تمارين كيجل لتقوية قاع الحوض للسيدات والرجال

تمارين كيجل او تمارين تقوية قاع الحوض اخترعها عالم امريكى طبيب نساء امريكى اسمه Arnold Kegel التمارين دى ممكن تساعد الرجال والنساء على تحسين وظائف معينة فى الجسم هاشرحها لكم دلوقتى

الفكرة ان احنا بنقوى عضلات موجودة فى قاع الحوض والعضلات دى بتساعدنا على الاحتفاظ بحاجات معينة لازم تفضل فوق فى الحوض

السيدات اللى بيعانوا من تسرب البول او البراز مع بعض الحالات المرضية الخفيفة منها ممكن نعالجهم بالتمرينات دى

ايضا الرجال اللى عندهم نفس المشكلة ممكن نعالجهم كدة كمان السيدات اللى عندهم والرجال اللى عندهم سقوط فى بعض الاعضاء اللى موجودة فى الحوض لتحت بنساعد بتقوية العضلة دى على بقائها فى مكانها

ايضا السيدات اللى عندهم مشاكل بعد الولادة من اتساع المهبل لدرجة ان علاقتهم الزوجية تاثرت سلبا ممكن نساعدهم بالتمرينات دى وايضا السيدات اللى عندهم صعوبة فى الوصول للنشوة او الـ Orgasm  اللى بيشتكوا من ان يمكن  دة بسبب ان حجم المهبل يعنى اوسع شوية من حجم القضيب عند الزوج فا احنا بنساعدهم بالتمرينات دى على انهم يوصلو للـ Orgasm  بطريقة اسهل

ايضا الرجال اللى عندهم مشاكل فى القذف سرعة القذف بنقول لهم يعملوا التمرينات دى كا نوع من تأخير القذف

التمرينات دى بتعوض ضعف عضلات قاع الحوض يعنى بتقويها وعضلات قاع الحوض هنا موجودة عند السيدات هنا فى قاع الحوض وفى الرجال ايضا هنا زى ما انتوا شايفين مع السهم

والسيدة ممكن تعملها باستخدام ادوات زى مثلا كرة بتتباع فى الصيدليات وبتحطها جوة المهبل وبتعمل عليها التمرين بس الحقيقة عمل التمرين من غيرها ممكن برضه يعنى النتائج مش فارقة اوى بس فى سيدات بيقولوا بيحسوا انهم بينقبضوا اكتر باستعمال الكرة

طيب نعمل التمرين ازاى اول حاجة لازم نلاقى العضلة صح نلاقيها ازاى ؟ اول مرة بس لما تيجى تدور عليها هى دى المرة الوحيدة اللى هاتعمل الانقباض بتاع العضلة وانت فى الحمام بتعمل البىيبى يعنى بتعمل التبول او التبرز

فا وانت فى الحمام او وانتِ فى الحمام اثناء خروج البول او البراز اقبض العضلة اللى بتمنع خروجه وقفه عن الخروج هى دى عضلة قاع الحوض لاقيتها ماتعملش بقى تانى كدة وانت بتعمل تبرز او تبول لان دة هايعملك امساك او مشاكل فى القناة البولية

وانتوا دايما قاعدين مثلا على المكتب على الكمبيوتر او فى العربية او واقفين مستنيين حاجة طابور ممكن تعملوا التمرين ازاى؟

نقبض العضلة دى لمدة 10 ثوانى اللى هى فى قاع الحوض دى 10 ثوانى نعد لـ 10 وبعدين نرخيها 10 ثوانى وكمان 10 ثوانى وهكذا 3 4 105  مرات لو تقدروا تعملو كدة كل يوم هتلاقى بالتدريج هتلاقوا نتائج كويسة من المشاكل اللى انتوا بتعانوا منها

التمرين دة ممنوع يعملوا الناس اللى عندهم التهابات فى البروستاتا او امساك مزمن او مشاكل فى القناة البولية زى التهابات القناة البولية المثانة البولية وهكذا

تمارين كيجل بتستعمل طبيا فا لو انتوا حابين تسمعوا عنها او تعرفوا عنها اكثر اقترح سؤال الطبيب هايساعدكم ازاى تعملوها وتعرفوا تعملوها افضل تحت اشراف طبى

اتمنى لكم كل الصحة والتوفيق تحياتى

الدودة الدبوسية

الدودة الدبوسية او الدودة الخيطية او الدودة بتاعة قاعدة الحمام او الدودة اللى بتخلينا نهرش فى الـ popo كلها اسماء لنفس الدودة اسمها Enterobius vermicularis  الاسم العلمى او الـ Oxyuris دى دودة بتعيش فى امعاء الانسان وبتسببله مشاكل فى النوم فى اغلب الاحيان هى دى اهم مشكلة انها بتضايقه فى النوم وبتصحيه من النوم هانعرف ازاى دلوقتى هى بتصيب اغلب اطفال المدارس واحيانا بتعملهم مشاكل فى العملية التعليمية علشان بتضايقهم فى النوم فا بيبقوا صاحين تانى يوم ناقصهم نوم المشكلة كمان انها بتصيب الطفل وبتصيب اخواته ويمكن اهله مامته وباباه وكمان الاهل يعدوا ناس تانين والطفل يجيبها من المدرسة او يوديها المدرسة وينشرها كمان فى المدرسة فا المشكلة منتشرة فى البيت وفى المدرسة ويمكن فى بيوت الناس اللى احنا بنزورهم وهكذا فا احنا عايزين نعالج الدودة مش بس فى الطفل كمان فى كل العيلة والمدرسة فى فترة واحدة اللى بيحصل ان الطفل بياخد اكل فيه بيض الدودة او بيشرب من كوباية عليها البيض او بيقعد على تواليت عليه بيض الدودة وتعديه تدخل بقى فى فمه او هو يحط صباعه اللى فيه البيض لما حط ايده على قاعدة التواليت حط صباعه فى بقه وعادته البيضة

البيضة بتروح للامعاء وتفقس وتطلع ديدان صغيرة  Larval اللى هما Baby دودة الـBaby  دودة بيتعلق على الحائط بتاع الامعاء ويعيش بقى حياته ياكل بقى وبتاع ويعنى يكبر لحد اما يتحول لدودة بالغة

الدودة البالغة دى بتعمل ايه ؟ بتخرج بقى تبقى حامل وتخرج تمشى كدة لحد اما تروح على المستقيم والشرج بتاع الطفل وفى الحالة دى الحركة بتاعة الدودة دى هى اللى بتعمله بتجننه بقى بالليل لانها بتروح تعمل كدة بالليل بس بالذات يعنى فا تلاقيها خارجة حوالين الشرج علشان تضع البيوض بتاعتها فا اللى بيحصل ان الطفل بيصحى من النوم يعيط ويحكيلك انو عندوا كابوس ان فى ثعبان ماشى عليه هايقولك كدة غالبا يعنى احيانا كمان تلاقيها راحت على منطقة المهبل عند البنت وعملت التهاب وافرازات مهبلية ونبتدى بقى نشك ان حصل للبنت اعتداء جنسى او حاجة لكن تأكدوا الاول انه مش هى الدودة دى اللى عاملة المشكلة فا بتعمل التهاب بقى والطفل بيكون يعنى مش قادر ينام وعمال يعيط واحيانا كمان من كتر العياط يجيله حاجة اسمها Hyperventilation ان هو ما يبقاش قادر يتنفس من كتر الرعب

طريقة للاهالى ممكن يعملوها علشان يشوفوا اذا الديدان دى موجودة يجيبو كشاف صغير بالليل فى الضلمة والطفل نايم او صاحى بيعيط ويشوفوا بالكشاف كدة حوالين منطقة الشرج هتلاقوا الديدان الصغيرة احتمال يعنى هى حجمها حوالى نصف سنتى لو كبيرة اوى تبقى حجمها سنتى رفيعة اوى ولونها ابيض احتمال برضه ما تلاقوهاش بعض الاهالى بنطلب منهم يجيبوا شريط لاصق ويحطوه على منطقة الشرج عند الطفل وغالبا هايستلموا الدودة عليه ممكن ياخدوها للدكتور يوريهاله يشوفها تحت المايكروسكوب

يبقى الفكرة ان احنا نقدر نشخص المشكلة بان احنا نشوف الدودة ومن الاعراض كمان اللى على الطفل وبنشوف الدودة على الشريط اللاصق دة

طيب الطفل عمال يعيط باليل وانت مش عارفة تعملى ايه مافيش دكتور وعمال يعيط تعملى ايه ؟ اول حاجة يكون عندك دايما كريم اسمه Zinc Oxide او كريم زنك اطلبيه من الصيدلية خليه دائما عندك فى الصيدلية بتاعتك او كريم نيفيا الكريم السميك دة تاخدى منه شوية كريم وتحطيه حوالين منطقة الشرج كدة وجوة شوية بكمية وفيرة علشان الطفل يهدى شوية الالتهاب وكمان الدودة بتتلخبط فيه بتدخل فى الكريم وماتبقاش عارفة تمشى كويس على الجلد فا دة بيقلل الشعور بالحكة اللى بتيجى من زحف الدودة عليه دى هاتهديه وتخليه ينام على طول

لكن كدة الموضوع ما اتحلش احنا محتاجين نعالج الطفل علشان يخلص من الديدان اللى لسة جوة فى الامعاء مش كدة ؟

عند الدكتور او فى الصيدلية اسأليهم على دواء للديدان الدبوسية يستحسن طبعا انك تكونى واخدة تشخيص من الدكتور ان دة فعلا المشكلة اللى عند الطفل هاتدى الطفل الدواء وكل العيلة لازم تاخده كمان لان غالبا لو واحد عنده فى البيت هتلاقى كل العيلة عندها وكمان تعملى ايه اهم حاجة قص اظافر الطفل بأستمرار لان الظوافر الطويلة هى المركز اللى بيتجمع فيه البيض لانه بيهرش فى المؤخرة وبعدين يروح ياكل او ياكل مثلا ظوافره يعض ظوافره فلازم دائما تقصيها كويس وكمان ظوافرك انت الام بالذات الام واى حد بيعتنى بالطفل كمان ترشى بمطهر قاعدة التواليت ولعب الطفل دائما بالذات اللى بيمسكها بصوابعه الصغيرة مثلا الـ Lego وكدة دائما رشى كل يوم قاعدة التواليت وباستمرار او بانتظام الالعاب بتاعته كمان الملابس الداخلية من  فضلكم غيروها كل يوم والفوط وملايات السراير لازم تتغسل بأستمرار على الاقل مرتين فى الاسبوع على درجة حرارة عالية

طيب احنا حلينا المشكلة فى البيت وهتكررى الدواء يا تاخديه مرة واحدة وبعدين بعد اسبوعين هاتكرريه لكى وللطفل ولباقى العيلة كمان فى المدرسة لازم يحصل دة كلو فى نفس الاسبوع كمان يعنى ايه ؟ تبعتوا رسالة للمدرسة انو حصل العدوى دى وانكم بتحبوا تبلغوهم انهم يرشوا قواعد الحمام واللعب بالمطهر دة ويبعتوا رسالة لباقى الاهالى كمان اذا يحبوا يشوفوا اطفالهم اذا عندهم المشكلة انت بتعملى ايه ؟ انت بتساعدى اطفال تانيين انهم ما يعدوش طفلك تانى فا التعاون فى الموضوع دة يعنى روح الفريق كدة مطلوب

المشكلة دى منتشرة اوى واحنا مش عارفين بالظبط ايه تأثيرها على الاطفال على المدى الطويل يعنى احتمال يكون لها تأثير على الزنك فى جسم الطفل فا انا باقترح تدولوا اطعمة غنية الزنك وتقللوا الاطعمة السكريات و الحاجات الـ Junk Food  وكمان يقال انه الثوم لو اكل ثوم كتير بيطرد الدودة فا ثوم فى الاكل احنا بنحب نحط ثوم فى الاكل فى مصر فا دى حاجة كويسة اوى وغسل اليدين بعد الحمام دائما دائما وقبل الاكل اهم حاجة للقضاء على الدودة دى وعدم انتشارها ان احنا نغسل ايدينا دائما قبل الاكل وبعد الحمام وهايكونوا بخير

اتمنالكم كل الصحة تحياتى

الفحص الذاتي للخصية

الكشف الذاتى عن الخصية قد ينقذ حياتك لو اتعلمت تعمله هاتقدر تكتشف اذا في اورام جديدة ظاهرة على الخصية والتشخيص المبكر فعلا قد ينقذ حياتك سرطان الخصية منتشر بين الشباب من سن 15 لـ 35 سنة هو اشهر او اكثر انواع السرطانات شيوعا فى الشباب فا لو انت اكتشفت الورم بدرى هانقدر نعالجك اسهل بكتير من لو انه كان متاخر وانتشر

مطلوب منك تعمل ايه ؟ تكشف عن الخصية مرة فى الشهر تتعود على الاحساس الطبيعى اللى انت عارفه لخصيتك او الخصيتين بالتالى لو حصل ان لاقيت حاجة جديدة عليك تتجه فورا للطبيب طبيب امراض ذكورة

تعالوا الاول نعرف ايه الطبيعى علشان نعرف نلاقى ايه فى الخصية مش طبيعى

فى الكتاب دة شرح لشكل الخصية الطبيعى زى ما انتوا شايفين احنا شايفيين ناحية واحدة من الجنب لكن فى الرجل فى خصيتين الطبيعى احيانا يكون موجود خصية واحدة دة يعنى استثاء لكن طبيعى ان فى خصيتين واحنا شايغين من الجنب هنا

لو انتوا شايفيين هى تشبع البيضة كدة دة الجانب الامامى منها والجانب الخلفى منها متعلق عليه حاجة تشبه الدودة شوية دى مجموعة من القنوات الصغيرة جدا اللى بتجمع المني وتوديه بقى لطريقه فا انت الحقيقة لما بتكشف عن الخصية او على كيس الصفن بتلاقى الخصية ووراها حاجة كدة زى دودة وراها كدة okay

تعالوا نتعلم نشوفها على Model هنا يبقى انت اول كل شهر تحت الـ Shower مثلا او خلصت Shower وواقف يعنى مستقيم قدام المراية هتاخد كيس الصفن تحته الايد اليمين وتمسك بالايد الشمال من فوق اول ما تبتدى تحس هاتحس ان فى حاجة بتهرب منك فا يعنى هاتبقى حاسس انك مش عارف تحس كويس بالتدريج هاتتعلم تمسك كويس من فوق وتبتدى تبحث الناحية اليمين الاول تعمل ايه ؟ بالابهام وباقى الاصابع هاتعمل كانك بتعمل Rolling Movement يعنى حركة كدة كأنك بتلف حاجة كدة من فوق لتحت وفى حركة دائرية كدة وتبتدى بقى تحس الحاجات اللى احنا قلنا عليها وبعدين تمسك بالايد اليمين من فوق وتبتدى تحس بالايد الشمال الناحية الشمال كدة كأنك بتعمل Rolling Movement يعنى حركة كدة بتلف بين الاصابع بتحس وتبقى كدة انت اطمأنت على الناحيتين Okay

ساعات ممكن تلاقى ناحية اعلى من التانية معلش دة طبيعى بس اتعود على الشكل الطبيعى لجسمك بحيث لو حاجة اتغيرت تقدر تكتشف الفرق طيب الحقيقة ان احنا بنحس بقى ايه انت بتحس كدة يمكن واحدة اعلى من التانية او اصغر من التانية معلش لكن اتعود افتكر ايه الطبيعى عندك وبعدين وانت بتحس كدة بصوابعك من الناحية اليمين تحس حاجة زى البيضة Okayوبعدين الجزء الخلفى من فوق كدة من البيضة تبتدى تحس بحاجة تانية من ورا  زى الدودة كدة دى اسمها Epididymis دة طبيعى وبعدين الناحية التانية كمان تبتدى تحس ولاحظ كمان انك بتحس سطح البيضة دى ناعم زى البيضة بالظبط ومن ورا تحس الـ Epididymis دة Okay

الحجم الطبيعى حوالى 5 سم X 2.5 سم يمكن يكون اصغر شوية لو انت شاب صغير لكن المهم انك تحس ان السطح ناعم وتحس الدودة اللى ورا دى دة الطبيعى

لو فجأة الحجم صغر اوى او كبر اوى دة مش طبيعى Okay ممكن بقى تبتدى تلاقى حاجات غريبة ايه اللى ممكن تلاقيه؟ لو لاقيت فجأة ورم انت حاسه كدة السطح ناعم وكل حاجة وفجأة فى هتلاقى ورم قد مثلا البسلة حبة البسلة او قد العدساية فى الحالة دى مش طبيعى فى حاجة غلط حتى لو مافيش الم او لو تلاقى ورم قد رزاية كدة برضه مش طبيعى دة يعنى يستدعى فورا انك تروح لدكتور Okay طيب ايه ممكن كمان تلاقيه ؟ لو عندك بالذات الم كمان وتحس الخصية والدودة اللى وراها الـ Epididymis تحس بقى كمان هنا هتلاقى حاجة احساسها كأنها شنطة فيها دود دة احساس دوالى الخصية دة برضه يستدعى انك تزور طبيب

تعالوا نراجع الحاجات اللى احنا قلناها علشان نتعلم ازاى نكشف على الخصية وتبقى واقف وتشوف السطح من تحت ايه اعلى من التانية وبعدين تشوف بقى صابعك السطح ومن ورا اذا كان ناعم وفى الدودة اللى ورا دى وبعدين تكشف على اذا كان فى اورام الحاجة الغريبة اللى ممكن تلاقيها كمان تغيير فى اللون يعنى لو لاقيت اللون فجأة كيس الصفن بقى ازرق او احمر اوى او غريب لونه غريب عن اللى انت متعود عليه دة برضه غريب لو في اى الم يستدعى برضه زيارة طبيب ولو لاقيت الشنطة دى اللى فيها الدود يبقى دة يستدعى برضه زيارة الطبيب اى تغير فى حجم الخصية سواء كانت موجودة وكبرت اوى او مش موجودة وفجأة لاقيت ورم مكانها يستدعى انك تسأل طبيب عن الموضوع تكشف على نفسك مرة فى الشهر باحثا عن اورام فى حجم البسلاية او العدساية او الرزاية على سطح الخصية او اى تغير فى حجمها او لونها او شكل كيس الصفن

اتمنى لك كل الصحة تحياتى

التعافي بعد استعمال المضادات الحيوية

اول الاعراض اللى ممكن تلاحظها كمضاعفات لاستعمال المضادات الحيوية هى مشاكل فى الهضم او فى الامعاء دة بسبب ان البكتيريا Flora اللى هى بكتيريا صديقة تعيش فى الامعاء اصابها ضرر بسبب استعمال المضادات الحيوية فا هتلاقى ان عندك اعراض زى مثلا امساك مزمن وبعدين اسهال وبعدين امساك وهكذا او انتفاخ وغازات او حرقان واحساس يعنى بحموضة شديدة طول الوقت او تحس انك مرهق وتعبان طول الوقت عندك مشاكل مع نزيف من اللثة ومن الانف ساعات قد تصاب بالتهابات فطرية مثلا حول الفم او المنطقة التناسلية او على الجلد عموما اذا فا اهم شيء ممكن نعمله لجسمنا علشان نعوض تأثير المضادات الحيوية السيء ان احنا نعوض بكتيريا Flora اللى فى الامعاء اللى فقدناها بتأثير المضادات الحيوية نعمل كدة ازاى ؟

اهم حاجة باسلوب اكل صحى يعنى احنا ناكل اكل يساعد على نوم البكتيريا الصديقة ويمنع نمو البكتيريا الضارة ايه الاكل الصحى دة ؟

اولا نمنع السكريات خالص والاكل اللى Processed يعنى مصنع كتير او معلب فى حاجات بلاستيكية كل الاكل دة مش كويس والـ Junk Food والدهون المتحولة اللى هى فى القلى الغزير والحاجات دى كل دى حاجات مش كويسة نستبدل الاكل غير الصحى دة باكل صحى زى خضراوات فاكهة عيش اسمر وفى حاجة لطيفة احب اقوللكم عليها هى الخضار المخلل تخللوا انتم الخضار فى البيت زى مثلا الزنجبيل المخلل اللى بيجى مع السوشى دة كويس اوى بس ما تزودوش الملح علشان مش كويس زيادة الملح من الاكل الصحى كمان العسل والموز والبصل والثوم بس مهم ان انتوا تعرفوا ان لو البصل والثوم بيعملكم غازات من الافضل ان انتم تطبخوه يعنى مثلا تغلوه او تقلوه علشان ما يعملش التعب

فى حاجة تانية ان احنا نستعمل جيلاتين اللى بيجى مع العظم يعنى تشترى من الجزار عظم وفى جواه جيلاتين دة كويس لبكتيريا فلورا برضه لو بتحب الخميرة ممكن او بتستحمل طعمها حطها فى مياه واشربها بس احيانا ممكن تتعب منها فا خد كميات قليلة وزود بالتدريج او يعنى لو عملتوا عيش فى البيت زودوا فيه الخميرة شوية دة مفيد برضه

فى الصيدليات وفى الـ Super Markets هتلاقى حاجة اسمها Probiotic يعنى صديق للخلايا الحية Pro صديق او موافق او يعنى مفيد Biotic للخلايا الحية دة بعكس الـ Antibiotic بقى يعنى الـ Anti يعنى ضد فا لما تشترى Probiotics دى هاتساعدك فى نمو الخلايا المفيدة من البكتيريا هتلاقى مكتوب عليها Lactobacillus هى دى البكتيريا اللى انت بتدور عليها علشان تفيد امعائك يعنى البكتيريا الصديقة Flora استعمال الـ Probiotics بانتظام بالذات بعد استعمال مضادات حيوية مفيد جدا علشان تعوض البكتيريا الللى فقدتها وبالتالى تعوض الوظيفة المفيدة لها وتتخلص بقى من متاعب الامعاء والنزيف والمشاكل الفطرية اللى ممكن تحصل بسبب استخدام المضادات الحيوية

اتمنى لكم كل الصحة تحياتى

الإنفلونزا الموسمية- الوقاية

زى ما عرفنا ان الانفلونزا سببها فيروس. فيروس يعنى حاجة تانية خالص غير البكتيريا. يعنى علاجه بالتأكيد مش المضادات الحيوية بالعكس انت لما تاخذ مضادات حيوية مع الانفلونزا هاتضعف مناعتك اكتر وبالتالى تصاب بانفلونزا عدة مرات اكتر من الشخص اللى مش بياخد مضادات حيوية. اهم حاجة تعرف انه الطريقة المثلى لمنع الاصابة بالانفلونزا هى انك تحافظ على اسلوب حياة صحى. هاشرح دلوقتى الخطوات وانك اذا من المجموعة الخطر عليها الانفلونزا تأخذ تلقيح الانفلونزا اللى هو التطعيم يعنى التطعيم بنديه للناس اللى عندهم خطر على حياتهم من الانفلونزا مين دول ؟ الناس الكبار فى السن او عندهم امراض مزمنة او السيدات الحوامل او الاطفال اللى تحت خمس سنين يعنى ايه الناس اللى خطير عليهم الانفلونزا  ممكن يحصلهم ايه؟

الانفلونزا عند شخص من المجموعة الخطيرة عليها الانفلونزا ممكن يصاب بالتهاب رئوى بكتيرى يعنى الالتهاب يوصل فى الرئة ودى مشكلة طبعا لانك الرئة لو فقدت وظيفتها مش هاتقدر تتنفس بسهولة ممكن يحصلك التهاب فى الاذن وتعملك مشكلة فى السمع وكمان فى التوازن وممكن يعمل فى الاطفال مشاكل اكتر ممكن تصاب بالتهاب مزمن في  الجيوب الانفية ودة على المدى الطويل طبعا شيء مزعج جدا ممكن يجيلك جفاف من الانفلونزا لو شخص من المجموعة الخطر دى والجفاف ممكن يقتل ممكن يتفاقم المرض اللى كان موجود عندك فى الاصل يعنى لو موجود عندك مثلا مرض فى القلب يجيلك ارتشاح فى الرئة او مشاكلة تانية لها علاقة بأن الانفلونزا اثرت على اجهزتك بطريقة سيئة يبقى اهم حاجة فى المجموعات اللى هى عليها خطر من الانفلونزا ان احنا نديهم تلقيح الانفلونزا يعنى مش اى حد ياخدها بالذات المجموعات اللى عليها الخطر دى التلقيح دة ليه نوعين النوع الاول Spray بنديه فى الانف كدة الـ Spray  دة بيكون الفيروس مضعف يعنى ضعيف بنديه للانسان علشان يقدر يعمل هو مضادات الفيروس من جسمه نفسه التلقيح الـ Spray دة مسموح بيه من سن سنتين لـ 49 سنة النوع التانى من التلقيح هو التلقيح بالحقن بندى حقن ودة مسموح للناس اللى من سن 6 شهور فما اكبر التلقيحات دى ممنوعة او التطعيمات دى ممنوعة لناس معينين مين هما ؟ الناس اللى مناعتهم قليلة فى الاصل بدون استشارة الطبيب والناس اللى عندهم حمى يعنى عندهم دلوقتى درجة حرارتهم عالية ممنوع تأخذوا الحقنة او التطعيم عموما الناس اللى عندهم حساسية فظيعة من البيض ومن التطعيمات عموما لو خدوا تطعيم قبل كدة وبالذات تطعيم الانفلونزا وجاتلهم اعراض حساسية حساسية البيض وحساسية التطعيمات الحاجة المعروفة طبعا انه الاطفال اقل من 6 شهور ممنوع يأخذوا التطعيمات دى فى مرض اسمه Guillain-Barre دة التهاب فى الاعصاب الطرفية لو انت عندك المرض دة ممنوع تأخذ التطعيم

ازاى نقى نفسنا من الانفلونزا ؟ بحاجات سهلة وبسيطة غير التطعيم لو فى حد مريض بالانفلونزا الزم غرفتك وماتروحش تروح مثلا كل مكان فى البيت بحيث تعدى الاخرين تجنب تقبيل الناس بالذات اللى ماتعرفهومش ممكن التقبيل يكون بالطريقة دى تعالى ( Stand up please stand up ) عاوز تقبل طفل من فضلك قبله كدة ووجهك بعيد عنه مافيش داعى تضع فمك على وجهه هما كمان الاطفال بيحبوا انك تحضنهم اكتر من انك تقبلهم فى اجراءات تانية نعملها ممكن فى البيت ونعلم الاطفال انهم يعملوها اهم حاجة ان الطفل يتعلم وكلنا يعنى ان احنا نضع ايدنا على الفم واحنا بنكح Can you cough with your hand on) ونتعلم نغسل ايدينا باستمرار افرض مش معاك منديل ممكن تعمل كدة او لو فجأك العطس او الكحة  (Can you cough on your shoulder) تعمل كدة على دراعك المهم انك تمنع تطاير الرذاذ  فى الجو علشان ما يتنقلش الفيروس لكل مكان حاجة تانية ان احنا ناخد بالنا ان يكون معانا دايما مناديل دايما فى شنطتنا مناديل علشان نستعملها والمناديل الورقة نحرص على اننا ما نرميهاش فى كل مكان يعنى فى الزبالة دايما مش فى الارض مثلا علشان يعنى مش نضيف وكمان العدوى بتنتشر كدة احرص على غسل يديك بالصابون دايما باستمرار والغسل كويس بين الاصابع وقص الاظافر لو السيدات مابيحبوش يقصوا اظافرهم اقترح بالصابونة تعملى باظافرك كدة فى الصبونة وتغسليها على الاقل دة بينظف الاظافر حاجة تانية انه نستعمل دايما Spray مطهر لكل حاجة فى البيت لو فى عندنا مريض او لو احنا بنروح اماكن مشتركة مع ناس مثلا فى اسطح كمبيوتر مثلا او حاجة نستعمل الـ Spray دة هو ممكن تشتروه جاهز او تعملوا خليط مثلا من ديتول ومية مخفف المهم يبقى عندك Spray معقم يعقم المنطقة اللى انت عايش فيها يعنى مثلا ايدين الباب الكمبيوتر الحاجات دى باستمرار علشان تتاكد ان مافيش فيروس فى مكان ما ممكن يعملك مشكلة اهم سبب كمان لانتقال العدوى فى المجتمع هو الحاجات المشتركة زى الفلوس مثلا فا لو اتعاملت بفلوس وانت راجع البيت مثلا اول ما تدخل البيت اغسل ايدك بالمياه والصابون علشان لو فيها عدوى ما توصلش لاطفالك فى ناس بيبقوا موسوسين شوية بيرشوها مثلا بالمطهرات وكدة يعنى دى مبالغة شوية المهم انك اغسل ايديك بعد الاستعمال اكتر حاجة هى الوعى بانك تمنع انتقال الرذاذ وانك تطهر الايدين وتبعدها عن الوجه والناس اللى عندهم خطر من انتقال العدوى بنديهم التطعيمات بس الانفلونزا مرض قاتل بس للناس اللى اما بيعالجوها غلط يا اما  مناعتهم قليلة لكن الشخص الطبيعى قادر على انه يتعايش ويشفى منها من غير اى مشاكل

اتمنى لكم كل الصحة تحياتى

الإنفلونزا الموسمية- مقدمة

الحديث اليومين دول عن الانفلونزا الموسمية اللى بتيجى باسماء مختلفة ساعات بيسموها انفلونزا الخنازير وساعات انفلونزا الطيور ويعنى اسماء كتير مختلفة لكن هى فى الحقيقة كلها مجموعة من الفيروسات اللى بتسبب اعراض متشابهة لما بتختلف من موسم لاخر تركيبة الفيروس بنقول عليها افلوانزا موسمية علشان كدة كل سنة هتلاقى انه فى مصل جديد للفيروس حسب الموسم اللى هو فيه علشان كدة بنقول عليها انفلونزا موسمية سبب الانفلونزا فيروس.

يعنى ايه فيروس؟

الفيروس دة عبارة عن شفرة من الاحماض الامينية يعنى مجموعة بروتينات جنب بعضها وخبيثة جدا بتدخل جسمنا وتروح للخلية وتغير طريقة عملها بحيث الخلايا تمرض

انفلونزا يعنى Influenza حاجة تسيطر على جسمك كلو وتجيبلك مشاكل صحية الفرق بينها وبين البرد انه البرد يعنى او الرشح بزكام يعنى بيجى فى المنطقة دى بس يعنى احتقان فى الانف احتقان فى الزور رشح عطس لكن بتفضل انت فى الجزء دة مصاب بس دة البرد لكن الانفلونزا ان كل جسمك يبقى متأثر Influenza يعنى الاعراض نشوفها هنا على الـ Model هى حمى يعنى ترتفع درجة حرارتك بالكامل تكح سعال يجيلك احتقان فى الحلق والانف وسيلان فى الانف يعنى مثلا مخاط كتير يجيلك الام فى الجسم والعضلات كلها وصداع واعياء واحيانا قيء و اسهال وبالذات لكبار السن والاطفال الاعراض دى بتختلف من شخص للاخر لكن فى الحقيقة هى فى مجملها يعنى بنقول عليها هى انفلونزا سواء زادت او قلت منها عرض او اتنين ازاى بتتنقل الانفلونزا تعالوا نشوف نشرح هنا على الاطفال ازاى الانفلونزا بتروح من شخص للتانى

(Enough thank you) الكحة من غير حماية بتخلى الرزاز يتطاير ويروح من شخص للتانى دة اول طريقة للعدوى الطريقة التانية انه نلمس الاسطح الملوثة بايدنا او نسلم على الاشخاص المصابين بايدنا او نبوسهم وبايدينا نلمس الفم او الانف او العينين

يبقى عندنا طريقتين رئيسيتين لنقل العدوى انه الرزاز ينتقل عن طريق السعال او الكحة يعنى او العطس او الكلام وانت بتكلم شخص قريب منك فا تنتقل العدوى من المصاب لسليم الطريقة التانية انه شخص يلمس شخص تانى او يسلم عليه بايده او يقبله وبعدين ايده تروح من السطح المصاب سواء الشخص او حاجة مسكها ويروح يلمس بيها فمه او انفه او عينه طريقتين

الشخص معدى قبل ظهور الاعراض يعنى بتنتقل العدوى وبعدين بتظهر الاعراض فيه فترة انت فيها معدى من غير ما الاعراض تظهر عليك علشان كدة احنا بنقول مهم جدا انك تكون عامل كل الاجراءات الصحية الصح قبل ما تظهر عليك الاعراض يعنى دايما واخد بالك على اساس احتمال تكون عندك الاصابة ما تنقلهاش لاولادك او الناس المحيطين بك مين اللى عليهم بالذات خطر الاصابة بالمرض كبار السن المصابين بامراض مزمنة زى السكر والقلب والربو والكلى والكبد كل المشاكل دى السيدات الحوامل والاطفال اقل من خمس سنين والناس اللى عندهم مشاكل فى المناعة زى مرضى الايدز او السرطان او الناس اللى عندهم سمنة زيادة كل دول بنقول عليهم فى مجموعة الخطر من الاصابة بالانفلونزا ازاى نمنع الاصابة بالانفلونزا لها فيديو مخصوص تابعونا فيه علشان نبقى واضحين كويس اوى نمنع الاصابة ازاى

تمنياتى لكم بكل الصحة تحياتى

نوبات الصرع (عرض للمرضى)

استكمالا لحديثنا عن مرض الصرع عاوزة أكلمكم عن أنواع نوبات الصرع ليه لازم نعرفها ؟ لما تبقى واعي إن في أنواع للنوبات وشوفت نوبات قبل كدة هاتقدر تميز النوبة اللي موجودة في شخص تاني لو هو قريبك أو طفل عندك في المدرسة أو حد في الشارع ممكن تقدر تميز نوبات الصرع دة مهم كمان للتشخيص لأنك لما تبلغ الطبيب إيه اللي حصل وتوصف له هايقدر يشخص المرض وبالتالي يعالجه أحسن في الحلقة اللي فاتت إحنا قولنا كلام عن أنسجة المخ وإن كل جزء ليه وظيفة هنا استكمالا للموضوع زي ما أنتم شايفين المخ متقسم لمناطق وكل منطقة لها وظيفة لو شايفنها في الـ Text على الصورة هنا لو تحبوا تعرفوا وظيفة كل منطقة ممكن تعملوا Freezing  للفيديو وتشوفوه الـ Text  المكتوب بحسب فين ابتدى الصرع فين نوبة الصرع الكهرباء الزيادة اللي حصلت دي تبقى النوبة نوبة الصرع بتدينا الأعراض افرضوا إنها مثلا حصلت في المنطقة 1 فا تلاقي المريض شايف حاجات غريبة ماحدش شايفها غيره افرضوا  إنها حصلت في 1 وبعدين انتشرت لمنطقة تانية مثلا منطقة السمع فا هتلاقي المريض شاف حاجة غريبة وبعدين سمع صوت غريب افرضوا إنها راحت من 1 لمنطقة النظر لمنطقة تانية السمع لمنطقة تالتة مثلا العواطف وبعدين انتشرت في المخ كله يبقى شكل العيان إزاي ؟ هتلاقي المريض شايف حاجة غريبة وبعدين سمع حاجة غريبة وبعدين بقى خايف جدا وبعدين وقع من طوله وجاتله النوبة المعروفة عن الصرع بالتشنجات اللي إحنا بنشوفها ساعات في الأفلام شوفتوا التسلسل الأحداث يبقى حسب وصفكم للي حصل الطبيب هايقدر يعرف إيه اللي بيحصل في مخ المريض طب ما هو سؤال ما هو ممكن يعرف بمثلا رسم مخ لا للأسف أثناء عدم وجود النوبة أثناء غياب النوبة مش هتلاقي عند المريض عند كتير من المرضى أي تغيرات في المخ ملحوظة التغيرات بتحصل فقط أثناء النوبة عند كثير من المرضى علشان كدة الملاحظة بتاعتكم أنتم الناس اللي حوالين المريض مهمة جدا للطبيب وقبل ما أتكلم عن النوبات عاوزة أوضحلكم إن في نوعين من الخلايا العصبية خلايا حسية وخلايا حركية يعنى إيه ؟ خلية رايحة من المخ للجسم بنقول عليها خلية حركية بتوصل الأمر الحركي من المخ والخلية الحسية اتجاهها إنها بتأخذ الكهرباء من الجسم للمخ مهم نعرف إن الصرع ممكن يحصل في نوع من النوعين دول فا إحنا ممكن نتخيل إنه مريض الصرع جاله النوبة في الخلايا الحسية أو في الحركية تعالوا بقى نشوف النوبات وأنواعها لو النوبة بتاعة الصرع ابتدأت في جزء صغير من المخ بنقول عليها نوبة جزئية Partial لو النوبة الجزئية دي في مكان صغير من المخ مكان واحد بس بنقول عليها Simple أو بسيطة لو النوبة البسيطة دي في الجزء الحسي من المخ العيان هايحس بأعراض معينة فا بنقول عليها بسيطة حسية Simple Sensory طيب الأنواع البسيطة الحسية دي ممكن تكون إيه ؟ ممكن إن العيان يسمع حاجة غريبة يشوف حاجة غريبة يحس بطعم حاجة غريبة يحس بحاجة ماشية على جلده يعنى كل الحاجات الحسية اللي ممكن يحسها ممكن تحصل في النوبة البسيطة دي لو النوبة البسيطة دي حصلت في جزء حركي من المخ بنقول عليها بسيطة حركة Simple Motor في الحالة دي هتلاقي العيان بيتحرك بطريق غريبة ولا يرغب فيها لكنها موجودة حركة في إيده كدة أو إحنا عارفين إنها بتحصلنا كلنا ساعات لما عينا ترف دي Simple Motor يعنى نوبة بسيطة حركية طيب افرضوا إن النوبة بقت في أكثر من جزء من المخ لكن مش المخ كله يعنى أكثر من جزء 1-2-3-4 أجزاء فا بنقول عليها نوبة جزئية مركبة جزئية مركبة يعنى أجزاء مختلفة Complex طيب الـ Complex دي ممكن بقى حاجات كتير ورا بعض يعنى واحد شاف حاجة وسمع وبعدين عيط وزعق وبعدين قلع هدومه مثلا دي نوبة جزئية مركبة طيب افرضوا النوبة حصلت إنها انتشرت في المخ كله هايجيلنا واحد من عدة  سيناريوهات أول حاجة بنقول عليها الـ يعنى العامة دي النوبة العامة بنقول عليها أو Generalized النوبة العامة الصغيرة أو النوبة الصغرى بنقول عليها Petit Mal زمان كنا بنقول عليها علشان الفرنسيين  أول ناس طلعوا بالتشخيص أو التصنيف الممتاز دة بنقول عليها دلوقتي Absence أو إن الطفل بيكون غائب عن الوعي بس اللي بيشوفه بيفتكره متنح أو بيستعبط فا تلاقي المدرسة بتكلمه وهو عنده نوبة الصرع يعني كل المخ منتشرة فيه الكهرباء الزيادة دي فا هتلاقي الطفل ابتدأ يقلب عينيه ويبص كدة والمدرسة بقى عمالة إيه تزعقله وتلطشله علشان فاكراه يعني بيزغرلها يعني بيتنحلها وهو في الحقيقة عنده نوبة صرع هو مش حاسس إطلاقا ولا سامع ولا في أي Input  جايله يعني مافيش حاجة هو بيستقبلها هو غائب عن الوعي تماما النوبة دي بنسميها Absence  أو نوبة صغرى أو نوبة الغياب إن هو غائب تماما عن الوعي أي حاجة المدرسة بتقولها له  في الوقت دة هو مش سامعها ولا قادر يتكلم ولا أي حاجة فا هاوريكم صور بعد شوية Videos مقاطع للأطفال اللي بيحصلهم كدة بعد كدة ممكن يحصل سيناريو تاني للنوبة بدل ما الطفل يبقى غائب كدة عنده Absence بنقول عليها بقى النوبة الكبرى اللي هي Grand Mal  أو Attack Tonic-clonic بيبقى الطفل أو المريض بيحصل له الحاجات التالية tonic يعني العضلات تتشنج كدة التشنجات دي يعني مثلا يتشنج كدة ويجز على أسنانه دة اسمه tonic يعني تشنج في العضلات إذا التشنجات اللي بتيجي للمرضى أحيانا بتكون مرض الصرع ممكن تكون من حاجات تانية لكن من أعراض مرض الصرع التشنج دة وبعدين في حاجة اسمها Clonic أو Clonic Attack إن العيان يعمل كدة دة اسمه Clonic  إن الـ Muscle أوالعضلة تهتز كدة دة اسمه Clonic   وبعدين في حاجة تانية إن العضلة تسيب خالص تبقى Atonic يعني فاقدة للتماسك بتاعها Atonic فا عندنا 3 احتمالات إنه العيان يبقى tonic متشنج أو بيهتز كدة أو Atonic أو الثلاثة كلهم مع بعض في الحالة دي بنقول عليها Generalized يعني نوبة عامة نوبة كبرى بنقول عليها Tonic Clonic يعني اهتزازية توترية يعني العيان يقع من طوله ويغيب عن الوعي يتشنج جامد شوية وبعدين يبتدي يهز كدة وبعدين يسيب خالص وساعات تلاقي كمان تبول وتبرز لا إرادي يبقى الحاجات دي كلها في التصنيفات اللي إحنا شوفناها كلها تقع تحت أنواع نوبات الصرع مطلوب منك إيه ؟ الناس اللي واقفين حوالين العيان وشايفينه إن أنتم تراقبوه ماتعملوش أي حاجة غير شوية إسعافات أولية هاشرحها بعدين وتراقبوا بيحصل إيه وتسجلوه يا إما تصوروا بفيديو أو تكتبوا اللي بيحصل دة يهم جدا في التشخيص تعالوا بقى نشوف أشكال النوبات دي على فيديو من جامعة Birmingham وهاخد مقتطفات منها علشان أوريكم شوفوا معانا

فهم مرض الصرع مهم جدا لكل الناس تقريبا الأهالي المدرسين الممرضين الأطباء كل الناس لازم تفهم إزاي تميز نوبات الصرع لأن دة هاينقذ ناس كتير من سوء تفاهم كبير في المدرسة أو في الشارع ومهم كمان نعرف إنه تشخيص المرض يعتمد بصورة كبيرة على الملاحظة أو التعليق اللي جاي مع المريض من عيلته أو الناس اللي كانوا معاه أثناء الحالة فا لو سمحتم اهتموا بمعرفة الأعراض دي ولاحظوا إذا كان حد حواليكم عنده منها لأنها هاتفرق كتير أوي في الرعاية الصحية والوقاية من مشاكل كتير تابعوا معانا سلسلة الصرع لاستفادة أكبر

أتمنى لكم كل الصحة تحياتي

رعاية مريض السكتة الدماغية

الحياة بعد السكتة الدماغية ليست كقبلها هتلاقي المريض عنده مشاكل جديدة ظهرت حتى مع إنه تعالج وكل حاجة وشكله سليم لكن في مشاكل جديدة طرأت على صحته علشان كدة في هدفين من الرعاية الصحية لمريض الجلطة أو السكتة الدماغية السابقة إن إحنا نقيه من تكرارها رقم 1 نمرة 2 إن إحنا نعالج الجديد من المشاكل اللي هاتظهر عليه العلاج مش هايكون يعني للتخلص منها للأبد ولكنه طريقة للتعلم التعايش مع المشاكل جديدة علشان كدة هاكلمكم في الفيديو دة عن المشاكل دي خلينا الأول نبدي بطريقة الوقاية من تكرار المشكلة هتلاقي مريض السكتة الدماغية أو الجلطة هتلاقيه غالبا مريض حاجة تانية يعني مثلا عنده سكر ضغط مرتفع عنده زيادة وزن حركته قليلة بيأكل مثلا لحوم كتير وعنده تصلب شرايين مدخن هتلاقيه فيه حاجة بيعملها غلط فا كل الحاجات اللى قد تسبب جلطة عايزين نتخلص منها يعني نظبط ضغط الدم نعالج السكر صح العيان يمشي 45 دقيقة في اليوم 3 أيام في الإسبوع على الأقل دة هايقيه من مشاكل كتير يأخذ أدويته لو هو الدكتور كتب له على مسيلات للدم يلتزم بيها كل الحاجات دي مطلوبة على طول بعد الإصابة بالجلطة أو السكتة الدماغية طيب الأكل اللي مطلوب العيان يأكله مهم أوي إن إحنا نعرف إن عدوك الأول هو اللحوم والدهون الحيوانية علشان كدة أهم 3 حاجات تأكلها هي الفاكهة الخضار والزيوت النباتية فاكهة خضار زيوت نباتية تحاول دائما يكون أكلك معتمد على الـ 3 حاجات دي تجنب تماما الدهون الحيوانية السمنة أو الدهون الصلبة في حرارة الغرفة يعني لو زيت نباتي مهدرج يعني صلب في حرارة الغرفة برضه مش كويس يكون زيت طبيعي نباتي كدة ويتحط على الأكل يستحسن بعد نهاية الطبخ علشان يحتفظ بقيمته الغذائية تاني حاجة ممكن العيان يكون وهو بيأكل عنده مشكلة في السيطرة على نصف جسمه وبالتالى هتلاقي إنه الأكل مثلا ممكن يقع من بقه أو يحصله شرقة فا الناس اللي بيعتنوا بالمريض أقترح أنكم دائما تكونوا واعيين وهو بيأكل علشان لو شرق تقدروا تساعدوه العناية المنزلية اليومية بمريض الجلطة أو السكتة الدماغية مطلوب إن إحنا نفهم إنه هايعاني من بعض المشاكل الصحية زي إيه أول حاجة المريض هايشعر بأنه مكتئب ويمكن الإكتئاب دة يخلي شخصيته متغيرة أو يخليه منعزل أو عصبي أو شديد العدائية حتى لبعض الناس اللي بيحبهم أوى فا إستعدوا إنها تكون شخصيته مختلفة لو إكتئابه زاد أوي لدرجة مؤثرة على العلاقات الأسرية أو على حياته مثلا حاول ينتحر أو حاجة أقترح إن إنتم تتكلموا مع الطبيب في إنه يأخذ أدوية مضادات الإكتئاب غير كدة العيان لفترة يعني طالت أو قصرت بعد الإصابة والخروج من المستشفى إحتمال يفقد السيطرة على البول والبراز فإستعدوا طبعا بتجهيز السرير إنه يكون في مشمع تحت الملاية ويعني غيارات وكدة وفي يعني زي Pampers للكبارعلشان لو المشكلة دي مزعجة يعني حسب الناحية اللى العيان متأثر فيها يعني مثلا لو الجلطة على الناحية اليمين من المخ هتلاقي عنده مشاكل في النصف الشمال من جسمه فاهتلاقي ضعف عام في النصف في نصف الجسم هتلاقيه مثلا مش قادر يعمل أي حاجة بنصه الشمال فا في وسائل مساعدة تقدروا تشتروها أو ممكن تعملوها أنتم لو أنتم شوية Creative تقدروا تعملوا حاجات تساعده في موضوع إنه ضعيف في نصف جسمه هاشرح منها شوية بعد شوية الأكل أهم حاجة زي ما قلت إنه يأكل حاجات خضراوات وفاكهة وزيت نباتي لكن لاحظوا كمان إنه الحاجات الصلبة ممكن بسهولة تسببله إنه يشرق فا لو هو بيشرق كتير طبعا إنتم مستعدين لإنقاذه لو حصل حاولوا تخلوا الأكل مش صلب أوي بحث إنه يقدر يبلعه بسهولة أكتر لو تطلب الأمر إن إنتم تعملوا الأكل في الخلاط ممكن برضه الطريقة اللي بيمسك بيها العيان الشوك والمعالق والسكاكين هاتكون أصعب شوية من السابق فا أقترح تشتروا له أدوات أكل تكون ايديها قصيرة وعريضة بحيث يقدر يمسك بسهولة ويقدر يوصل للفم بسهولة لإنه يمكن يمكن مش هايقدر بسهولة يلاقي مكان الفم زي زمان فا الحاجات اللي ايديها قصيرة وعريضة زي ممكن تشتروا حتى أدوات بتاعة الأطفال ممكن تنفع برضه المريض كمان عنده مشكلة في اللبس بيبقى عنده ضعف في نصف جسمه وعدم توازن فا بقترح إن إنتم تعلموه إزاي يقعد على السرير مجهز اللبس جنبه ولو عنده مثلا مشكلة في الوصول لنصف ما من جسمه في مثلا أدوات تعويضية زي العصاية دي يقدر يوصل بيها للنصف البعيد من جسمه والناحية التانية علشان يلبس بنفسه الجزمة كمان ممكن لو عنده صعوبة مثلا في إنه يقفل السوستة تركبوله حلقة معدنية كدة في السوستة علشان يقدر يشدها أسهل أو تركبوله مثلا شرايط في الحاجات اللي مش قادر يشدها كويس يعني إعملوا كدة Improvise يعني إعملوا شوية تفكير في نعمل إيه في المشاكل اللي بتواجه المريض اللي عندنا في البيت ونحاول نساعده فيها المشاكل بتختلف ليه ؟ لأن المخ عنده مناطق مختلفة وكل منطقة لها وظيفة مختلفة فا هتلاقي إنه حسب فين حصلت الجلطة هتلاقي العيان عنده المشكلة أوضح يعني مثلا لو الجلطة في منطقة الرؤية هتلاقيه المشكلة إنه عنده مشكلة في إنه بيشوف الحاجات بطريقة مختلفة أو إنه يسمع أقل وهكذا لكن العلامات اللي بقولها دي علامات عامة يعني ممكن تلاقيها في أغلب العيانين في حاجة تانيه إنه بيشوف العالم بطريقة مختلفة يعني ممكن يشوف الحاجة 2 أو ممكن يشوف العالم بالنص بس يعني يشوف نفسه كا نصف إنسان ويشوف كل حاجة بالنص بنقول عليه Neglect Syndrome يعني بيتجاهل نصف العالم يعني لو هو بص في المراية على نفسه هتلاقيه شايف نفسه بالنص هتلاقى سيدة مثلا حاطة الـ Makeup نص الـ Lipstick نص الفم والكحل على عين واحدة هي مش منتبهة إنه في نصف آخر فالعيان دة محتاج عناية خاصة هتلاقي إنه بيحتاج إنك تفهم منه هو شايف العالم إزاى فامثلا تطلب منه إنه يرسم بيت تحطله صورة بيت أو ترسمه أنت وتقوا له إرسم البيت هتلاحظ إنه مثلا رسم مثلا نص البيت اليمين أو على جزئه اليمين هو فا لو رسم كدة يبقى هو شايف نص العالم اليمين بس مهما حاولت تفكره هو مش فاهم إن في نص تاني مثلا هايشوف الحاجات والقطط والناس وكدة نصف إنسان هو مش هافتقد أي حاجة مش هايقولك مثلا لأ في حاجة غلط هو مقتنع تماما إن دة شكلها بعض الناس ممكن يفكروا إنه في حاجة غلط بس مش عارفين إيه المشكلة يعني هايشوف نص الساعة فا لما يشوف الوقت هتلاقيه مش قادر يميز الوقت المشكلة بقى إن الناس الكبار دول اللي بيحصلهم الـ Neglect دة دول ممكن يخبطوا في الحيطان وهما ماشيين بيحاولوا يخرجوا من البيبان بالذات بالليل وهما رايحين الحمام فاعندنا مشكلة أكبر إنه ممكن يخبط جامد في جسمه ويصيب نفسه فا مهم أوي إنه نعرف إن العيان عنده قد يكون عنده نص جسمه هو مش منتبه له ونص العالم وبالتالي لو باليل مثلا عاوز يروح الحمام نعمل خطة معاه مثلا نقول له يصحينا أو يضرب جرس وإحنا نيجي نساعده أو يعني حاجة لازم علشان ننقذه من إنه  يخبط نفسه وهو ماشي بالليل في نص الباب مثلا المشكلة بتاعة Neglect دي بتبان كمان في الأكل هتلاقي العيان أكل نص الطبق بتاعه وقالك أنا عاوز كمان آكل يعني حطلي كمان أكل فا إحنا نعلم العيان طريقة من الطرق إن إحنا نلف له الطبق هتلاقيه إكتشف اه دة في أكل أهه هي حاجة غريبة جدا لكن هو دة اللي بيحصل فعلا فا هتلاقيه إن هو مش منتبه حتى لنص الأكل بتاعه فا نعلمه بالتدريج لو حسيت إنك خلصت الأكل لف الطبق هاتلاقي الباقي موجود في ناس بيحطوا لهم مراية ممكن برضه بس دي طريقة يعني سهلة بس إفتكر بعد ما تخلص الأكل لف الطبق هاتلاقي الأكل رجع تاني طبعا الحاجات دي بتجرحه نفسيا جدا إنه يعني مختلف عن الناس فاحاولوا تأخذوا الموضوع بلطف معاهم لإنه الإكتئاب دة طبعا بيتحسروا على حياتهم وعقلهم وكدة فالكثير يعني من الإحترام والحنان مطلوب طيب لو هايمشي كتير أقترح يكون معاه عصاية لأنهم معرضين للسقوط بالذات لو هما مش شايفين كويس أو شايفين الحاجات مختلفة عن زمان هاتلاقي برضه صعوبة في اللغة في القراءة وفي التعبير عن نفسهم وفي فهم الآخرين يعني هتلاقيه بيتكلم بصعوبة أنت مش فاهمه فاحاول تشوف إذا يقدر يكتب هو عاوز يقول إيه أو إسمع له عن قرب أو ممكن يكون مش فاهمك أنت أنت تكلم ببطئ وبطريقة واضحة ومفهومة ماتزعقش يعني حاول بس تقرب له وتقوله ببطئ الكلام مريض الجلطة الدماغية يحتاج الكثير من الرعاية ولكنه إنسان ومحتاج برضه الكثير من الحب والحنان والصبر فامعلش لو هو شخصيته تغيرت استحملوه شوية

تمنياتي لكم بكل السعادة والصحة تحياتي

السكتة الدماغية- مقدمة

السكتة الدماغية هي ضرر يصيب المخ نتيجة جلطة أو نزيف في أحد الأوعية الدموية في المخ المشكلة دي ممكن تعمل أعراض تبقى مع المريض بقيت عمره وممكن تقتله في ساعتها وأنا عاوزة في الفيديو دة أعلمكم إنكم تقدروا تميزوا الأعراض لأن لو أنقذتم المريض ووديتوه المستشفى في أول 3 ساعات من حدوث النوبة دي هاتقدروا تنقذوا حياته أو تنقذوه من مشاكل هاتفضل معاه بقيت عمره لو عاش فا مهم أوى فى الفيديو دة نتعلم إزاى نميز أعراض السكتة الدماغية أحيانا بعض الناس بيكون عندهم سكتة دماغية يعنى تلف في المخ حدث نتيجة المشكلة دي وأحيانا بيكون عندهم سكتة صغننة بنقول عليها Transient Ischemic Attack أو Mini-Stroke الـ Mini-Stroke دي بالعربي اسمها إقفارة عابرة أو نوبة إقفارة عابرة طيب تعالوا نشوف الأول شوية تشريح نفهم منه ايه حكاية السكتة الدماغية إحنا عارفين إن المخ بيتكون من فصين كدة يمين وشمال فا دة مثلا النصف الأيسر من المخ تخيلوا معايا إنه أنا شافيه مخ الإنسان في الرسمة دي عامل زي مدينة كبيرة وفيها نهر النهر دة له فروع دي الأوعية الدموية اللى واخدة الأكسجين والتغذية ورايحة لخلايا المخ فاتخيلوا معايا إحنا شايفين كدة من الجنب وهنا الصورة دي إحنا شايفين المخ من تحت شايفين مصدر الأوعية الدموية النهر الكبير كأنه مثلا نهر النيل جي من الرقبة وبعدين متفرع بقى الفروع بتاعته في المخ فا اللي بيحصل مع السكتة الدماغية إنه يحصل إنسداد غالبا إنسداد قرابة 80-90 % إنسداد في أحد فروع النهر دة في مكان ما في المخ في النصف الأيمن أو الأيسر من المخ وبعيمل تلف في جزء ما من المخ ممكن يحصل نزيف برضه فا تخيلوا معايا لو النهر انسد النهر لو انسد هايعمل يعني الزرع اللي في المنطقة اللي بيغذيها هايموت ودة نفس الحاجة لنسيج المخ ولو حصل نزيف الزرع هايغرق وبرضه يموت مش كدة ؟ فاتعالوا نشوفها هنا على الـ Sketch دة تخيلوا إنه الدم توقف بسبب جلطة موجودة في أحد الشراين تخيلوا الشراين دي دقيقة جدا فا إتسدت بسبب أن العيان عنده مثلا كوليسترول عالي أو الاوعية الدموية متصلبة بسبب إسلوب حياته مثلا مش صحي فا الجلطة دي هاتموت جزء كبير من المخ اللي بيغذيه الفرع حسب حجم الفرع اللي اتأثر ممكن يحصل برضه نزيف والنزيف يغرق المنطقة دي بالدم ويضغط عليها فا يعمل برضه تلف في المخ فا ممكن جلطة أو نزيف لاحظوا إنه لما أقول جلطة يبقى أنا علاجها مطلوب مني أعمل إيه إن أنا أمشي الدم يعنى أزود سيولة الدم والنزيف مطلوب مني أقلل سيولة الدم فا معنى كدة إن إحنا إحتمال يكون عندنا نفس الأعراض لكن العلاج العكس علشان كدة مهم إن إحنا نعرف إنه مش كل عيانين الجلطة لهم نفس أو كل عيانين السكتة الدماغية بالأصح لهم نفس نفس العلاج لأ بعضهم عنده جلطة الأغلبية وبعضهم عنده نزيف طبعا العلاجات هاتكون مختلفة في الحالة دي الـ Transient Ischemic Attack معناها الإقفارة العابرة دي معناها إنه هايحصل غالبا جلطة صغيرة وبعدين فجأة تمشى لوحدها تختفي لوحدها فا العيان تجيله الأعراض وبعدين تروح بس لو هي جت وراحت مش معنى كدة أنه شفي لازم نروح للدكتور ونشوف إزاى يأخذ أدوية تمنع الإصابة بالسكتة الدماغية الكبيرة بقى طيب حياة مريض السكتة الدماغية تعتمد على أول 3 ساعات من حدوث الأعراض للسكتة لو لحقت تميزها وتوديه المستشفى في الـ 3 ساعات دي هاتنقذ حياته فا عاوزة اعلمكم من فضلكم إنه أشوف الأعراض أودى المريض للمستشفى في خلال 3 ساعات إفتكروا دي من فضلكم Okay تعالوا بقى نشوف الأعراض بيلخصوا الأعراض في الطب الغربي لمختصر F A S T F A S T إختصار لأربعة كلمات أول حاجة Face هتلاقي العيان وجهه إتعوج على ناحية ما هتكون الأعراض بعكس الناحية اللي فيها نزيف في المخ يعني لو النزيف في اليمين هتلاقي الأعراض ظهرت على الشمال فا هتلاقي المريض إبتدأ وشوه يتعوج نص وشه كدة ويمكن يبتدي هو شخصيا يحس إنه مش شايف لنص من وجهه أو عنده صداع في نص الرأس وهتلاقيه واضح جدا أنك ملاحظ وشه معوج وإسأله إسأله أنه يبتسم فا هتلاقيه بيحاول يبتسم الناحية السليمة هاتترفع والناحية المشلولة هاتفضل لتحت فا دي أول علامة Face هتلاقي الوجه علاماته متغيرة تانى حاجة هتلاقى Arm From FAST  الذراع هتلاقى واحد إفرض إن العيان دة مثلا عنده الناحية الشمال متأثرة فا هتلاقي إنه عنده ضعف في دراعه الشمال فاتعرف إزاى ؟ أول ما تلاحظ إن وشه إختلف كدة إسأله يرفع دراعاته الإتنين فا تقول له إرفع دراعاتك الإتنين فا هتلاقيه رفع اليمين والشمال ضعيف أو مش بيتحرك خالص آدي علامة تانية العلامة التالتة S اللي هي Speech إسأله أي حاجة إسمك إيه ؟ إحنا النهاردة إيه أنت كويس كلمني كنت بتقرأ إيه من شوية وإسمع هو بيتكلم إزاى إما هايتكلم كلام  مش مفهوم أو هتلاقيه عنده صعوبة فظيعة في الكلام يعنى    [ همهمة غير مفهومة ] بطيء الكلام رابع حاجة Time بيفكرك إنه أول ما تشوف الحاجات دى قدامك 3 ساعات تنقذ حياته من فضلكم أول ما تشوفوا العيان بالأعراض دي تأخذوه فورا للمستشفى ممكن العيان يحصله دوخة فا لاحظوا إنكم لازم تسندوه أو لو يعني إتنين صحتهم كويسة يشيلوه يمكن يكون المريض برضه حاسس بغثيان أول ما تلاقي الأعراض دي تأخذ المريض على طول للمستشفى طيب إيه أسباب الإصابة بالسكتة الدماغية دى ؟ يعني العيانين اللي عندهم حاجات معينة هاتزيد إحتمالات الإصابة بالسكتة الدماغية مين دول ؟ الناس اللي عندهم ضغط عالي طبعا ضغط الدم العالي هايزيد الفرصة للإصابة بإنفجارات أو الجلطات اللي موجودة في الشرايين أو الأوعية الدموية الناس اللي عندهم سكر أو أمراض في القلب أو مدخنين أو الكوليسترول بتاعهم عالي أو عندهم يعني وزن زيادة وبيتحركوا قليل فا بتزيد النسبة كمان كل اما يبقى عندك أكتر من مرض من اللستة دي يعني اما يبقى عندك مثلا ضغط وسكر وسمنة وقلت حركة هاتزيد جدا الفرصة للإصابة بالسكتة الدماغية يبقى معنى كدة إن الوقاية من تكرارها بتعتمد على إسلوب حياة معين الإلتزام بالعلاجات المعينة اللي مطلوبة منك كمريض وأخذ أدوية معينة والرياضة وهكذا الحياة بعد السكتة الدماغية بتتطلب حاجات معينة المفروض في البيت بعد ما المريض يرجع البيت مش هايكون 100 % كويس في حاجات معينة هاتلاقوها عليه وعاوزاكم تعرفوها وعاوزاكم تتعلموا تتعايشوا مع مريض السكتة الدماغية تبقوا فاهمين هو إيه بيفكر إزاى وشايف الحياة إزاى وعليه الفيديو القادم هاشرحلكم طريقة التعايش مع مريض السكتة الدماغية

اتمنى لكم كل الصحة وألف سلامة عليكم تحياتى