تمارين كيجل لتقوية قاع الحوض للسيدات والرجال

تمارين كيجل او تمارين تقوية قاع الحوض اخترعها عالم امريكى طبيب نساء امريكى اسمه Arnold Kegel التمارين دى ممكن تساعد الرجال والنساء على تحسين وظائف معينة فى الجسم هاشرحها لكم دلوقتى

الفكرة ان احنا بنقوى عضلات موجودة فى قاع الحوض والعضلات دى بتساعدنا على الاحتفاظ بحاجات معينة لازم تفضل فوق فى الحوض

السيدات اللى بيعانوا من تسرب البول او البراز مع بعض الحالات المرضية الخفيفة منها ممكن نعالجهم بالتمرينات دى

ايضا الرجال اللى عندهم نفس المشكلة ممكن نعالجهم كدة كمان السيدات اللى عندهم والرجال اللى عندهم سقوط فى بعض الاعضاء اللى موجودة فى الحوض لتحت بنساعد بتقوية العضلة دى على بقائها فى مكانها

ايضا السيدات اللى عندهم مشاكل بعد الولادة من اتساع المهبل لدرجة ان علاقتهم الزوجية تاثرت سلبا ممكن نساعدهم بالتمرينات دى وايضا السيدات اللى عندهم صعوبة فى الوصول للنشوة او الـ Orgasm  اللى بيشتكوا من ان يمكن  دة بسبب ان حجم المهبل يعنى اوسع شوية من حجم القضيب عند الزوج فا احنا بنساعدهم بالتمرينات دى على انهم يوصلو للـ Orgasm  بطريقة اسهل

ايضا الرجال اللى عندهم مشاكل فى القذف سرعة القذف بنقول لهم يعملوا التمرينات دى كا نوع من تأخير القذف

التمرينات دى بتعوض ضعف عضلات قاع الحوض يعنى بتقويها وعضلات قاع الحوض هنا موجودة عند السيدات هنا فى قاع الحوض وفى الرجال ايضا هنا زى ما انتوا شايفين مع السهم

والسيدة ممكن تعملها باستخدام ادوات زى مثلا كرة بتتباع فى الصيدليات وبتحطها جوة المهبل وبتعمل عليها التمرين بس الحقيقة عمل التمرين من غيرها ممكن برضه يعنى النتائج مش فارقة اوى بس فى سيدات بيقولوا بيحسوا انهم بينقبضوا اكتر باستعمال الكرة

طيب نعمل التمرين ازاى اول حاجة لازم نلاقى العضلة صح نلاقيها ازاى ؟ اول مرة بس لما تيجى تدور عليها هى دى المرة الوحيدة اللى هاتعمل الانقباض بتاع العضلة وانت فى الحمام بتعمل البىيبى يعنى بتعمل التبول او التبرز

فا وانت فى الحمام او وانتِ فى الحمام اثناء خروج البول او البراز اقبض العضلة اللى بتمنع خروجه وقفه عن الخروج هى دى عضلة قاع الحوض لاقيتها ماتعملش بقى تانى كدة وانت بتعمل تبرز او تبول لان دة هايعملك امساك او مشاكل فى القناة البولية

وانتوا دايما قاعدين مثلا على المكتب على الكمبيوتر او فى العربية او واقفين مستنيين حاجة طابور ممكن تعملوا التمرين ازاى؟

نقبض العضلة دى لمدة 10 ثوانى اللى هى فى قاع الحوض دى 10 ثوانى نعد لـ 10 وبعدين نرخيها 10 ثوانى وكمان 10 ثوانى وهكذا 3 4 105  مرات لو تقدروا تعملو كدة كل يوم هتلاقى بالتدريج هتلاقوا نتائج كويسة من المشاكل اللى انتوا بتعانوا منها

التمرين دة ممنوع يعملوا الناس اللى عندهم التهابات فى البروستاتا او امساك مزمن او مشاكل فى القناة البولية زى التهابات القناة البولية المثانة البولية وهكذا

تمارين كيجل بتستعمل طبيا فا لو انتوا حابين تسمعوا عنها او تعرفوا عنها اكثر اقترح سؤال الطبيب هايساعدكم ازاى تعملوها وتعرفوا تعملوها افضل تحت اشراف طبى

اتمنى لكم كل الصحة والتوفيق تحياتى

سن انقطاع الحيض (سن اليأس)

Menopause  هو سن توقف الطمث هى فترة من حياة السيدة حول سن الخمسين تبتدى الدورة الشهرية تتغيب عنها واذا تغيبت لمدة 12 شهر متتالية نقول عليها دخلت فى سن انقطاع الطمث هى بتحدث طبيعيا حول سن الخمسين لكن ممكن تحدث قبل كدة قبل سن الاربعين بنقول عليه سن انقطاع الطمث مبكر وممكن يكون له سبب وراثى ممكن يكون مرض ما ممكن تكون السيدة تعرضت لاشعاع علاجى اوقف وظيفة المبايض عندها او ازالت الرحم والمبايض نتيجة سبب ما يبقى ممكن سن انقطاع الطمث دة يحدث للسيدة فجأة بعد مرض ما بس بنقول عليه دة مبكر او مع سن طبيعى حول سن الخمسين فى الحالتين ها تعانى من مشكلة اعراض معينة تحدث نتيجة نقص هرمون الـ Estrogen اللى هو هرمون الانوثة يبقى المشكلة مع سن انقطاع الطمث هو ان غابت وظيفة المبيض الاساسية اللى هى انتاج الـ Estrogen وكمان طبعا الوظيفة الثانية المهمة جدا اللى هى عمل البويضات فا انت غير قادرة على الانجاب مرة اخرى اللى بيحصل انه المبيض بينكمش وبالتالى تقل قدرته على اداء وظائفه

المشاكل الصحية المتعلقة بسن انقطاع الطمث تكون فى ثلاثة خطوط عريضة المشاكل العضوية اللى بتحصل يعنى انت حاسة اعراض ظاهرة عليكى والمشاكل النفسية متضايقة او مكتئبة او عندك رغبة اقل فى ممارسة العلاقة الحميمة وايضا المضاعفات اللى ممكن تحصل بسبب سن انقطاع الطمث

تعالوا نتكلم الاول فى الاعراض اول الاعراض اول اللى هاتبتدى تلاحظيها انه الدورة الشهرية ابتدت تتلخبط يعنى بقت تيجى مثلا مرتين فى الشهر بدل مرة او تغيب ثلاثة شهور او الكمية اكثر بكتير او اقل بكتير لخبطة كدة غريبة

العلامة الثانية المهمة انك تلاحظى حاجة اسمها Hot Flashes يعنى تحسى انك حرانة فجأة كدة هبات حرارية على جسمك وجلدك احمر وعرقانة وبتيجى ساعات بالليل بنقول عليها Nights Sweats عرق او تعرق ليلى هايقومك من النوم وطبعا دة ها يسببلك ارق وممكن يضايقك فى شغلك تانى يوم ممكن برضه تلاحظى مشاكل فى المهبل يعنى يكون اكثر جفافا من السابق او فى حرقان او حكة او الم اثناء العلاقة الحميمة كمان ممكن تلاقى مشاكل فى سلس البول يعنى تلاقى انه فقدتى شوية بول مع الكحة او العطس الحقيقة ان دة سببه انه الاعضاء الداخلية فى الجسم بتهبط شوية لتحت مع تقدم السن وبالتالى بتضغط على قناة مجرى البول اللى بتخرج البول لتحت فا كل ما تضغطى انت مثلا بالكحة او العطس يزيد الضغط عليها وتسربى نقط من البول

فى مشكلة ثانية ممكن تحصل انك وزنك هتلاقيه بيزيد شوية- ليه؟ الجسم بيحاول يخزن هرمونات الانوثة فى مكان ما ودة ممكن يتعمل فى الخلايا الدهنية فا هتلاقى ان دهون البطن ابتدت تتجمع جوه البطن دى ما بتتحلش بشفط الدهون على فكرة وهتلاقى كدة ظهر بطن وجناب وحاجات جديدة ما اتعودتيش عليها فى جسمك

فى حاجة ثانية ممكن تلاحظيها انه يمكن تلاحظى زيادة فى الشعر فى منطقة الذقن وحوالين منطقة الشنب ويمكن تلاحظى حبوب جديدة ظهرت على الوجه دة بسبب اختلال الهرمونات بحيث هرمونات الذكورة بيبان اثرها اكتر عليكى احنا برضه السيدات عندنا هرمونات ذكورة

هتلاحظى برضه انك عصبية شوية زيادة عن اللزوم وعاطفية اوى بتعيطى فجأة من غير سبب او صبرك اقل من زمان وتركيزك كمان فى القراءة اقل بكتير عن زمان قد تلاحظى ايضا مشاكل نفسية زى انك مصابة بأكتئاب يعنى قوى او ضعيف المهم انك تحسى انك زعلانة او فى حاجة مضليقاكى طول الوقت فى كمان حاجة انك بتفقدى الرغبة الجنسية احيانا مش فى كل السيدات لكن دى برضه اسباب نفسية ممكن تسببلك مشاكل فى حياتك الزوجية

المضاعفات اللى ممكن تحصل مع سن اليأس او سن انقطاع الطمث كما احب ان اسميه هى متعلقة بان احنا بتقل كثافة العظام عندنا فا هشاشة العظام من اهم المشاكل اللى ممكن نواجهها ودى لازم نتعامل معاها طبيا الحاجة الثانية اننا بنعانى من مشاكل فى الجهاز الدورى اللى هو القلب والاوعية الدموية احنا معرضات اكثر للاصابة بمشاكل فى القلب و فى الاوعية الدموية عموما زى امراض الضغط والجلطة اوالسكتة الدماغية دى كلها ممكن تزيد فرصتنا فيها بعد سن انقطاع الطمث

ازاى نعرف ان السيدة فى هذا السن ؟ مافيش تحليل دم ممكن نعمله احنا بنخلى السيدة تقولنا على اللاعراض واحنا نتخيل او نتوقع ان هى دى اعراض سن انطاع الطمث يعنى ما تقدريش تعملى تحليل دم علشان تعرفى اذا كانت الهرمونات عندك كويسة ولا لأ لانه هى عمالة بتختلف كل يوم حاجة عن التانية فا مش بنقدر نميزه من تحليل دم

علاج سن انقطاع الطمث بنتكلم فى خطين الحقيقة انا بجدهم متكاملين والمفروض تنظرى فيهم هما الاثنين الاول هو الخط الطبى انك تروحى عند الطبيب وتاخدى حاجة تعوضلك الهرمونات زى فى سيدات بياخدوا هرمونات بنوع اللى بنقول عليها هرمون الـ Replacement Therapy (HRT) لكن مش كل السيدات مسموح لهم ياخدوا العلاج دة بسبب تاريخهم المرضى يعنى لو عندك تاريخ فى الاسرة الاصابة بالسرطان او امراض معينة مش مسموح ان انت تاخدى الهرمونات دى فى سيدات بياخدوا حاجة اسمها Oral Contraceptive Pills او يعنى Birth Control Pills او يعنى حبوب منع الحمل الحبوب دى فيها هرمونات برضه فا ممكن تكون بتعوض الهرمونات المفقودة بس مش كل السيدات بيكونوا سعيدات بالنتيجة

بعض السيدات بتكتفوا باستعمال كريمات تحتوى على هرمون الـ Estrogen ويتعملوه حوالين منطقة المهبل وممكن دى فكرة كويسة والسيدات اللى بيعانوا من مشاكل نفسية ممكن يستعملوا مضادات اكتئاب والسيدات اللى بيعانوا من سلس البول فى عندنا اقتراح اننا نستعمل عند الدكتور حقن اسمها حقن Collagen الطبيب بيدخل فى منطقة قرب المثانة البولية ويحقن Collagen اللى بيحصل انه المنطقة دى بتبقى اضيق شوية فا تسرب البول بيقل يعنى مع استعمال الحقن دى

العلاجات البديلة اللى ممكن نستعملها بنفسنا هى استعمال اى حاجة تحتوى على هرمونات Estrogen او هرمونات الانوثة طبيعية من مصادر نباتية زى ايه ؟

اى حاجة فيها صويا زى كبسولات فيها صويا يعنى او اكل زى فول الصويا او الحمص او العدس كل دى تحتوى على Estrogen او اسمهم Isoflavones  دول هرمونات انوثة طبيعية بس بكمية اقل بكتير من اللى بيديهالك الدكتور فى الدواء بعض السيدات ممكن يكون عندهم مشاكل صحية سابقة تستدعى انك تتكلمى مع طبيبك الاول قبل استعمال  الحاجات دى بكميات كبيرة يعنى لو انت بتروحى للدكتور علشان دكتور النساء علشان تشوفى اعراض الطمث او انقطاعه كلميه برضه عن اى حاجة طبيعية بتاخديها اذكريها للدكتور

المشكلة الثانية ان احنا متعرضين اكثر للاصابة بمشاكل فى العظام علشان كدة مهم اوى ان انت تاخدى فيتامين D3 بتاع الشمس او تقعدى فى الشمس وتاخدى منتجات البان او كالسيم وفيتامين D3 فى كبسولة واحدة او حباية واحدة ممكن برضه بعض السيدات بيقولوا انا بحب اخد فيتامينات متعددة برضه دى فكرة كويسة الحاجة الثالثة المهمة هى فيتامين E فيتامين E دة كويس اوى علشان بيخليكى جلدك طرى اكتر يعنى ممكن تحطيه على جلدك وممكن تاخديه كبسولات وهو الحقيقة موجود كمان فى كبسولات الاوميجا 3 فا انت لو اخدى كبسولات اوميجا 3 فا دى حاجة كويسة يعنى محتوية على فيتامين E كمان وصديقك بقى كل الزيوت المحتوية على فيتامين E من الطبيعة اللى هى من اصول نباتية يعنى زيت الزيتون مثلا والمكسرات والحبوب اللى هى زى السمسم كلها تحتوى على فيتامين E ودة كويس اوى بس خدى بالك من السعرات طبعا لو كلتى جنزبيل او زنجبيل دة كويس للدورة الدموية وبينشط عندك نشاط كل الانسجة فا دى حاجة كويسة علشان تحسنى من انتاج الهرمونات عندك

فى حاجات بقى زى مثلا عشبة اسمها Black Cohosh او Wild Yam اليام البرى بعض السيدات سعيدات بالنتيجة بيستعملوه كا كريم او كبسولات جربيه يمكن يعجبك النتيجة

بعض السيدات بيقولوا انا شايفة تأثير الابر الصينية كويس اوى الابر الصينية بتشتغل على مستويات تحفيذ انتاج هرمونات وفى سيدات بيقولوا لما بستعمل الابر الصينية مع الرياضة بشوف نتيجة ممتازة

بنقول بقى اسلوب الحياة الصحى اللى هو انك تعملى رياضة وتاكلى كويس كل الحاجات الصحية فاكهة وخضار وزيوت نباتية كل دة ممتاز جدا لتحفيز انتاج الـ Estrogen عندك بطريقة طبيعية توقفى عن التدخين لان دة هاينقذ قلبك من مضاعفات مش كويسة ممكن تجربى تمارين اسمها كيجل انك تعملى انقباض للعضلة اللى فى قاع الحوض بأستمرار هاقوللكم عنها فى فيديو تانى ازاى بنعملها بس دى يعنى مقدمة لها

فى اليابان لاقوا ان السيدات اليابانيات بيعانوا اقل بكتير من اعراض سن انقطاع الطمث عن السيدات الغربيات واستنتجوا انه سبب كدة قد يكون فى انه اكلهم بيحتوى على حاجات طبيعية وصويا ونباتية اكتر وكمان بيتحركوا اكتر وان الثقافة اليابانية تحترم جدا دور المرأة حتى بعد التوقف عن الانجاب يعنى هى مش وظيفتها بس انها بتخلف لا دى عندها وظائف تانية كتير والثقافة اليابانية بتحترم دة جدا فا الحالة النفسية المتعلقة بفكرة انا غير قادرة على الانجاب اللى بتديهالنا ثقافتنا ممكن تكون سبب عندك كبير للأكتئاب الحياة بعد سن انطاع الطمث هى مرحلة جديدة ممكن نعمل منها حاجات كتير نتعلم تعليم جديد نفتح شركة جديدة مشروع جديد الحياة جميلة واحنا مش موجودين بس علشان ننجب اطفال عندنا وظائف اخرى كتير فى الحياة

استمتعى بحياتك وبكل سن بتمرى بيه واتمنى لك كل الصحة والسعادة تحياتى

حديث البلوغ مع طفلتك

اطفالنا بيكبروا بسرعة بين يوم وليلة وبنلاقيهم تحولوا من اطفال لبالغين الفيديو دة عن تحضير بنتك لمرحلة البلوغ اهم حاجة تعرفيها ان الاستعداد لمرحلة البلوغ يبدأ من سن صغير جدا يمكن من 4 سنين تبتدى تقولى لبنتك ان فى فروق بين البنت والولد تشريحيا فى شكلهم وبالتدريج بقى ايه تخدى العملية كل فترة تتكلمى مع الطفلة عن حاجات معينة مثلا توريها صور بنات وصور ولاد وبعدين اما تكبر شوية اما يبقى عندها 7-8 سنين تبتدى تكلميها عن امكانية حدوث الدورة الشهرية لازم تكلميها عن ان الدورة الشهرية هاتحصل قبل ما تحصلها ليه ؟  لأن ممكن الدورة لو حصلت وهى مش عارفة عنها حاجة تجيبلها صدمة نفسية كبيرة هى فجأة لاقيت دم فا مش عارفة حصل ايه وهاتحس بالرعب والخوف وتكون مكسوفة منك احسن تعاقبيها او خايفة منك فامهم اوى انك تفهمى طفلتك انك عارفة هايحصل ايه وتخليها هى مستعدة بحيث تكون جاهزة واعصابها هادئة خليكى جادة فى الحديث عن الموضوع خليكى صادقة ودقيقة واستعملى تعبيرات علمية ومحترمة لجسمها خليكى متفتحة يعنى ماتقوليلهاش مثلا ان الحاجات دى عيب هى دة جسمها ودى وظيفته ولازم تعرف عنها خليكى عملية كمان اول ما تبتدى تلاحظى مثلا انه الثدى ابتدى يكبر دى علامة ان البلوغ هايحصل قريب وعلامة كمان انك لازم تروحى تشترى لها ملابس داخلية جديدة

مرحلة شراء الملابس والفوط الصحية والحاجات دى ممكن تعمليها فى صورة هدية انك تجيبيلها هدية معاكى باسكت كدة او شنطة وفيها الحاجات اللى ممكن تساعدها انها تدخل فى مرحلة النضوج اللى هى يعنى البلوغ ونبتدى بقى ندخل فى المراهقة وكدة دايما فكريها كل يوم انك بتحبيها وان انت بتشجعيها على تقبل شكلها الجديد لانها هاتكون حاسة دايما انها مختلفة عن صحباتها ساعات يمكن يكون فى فرق لانه البلوغ بيحصل فى اعمار مختلفة عند البنات فا هتلاقى مثلا هى كبرت بسرعة اكتر من صحباتها او العكس فا هتلاقيها دايما غير واثقة فى شكلها فا انت دايما تأكدى لها ان هى على شكلها دة جميلة وهتبقى سيدة او آنسة صغيرة حلوة وهكذا كمان فهميها انه التغيرات الهرمونية اللى بتحصل دى بتحصل فى كل السيدات او فى كل البنات علشان يبقى لهم وظيفة الحمل والولادة اللى هاتحصل فى المستقبل

اوجدى يعنى Balance يعنى اتزان بين وظيفتك كأم وصديقة يعنى ماتكونيش صديقة يعنى متباسطة معاها اوى بحيث تفقد الشعور بان انت ليكى سلطة معينة وفى نفس الوقت ما تتدخليش اوى فى امورها وتتصلتى عليها بحيث تكرهيها او تبعديها عن الثقة فيكى او تخليها مش عاوزة تكلمك او عاوزة تخبى عنك حاجات

اتكلموا مع بعض فى مناسبات منتظمة يعنى خدى دايما الفرصة ان انت مثلا لو انت قاعدة معاها فى العربية ولوحدكم اتكلموا فى حاجات عن مثلا الحياة والحب والاغانى والافلام وكدة او لو انت مكسوفة تتكلمى فى الموضوع اشترى لها كتاب ممكن مثلا زى كتب زى كتب التشريح كبداية تتكلمى فيها مثلا دة اسمه Human Body فى كلام عن جسم الانسان وبيحصل ازاى الحمل وتطور السيدة والرجل وهكذا

طيب جهزى فيها الاحساس بأنها انسانة مستقلة يعنى لها مشاكلها تقدر تحلها بالتعاون معاكى او لوحدها جهزى فيها الاحساس بأنها بتكبر وبتنفصل عنكم كأنسانة مستقلة بذاتها عززى فيها الاحساس بأنها واثقة فى نفسها ما تقوللهاش انتى اقل من الولاد او انت ضعيفة او الحاجات دى لا خليها فخورة بنفسها كأنسانة قائمة بذاتها خلى بينك وبيها نوع من العلاقة اللى فيها نوع من الممارسات المعينة اللى هى متعودة عليها بنقول عليها Ritual زى تقاليد بينك وبينها انك مثلا تخرجوا مع بعض تروحوا تشتروا حاجات للبنات يعنى مثلا تروحوا تشتروا حمالات الصدر جديدة او تروحوا تشتروا لبس وتفهميها ايه اللبس المناسب لها او لو هى عايزة تتعلم تحط Makeup الاول فهميها انه فيه كيماويات كتير ويعنى مش لازم كل اللى بيعملوه البنات هى تعمله وعلميها يمكن مثلا تعمل منتجات تجميل طبيعية لنفسها فهميها ان الجمال الاصلى بيجى بالرياضة وبالاكل الصحى وبعدين اطبخوا مع بعض اكل صحى يعنى اتعودوا انكم مثلا تطبخى يوم الجمعة مع بعض مثلا حاجة صحية وتفهميها ايه مكونات الاكل الصحى فهميها ان الاكل الكويس بينعكس على جمالها وعلى شكلها وفهميها برضه انها لازم تاخد اطعمة معينة مثلا زى اوميجا 3 مفيد لصحتها

دخول الطفلة فى مرحلة البلوغ له جوانب معينة لازم نركز عليها مش بس الجوانب الجسدية يعنى هما فيه 3 جوانب رئيسة فى جوانب جسيدة وفى جوانب عاطفية وجوانب اجتماعية

تعالى نشوف الجوانب الجسدية البنت جسمها بيتغير تحت تأثير الهرمونات فا انت تقدرى توضحي لها التغيرات الللى هاتحصل فى جسمها بأنك توريها مثلا فى كتاب عن التغيرات اللى بتحصل على جسم الانثى التوقيت انك تختارى تكلميها امتى حرج جدا ولازم محتاج يعنى فن يعنى انت يعنى تقعدى مثلا تكلميها تلاقيها اتكسفت او مش عاوزة تتكلم خلاص التزمى بمشاعرها او احترميها فى انها مش عاوزة تتكلم وانتهزى فرصة ثانية كمان لو انت مكسوفة ممكن تديلها كتاب وتقوليلها اقريه وتقريه انت كمان الام وتتناقشوا فيه بعدين لو انت مكسوفة ممكن كمان تتكلموا وانتوا بتتفرجوا على التلفزيون او قاعدين فى العربية مافيش تواصل بالعينين تتكلموا عن حاجة انتم شايفنها مثلا شوفى البنت دى كبرت ازاى وبقت آنسة وطلعلها صدر وجناب وخلاص بقى هاتبقى ماما قريب مثلا

عززى فى طفلتك المشلاعر الانثاوية بانها فخورة بنفسها كانثى هى مش جريمة ولا هى عيب ولا جسمها عار هى انثى ومساوية للرجل فى كونها انسانة

لا تشعريها بانها مخطئة لانها بتحتفل بجسمها او تحتفل بشبابها خليها تحتفل وتسعد لو حابة ترقص ترقص مافيهاش حاجة التغيرات الجسمانية فى جسم البنت هاتحسسها لفترة انها مش واثقة فى نفسها لما تشوف البنات حواليها جسمهم بيتغير بطريقة مختلفة بدرجات مختلفة ممكن تحس بأنعدام الثقة فى نفسها لان الاعمار دى بتتغير ها ؟ فا انتى تبتدى تتكلمى معاها عن الدورة الشهرية مثلا من سن 9 سنين وتلتزمى بانك دائما تكلميها عن التغيرات اللى هاتحصل دى طول ما هى داخلة فى سنوات المراهقة لحد مثلا سن 16 او 18 تفضلى تتكلمى معاها عن التغيرات دى فا بالتدريج كل ماتنتهزى فرصة تكلميها فيها وتلاقيها هى متقبلة استمرى فى الكلام

مهم ايضا تعرف منك عن العلاقة الجنسية وكيف يحدث الحمل علشان ماتعرفهاش من مصادر برة تكون سيئة او خاطئة المعلومات اللى انت هاتديهالها عن الجنس هاتفضل معاها طول عمرها فا فهميها بطريقة ايجابية انه الجنس تعبير عن الحب بين الزوجين وانها حاجة مش عيب علشان تبقى علاقتها بجوزها كويسة مهم كمان ما تخوفيهاش من موضوع غشاء البكارة لان فى بعض الناس بيفهموا اولادهم انه حتى الرياضة بتأثر على غشاء البكارة وبالتالى بتخلى البنت تفقد يعنى الرغبة فى انها تتحرك او تعمل رياضة مع ان دى حاجة كويسة خوفا على غشاء البكارة وبالتالى كمان فى ناس بيروحوا يمارسوا مثلا الجنس الشرجى علشان يحافظوا على غشاء البكارة مع ان دة غلط خالص وخطر يبقى من الافضل انك تفهمى بنتك عن الامراض الجنسية اللى بتنتقل بالجنس احسن ما تخوفيها من حاجة يعنى قد يتحايلوا عليها او مالهاش اى معنى فى مدلول حياتها لانه من الاحوط انها تخاف من العدوى الجنسية حتى اللى بتنتقل بالتقبيل عن انها تخاف من تأثير اى حاجة على غشاء البكارة وتجيبلها وساوس عن حاجة مش موجودة يعنى هو طبعا موجود لكن مسألة انه بيتأثر بسهولة كدة من الحركة دة مش صحيح

عندنا بقى المشكلة الثانية فى مسألة تطور جسمها هتلاقيها بتقع منها حاجات كتير يعنى بتتحرك حركات ساعات غريبة كدة دة كلو لان جسمها بيكبر اكبر من قدرتها هى على استيعاب النمو دة فا ماتغضبيش لو هى وقعت حاجات او كانت بتطبخ ويعنى وقعت الحلة وبتاع فا انت خليكى حنونة معاها وتفهمى ان جسمها بيتغير وهى مش قادرة فعلا لسه تستوعب الـ Dimensions يعنى المقايس الجديدة لجسمها ماتكونيش عصبية معاها

الجوانب العاطفية من مرحلة البلوغ عند البنات هتلاقى فيها ان الطفلة مزاجها بيتغير 180 درجة فى عدة دقائق ساعات تبقى مبسوطة اوى وفجأة  تبقى زعلانة اوى وفى حاجات زعلتها انت مش شايفاها تزعل خالص وتلاقيها حساسة زيادة عن اللزوم وهكذا فا التغيرات دى بنقول عليها Mood Swings هتلاقيها واضحة اوى فى السن دة بسبب الهرمونات استحمليها وتقبليها واحتضنيها وحبيها هى دة اكتر حاجة محتاجاها

احيانا قد يقعوا فى مشاكل نفسية زى الاكتأب او مشاكل مثلا امراض فيما يتعلق مثلا بالشهية خدى بالك دائما راقبى ايه الموضوع علشان تعرفى اذا فى حاجة محتاجة تدخل منك او تدخل طبى مسألة الهوية احساسها بكونها انثى وتطورها من طفلة لأمرأة هى دى المرحلة اللى بتبتدى فيها خليها تفخر بكونها انثى وبوظيفتها فى المجتمع وانها هاتكون نصف المجتمع هاتكون مدرسة او طبيبة او ممرضة او انسانة عاملة فى المجتمع وممكن هاتكون ام يعنى كل الحاجات الوظائف اللى بتقوم بيها السيدة او الانسانة او الانثى مهم جدا للمجتمع فهميها وظائف الانثى دى كمان اديها الكثير من الحب احضنيها كتير وبوسيها كتير هى محتاجة الكثير من الحب فى المرحلة دى هتلاقيها كمان ابتدت تعلق صور مثلا نجوم السينما او متعلقة عاطفيا بحد لما تكتشفى مثلا انها بتكلم حد معاها فى المدرسة بطريقة معينة او ابن الجيران او بتاع ماتكونيش عصبية دة طبيعى امال هى هاتعمل ايه هاتحب طبعا فا انت احسنلك انها تحب قدامك بدل ما تعمل حاجات عجيبة من وراكى

مهم كمان انك تفهميها انها قادرة على حل مشاكلها بنفسها يعنى لما تحصل مشكلة تساليها رأيها بدل ما توبخيها وتعنفيها تقوليلها رأيها ونحلها مع بعض ازاى المهم تحلوا المشاكل مع بعض عند شعورك بأنك مش قادرة تفهمى طفلتك كويس وحاسة انك محتاجة مساعدة ممكن تقرأى كتب او تروحى لمعالج نفسى او مدرب يساعدك على فهم اطفالك اكثر ممكن تقرى كتب دة لاقيته مثلا فى معرض البحرين للكتاب كان جميل اوى (المراهقون المزعجون) كتاب ممتاز ممكن تقرأى فيه ازاى ممكن تتعاملى مع اولادك والشرح فيه بسيط والصور لطيفة اوى يعنى اقرأى اكثر فى الموضوع وانت هاتعرفى اكثر

الجوانب الاجتماعية من مرحلة البوغ تقتدى مننا اننا نفهن الطفل او الطفلة انها عضو فى مجتمع وفى قوانين للمجتمع فا المفروض ان انت تفهميها هو مطلوب منها ايه ؟ ايه هما القوانين فى البيت والقوانين للمجتمع اللى انت متوقعاها منها بحيث ماتبقاش عايشة على طول فى ضغط عصبى مش عارفة اذا كنتى هاتغضبى منها علشان هى عملت كدة ولا لا يعنى لو تقولى مثلا الاصحاب مسموح يتصلوا لحد الساعة 8 بالليل بالتليفون بعد كدة ممنوع طبعا لوحصل ان حد اتصل بعد 8 باليل مش تعمليها بقى مأساه طبعا تفهميها ان دة غلط ودة ازعاج وكدة وتفهميها ان دة ماينفعش تانى فا هى تبقى عارفة القوانين عارفة انها مش هاتغضبك وفى نفس الوقت كمان مش خايفة منك مش خايفة من غضبك بل خايفة على مشاعرك او بتحبك وبتحافظ عليها المهم اوى مسألة احترامها وتعليمها احترام القوانين من غير ارهاب طبعا الضرب مرفوض تماما وحدف الحاجات وبتاع مرفوضة الحاجات دى كلها

من الافضل ان البنت تتعامل مع اولاد لانها لو يعنى اتربت منفصلة خالص عن الاولاد لا فى المدرسة ولا فى النادى ولا فى البيت ولا فى الشارع هتلاقيها مش قادرة تتعامل معاهم فى المستقبل فا لما تكبر وتروح الشغل مثلا او الجامعة هاتبقى مش عارفة تتعامل معاهم صح فا مهم ان احنا نمرن الاطفال فى مرحلة البلوغ على التعامل بطريقة صحية مع الجنس الاخر يعنى مثلا لما يبقوا فى النادى تحت اشرافك الولاد والبنات بيلعبوا مع بعض او بيمارسوا رياضة مع بعض مافيهاش حاجة انهم يتعلموا ان الجنس الاخر دة مش Aliens مش جاى من الفضاء دول ناس زينا زيهم بنتكلم معاهم بطريقة عادية محترمة وكل حاجة

فى حاجة كمان هاتتعرضى لها من تأثير المجتمع هو تأثير الاصدقاء على الاطفال يعنى الاصدقاء ممكن يعرفوهم حاجات سيئة مثلا يتفرجوا على افلام سيئة او يقولوا كلام مش كويس فى المدرسة وفى كمان تأثير من التليفزيون من برة يعنى لما بيشوفوا حاجات مؤثرات خارجية مهم تكونى متابعة ايه اللى بيحصل ومهم تفهميهم ان قوانين البيت مختلفة مثلا عن قوانين البيت الثانى وان لو تخالفت القوانين دى او تعارضت فا احنا نحب نلتزم بقوانين بيتنا فا مهم ان الانسان يفهم ان فى مجتمع وله قوانين عامة وفى بيت وله قوانين خاصة لما الطفل يبقى فاهم القوانين كويس مش هايتخطاها بسهولة لكن لما يبقى كل شوية نتخانق معاه ويفهم بعد خناقة ان دة كان مش مسموح هتلاقى ان البيت فى تنشنة مش محتاجينها يعنى ممكن يكون فى ضغط عصبى اقل بكتير لما الطفل يكون فاهم انه عضو فى البيت وفى قوانين هو بيحترمها زيكم زيه

كونوا قدوة كويسة لاولادكم كلوا كويس اعملوا رياضة ما تتخانقوش عبروا عن حبكم لبعض وبالهدوء والمحبة والاحترام هتطلعوا انسان ناجح وكمان فترة المراهقة دى هتعدى على خير

اتمنى لكم ولبناتكم كل الصحة والحب والسعادة تحياتى

فيتامين د- مقدمة

الفيتامين هو مادة مهمة جدا لحياتنا فيتا يعنى حياه امين يعنى بروتين الفيتامينات مواد اساسية للعمليات الحيوية فيتامين D او د اللى هو فيتامين الشمس من اهم البروتينات اللى مسؤولة عن تنظيم عمليات حيوية كتير فى جسمنا وعلشان كدة الفيديو دة هايوضحلكم دور فيتامين D فى صحة ووقاية جسمنا من الامراض فيتامين د يذوب فى الدهون وبالتالى احنا محتاجين دهون علشان نتعامل بيه بطريقة صح فى الجسم علشان كدة افتكروا كويس انه لو احنا بناكل اكل قليل دهونه او عندنا مشاكل فى هضم الدهون او بناخذ ادوية بتمنع امتصاص الدهون فى الاخر هايعملنا دة مشاكل فى فيتامين د

للاسف فيتامين د موجود بكميات قليلة جدا فى الاكل اهم مصادره هى السمك وزيوت الاسماك لكن مصدره الرئسى يعنى هو الشمس لو احنا مش بناكل كفاية فيتامين د ومش بنتعرض للشمس عندنا اختيار تالت هو الاطعمة المضاف لها فيتامين د هتلاقى مثلا فى السوبر ماركت لبن مكتوب عليه Fortified يعنى مضاف له حاجة زيادة احيانا بيبقى فيتامين D Fortified يعنى مضاف ليه فيتامين D احيانا برضه دة مش بيكون كفاية فابنضطر نستعمل كبسولات او نقط او شراب او حقن لفيتامين د بنقيس فيتامين د بالوحدات الدولية يعنى International Units فتلاقى العبوة مكتوب عدد الوحدات الدولية فى الكبسولة العبوة فا العبوة بتعتمد او الجرعة بتاعتك بتعتمد على سنك واحتياجاتك وظروفك الصحية ومكتوب على كل علبة اد ايه فى الكبسولة كام International Unit كام وحدة دولية فى كل كبسولة عاوزة اوضحلكم هنا ازاى فيتامين د بيتكون وبيشتغل فى الجسم تخيل ان انت قاعد فى الشمس فى اجازة لطيفة ومعرض اجزاء كفاية من جسمك زى الصدر والظهر والذراعين للشمس مش حاطط Sun Block كريم حماية وقاعد فى وقت مناسب مثلا الصبح بدرى او بعد الظهر وبتاكل كميات صحية من اوميجا 3 واوميجا 6 لانهم بيحموا جلدك من الحرق وكمان بيساعدوا على تكوين فيتامين د لو عملت كل الحاجات دى هاتبتدى تكون فيتامين د بكميات صحية طيب فيتامين د اللى بيتكون فى الجلد الحقيقة مالوش قدرة انه يعمل حاجات كتير لازم يتنشط الاول فا هو بيروح الكبد يتحول بتأثير الدهون اللى فى الكبد والعصارة الصفراوية الى صورة انشط شوية اسمها فيتامين د 2 D2 فيتامين د2 برضه لسة مش نشط اوى مايقدرش يعمل حاجات كتير لازم الاول يروح الكلية علشان ياخذ الصورة النشطة بتاعته اللى هى فيتامين D3 فيتامين D3 هو دة فعلا اللى قادر يعمل الشغل صح بيعمل ايه بقى انت قاعد فى الشمس تشرب لبن وتاكل جبنة وكل الحاجات الطيفة اللى فيها كالسيوم بيروح فيتامين د الامعاء يحمل الكالسيوم من هناك وينقله فى الدم للاعضاء اللى محتجاه زى مثلا العظام والمخ والعضلات والجهاز المناعى ويحطه بقى الكالسيوم

يبقى الصورة النشطة من فيتامين د اللى هو فيتامين د3 هو اللى قادر على عمل الوظائف المفيدة دى وعلشان دة يكون موجود ونشيط محتاج انت تتعرض للشمس تاكل دهون صحية زى اومجا 3 واوميجا 6 يكون عندك كالسيوم كفاية فى الجسم بتاكله من اكلك وبتشربه مع اللبن وكدة يكون الكبد سليم وعندك دهون كفاية فى جسم  مش بتاخد مثلا ادوية تمنع امتصاص الدهون والحويصلة الصفراء سليمة وبعدين يكون عندك الكلية كمان سليمة يعنى مرضى الكلى ممكن يكون عندهم مشكلة فى فيتامين د

طيب ما هى اهمية فيتامين د فى جسمنا لماذا هو بهذه الاهمية اول حاجة فيتامين د مسؤول عن قوة وصلابة العظام علشان كدة اللى عندهم نقص فيه هتلاقى عندهم لين عظام وكساح وكسور فى العظام امراض كتير فى العظام الحاجة التانية انه مسؤول عن سلامة جهازنا العصبى علشان كدة تلاقى الناس اللى قليل عندهم فيتامين د عندهم اعراض كأنها اكتئاب او عصبية شديدة او مشاكل عموما فى ان الواحد بيبقى مش قادر يركز يعنى مشكلة فى الدراسة وهكذا الجهاز المناعى معتمد بطريقة مهمة جدا على فيتامين د فاهتلاقى الناس اللى عندهم نقص فيتامين د بيعيوا كتير بيجيلهم انفلونزا كتير وامراض بكتيريا  كتير والجهاز المناعى كمان على طول الزمن يعنى على المدى الطويل بيبقى فى مشاكل بتزيد فرص اصابتنا بالسرطان وبالتالى بنقول ان اللى عندهم نقص فيتامين د على المدى الطويل خطر الاصابة بالسرطان عندهم اعلى هنلاحظ كمان ان الناس اللى عندهم مشاكل فى الامعاء وفى الهضم وفى عدم القدرة على الحفاظ على الوزن الصحى بعضهم عندهم مشاكل فى فيتامين د فا لو عندك مشاكل فى الهضم احتمال  يكون فيتامين د احد الاسباب نقصه يعنى اكتشفنا كمان انه الوقاية من امراض السكر ومشاكل امتصاص السكر عموما مرض التصلب المتعدد Multiple Sclerosis وارتفاع ضغط الدم الوقاية من الامراض دى بصورة اساسية انه يكون عندك كميات كافية من فيتامين د فى جسمك

عرفنا كمان انه وظائف العضلات العضلات الملساء او العضلات الارادية كلهم محتاجين فيتامين د لانهم يشتغلوا صح فا انت لو انت بتتمرن اويعنى علشان صحة القلب كعضلة كل العضلات دى محتاجة  فيتامين د كفاية علشان يقدر بينقل لهم الكالسيوم ويشتغلوا صح

مؤخرا لاقينا مشاكل فى فيتامين د وانه ناقص عند ناس كتير جدا وعاوزين نعرف مين فى خطر اكبر انه ينقص عنده فيتامين د الناس اللى مابيخرجوش كتير ومابيتعرضوش للشمس كتير لاسباب انهم بيشتغلوا كتير مثلا او عندهم اسباب ثقافية بتمنعهم من التعرض للشمس مثلا بيلبسوا ملابس متغطية لو بيقعدوا دايما فى العربية والشغل والبيت علشان الجو بره حر او مافيش شمس فى البلد اللى عايشين فيها كل العوامل دى بتسبب ان انت مابتعملش فيتامين د كفاية حتى لو اكلت ما تعتقد انه كفاية عمره ما بيكون كفاية زى التعرض للشمس علشان كدة بنقول للناس دول لو انت مش بتتعرض كفاية للشمس احتمال تكون بحاجة يومية لاستعمال كبسولات او نقط فيتامين د

فى المجتماعات الغربية اليومين دول عاملين لهم مشاكل كبيرة فى موضوع الخوف من سرطان الجلد علشان كدة الناس بيحطوا دايما Sun Block على جلدهم ودة بيمنع امتصاص الاشعة Ultraviolet اللى هى فوق البنفسجية علشان كدة دة برضه واحد من المسببات انك يعنى مش دايما وانت متعرض للشمس يعنى شمس النهار وشمس بعد الظهر كويسين للتعرض من غير حماية علشان تعمل فيتامين د لو انت بتاكل اكل الدهون بتاعته قليلة زيادة عن اللزوم منزوع الدهون كل حاجة او انك تاكل اكل الدهون بتاعته مضرة فى الحالتين الدهون دى بتخلى عندك مشكلة فى امتصاص فيتامين د وتنشيطه وبالذات الناس اللى بياخدوا ادوية اللى مانعة لامتصاص الدهون هتلاقى عندهم مشاكل فى فيتامين د فى الاخر الناس اللى عندهم ضغط عصبى رهيب وبيناموا قليل بيعملوا كورتيزول كتير والهرمون دة بيخلى امتصاص فيتامين د ونشاطه اقل من العادى فا تلاقى ان عندك مشاكل فى نقص فيتامين د بسبب الضغط العصبى فى حياتك الناس اللى جلدهم لونه غامق يعنى لون جلدى فما اغمق عندهم حاجة انهم يقعدوا فترة اطول فى الشمس عن الجنس الابيض علشان يقدروا يعملوا فيتامين د

السيدات اللى بيعملوا رضاعة طبيعية لفترة طويلة لسنين هما واطفالهم محتاجين فيتامين د زيادة يعنى تاخذوه على شكل نقط او اقراص او احيانا حقن تحت اشراف طبي طبعا

لاحظنا كمان ان الناس اللى عندهم امراض مزمنة فى الكبد او الكلى او الامعاء او الغدة الدرقية او جارات الدرقية عندهم مشاكل فى امتصاص فيتامين د ولذلك محتاجين كميات خارجية بادوية

الاهتمام بفيتامين د وكميته فى جسمك مهم جدا جدا لنشاطاتك الحيوية كلها تقريبا فا متهملش تعرض كفاية للشمس بطريقة صحية علشان جسمك يكون مستعد لمقاومة الامراض على المدى الطويل يعنى وحمايتك من مشاكل صحية كتير

اتمنى لكم كل الصحة تحياتى

التعافي بعد استعمال المضادات الحيوية

اول الاعراض اللى ممكن تلاحظها كمضاعفات لاستعمال المضادات الحيوية هى مشاكل فى الهضم او فى الامعاء دة بسبب ان البكتيريا Flora اللى هى بكتيريا صديقة تعيش فى الامعاء اصابها ضرر بسبب استعمال المضادات الحيوية فا هتلاقى ان عندك اعراض زى مثلا امساك مزمن وبعدين اسهال وبعدين امساك وهكذا او انتفاخ وغازات او حرقان واحساس يعنى بحموضة شديدة طول الوقت او تحس انك مرهق وتعبان طول الوقت عندك مشاكل مع نزيف من اللثة ومن الانف ساعات قد تصاب بالتهابات فطرية مثلا حول الفم او المنطقة التناسلية او على الجلد عموما اذا فا اهم شيء ممكن نعمله لجسمنا علشان نعوض تأثير المضادات الحيوية السيء ان احنا نعوض بكتيريا Flora اللى فى الامعاء اللى فقدناها بتأثير المضادات الحيوية نعمل كدة ازاى ؟

اهم حاجة باسلوب اكل صحى يعنى احنا ناكل اكل يساعد على نوم البكتيريا الصديقة ويمنع نمو البكتيريا الضارة ايه الاكل الصحى دة ؟

اولا نمنع السكريات خالص والاكل اللى Processed يعنى مصنع كتير او معلب فى حاجات بلاستيكية كل الاكل دة مش كويس والـ Junk Food والدهون المتحولة اللى هى فى القلى الغزير والحاجات دى كل دى حاجات مش كويسة نستبدل الاكل غير الصحى دة باكل صحى زى خضراوات فاكهة عيش اسمر وفى حاجة لطيفة احب اقوللكم عليها هى الخضار المخلل تخللوا انتم الخضار فى البيت زى مثلا الزنجبيل المخلل اللى بيجى مع السوشى دة كويس اوى بس ما تزودوش الملح علشان مش كويس زيادة الملح من الاكل الصحى كمان العسل والموز والبصل والثوم بس مهم ان انتوا تعرفوا ان لو البصل والثوم بيعملكم غازات من الافضل ان انتم تطبخوه يعنى مثلا تغلوه او تقلوه علشان ما يعملش التعب

فى حاجة تانية ان احنا نستعمل جيلاتين اللى بيجى مع العظم يعنى تشترى من الجزار عظم وفى جواه جيلاتين دة كويس لبكتيريا فلورا برضه لو بتحب الخميرة ممكن او بتستحمل طعمها حطها فى مياه واشربها بس احيانا ممكن تتعب منها فا خد كميات قليلة وزود بالتدريج او يعنى لو عملتوا عيش فى البيت زودوا فيه الخميرة شوية دة مفيد برضه

فى الصيدليات وفى الـ Super Markets هتلاقى حاجة اسمها Probiotic يعنى صديق للخلايا الحية Pro صديق او موافق او يعنى مفيد Biotic للخلايا الحية دة بعكس الـ Antibiotic بقى يعنى الـ Anti يعنى ضد فا لما تشترى Probiotics دى هاتساعدك فى نمو الخلايا المفيدة من البكتيريا هتلاقى مكتوب عليها Lactobacillus هى دى البكتيريا اللى انت بتدور عليها علشان تفيد امعائك يعنى البكتيريا الصديقة Flora استعمال الـ Probiotics بانتظام بالذات بعد استعمال مضادات حيوية مفيد جدا علشان تعوض البكتيريا الللى فقدتها وبالتالى تعوض الوظيفة المفيدة لها وتتخلص بقى من متاعب الامعاء والنزيف والمشاكل الفطرية اللى ممكن تحصل بسبب استخدام المضادات الحيوية

اتمنى لكم كل الصحة تحياتى

كيف تزيد هرمون الذكورة

الـ   Testosterone او هرمون الذكورة هو المسؤول عن جعلك رجل بيبدئ دوره من وانت جنين فى بطن الام ومسؤول هو فى الحالة دى عن ان الخصيتين بينزلوا مكانهم من تجويف البطن لكيس الصفن وبعد اما تكبر تبتدى بقى تدخل فى البلوغ هو مسؤول عن انك يعنى حجم القضيب عندك يكبر والخصيتين وصوتك يخشن ويتوزع الجسم على الجسم شعر كتير ويعنى العظام تبقى طويلة والعضلات تبقى قوية وكمان رغبتك الجنسية وهكذا يعنى هو هرمون اساسى فى جسمك لمنحك الخصائص الذكورية

الهرمون بيتغير تركيزه فى الجسم وتأثيره بحسب جسمك وطريقة حياتك وكمان سنك بيقل شوية على سن الاربعين علشان كدة فى سؤال بيحير الرجال ديما ازاى احافظ على الـ Testosterone فى جسمى يكون كميته مناسبة لرغبتى الجنسية وشكلى وهكذا فى رجال بيقولوا انا هاروح اخد Testosterone عند الدكتور وانا الحقيقة عاوزة اقولكم ان دة مش اقتراح مناسب او ذكى لان لازم تفهم ان انت جسمك قادر على انه يعمل Testosterone بنفسه لو عرفت ايه الاسلوب اللى يخليك تساعد جسمك انك تعمل كدة قبل ما اتكلم عن ازاى تعمل كدة هاشرحلك الاول هو بيتعمل فين

الـ Testosterone بيتعمل فى الخصية بصورة رئيسية والغدة فوق الكلوية برضه بتصنع هرمونات الذكورة وكمان لاقينا ان فى الجلد جلد الرجل بيصنع برضه هرمونات الذكورة بكمية قليلة جدا فا انت مطلوب منك ان انت تشجع جسمك انه يعمل هرمون الذكورة لانك لما تأخذه من بره المشكلة ان جسمك بيكسل يعمله فا انت بتأخذه من بره يؤثر طول ما انت بتأخذه وبعدين جسمك هايكون اتأثر بالتأثير الخارجى دة ويكسل يعمله فا الاحسن انك تشجع جسمك انه يعمل الهرمون دة تعمل كدة ازاى ؟

اهم حاجة انك تخلى الكيمياء بتاعة جسمك مظبوطة بالنوم الكفاية اول حاجة النوم الكفاية حوالى 8 ساعات فى اليوم شوف اذا انت مدمن حاجة مثلا انترنت او يعنى حاجة بتعملها بالليل ومؤثرة على نومك لازم تتعلم تتخلص منها علشان تنام كفاية

تانى حاجة اوصل للوزن الصحيح لو وزنك زيادة او قليل فى الحالتين عندك مشكلة فى انتاج الـ Testosterone فا لازم توصل للوزن المظبوط يعنى لو وزنك قليل قوى زوده ولو وزنك كبير قلله خليك دايما نشيط وبتتحرك كل يوم الحركة بتحفز انسجة جسمنا انها تعمل الوظائف بتاعتها صح فا انت حاول تمشى كل يوم نصف ساعة مثلا لكن فى حاجة تانية مهمة جدا هرمون الـ Testosterone مسؤول عن بناء العضلات ولما جسمك يبتدى يعمل مجهود الجسم بيقول انا عاوز ابنى عضلات وبالتالى بيعمل Testosterone اكتر من نفسه انت مش بتحتاج حاجة من بره علشان كدة عاوزاكم غير انكم تمشوا تتحركوا شوية تنشطوا الدورة الدموية انكم تشيلوا اوزان حمل الاوزان دة بيحفز انتاج الـ Testosterone ازاى نعمل كدة ممكن تشيل اوزان زى اللى بالـ dumbbells  او  kettlebells وممكن انت تتعلم تعمل رياضة فى البيت لوحدك بوزنك انت زى الـ push ups وكدة وفى ناس بيقولوا انا هاشترى حاجة كدة زى جركن او كيس رمل واشيله يعنى حمل الاوزان كدة دة كويس برضه المهم انك تشيل اوزان اهم حاجة حاجة تانية قلل الضغط العصبى فى حياتك شوف اذا فى حاجة مصدر ضغط عصبى عندك زى الشغل او علاقة زوجية او الحياة فى مدينة مزدحمة حاول دايما تقلل الضغط يعنى مثلا روح اجازات كتير برة القاهرة مثلا لو الضغط العصبى عليك كتير يعنى شوف اذا كان فى مشكلة فى الشغل حلها وهكذا الضغط العصبى مضر جدا بأنتاج الهرمونات عندك

بعض الادوية المسؤولة عن التأثير على هرموناتك زى الكورتيزون او الـ Steroids اللى بتأخذها فى الجيم دى بتضر بيك على المدى الطويل من الافضل ان لو انت عايز تبنى عضلات بجد تخلى جسمك هو اللى يعمل الهرمون وعلشان كدة الـ Steroids اللى بناخدها من برة ليست فكرة جيدة كان الـ Opioids والحاجات اللى فيها مثلا زى الحشيش والادوية اللى بتأخذوها علشان تهدوا اعصابكم وكدة ممكن يكون لها تأثير سيئ على هرمونات الذكورة عندك افتكر ان انت لما تأخذ اكل معين ممكن يكون محطوط فيه هرمونات برضه هياضرك خد بالك من الاكل المضاف ليه هرمونات زى الفراخ البيضة واللحوم عموما ممكن يكون فيها هرمونات تضر بأنتاجك للـ Testosterone بتاعك ايضا احمى الخصيتين خليهم الدورة الدموية فيهم ماتكونش معاقة بحاجة زى مثلا الجينز الضيق او بتاخذ خبطات كتير وانت بتلعب كورة فى المنطقة الحساسة دى وكمان قلل الكرش لانه المنطقة دى محتاجة دم كويس فا لو الكرش كبير وانت لابس جينز ضيق وكدة دة بيقلل انتاج الـ Testosterone عندك الحاجات اللى بناخذها من برة هى مؤثرة جدا على كيمياء جسمنا علشان كدة ماتنسوش ابدا انه التوازن الكيميائى فى جسمنا بيظبط وظائف الجسم من غير ما نحتاج حاجة خارجية مساعدة خارجية الرياضة النوم الكفاية الابتعاد عن الاكل والادوية اللى مش محتاجينها او المضرة وكل حاجة هتكون كويسة

خبز الرأس (قلنسوة المهد)

قلنسوة المهد او Cradle Cap هو نوع من القشرة بيظهر على جلد طفل الوليد ويقعد شهور وغالبا هايختفى لوحده لكن بعض الامهات بيضايقوا من شكله مع انه مش بيوجع البيبى ولا بيضايقه باى طريقة لكن الامهات بيحبوا يشيلوه علشان بيحسوا ان  شكله انضف فا علشان كدة عاوزة اشرحلكم ايه الكويس وايه الوحش فى العملية دى ان احنا نزيل قلنسوة المهد زى ما بيقولوا عليها اولا فى افتراضات عن دور القلنسوة دى هما بيقولوا بنفترض انها افرازات من الغدد الدهنية علشان تحمى رأس الطفل ايام ما كان جوة البطن بيقولوا انها بتعمل كعازل عن المية الكتير اللى حواليه اللى بيعوم فيها فى ناس بيقولوا انه قد يكون برضه التهاب فطرى او عدوى فطرية فى الحالتين ممكن ازالته بنفس الطريقة ان احنا نزاول على استعمال زيوت طبيعية ندهن بيها المنطقة المصابة هى غالبا هنا عند الرأس من فوق او فى الحواجب اوعند الودان لاحظى افتكرى ان المنطقة دى لسة العظم فيها ما اتقفلش فا انت بتتعاملى مع المخ مباشرة تحت الجلد اللى انت بتشتغلى بيه يعنى افتكرى ان ما تضغطيش جامد وماتدعكيش حاجات غريبة وماتحطيش كيماويات علشان خطر جدا انك تعملى حاجة مش طبيعية هنا الممنوع ان انتى تستعمليه هو الزيت بتاع الاطفال Baby Oil دة وحش جدا دة من مخلفات المواد البترولية ماتستعمليهوش ابدا لطفلك الحاجة التانية هى منتجات ضد القشرة برضه مش كويسة وقرأت فى بعض المنتديات ان الامهات بيستعملوا ملح دة خطر برضه على مخ الطفل لان ممكن يسبب نزيف للاسف فى حوالين المخ فا مهم اوى انك تستعملى بس زيوت طبيعية افضل المنتجات الطبيعية ان انتى ممكن تستعمليها لطفلك هى الزيوت الطبيعية علشان كدة بقترح ان انت تستعملى اما زيت الزيتون او زيت جوز الهند دول افضل زيتين ممكن تستعمليهم لاحظى ان انت هاتفضلى فترة طويلة تجربى تحطى الزيت وتغسليه بعديها بفترة ويرجع تانى وهكذا خلى عندك صبر هو مش هايروح من مرة لكن دول احسن حاجتين ممكن تستعمليهم ميزة زيت جوز الهند انه قاتل للفطريات كمان فا هو اغلى شوية من زيت الزيتون يمكن لو هو ماركة كويسة لكنه قاتل للفطريات لو فى عدوى فطرية هتلاقيه ساعات فى البرد صلب شوية فا انت ممكن تحطيه فى حمام مية دافى علشان يسيح فا جيب الزيت تغمسى فيه قطنة وتحطيه على راس الطفل كدة وبعدين تسيبيه فترة مثلا 8 ساعات او النوم بالليل وتصحى الصبح تغسليه ممكن لو تحبى تسرحيه شوية بس ماتدعكيش جامد باليعنى اطراف المشط لانه مش كويس واوعى تحركيه ابدا بضوافرك لان ممكن يعمل عدوى بكتيرية وتبقى مشكلة كبيرة للطفل فا لازم يبقى الموضوع نظيف وماتحكيش جامد فى جلدة الرأس علشان مايحصلش مشاكل بعدها بس وبالتدريج ها يروح يعنى انت بس افضلى عندك صبر واستعملى بس زيوت طبيعية ممنوع الملح والـ Baby Oil وشامبو القشرة ممنوع

تمنياتى لكم بكل الصحة تحياتى

الصلع عند الرجال

في أبحاث عملوها على مجموعات من الرجال كانت أسوء مخاوفهم هي فقدان ذكورتهم أو رجولتهم أو قدراتهم الجنسية وتاني خوف هو فقدان شعرهم الصلع من أسوء مخاوف الرجال وعلشان كدة عاوزة أكلمكم عنه في الفيديو دا.

سقوط الشعر عند الرجال له أسباب مختلفة عن النساء علشان كدة الحلقة دي بس عن سقوط الشعر عند الرجال الكتاب دة عاملاه شركة Merck للأدوية وبتتكلم فيه عن Male Hair Loss بتقول إيه بقى، تعالوا نشوف أول صفحة بتشرح التشريح للشعر شايفين هنا إن الشعرة لها ساق ولها تحت جدر أو جذر، والجذر دة متصل بشعيرات دموية بتجيب له الأكل من الدم المشكلة عند الرجال إنه الجذر بتاع الشعرة بيضعف بمرور الوقت نتيجة تأثير حاجة معينة في دم الرجال موجودة بكمية قليلة جدا في دم النساء ممكن نتخيل إيه هي المشكلة عند الرجال إنه جذر الشعرة بسبب الوراثة بيكون عنده مستقبلات لهرمونات الذكورة زيادة شوية أو زيادة حساسية لها فا هرمونات الذكورة بتسبب في الآخر إن الشعرة بتقع يبقى معني كدة إنه الصلع عند الرجال السبب الرئيسي له هو وجود مستقبلات معينة لهرمونات الذكورة عددها بيكون وراثي وبالتالي تسبب سقوط الشعر أو الصلع في النهاية سقوط الشعر عند الرجال اللي بيسببه الـ DHT دي مادة موجودة في الجسم هو نوع يعني من هرمونات الذكورة هنا بتلاقي إنه الرجل ممكن يعاني من الصلع بأشكال مختلفة فا هما العلماء قرروا يعملوا لهم تصنيف الأشكال دي أو الدرجات دي جه عالم اسمه Norwood عالمين الحقيقة Norwood Hamilton عملوا Scale سموه The Norwood Hamilton Scale قسموا فيه درجات الصلع عند الرجال لحد 7 درجات الدرجة الأولى لحد الدرجة السابعة لو تلاحظوا الدرجة الأولى مجرد تراجع بسيط في خط الشعر التانية التراجع أكبر التالتة كمان المقدمة متراجعة والتانية  A فيها متقدمة متراجعة وكمان الجنب وكمان في تاج صغير كدة Crown نمرة 3 زيادة وهكذا 4 وهكذا المرحلة السابعة ما بيكونش فاضل فيها إلا جزء صغر جدا من نهاية الشعر من ورا من تحت ساعات بيقولوا في مرحلة 8 اللي هو تقريبا الشعر حتى اللي ورا دة مختفي بس قليلين قوي الناس اللي كدة طيب يبقى بما إن عرفنا السبب إنه السبب لحدوث سقوط الشعر عند الرجال هو حاجة هرمونية حساسية شعرهم لهرمونات الذكورة يبقى الحل الوحيد لو إحنا ها نستعمل أدوية إن إحنا حاجة نجيب حاجة تواجه عمل هرمونات الذكورة على الشعر طبعا لكم أن تتخيلوا إن دي هايكون لها عيوب العلماء كمان لاحظوا إن الرجال دول مهما فقدوا من شعر بيفضل الشعر اللي ورا موجود عند أغلب الناس معنى كدة إن الشعر اللي ورا ما بيتأثرش بهرمونات الذكورة وبيفضل الذاكرة دي عنده لحد طول العمر ومن هنا جم علماء تانيين وقالوا طب ما إحنا نجيب الشعر اللي ورا دة نحطه قدام ونشوف ها يحصل إيه لو فضل موجود يبقى كويس وعلى الأسس دي قامت فكرة علاج سقوط الشعر شركة Merck بتقول إن إحنا عندنا 4 خطوط رئيسية مش كلها طبعا نتائجها متشابهة فا خلينا نشوف في أدوية معينة ممكن نستعملها تعادل تأثير الهرمونات الذكورية على الشعر ممكن نستعمل Lotions وحاجات من الكوافير بس مش عارفين هاتنفع ولا لا ممكن نستعمل أجهزة وفي ناس قالوا لا إحنا أحسن حل لاقيناه إن إحنا نعمل زرع شعر لأن الشعر اللي ورا دة عمره ما هايقع تاني بينما لاقينا إنه استعمال الأدوية تأثيره إذا نجح مابينجحش دايما إذا نجح بينجح مع دوام استعمال الأدوية دي وطبعا لها أعراض جانبية تعالوا أوريكم بعض المنتجات دي معروضة هنا على التربيزة هنا مثلا أدوية زي Finacapil و Finasteride دي حبوب يأخذها الرجل Finasteride واحد مللي جرام كفاية فا دي 5 فا ساعات تشتري العلبة وتكسر الحباية 5 حتت وتأخذ واحد واحدة كل يوم جزء من الحباية في كمان Lotions زي دة Minoxidil في منه للرجال وفي منه للنساء اللي للرجال بيكون مركز أكتر شوية تحطه على المناطق المتأثرة الأدوية دي بتنفع غالبا للشعر اللي واقع في الـ Crown الي هو فوق وماتنفعش أوي مع الشعر اللي قدام الحل الأكيد هو زرع الشعر وهنا صورة أخدتها من زميل المنطقة اللي ورا زي ما قولنا الشعر فيها ما بيقعش فا هو مضمون لو حطيناه في حتة تانية ها ينمو طول العمر فا استفدنا من الموضوع دة بعملية اسمها FUE Follicular Unit Extraction بقينا نأخذ الشعريات واحدة واحدة من جذورها نقتلعها كأننا بننقل زرع وبعدين نعمل ثقوب صغيرة في الجزء الأمامي أو المفقود فيه الشعر من عند المريض ونحط الشعريات شعرة شعرة هي عملية طويلة ومكلفة لكنها الحل الوحيد المضمون إنك هاتدفع الفلوس وها ينمو الشعر في 99% من الحالات ويعني هي اه دفعة كبيرة لكن تكاليفها على المدى الطويل ها تكلف أقل من الأدوية لأنك الأدوية هاتفضل تشتريها دايما وها يدوم التـأثير بدوام استعمالها بس فا على المدى الطويل ها تلاقي نفسك دفعت أكتر من تمن العملية فا أغلب العيانين بيكونوا سعداء بنتيجة العملية أكتر من الأدوية غير إن الأدوية البعض بيشتكوا إن لها آثار جانبية لأنها بتؤثر على هرمونات الذكورة عند الرجل فا ممكن يكون لها آثار جانبية غير مستحبة حاجات تانية بقى جانبية فرعية ها تلاقي مثلا Guns زي مسدس ليزر أو مشط ليزر زي شركة Hairmax عاملة واحد تعمل بيه تسرح بيه الشعر وبموجات الليزر كل يوم النتيجة مش ناجحة عند الجميع والحقيقة إن أنا لاحظت إنها بتنجح أكتر مع السيدات لأنه المشكلة عند الرجال هي الهرمونات دي فا هو الليزر بس بيحفز نمو الشعر لكن لسه الهرمون موجود اللي بيخليهم يقعوا أتمنى تكون كدة الفكرة واضحة عن اختياراتك لموضوع معالجة سقوط الشعر كرجل. دور كتير قوي على Google وأدخل Forums واسأل ناس وشوف Videos يعني اعمل بحث كويس قوي قبل ما تقرر

أتمنى لك كل الصحة والسعادة والجمال، تحياتي

سقوط الشعر عند السيدات- العلاجات

أسباب سقوط الشعر عند السيدات متعددة وكل سبب له طريقة علاج مختلفة- لي معكم في هذا حديث آخر

 

عايزة أكلمكم في الفيديو دا تحديدا عن العلاجات المتوفرة لسقوط الشعر عند السيدات

في الأصل إن إحنا بنعالج السبب علشان نعالج سقوط الشعر. لازم نعرف إيه هو السبب.

لكن في الخلاصة عاوزة أقول لكم إن الشعرة زي الموديل هنا عبارة عن زي ما تقولوا أنبوبة مخزن فيها  حاجات معينة بتيجي من أكلنا

زي ما أنتم شايفين هي متصلة هنا بالأوعية الدموية يعني معنى كدة إنه صحة شعرك في الأساس بتيجي من الأكل اللي بتأكليه وطبعا من حاجات معينة أسباب قد تكون مرضية

لكن في الأساس أكلك وأسلوب حياتك هو المؤثر الرئيسي على صحة شعرك طبعا إحنا عندنا ظروف كتير بتؤثر على نمو شعرنا زي الهرمونات من الحمل والولادة والرضاعة زي مثلا الضغط العصبي الصبغات الحاجات اللي بنستعملها الـ Permanent كل الحاجات دي بتؤثر جدا على صحة الشعر لكن لو أنتي حشيتي شعرك كويس يعني أكلتي كويس ما داخل الشعر هايكون صحي وعلى المدى الطويل هاتتحسن حالة شعرك عاوزة أقولك إنه علاج الشعر سقوط الشعر أو مشاكله عموما بتأخذ سنين يعني ما تستعمليش حاجة أسبوع وتقولي ما لاقيتيش نتيجة- لا دة أنتي المفروض تستعمليه على الأقل سنة علشان تبدتي تلاحظي حاجة على شعرك بعض السيدات عندهم مشكلة سقوط الشعر لا يمكن حلها بالأدوية أو بالفيتامينات في الحالة دي بنشك إنه ممكن يكون في سبب مرضي أو تأثير هرمونات الذكورة اللي في جسمهم على الشعر وفي الحالة دي بنقول إنه الحل الأمثل هو زرع الشعر عاوزة أوريكم العلاجات المتوفرة لعموما واحدة شعرها بيقع تعمل إيه في الأصل قبل ما تدور على علاج عند الطبيب لو أنتي صحتك كويسة والكبد سليم والكلى سليمة بأقترح إن أنتي تأخذي حبوب أو كبسولات لعلاج سقوط الشعر وتستمري عليها فترة طويلة زي مثلا مبدئيا ممكن يكون نقص الحديد وفيتامين د هما أهم سببين لتساقط الشعر عندك لأنها منتشرة أوي المشكلتين دول في عند السيدات في أغلب دول العالم فا تأخذي حديد ومعاه حمض الفوليك وفيتامين D3 لو مش بتتعرضي كفاية للشمس في كمان حاجة تانية اسمها فيتامينات للشعر زي علبة فيها عناصر كتير مفيدة للشعر زي الزنك والنحاس وفيتامين B وD وA كلها مفيدة للشعر وفي كبسولة واحدة هتلاقي منها معمول من شركات مختلفة بالذات Merz عاملة منها كبسولات كويسة أوي كمان أوميجا 3 ممتاز للشعر وبيجي في صور مختلفة شراب أو حبوب وهنا Gummies  كمان لو مش بتحبي طعمه ممكن تأخذيه Gummies  طعمه حلو هو دة للأطفال لكن للكبار كمان ممكن نستعمله في حاجات تانية بقى بيقولك إنها بتملئ ساق الشعرة فا تعمل شكل حلو للشعر زي مثلا زي الكولوجين وزي الكيرياتين وزي خلاصة الخضار والفاكهة كل الحاجات دي ممكن تلاقيها في السوق مفيدة لشعرك بشرط تستعمليها فترة طويلة وبشرط سلامة الكبد والكلى قبل الاستعمال لو أنتي عندك أي أمراض استشيري الطبيب في استعمال الفيتامينات دي أقترح ما تتخطيش أبدا الجرعة المكتوبة على العلبة يعني إذا هي ماركة معينة هاتقولك حباية وماركة تانية من نفس المركبات ها تقولك حبايتين فا أنتي خدي بالك إنك تلتزمي بالمكتوب على كل علبة كما هو موصوف في بعض السيدات كمان بيقولوا أنا عاوزة حل فوري وعلشان كدة قررت أستعمل Minoxidil ودي فكرة كويسة بس هو بيجيب نتيجة طبعا بس خدي بالك إنه أول ما بيسيح على جبهتك مثلا أو على الوجه أي مكان نزل عليه الـ Lotion  بيحفز نمو الشعر فاخدي بالك لأحسن يزود شعر الوجه مثلا أقرئي كويس الإرشادات قبل الاستعمال بعض السيدات كمان بيجدوا نتيجة كويسة من مسدسات الليزر أو أمشاط الليزر بس عاوزة استعمال وصبر طويل وفي بعض السيدات كمان سعداء بنتيجة الـ Mesotherapy لأنه زي ما يكون ماساج كويس للجلد اللي بيغذي الشعرة الماساج عموما يعني أنتي لو كل يوم بتعملي ماساج كويس لجلدة الرأس بصوابعك بالزيوت أو أي حاجة دة كويس جدا لشعرك فا أنتي اعملي ماساج بيحفز الدورة الدموية اللي بتغذي الشعر هنا شايفة الصور لسيدات عملوا عمليات زرع شعر لأنه كان السبب عندهم للأسف يعني هرمونات ذكورة وماكنش ليها حل إن هي تعمل علاجات تانية فا العلاج الأخير والمضمون هو زرع شعر اللي هو خفيف أوي في فيديو تاني ها أكلمكم عن الأسباب المرضية لسقوط الشعر

أتمنى لكم كل الصحة والسعادة تحياتي

العناية بقدم مريض السكر

العناية بقدم مريض السكر ضرورة حياتية لك لأنك بمرور الوقت وبإهمالك في نوعية الأكل اللي بتأكله وكميته ومواعيده والدواء ها تلاقي للأسف بالتدريج إنه ابتدأت رجليك أو قدميك تحديدا يفقدوا الإحساس لما تلمسهم أو تمشي عليهم ها تبتدي تلاحظ أنك مش حاسس بيهم ودي مشكلة كبيرة لأنك لما تخبط رجلك وماتبقاش حاسس بالخبطة مريض السكر بالذات عنده مشكلة في الدورة الدموية فتلاقي أنك بسرعة حصلك جرح والجرح دة حصل له التهاب وممكن ينتهي بك الحال إنه للأسف تحصل غرغرينة ونضطر نبتر القدم أو الساق فأنا عندي لكم شوية نصايح علشان نمنع الموضوع دة من الحدوث أول حاجة أنا عملتلكم الـ Poster  دة بحيث ممكن تعملوا واحد زيه وتنشروه عند مرضى السكر في المكان اللي أنتم فيه أو تعلقوه لماما وبابا في البيت لو حد فيهم مصاب الفكرة إن أنت تأخذ بالك دايما من قدميك يوميا في نظام رعاية يومية للقدمين نعمل إيه غسل القدمين كل يوم زي ما أنتم شايفين بالمياه والصابون مهم أوي إن إحنا نعمله علشان لو في أي حاجة مش نظيفة عالقة بالقدمين نتخلص منها كفاية مرة في اليوم ولابد من التنشيف كويس يعني إحنا محتاجين فوطة ننشف كويس أوي أوي وبالذات بين الأصابع بعد كدة نهتم يوميا بأن إحنا نقصر أظافر القدم وأحسن حاجة إن إحنا نستعمل الـ File دة أو المبرد ومهم أوي إنها تبقى مستقيمة مش دائرية ليه لأنه الظوافر لما يطول ممكن يغرس في اللحم لو هو دائري لكن لو مستقيم وقصير مشاكله مع الغرس في اللحم مش هاتبقى كتير كمان بأقترح استعمال علبة العناية بالأظافر اللي هي الكهربائية دي بدل القص بالمقص وهي بتكون لها رؤوس مختلفة هنا لكن الرأس دة المدور الكبير دة أحسن حاجة للاستعمال والفرشة طبعا دي أحسن من القص لأنه ممكن تعمل وأنت مش شايف جرح صغير في رجلك وبالتالي يعمل عدوى مشكلة كبيرة فأنا أقترح استعمال الحاجات اللي هي ما فيهاش قص كتير حوالين الأظافر في القدم بعد كدة نستعمل كريم للقدم وأقترح إنه يكون كريم فيه حاجات طبيعية يعني دة مثلا Shea Butter زبده الشيا الكريم دة نحطه على رجلينا على القدمين بس لازم إن إحنا نتفادى ممنوع إن إحنا نحطه بين الأصابع لأن لما نحطه بين الأصابع ها يحصل فرصة لنشوء عدوى فطرية فإحنا مجففين كويس بين الأصابع ومافيش حاجة خالص هو بس الكريم حوالين القدم المناطق الخارجية لكن مش بين الأصابع الحاجة اللي بعدها إن إحنا نختار دايما شرابات تكون واسعة من منطقة الرقبة يعني مش عاملة إعاقة لدوران الدم في قدمك فتأكد دايما وأنت بتشتري الشراب إنه يكون أولا قطن ثانيا واسع كفاية من منطقة الرقبة حوالين الكاحل ممنوع منعا باتا المشي حافيا علشان المشي وأنت حافي هاتخبط رجلك وتعمل جرح وأنت مش واخد بالك وبعد يوم أو أثنين تلاحظ إنه ابتدأ يزرق وتبقى مشكلة كبيرة اختار الأحذية بتاعتك تكون طرية جدا ومغطية الجزء الأمامي من قدمك كويس والجزء الخلفي كمان لازم يكون طري مش بيغرس في رجلك من ورا أقترح جدا الأحذية المقفولة كويس وطبعا ممنوع الكعب العالي والحاجات الضيقة علشان هي دي الجزم اللي بتحمي كويس لو خبطت رجلك في حاجة تأكد دايما من صحة القدم والجزمة اللي بتلبسها لو فيها حاجة داخلة فيها وأنت مش واخد بالك أقترح إن أنت تشتري عدسة مكبرة ومراية وتشوف بيهم دايما قدمك عن قرب إذا فيها جرح صغير أو أي التهاب أو لون متغير أزرق أو كدة علشان تلحق نفسك بسرعة لو لاحظت أي مشكلة في قدمك سواء قرحة أو احمرار أو جرح أو لون أزرق أي تغير في شكل القدم هو علامة خطيرة وأنصح بالتوجه فورا لطبيبك طبيب أمراض باطنه ممكن يساعدك أو طبيب جراحة ممكن برضه لو في مشكلة كبيرة العناية بقدمك على مستوى الوقاية مهم جدا لكن قبلها كمان لازم تهتم بمستوي السكر في الدم علشان الحاجات دي ماتحصلش أبناء مرضى السكر ممكن لو تحبوا تساعدوهم بأنكم يمكن النظر عندكم أحسن من مريض السكر فأنتم تأكدوا كل يوم من سلامة القدمين بالذات لو المريض مش شايف كويس

أتمنى لكم كل الصحة، تحياتي