الصرع- أسباب وطرق العلاج

ايه اسباب الصرع ؟ لماذا يصاب البعض بالصرع ؟ اغلب الناس مانعرفش السبب المحدد عندهم بنقول انه احتمال يكونوا اصيبوا بنقص اكسجين اثناء الولادة الولادة متعسرة ومخهم ما اخدش اكسجين كفاية وبالتالى حصل فيه بؤرة ناقصها تطور او خلل ما فى تكوينها فا يبقى عندها دايما خلل كهربائى.

سبب تانى لحدوث الصرع هو الوراثة ممكن حد يكون عنده فى العيلة هتلاقى اشخاص عندهم صرع وبالتالى بتنتقل القابلية للاصابة

فى ناس بيحصلهم مشاكل فى القلب ويتوقف القلب فترة، مثلا واحدة ست بتولد و او بتعمل عملية والقلب توقف وفضلت فترة ناقص الاكسجين اللى بيوصل للمخ عندها لانه القلب مش بيشتغل، فا دة سبب خلل يسبب الصرع فى المستقبل

ممكن حد يحصله حادثة ياخد خبطة قوية على الرأس وتعمل مثلا نزيف وبالتالى يحصل فى المستقبل مشكلة فى المنطقة اللى خد فيها الخبطة عند المخ فايحصله اعراض صرع دة ينطبق على اللي جاله السكتة الدماغية او Stroke ممكن بعد ما يعالج من السكتة تفضل عنده اعراض صرع فى برضه ناس عندهم مشاكل فى الكبد او فى الرئة دة يؤثر على وظائف المخ عندهم بحيث يحصلهم نوبات صرع اللى بيستعملوا مخدرات او كحوليات ممكن برضه يعانوا من اعراض الصرع نتيجة الحاجات اللى بيستعملوها او بعض الادوية

السيدات اللى عندهم مشاكل مع الدورة الهرمونات تأثير الهرمونات ممكن يسبب نوبات صرع

 

كلنا جالنا نوبات صرع قبل كدة  العين لما ترف دى نوبة صرع بسيطة

 

فى حاجة تانية لما حد مثلا يحس بريحة غريبة طول الوقت وماحدش حاسسها غيره او يسمع صوت طنين فى الودن ساعات يروح ويجى ممكن تكون دى نوبة صرع

اللى عاوزة اقولكم عليه كمان مهم نعرفه ان الـ Déjà vu  دة برضه نوبة صرع الـ Déjà vu دة اللى هو ان الواحد يحس انه شاف حاجة قبل كدة بتحصله دلوقتى

بتحصل ازاى العملية دى المخ بيتكون من نصفين فا احد نصفى المخ بيستقبل المعلومة اسرع من التانى هو فى بينهم كوبرى كدة بينسق المسائل يعنى فاللى بيحصل مع الـ Déjà vu انه الواحد بيحصل ان مخه مثلا النصف الايمن بتوصله المعلومة اسرع شوية ويخزنها فى الذاكرة على انها معلومة قديمة يعنى بيخزنها وبعدين تيجى بعد شوية من النص التانى من المخ فا يقول  يعنى انا مخزن دى فى الذاكرة وحاسس انى شفتها قبل كدة  هى الحقيقة خلل كهربائى فى توصيل المعلومة فى وقت مناسب بين نصفى المخ فا هى يعنى مالهاش علاقة بأى حاجة Paranormal ولا حاجة هى خلل كهربائى فامعنى كدة ان فى نوبات صرع بسيطة نصاب بها كلنا احيانا مافيش منها مشكلة لكن نوبات الصرع اللى بتعمل مشاكل ان الانسان يفقد الوعى او يبتدى يبقى عدائى او يبقى خايف كل الاعراض دى لازم لها علاج فى مريض الصرع فى اغلب الاحيان انت ماتقدرش تعرف النوبة هاتحصل امتى فا احنا بنقول ان فى محفزات للنوبة فى مريض الصرع ويستحسن ان احنا نتجنبها بحيث ان المريض يستغنى عن الادوية اذا قدر ايه المحفزات دى اول حاجة قلة النوم لو انت عندك قابلية للاصابة بنوبات دى كتير لازم تنام كفاية مهم جدا لان جهازك العصبى كهرباء وتعبه بيلخبط الكهرباء دى فا انت لازم تريحه وتبعده عن الارهاق ايضا سوء التغذية لانه عناصر الاساسية اللى بتكون جسمنا لازم تكون كلها موجودة وكاملة فى الجسم علشان يقدر يعمل كل وظائفه فا لو انت مريض صرع هتلاقى الكهرباء تأثر لو انت مثلا مش بتاكل كويس الهرمونات هرمونات منع الحمل او يعنى الهرمونات اللى بناخذها فى حبوب منع الحمل او قبل الدورة هتلاقى السيدة نفسها معرضة للاصابة اكتر بالنوبة لو هى مريضة صرع وعلى كدة ننصح السيدات بانهم يحتفظوا بأجندة ويكتبوا فيها يعنى تاريخ الدورة امتى واذا الاعراض مقاربة لحدوث الدورة على اساس تتكلمى مع طبيبك فى موضوع تغيير الادوية حول ميعاد الدورة بحيث تتجنبى حدوث الاصابة بالنوبة يعنى الضغط العصبى الشديد مهم اوى ان انت تكون مرتاح نفسيا علشان جهازك العصبى الكهرباء بتاعته ماتختلش فا انت لو عندك شغل جامد مضايقك وانت مريض صرع اقترح تعمل رياضة لان دى هاتريح جهازك العصبى اوى فى حاجة بحذركم منها اوى الى هى الاضاءة الشديدة والحاجات اللى فيها خطوط بالطول والعرض وبالذات وانتم بتستعملوا الكمبيوتر كمان وانتم قاعدين فى العربية وهتلاقى انت بتسوق فى طريق مثلا على الطريق الزراعى وفى اشجار كتير وبينها الشمس بتروح وتيجى فا انت سايق والاضاءة اللى هى الـ Flash دى هتلاقى الناس بيصابوا بالنوبة وهما قاعدين مثلا فى العربية والاضاءة بتعمل كدة فى وشهم فجأة جاتلهم النوبة فا انت لو قاعد فى عربية وانت مريض صرع وقاعد فى عربية والـ Flash Lights دى بتحصل حاول تخبى وشك او تلبس نظارة او تعمل اى حاجة بحيث الضوء دة مايعملش Flashing فى عنيك برضه الناس اللى بيشتغلوا فى الـ Animation والحاجات اللى هى Visual  الخدع البصرية دى او الناس اللى بيشتغلوا مثلا انا مدرسة او مذيعة او ممرضة او طبيبة او حد بيشتغل مع مجموعة من البشر وبقف قدامهم كتير اقرح من فضلكم ما تلبسوش حاجات مخططة كدة لأن دى بتحفز اللخبطة فى كهرباء المخ عند مرضى الصرع وكمان زى ما انا لابسة كدة حاجة مخططة ها دى بتلخبطلهم النظر فا بتحفز حدوث النوبة العلاج بقى يعنى بيعتمد اساسيا على كل شخص بيختلف عن التانى بيعتمد على خطورة النوبات وازاى انت يعنى بيحصلك ايه فى النوبة وبتحصل قد ايه وهكذا فا العلاج بيختلف من شخص للتانى بس ان هاعرضه يعنى خطوط عامة بنبتدى بالعلاج الدوائى اللى هو بندى ادوية للعيان ونشوف هايحصل ايه لو العملية صعبة جدا وفى بؤرة صرع سيئة بنحاول نعمل جراحة جراحة فى المخ طبعا فى علاجات تانية زى تنبيه العصب الحائر اوالجلسات بالكهرباء دى برضه حاجة كويسة لكن من اهم العلاجات اللى عاوزة اقولكم عليها ان الواحد يعمل تغذية كويسة لجسمه ازاى فاكرين لما قولتلكم عن تكوين الخلية العصبية قولتلكم ان المحور بتاعها بيتكون من ساق كدة وحواليه طبقة من الدهون فاكرين الطبقة من الدهون دى هى اللى بتحمى سلامة المحور دة من ان الكهرباء تتسرب براه زى ما تقولوا دة Coax اللى هو حوالين الكابل بتاع الكهرباء فا انت لما تبقى الطبقة دى عندك ضعيفة او سيئة التكوين هتلاقى الكهرباء اتسربت من المحور لبرة معنى كدة انك عندك قابلية لتسريب الكهرباء وبالتالى حدوث نوبات الصرع اكتر يبقى نعمل ايه المفروض اننا نحسن حالة طبقة الميالين Myelin دى نعمل كدة ازاى ناخد دهون كويسة مناسبة لتكوين الطبقة دى زى ايه اهم حاجة طبعا الاوميجا 3 والحقيقة كل الفيتامينات مفيدة فا انا اقترح تأخذوا فيتامينات متعددة وبالذات الفيتامينات اللى تذوب فى الدهون زى فيتامين د اللى هو بتاع الشمس او نقعد فى الشمس يعنى وكمان بعض الفيتامينات اللى تذوب فى الماء زى فيتامين ب المركب كويس للاعصاب وبعد كدة فى ناس بيقولوا انه التغذية باعشاب معينة او الطب البديل زى الابر الصينية بيستريحوا عليها شوفوا ايه اللى يريحك المهم ان تكون متابع برضه مع طبيبك او تقوله بتعمل ايه من الطب البديل علشان يبقى مافيش حاجات بتتفاعل مع حاجات وتعملك مشكلة فى ارشادات عامة لمرضى الصرع ان احنا بنشوف اذا النوبة خطر عليهم بيفقدوا الوعى وبيحصلهم يعنى حاجات خطر عليهم يقعوا مثلا فى الارض انك لو بتسوق عربية ممنوع لو مش عارف النوبة بتيجى امتى لو انت بتعوم او بتعمل رياضة او بتطبخ خد بالك انك تكون مع شخص مرافقك دايما علشان لو حصل حاجة او تلبس حاجة ان انت مريض صرع علشان لو حصل حاجة الناس يقدروا يساعدوك الحمل ممكن مع مريضة الصرع وبس مطلوب انك تتابعى مع الطبيب وتشوفى اذا الادوية هاتستعمليها مع الحمل ولا لأ فى حاجات تانية عاوزة اقول لكم عليها الـ First Aid اللى هو الاسعافات الاولية لمريض الصرع اهم 3 حاجات ان انت تبعد مريض الصرع عن مصدر الخطر تانى حاجة ان انت ماتكتفهوش لما النوبة تجيله بتجيله التشنجات دى ما تكتفهوش وماتحولش تحط حاجة فى بقه هايعضك وممكن يقطع صباعك مالكش دعوة خالص ببقه ابعد عن بقه والحاجة التالتة ان انت تحطه فى الوضع الجانبى اللى هو لحد ما يفوق لان هو بعد النوبة ما تخلص هتلاقيه فاقد الوعى شوية هتلاقيه احتمال يفقد السيطرة على البول والبراز فا لو انت قريب مريض صرع وبتجيله النوبة باستمرار خلى معاك دايما غيار فى شنطتك دة تلخيص لاسباب وعلاجات مرض الصرع معتمدين عليكم فى مشاهدة بيحصل ايه للمريض علشان العلاج يكون ناجح

اتمنى لكم كل الصحة تحياتى

مرض الصرع- ملاحظة النوبة

تشخيص مريض الصرع يعتمد بالأساس على مراقبة المريض ومعرفة النوبة اللى بتحصله بيكون شكلها ايه علشان نعرف نخمن ايه المشكلة فى المخ يعنى فى اي منطقة ابتدت المشكلة اثناء وجود الطبيب مع المريض مريض الصرع غالبا مش هاتحصل النوبة علشان كدة الطبيب مابيقدرش يحدد بالظبط ايه المشكلة الا لما يسمع من اهل المريض ايه الاعراض اللى حصلتله علشان كدة اهل المريض لازم يكونوا عارفين يوصفوا ايه للطبيب علشان يقدر يشخص المشكلة طبعا فى وسائل تشخيصية زى رسم المخ والحاجات اللى يعنى فى المستشفى لكن دى بتتعمل لما نشك مثلا ان فى ورم او اثناء النوبة نفسها ودة بيحصل نادر اوى يبقى اهم حاجة ان احنا نعرف نراقب ايه فى مريض الصرع علشان نقدر نشخصه فى المستشفى او عند الطبيب علشان كدة عاوزة اعلمكم ازاى تراقبوا مريض الصرع تشوفوا فيه ايه توصفوا ايه للطبيب علشان التشخيص والعلاج يكونوا سهلين اول حاجة لو انت شاكك ان عندك صرع او عند حد فى البيت عنده صرع عاوزة منكم يكون عندكم اجندة تكتبوا فيها نشاطاتكم اليومية تسجلوا فيها ايه فى الاجندة كل يوم مش لازم يكون حاجات معقدة يعنى تكتب بس كلمات بسيطة تكتب ايه فيها تكتب اكلت ايه ايه الانشطة اللى عاملتها فى اليوم خرجت روحت فين وركبت ايه وشوفت ايه وانت ماشى فى الطريق مشاعرك كانت ايه النهاردة حزين سعيد ممكن تحط علامة بس اتخانقت مع حد كدة اذا بتاخد ادوية او اي منبهات او بتستعمل مكيفات اكتب كمان يبقى اهم نقط عاوزين نعرفها منك أكلت ايه مارست ايه النهاردة من انشطة خرجت روحت فين ما هى مشاعرك واذا كنت بتستعمل ادوية الخمس نقط دى مهمة جدا فى تحديد مسار المرض عند المريض الاجندة دى هتساعدك جدا فى وصف حالتك للطبيب اذا كنت انت المريض او حد عندك فى البيت مريض او انت شاكك انه مريض تخلى عندك اجندة ليه كدة احنا بنعتمد على اربعة حالات او اربعة مراحل لنوبة الصرع ان احنا نوصفها مرحلة ما قبل النوبة بأيام بنقول عليها Prodrome المرحلة دى ممكن العيان يبتدى يبقى عصبى عدائى بيعمل حاجات غريبة مثلا بيعمل كدة بيهرش بيمضغ كدة فا انت تلاحظ فى مجموعة الايام اللى قبل النوبة طبعا انت مش عارف امتى النوبة هاتيجى فا انت بتسجل كل يوم علشان تشوف اذا كانت تصرفاته ابتدت تبقى غريبة قبل اليوم اللى جت فيه النوبة الحاجة التانية ان العيان يجيله حاجة اسمها الـ Aura Aura دى مرحلة ما قبل النوبة مباشرة بعدة دقايق او ساعات هتلاقى العيان بيقولك اه انا عندى الاحساس دة جاى حاجة احساس فى بطنه احيانا ممكن يشوف اضواء او يبتدى يعمل حاجات غريبة او يترعب يبقى خايف من حاجة او يمكن يقلع هدومه لكن الاحساس دة هو اللى بيسبق النوبة مباشرة Aura فا احنا عاوزين نعرف اذا كان العيان جاتله Aura ولا لأ وبعدين فى النوبة نفسها اثناء النوبة عاوزين اثناء نوبة الصرع عاوزينك تتابع حاجات معينة مع العيان وفى كمان متابعة لما بعد النوبة العيان هايعمل حاجات معينة عاوزين نعرفها منك طيب نبتدى نعرف اثناء مراقبة النوبة نفسها نراقب ايه اول حاجة اول ما تحس ان المريض ابتدى جاتله النوبة لو تحب ممكن تسجل بالموبايل بيحصل ايه دة يبقى اسهل جدا على الطبيب تجيب الموبايل وتبتدى تسجل تانى حاجة انت انت تسجل وقت وتاريخ حدوث النوبة يعنى مهم اوى نعرف ابتدت امتى وخلصت امتى وتاريخ النهاردة كام وهكذا تقول تسجل العيان كان بيعمل ايه بالظبط لما النوبة ابتدت هل كان بياكل حاجة بيشرب حاجة بيشوف حاجة فى التلفزيون بتعمل اضواء قوية او قاعد فى عربية والاضواء بين الشجر بتاعة الشمس بتعمل ومضات كدة فى وشه هو يمكن اتعرض لفلاش من كاميرا هل اثناء يعنى اول ما ابتدت النوبة ابتدى يتنفس بعمق يعمل كدة سجل كل دة هل كان بذل مجهود رهيب قبل النوبة كان مثلا بيجرى او كان بيشتغل جامد لو انت سيدة اكتبى علاقة النوبة بايام الحيض عندك شوفى اذا كانت لها علاقة بالحيض انها بتزيد قبل الحيض او مع الحيض واذا كنتى بتاخدى حبوب منع الحمل من فضلك سجليها طيب اثناء النوبة عايزاك تراقب الآتى راقب اى جزء فى جسمه ابتدت فيه النوبة يعنى افرض النوبة ابتدت عندى فى نصف المخ الايسر فاتلاقى جسمى النص الايمن ابتدى يعمل كدة وبعدين راحت النوبة الناحية التانية مثلا وبعدين تحولت لنوبة كاملة فا او مثلا العيان ابتدأ يعمل يبربش بعنيه او يعمل كدة اكتب كل حاجة ازاى ابتدت النوبة وفين وانتشرت فى اى اتجاه يعنى بعد ايدى راحت لرجلى ولا راحت فين عايزة كمان تراقب انك تراقب وعيه تسال العيان وسجل هو بيقولك ايه اسأله اسمه ايه ورد شوف اذا كان الرد بتاعه واضح ولا لأ اسأله عن مشاعره انت حاسس بأيه وسجل تعبيرات وجهه وشوف الانطباع اذا كان هو واع للوقت ولا لا انت عارف النهاردة كام احنا فين انت مين انا مين وهكذا شوف مستوى وعيه هل هو فاهم انت بتقول ايه هل هو واع للمكان والزمان هل مشاعره طبيعية وتعبيرات وجهه وسجل كل دة طيب كمان لاحظ اذا كان عنده شد فى حركات العضلات عنده يعنى هل الشد هو بس عامل كدة مثلا ولا عامل كدة شد وتراخى اكتب انت شايف ايه اذا قدرت فى بعض الحركات الاوتوماتيكية اللى هاتشوفها على العيان سجل من فضلك اذا لاحظتها الحركات الاوتوماتيكية زى ايه زى البلع مضغ فرك اليدين او خلع الملابس مشى او جرى يعنى هايعمل حاجة كدة اوتوماتيكية كأنه زى الالة يعنى كأنه Robot لاحظ ايضا على العيان اذا لون الجلد اتغير يعنى يزرق او بقى لونه احمر جامد او كدة سجل لاحظ ايضا اذا حدث تبول او تبرز لا ارادى وسجل ملاحظة الانشطة اليومية لمريض الصرع من اهم وانجح وسائل تشخيص المرض وعلاجه بدون مضاعفات كتير علشان كدة مطلوب منكم تتعلموا لو عندكم مريض صرع فى البيت انكم تراقبوه صح وتكتبوا فى اجندة انشطته اليومية او هو ياخد باله من نفسه اذا ممكن وتخدوا بالكم من الاربع مراحل دى مرحلة ما قبل النوبة بايام مرحلة الـ Aura اللى هى قبل النوبة على طول النوبة نفسها ومابعد النوبة التفاصيل دى هاتهم الطبيب جدا فى علاج المرض علشان نفهم المرض اكتر تابعوا معايا فى Videos  تانية عن النوبات نفسها بـ Videos  توضيحية علشان تفهموا اكتر ممكن نشوف ايه مع المريض

اتمنى لكم كل الصحة تحياتى

الإمساك

الإمساك هو عدم القدرة على التبرز بانتظام لدرجة حدوث مشاكل نتيجة لذلك هل يوجد معدل ثابت للجميع ؟ لا أحيانا في ناس بيعملوا تبرز مرتين تلاتة في اليوم وفي ناس بيعملوا تبرز مرتين تلاتة في الاسبوع المهم إنك تكون مستريح وماعندكش مشاكل أو يعني شكوى من إنك مابتروحش الحمام إيه المشكلة من الإمساك ؟ لماذا الإمساك خطير على صحتك لما يكون عندك تجمع للبراز في القولون دى سموم جوا جسمك ممكن تدخل في الدم السموم منه وتعملك مثلا صداع رائحة فم كريهة مشاكل في الحالة العامة عموما تلاقيك مرهق ومضايق طول الوقت كمان ممكن وجودها لفترة طوية يسبب مشاكل في القولون نفسه على المدى الطويل ومع الأكل الغير صحي والإمساك المزمن أحد أسباب سرطان القولون هو دة أيضا بنلاقي ناس كتير عندهم مشاكل من شرخ شرجي أو بواسير في ناس عندهم يعني احتجاز للبراز لدرجة كبار السن بالذات ممكن يحصل إنه البراز يرجع من فوق يعني يتقيأ براز وفي الحالة دي العيان بيتوفى لأنه ماحليناش المشكلة في وقتها الأسباب بتاعة الإمساك هي في 3 خطوط عريضة هي نقص مياه مابتشربش مياه كتير نقص حركة مابتتحركش كفاية علشان تعمل ماساج للأمعاء بعضلات البطن وسوء تغذية يعني نقصك عنصر غذائي معين قد يكون فيتامين أو معدن ما وممكن يكون مابتاكلش ألياف أهم حاجة إن إحنا نأكل ألياف فيتامين د وكالسيوم والناس اللي بيعملوا دايت طول الوقت يلاحظوا كمان إن في كسل في الأمعاء الشباب اللي بيأخذوا Whey Protein والحاجات اللي في الجيم بيأخوذها أحيانا بيعانوا من أعراض جانبية لأنها بتسبب إمساك النساء أكتر من الرجال عرضة للإصابة بالإمساك نتيجة الهرمونات والحمل وحبوب منع الحمل اللي بيأخذوها وكدة بتسبب للأسف كسل في الأمعاء فا تلاقي في ناس سيدات عندهم طول عمرهم إمساك لكنهم مافيش أي حاجة بيعملوها غلط لكنهم مضطرين دايما إنهم يعملوا مجهود زيادة علشان عملية التبرز تحدث أيضا النساء اللي عندهم أورام في الرحم أورام عضلية حميدة الرحم بيضغط على القولون فا للأسف بيعمل إمساك مزمن وعلشان كدة السيدات اللي عندهم إمساك مزمن دايما بقول لهم روحوا لدكتور النساء علشان تتأكدوا إنه مافيش حاجة معيقة طريق البراز في القولون كسل الغدة الدرقية والحمل وأمراض القولون عموما وأي مشاكل صحية عامة قد تسبب الإمساك علشان كدة أي أمراض عامة ممكن ترتبط معاها أعراض الإمساك استعمال أدوية معينة زي المسكنات ممكن يعمل إمساك وعلشان كدة بقترح دايما تقروا الـ Pamphlet  اللي مع الأدوية علشان تعرفوا إذا كانت هي السبب في الأعراض اللي بتعانوا منها اللي مضايقاكم  أدوية الحموضة وأدوية الالتهاب والحديد والمسكنات بتعمل إمساك عند بعض الناس لا يوجد سبب معروف للإمساك هما بس عندهم إمساك كدة دي طبيعتهم علشان كدة بأقترح عليهم يعملوا حاجات معينة هاقولها لكم حالا نعالج الإمساك إزاي؟ أهم حاجة نتخلص من السبب نتحرك كفاية نشرب مياه كتير نتغذى كويس اللي ناقصنا من الفيتامينات والمعادن نأخذوا في عادات معينة عاوزة أقولكم عليها كمان إن إحنا نستعمل الـ Toilet في وقت معين من اليوم كل يوم يعني الصبح مثلا قبل ما تروح الشغل أقعد شوية على الـ Toilet وريح أعصابك اسمع موسيقى أو اسمع صوت المياه بيتساقط والأبحاث بتقول إنك لو قعدت بزاوية 70 درجة على الـ Toilet ورفعت رجلك على حاجة دة بيريح العضلة اللي هي قابضة في قاع الحوض فا بيخليك تخرج أسهل حاجة تانية إن في بعض الناس بيقولوا بنسترح لما نعمل ماساج للبطن بس إزاي نعمل ماساج لو أنتم شايفين هنا القولون القولون الصاعد وبعدين المستعرض وبعدين النازل دة إتجاه البراز فا أنت لو عملت ماساج لنفسك ها تساعد نفسك فا تعمل ماساج من الناحية اليمين وأنت طالع على الشمال على تحت دة يعني كأن على بطنك ساعة وأنت بتعمل ماساج باتجاه عقارب الساعة Okay دة بيساعد كمان حاجة تانية لا تتجاهل الشعور بإنك عاوز تروح الحمام كل ما يجيلك الشعور لازم تروح ما تكسلش التغذية مهمة جدا علشان كدة هاشرح لكم دلوقتي ممكن نأكل إيه يفيدنا في عملية الإخراج أهم حاجة إن إحنا نأكل فواكه فيها ألياف مثلا الموز والحمضيات والفواكه المجففة زى البلح والبرقوق والقراصية والزبيب ممتازة جدا أقترح كمان نأخذ الحبوب زي السمسم وحبة البركة وكمان الزيوت كويسة جدا نزود شوية في الزيوت في الأكل والأعشاب الجميلة زي النعناع والزعتر ممتازة ممكن كمان نأخذ عسل ومن الأدوية اللي ممكن نأخذها البران هي دواء وغذاء عادي مفيد لك يعني نأخذ بران كويس أوي ونأخذ معاها أكل صحي وبالذات اللي فيه كالسيوم وفيتامين D3 اللي هو بتاع الشمس أو نقعد في الشمس يعني كفاية في ناس بيأخذوا أدوية زي مثلا Milk Of Magnesia كويس أوي لعملية الإخراج أيضا في ناس بيقولوا إنهم بيستريحوا جدا على الصبار الصبار بيتباع في صورة جل أو ممكن تعملوا أنت في البيت لو أنت عندك زرعة صبار تأخذ معلقة صغيرة وتحطها على كباية مياه كبيرة تخلطها بيها وتشربها هي بس المشكلة لو زودت الجرعة هايجيلك إسهال فظيع فا خد بالك إنك ما تزودش الجرعة مطلوب مايكونش عندك الإمساك فترة طويلة لأنه الإمساك المزمن والاعتماد على الأدوية دة مش كويس ها يسبب كسل في الأمعاء ودي حاجة مش كويسة في الصيدلية في أدوية لحالات الإمساك الشديدة جدا لكن ماتعتمدش عليها دايما اعتمد على الغذاء الصحي والفواكه المجففة دي أحسن طريقة أنك تأخذها بانتظام علشان تسهل عملية الإخراج الإمساك ممكن يكون عرض لحاجة لو جه فجأة لاحظت إن في إمساك شديد مش متعود عليه لازم تتوجه فورا لطبيب أمراض باطنه ولو هو مزمن تعلم تتعايش معاه تعلم إنك تعمل حاجات دايما علشان تخرج بانتظام علشان تقي نفسك من أمراض كتير زي البواسير والشرخ الشرجي أو السرطان

تمنياتي لكم بكل الصحة تحياتي

مبيدات حشرية آمنة للأطفال

المبيدات الحشرية ذات الرائحة القوية اللي بنستعملها في البيوت منتشرة أوي في مصر والدول العربية للأسف لها أضرار فظيعة على أطفالنا بالذات على جهازهم العصبي والتنفسي والمناعي والكبد يعني كل حاجة في جسمهم ممكن تتأثر سلبا بالمضادات الفظيعة دي علشان كدة أنا من رأيي إن إحنا بدل ما نستعمل مضادات السيئة جدا دي نختار حاجة تكون صديقة للبيئة وبالتالي مش خطر على أطفالنا.

عندي شوية اقتراحات في سلسلة من الـ Videos ها ابتدي بواحد منا في الفيديو دة إزاي نتغلب على مشكلة الحشرات الزاحفة زي النمل والصراصير وأحيانا البراغيث ممكن ينفع معاها شوية حاجات تانية .مبدئيا ممكن نستعمل حاجات طبيعية زي ها تستغربي أوي بس ممكن تستعملي قرفة أو بودرة تلك للتخلص من النمل لو رشتيها في طريقهم هي بتكسر مفاصلهم فا لو أنتِ استعملتي بودرة تلك أو قرفة في الأماكن اللي بيدخل منها النمل ها تلاقي إنه النمل بالتدريج قل في البيت لو رشتي Tabasco عند المكان اللي فيه الصراصير هتلاقي إن الصراصير ما بتحبهوش وما بتجيش في المكان اللي هو فيه ولو حطيتي فلفل أحمر بودرة فلفل أحمر على أماكن خروج الصراصير هتلاقيهم برضه مابقوش يجوا فيها فا الحاجات الطبيعية دي مش مضرة بلأطفال وممكن تستعمليها في البيت لمعالجة الحشرات الزاحفة.

حاجة كمان عاوزة أقترحها مبيد حشري ممتاز وبيتكون من ملح طبيعي بنلاقيه في الطبيعة اسمه مبيد Borax أو ملح حمض البوريك الـ Borax دة بنعمل منه محلول ممكن تطلبوه من الصيدلي هو مش بسهولة نلاقيه في الصيدليات للأسف لكن في الكبيرة يمكن نلاقيه نطلب من الصيدلي يعملنا محلول 20 -25% أو إحنا نعمله في البيت فا المطلوب إن إحنا علشان نعمل المحلول دة مطلوب كوباية إزاز أقماع حمض البوريك طبعا وإزازة Spray مستعملة من حاجة استعملناها قبل كدة بس نحط عليها علامة مبيد خطر ومياه دافية لطريقة تحضير المحلول ها تجيبي العلبة اللي فيها الـ Borax ودايما خلي فيها معلقة علشان تحضري فيها المحلول وتحطيه في الكوباية لحد ربع الكوباية تقريبا تقريبا خدي بالك مايكونش في أطفال في المكان وأنتِ بتشتغلي واغسلي إيديكي كويس بعدها واملي الكوباية لحد الآخر بمياه دافية هتلاقيه عمل فقاقيع كدة ممكن تستعملي المعلقة في التقليب لكن بعدها تنشفيها كويس بيأخذ وقت طويل شوية على ما يدوب لكن في الآخر ها يدوب خالص ها يبقى محلول متجانس لما تتأكدي إنه داب تماما لازم يبقى دايب تماما علشان تعرفي تصبيه في علبة الـ Spray تقدري تحطيه بعد كدة في علبة Spray  مستعملة حاجة قديمة زي مثلا كان Spray إزاز أو حاجة بس تكوني غسلتيها كويس استعملي قمع مناسب لحجم الإزازة وتصبيها خدي بالك إنه لو مش دايب كويس يمكن يبقى فيه مشكلة في الرش لو رشتي بالمحلول دة في الأركان وعند البلاعات هتلاقي إنه الحشرات قلت كتير أوي عن قبل كدة مش هاتموت تماما كلها لكن هي ممتازة لأنها آمنة للأطفال أحيانا بنرش كمان البودر دي على السجاد لو عندنا براغيث في البيت بس نقطة لو فيه أطفال بيزحفوا خدي باللك إن دة خطر عليهم فا بس لما يكون في البيت كبار ماحدش بحط إيده في الأرض وبعدين يأكل ممكن تستعمليه البودرة دي على السجاد علشان قتل البراغيث دي ملخص لبعض المبيدات الآمنة للحشرات بدل الضارة جدا بالأطفال اللي بنستعملها الكيماوية منها كلها طبيعية دة ملح ودي بودرة من حاجات نباتية

تمنياتي لكم بكل الصحة

فصائل الدم

البرد والإنفلونزا

ت أولية: نزيف الذراع

الكولسترول

الإغماء

الإسعافات الأولية: مقدمة