كتير لازم يتنشط الاول فا هو بيروح الكبد يتحول بتأثير الدهون اللى فى الكبد والعصارة الصفراوية الى صورة انشط شوية اسمها فيتامين د 2 D2 فيتامين د2 برضه لسة مش نشط اوى مايقدرش يعمل حاجات كتير لازم الاول يروح الكلية علشان ياخذ الصورة النشطة بتاعته اللى هى فيتامين D3 فيتامين D3 هو دة فعلا اللى قادر يعمل الشغل صح بيعمل ايه بقى انت قاعد فى الشمس تشرب لبن وتاكل جبنة وكل الحاجات الطيفة اللى فيها كالسيوم بيروح فيتامين د الامعاء يحمل الكالسيوم من هناك وينقله فى الدم للاعضاء اللى محتجاه زى مثلا العظام والمخ والعضلات والجهاز المناعى ويحطه بقى الكالسيوم

يبقى الصورة النشطة من فيتامين د اللى هو فيتامين د3 هو اللى قادر على عمل الوظائف المفيدة دى وعلشان دة يكون موجود ونشيط محتاج انت تتعرض للشمس تاكل دهون صحية زى اومجا 3 واوميجا 6 يكون عندك كالسيوم كفاية فى الجسم بتاكله من اكلك وبتشربه مع اللبن وكدة يكون الكبد سليم وعندك دهون كفاية فى جسم  مش بتاخد مثلا ادوية تمنع امتصاص الدهون والحويصلة الصفراء سليمة وبعدين يكون عندك الكلية كمان سليمة يعنى مرضى الكلى ممكن يكون عندهم مشكلة فى فيتامين د

طيب ما هى اهمية فيتامين د فى جسمنا لماذا هو بهذه الاهمية اول حاجة فيتامين د مسؤول عن قوة وصلابة العظام علشان كدة اللى عندهم نقص فيه هتلاقى عندهم لين عظام وكساح وكسور فى العظام امراض كتير فى العظام الحاجة التانية انه مسؤول عن سلامة جهازنا العصبى علشان كدة تلاقى الناس اللى قليل عندهم فيتامين د عندهم اعراض كأنها اكتئاب او عصبية شديدة او مشاكل عموما فى ان الواحد بيبقى مش قادر يركز يعنى مشكلة فى الدراسة وهكذا الجهاز المناعى معتمد بطريقة مهمة جدا على فيتامين د فاهتلاقى الناس اللى عندهم نقص فيتامين د بيعيوا كتير بيجيلهم انفلونزا كتير وامراض بكتيريا  كتير والجهاز المناعى كمان على طول الزمن يعنى على المدى الطويل بيبقى فى مشاكل بتزيد فرص اصابتنا بالسرطان وبالتالى بنقول ان اللى عندهم نقص فيتامين د على المدى الطويل خطر الاصابة بالسرطان عندهم اعلى هنلاحظ كمان ان الناس اللى عندهم مشاكل فى الامعاء وفى الهضم وفى عدم القدرة على الحفاظ على الوزن الصحى بعضهم عندهم مشاكل فى فيتامين د فا لو عندك مشاكل فى الهضم احتمال  يكون فيتامين د احد الاسباب نقصه يعنى اكتشفنا كمان انه الوقاية من امراض السكر ومشاكل امتصاص السكر عموما مرض التصلب المتعدد Multiple Sclerosis وارتفاع ضغط الدم الوقاية من الامراض دى بصورة اساسية انه يكون عندك كميات كافية من فيتامين د فى جسمك

عرفنا كمان انه وظائف العضلات العضلات الملساء او العضلات الارادية كلهم محتاجين فيتامين د لانهم يشتغلوا صح فا انت لو انت بتتمرن اويعنى علشان صحة القلب كعضلة كل العضلات دى محتاجة  فيتامين د كفاية علشان يقدر بينقل لهم الكالسيوم ويشتغلوا صح

مؤخرا لاقينا مشاكل فى فيتامين د وانه ناقص عند ناس كتير جدا وعاوزين نعرف مين فى خطر اكبر انه ينقص عنده فيتامين د الناس اللى مابيخرجوش كتير ومابيتعرضوش للشمس كتير لاسباب انهم بيشتغلوا كتير مثلا او عندهم اسباب ثقافية بتمنعهم من التعرض للشمس مثلا بيلبسوا ملابس متغطية لو بيقعدوا دايما فى العربية والشغل والبيت علشان الجو بره حر او مافيش شمس فى البلد اللى عايشين فيها كل العوامل دى بتسبب ان انت مابتعملش فيتامين د كفاية حتى لو اكلت ما تعتقد انه كفاية عمره ما بيكون كفاية زى التعرض للشمس علشان كدة بنقول للناس دول لو انت مش بتتعرض كفاية للشمس احتمال تكون بحاجة يومية لاستعمال كبسولات او نقط فيتامين د

فى المجتماعات الغربية اليومين دول عاملين لهم مشاكل كبيرة فى موضوع الخوف من سرطان الجلد علشان كدة الناس بيحطوا دايما Sun Block على جلدهم ودة بيمنع امتصاص الاشعة Ultraviolet اللى هى فوق البنفسجية علشان كدة دة برضه واحد من المسببات انك يعنى مش دايما وانت متعرض للشمس يعنى شمس النهار وشمس بعد الظهر كويسين للتعرض من غير حماية علشان تعمل فيتامين د لو انت بتاكل اكل الدهون بتاعته قليلة زيادة عن اللزوم منزوع الدهون كل حاجة او انك تاكل اكل الدهون بتاعته مضرة فى الحالتين الدهون دى بتخلى عندك مشكلة فى امتصاص فيتامين د وتنشيطه وبالذات الناس اللى بياخدوا ادوية اللى مانعة لامتصاص الدهون هتلاقى عندهم مشاكل فى فيتامين د فى الاخر الناس اللى عندهم ضغط عصبى رهيب وبيناموا قليل بيعملوا كورتيزول كتير والهرمون دة بيخلى امتصاص فيتامين د ونشاطه اقل من العادى فا تلاقى ان عندك مشاكل فى نقص فيتامين د بسبب الضغط العصبى فى حياتك الناس اللى جلدهم لونه غامق يعنى لون جلدى فما اغمق عندهم حاجة انهم يقعدوا فترة اطول فى الشمس عن الجنس الابيض علشان يقدروا يعملوا فيتامين د

السيدات اللى بيعملوا رضاعة طبيعية لفترة طويلة لسنين هما واطفالهم محتاجين فيتامين د زيادة يعنى تاخذوه على شكل نقط او اقراص او احيانا حقن تحت اشراف طبي طبعا

لاحظنا كمان ان الناس اللى عندهم امراض مزمنة فى الكبد او الكلى او الامعاء او الغدة الدرقية او جارات الدرقية عندهم مشاكل فى امتصاص فيتامين د ولذلك محتاجين كميات خارجية بادوية

الاهتمام بفيتامين د وكميته فى جسمك مهم جدا جدا لنشاطاتك الحيوية كلها تقريبا فا متهملش تعرض كفاية للشمس بطريقة صحية علشان جسمك يكون مستعد لمقاومة الامراض على المدى الطويل يعنى وحمايتك من مشاكل صحية كتير

اتمنى لكم كل الصحة تحياتى