تحفيز الولادة

بعض الأمهات الحوامل يتساءلن إذا كان من الممكن إنهم يحفزوا بدأ الولادة بطريقة طبيعة حوالي 5% من الأطفال بيولدوا في اليوم المحدد المتوقع بعد 40 أسبوع من بداية الحمل وحوالي نصف الأطفال بيولدوا في الأسبوعين اللي بعد الأربعين أسبوع من 40-42 أسبوع بعد الأسبوع الـ 42 لازم الطفل يولد علشان دة خطر على حياته إنه يفضل في البطن في أمهات بيقولوا أنا عاوزة أولد بدري علشان مش عارف عندي فرح ولا حاجة أو لازم أحضره وأنا رفيعة ما ينفعش تقولي كدة تقولي هيا بنا نولد وتروحي تقرري تولدي لوحدك لا ماينفعش لأنه قبل 39 أسبوع من الولادة الطفل معرض لمشاكل قد تؤثر على حياته قد تكون خطر على حياته فا مافيش حاجة اسمها تقرري بمزاجك لا القرار أنك تولدي أو تشجعي الولادة لازم يكون تحت إشراف طبي  والطبيب موافق أن أنتي تولدي وأن أنتي تكوني فعلا عديتي الأربعين أسبوع من الحمل علشان طفلك يكون بخير وسلامة الأمهات بقى بيتساءلوا هل ممكن أعمل كدة بطريقة طبيعية ؟ في طرق ممكن نستعملها ولو أنها مش دايما أكيدة لكن بتساعد يعني في أكتر من نصف الحالات ساعدت إيه هي الطرق دي ؟ أول طريقة نساعد بيها على بدأ الولادة إن إحنا نمارس العلاقة الحميمة فا العلاقة الحميمة ها تسبب إنه السائل المنوي محتوي على مادة اسمها Prostaglandin بيسهل انقباضات الرحم والمطلوب هنا إنه الزوج يعمل عملية قذف داخل المهبل علشان يعمل تأثير كويس ممكن كمان بإمتاع النفس تعملي الهرمون اللي اسمه Oxytocin ودة هايساعد برضه الـ Acupuncture أو الإبر الصينية بتساعد لو أخذتي جلسة لثلاث جلسات هتلاقي إن الانقباضات ابتدأت حوالي 6لـ 48 ساعة بعد ما أخذتي الجلسات في كمان الماساج أو نقاط الضغط الصينية هتلاقي المعالج الصيني يعلمك إزاي تعمليها هناك أيضا لو عملتي ماساج لحلمات الثدي أو خليتي زوجك يساعدك بعمل شفط لحلمات الثدي هايعمل انقباضات في الرحم فا حاولوا تجربوا كدة 5 دقايق وشوفوا التأثير لو مانفعش جربي تاني لحد ما يجيب تأثير في زيت زهرة الربيع المسائية بينفع أوي لو أخذتيه سواء بالفم أو حطيتي الحبايات أو الكبسولات في المهبل فا لو أخذتي حبيتين أو كبسولتين من 500 مجم يوميا أو وضعتيهم في المهبل بس استعملي Liner  يعني علشان بيعمل بيوسخ الـ Underwear هتلاقي نتيجة سريعة Castor Oil بيساعد على أنك تولدي بس لاحظي إنه بيعمل يعني قيئ وإسهال رهيب فا خدي بالك إن أنتي ما تعمليش كدة من غير إشراف طبي يعني اسألي طبيبك الأول مشروب شاي ورقة التوت بيساعد برضه والبهارات زي الكاري والقرفة حطي مثلا كاري على الأكل أو اشربي قرفة في مشروب ساخن بيقولوا كمان البلح لو أخذتي 6 بلحات في الأربعة أسابيع الأخيرة من الحمل كل يوم بيساعد على إن الولادة تحصل لو كلتي أناناس ومانجة كتير هايساعد على تحفيز الأمعاء ومعاها انقباضات الرحم أيضا المشي والرقص بيساعد على حدوث انقباضات الرحم فا امشي وارقصي كل يوم لكن خدي راحتك استريحي ونامي شوية في الليلة اللي تحسي إن فيها الولادة ابتدأت

أتمنى لكي ولادة ناجحة ومستقبل جميل مع طفلك تحياتي

تربية بدون عنف

 

10 طرق لتوجيه الأطفال دون عقاب

هذا الفيديو في ضوء الكتاب: الحب غير المشروط.

الأطفال هم أبدا امش أشرار. السبب في أنهم بيعملوا أشياء مزعجة أحيانا، هو دائما أنهم بيعملوا كدا إما لاستكشاف العالم بطريقتهم بريئة الخاصة بهم، أو أنهم مش مدركين للخطر، أو أنهم مجروحين نفسيا و في حاجة إلى الحب والاهتمام.

خلينا نتفق على تعريف للتأديب! التأديب هو تعليم الانضباط، يعني تعليم ضبط النفس، ولا يعني الضرب والعقاب والحرمان.

الطريقة الأكثر فعالية لتعليم الأطفال هي أننا نعاملهم زي ما عاوزينهم يعاملونا: بحب واحترام.

علشان كدا لما نصرخ ونضرب ونعاقب، هتكون النتيجة أننا بنربي أطفال عنيفين، معانا أو مع أولادهم

مشكلة التايم آوت مثلا أن الطفل بيحس أن لوحده في الحياة وأنه مش عارف يوجه نفسه للتصرف الصحيح

والبديل الأفضل يجب أن يكون: التايم إن، يعني ناخد الطفل بعيد عن الموقف ونقعد معاه لوحدنا ونتكلم معاه في اللي عمله غلطا.

وضع حدود أمر مهم طبعا. والحدود دي تختلف بحسب سنه. مثلا وهو صغير، ممنوع يعدي الشارع لوحده، ممنوع يلعب كرة القدم في البيت، ممنوع يضرب البيبي، وهكذا.

تبين البحوث أن معاقبة الأطفال يخلق المزيد من سوء السلوك.

معاقبة الطفل بتخليه غاضب ودفاعي وغير قادر عل التفكير بمنطقية، وبالتالي بيكون غير راغب في التعاون معاك

الطفل بينسى بسرعة السلوك “السيء” الذي أدى إلى تعرضه للعقاب، ويفتكر بس الألم من العقاب. إذا كان بيتعلم حاجة من العقاب العنيف، فهو أنه يبقى جبان وكذاب ومنافق.

العقوبات اللي بتخلي علاقتنا بأطفالنا سيئة زي الضرب والتايم آوت ثبت أنها تقلل معدل الذكاء، لأن الطفل الخائف غير قادر على التفكير بمنطقية والتعلم بطريقة صحيحة

العقوبة في وجهة نظر مؤلف الكتاب هي ليست وسيلة فعالة لتربية طفل سعيد ومسؤول

لما نكون لطاف ومحبين في توصيل الرسالة، هنلاقي معجزات في رد الفعل. هتلاقيهم بيتصرفوا صح لأنهم مقتنعين بالصح، ومعتزين بنفسهم، وسعداء بحبنا لهم. وهو دا فعلا ضبط النفس الحقيقي، اللي جاي من وعي وضمير، مش خوف من العقاب.

طيب ازاي نوجه أطفالنا من غير من نلجأ لوسائل ” تأديب” عنيفة

عندي ١٠ نصايح من الكتاب

١- سيطر على عواطفك

خذ نفسا عميقا والانتظار حتى كنت هادئا قبل أن تقرر أن تتعامل مع المشكلة. قاوم الشعور أنك لازم تبقى عنيف لأن العنف يولد العنف

٢-. احترم مشاعر طفلك. احترم أنه غضبان ومتألم، وخده واعملوا تايم-إن

اشرح له المشكلة وحلها، وفهمه أنك بتحبه

٣-. افتكر ازاي احنا بنتعلم- الكتابة مثلا، بالتقليد. كن قدوة وهو هيقلدك. تعلم لتقول شكرا، تقولله أننا بنقف طابور وأنت واقف في الطابور، علمه يسقي الزرع وما يرميش زبالة في الأرض بأنك تعمل كدا كن قدوة وهو هيقلدك

٤- قول الرسالة المطلوبة وأنت متصل به بطريقة ما: سواء بمسك يده، كتفه، حضنه، أو النظر في عينيه،  بدلا من الصراخ والعقاب. قول مطلوب ايه من الطفل:

شيلها وبوسها وقول:”أنا عارف أنك عاوزة تلعبي بس … معاد النوم جا

بص في عينيه وقول: أنا عارف انك زعلان، بس أنت لازم تدي اللعبة لأخوك علشان دوره جا

حد ايدك على كتفه وبص في عينيه وقول: العض غلط، قول أنت عاوز ايه

٥- لازم طبعا تذكر الحدود وتحط نظام للحياة. قول ايه ممنوع وليه (سبب منطقي ومقنع) وقدم بديل

“ممنوع العض، قول أنت عاوز ايه، أو يلا نرسم أنت زعلان ليه”

٦- . تذكر أن “سوء السلوك” أو العنف هو تعبير عن معاناة في نفس الطفل.

.إذا بيعمل تصرف سيء فهو من جواه حزين وغاضب أو يمكن مش عارف فين المشكلة.

يمكن ناقصه نوم

يمكن محتاج حب واهتمام منكم

ربما انه مصاب بالاحباط انه لا يستطيع التعبير عن مشاعره في كلمات،

فالمطلوب أننا نعرف السبب ونتعامل معاه، وهيتسحن التصرف

٧- . خليك إيجابي. الأطفال هيعملوا أي حاجة نطلبها منهم لما نكون إيجابيين.

“أنت ولد نضيف وعلشان كدا هتاخد حمام دلوقت.”

٨- خصصوا وقت من اليوم تكونوا فيه مع الطفل وتدوه ١٠٠٪ من الاهتمام. اقفلوا الموبايل والكومبيوتر والتلفيزون وسيبوا كل حاجة واقعدوا مع الطفل

اقروا كتاب، قولوا نكت، العبوا شطرنج، أي صورة من صور الاهتمام الشخصي

كون 100٪ الحاضر.

لما يحس الطفل أن مشاعرك معاه، هيكون حابب يتصرف بطريقة ترضيك، من غير خوف أو نفاق

٩- سامح نفسك. لما تكون عملت حاجات غلط قبل كدا، ادينا كل يوم بنتعلم حاجات جديدة، ونغير من نفسنا للأفضل

١٠ – انهي كل صراعاتك مع طفلك بحضن، وشوف النتيجة قد ايه هتكون إيجابية في تصرفاته

*****

تمنياتي بكل التوفيق

نوبات الغضب

 

الغضب عاطفة طبيعية وتعبير صحي عن مشاعرك، لكن عندما يصبح الغضب مبالغ فيه قد يؤدي لأضرار صحية لك كالإصابة بأمراض القلب والشرايين أو السكر مثلا أو يؤدي لأذى للآخرين وتعرضك لمشاكل قانونية أو اضطراب في علاقاتك الاجتماعية

وفي هذه الحالة عليك تعلم السيطرة على غضبك

ازاي نتغلب على سرعة الغضب؟
عندي لكم ١٠ علاجات من الطب النفسي

اعرف من الأول ايه اللي بينرفزك. اقعد اكتب في ورقة أو بلوج أونلاين الحاجات اللي بتنرفزك: المعاكسات، دوشة العيال، جوز مش بيشيل طبقه للمطبخ، مديري مستفز، باتجنن من المرور

اكتب وانت هادي جمل مهذبة تقولها لمواقف الغضب المختلفة. : مثلا جارتك اللي بتقول لك كل ما تشوفك: هتتجوزي امتى؟ حضري لها جملة وانت هادية واحفظيها تقوليها لما تشوفيها زي الروبوت، وخلي صوتك حازم وقوي مش غلبان ومكسور أو متنرفز، واتمرني على تعبير لوجهك- ابتسامة باردة كدا

انتبه لكلامك وتفكيرك وحاول تكون بتفكر بمنطقية. تجنب وانت غضبان تقول حاجات تندم عليها بعدين. افتكر أن الكلام بيكسر حاجات عمرها مابتتصلح بعدها. افتكر أن الكلام بيكسر حاجات عمرها ما بتتصلح بعدها

آول ما تحس أنك بدأت تتنرفز وهتعمل حاجة مؤذية، خد نفس عميق، حاول تعد لعشرة، وإذا حاسس أنك هتضرب مثلا، سيب المكان وامشي فورا، بالذات لو مع مراتك وأولادك

افتكر ان العنف عمره ما بيحل مشكلة أبدا أبدا. أنك تبدأ بالعنف مع حد ممكن دا يكون خطر على حياتك وحياته

عبر عن مشاعرك بوضوح في ساعة الغضب: اوصف المشاعر بدل ما تشتم. أنا متنرفز جدا دلوقت من فضلك سيبني لوحدي لما أهدا وأعرف أتكلم

حاول تركز في الوصول لحل للمشكلة ووصفه بصوت عالي بدل الصريخ. يعني بالذات لما تكون مع طفلك مثلا ووقع حاجة. بدل ما تقول يا حمار ياغبي، توصف اللي حصل: طبق الأكل اتقلب في الأرض ودلوقت لازم نجيب فوطة وننضف الأرض، يالا نعمل كدا؟
أنت عملت ايه؟ وصفت المشكلة، وعرضت الحلول، وأكدت أنك في صف طفلك ومتعاون معاه.

افتكر أن الأطفال بالذات في سن النمو هيوقعوا الحاجات من إيديهم كتير. الغضب عليهم بيحطم نفسيتهم ويسبب أنهم يخافوا ويقلقوا منك ودا مش الهدف. يبقى الحل السحري ٣ خطوات: “اذكر المشكلة، اعرض الحلول، وأكد على حبك لهم”

حاول تمنع الوصول لمرحلة الغضب بالاتفاق على قوانين في البيت والشغل ونظام معين
كل ما كان في نظام في حياتك
كل ماقلت فرص الغضب والخلافات بينك وبين اللي عايش معاهم

مارس الرياضة وكل أكل صحي ونام كفاية، دول هيفرقوا كتير. تأثير الرياضة مهديء زي تأثير الحشيش
١٥-٣٠ دقيقة في اليوم هيغيروا كتير من تصرفاتك العصبية ويهدوك
والأكل الصحي يعني تمنع الجنك فوود وتاكل فواكه وخضروات وبقول ودهون صحية زي الزيوت النباتية، وتقلل قد ما تقدر اللحوم الحمراء وتاكل بدالها فراخ وأسماك

الخلافات الزوجية

مافيش حد متجوز مش بيتخانق او بيختلف مع شريك حياته كل الناس فى زواجهم عندهم اختلافات وعندهم خلافات والسؤال هو ان احنا مش ازاى نمنع الخلافات بل ازاى نتعامل اثناء الخلافات دى ؟ احنا شخصيا مختلفين من شخصيات مختلفة وخلفيات مختلفة وكمان عندنا عادات مختلفة فى منها عادات سيئة وتوقعات مختلفة من بعض فا طبعا ممكن تحصل اصطدامات  وخناقات  بما ان كل زواج فيه اختلافات السؤال هو نعمل ايه لو عندنا خلاف او اختلاف ؟ نتعامل ازاى ؟ افتكروا ان الخلاف ممكن يخلينا نتوحد ونبقى اقرب لبعض وممكن يخلينا ابعد عن بعض فا طبعا الهدف ان احنا نقرب من بعض اكتر بعد ما يبقى عندنا خلاف عندى لكم 5 نصائح فى السياق دة اول حاجة اعرفوا الاختلافات وتقبلوها وحاولوا تكيفوا نفسكم عليها طبعا مهم ان احنا نفهم ان احنا شخصين مختلفين لكن ما نقدرش برضه نغير الشخص التانى يعنى الشخص هو زى ما هو كدة هايفضل لكن ممكن نتقابل فى المنتصف يعنى نتفاهم ونشوف حل مع بعض الخطوة التانية ان احنا نكون اقل انانية يعنى لازم نفهم ان احنا احيانا ممكن نكون غلطانين واحيانا لازم نعتذر وان احنا بنحب الشخص التانى زى ما بنحب نفسنا الخطوة التالتة ان احنا نبقى عادلين ومنطقيين يعنى تبحث عن الدافع اللى بيحصل بسببه المشكلة دى او الخلاف دة وفكر دايما ان أنت فى اتجاه دايما بتقربوا لبعض بدل ما تبعدوا عن بعض حاول تشوف الـ  Attitude  طريقة تعاملك خلى الـ Attitude او الطريقة اللى بتتعامل بيها تدل على انك بتحب الشخص انا بحبك انا بحترمك انا مش عاوز اجرح مشاعرك مش يعنى تحاول كأنك ماسك سلاح وبتضربه بالنار لأ يعنى خليك ماتغتالوش معنويا كدة واحرص انك تكون فى وقت ومكان وظروف مناسبة لأنكم تختلفوا ماتجوش مثلا قدام الاطفال او فى قدام العيلة وتتخانقوا اعرفوا كمان ان الوقت المناسب مثلا لو شخص لسة راجع من الشغل ماينفعش نتخانق معاه هو مرهق ولو احنا قاعدين فى مكان عام ماينفعش نبتدى نسخر من بعض او نشتم بعض حاول تفهم انه شريك حياتك دايما عنده ظروف خارجة عن ارادته ممكن تؤثر على طريقة التعامل اللى هو فيها يعنى هل مثلا صحته سليمة يمكن فى حاجة احنا مش عارفينها يمكن عنده مشاكل فى الشغل يمكن شاف فيديو صادم من شوية وبقى عاطفى وعنيف وعصبى اسمعوا من بعض اوعوا تقاطعوا بعض اسمعوا وجهة نظر الاخر خلو وقت كدة خليه يتكلم للاخر اثناء المناقشة التزموا بموضوع واحد بس مش نقعد نجيب بقى القديم والجديد و100 موضوع ومامتك عاملت كذا من 100 سنة وكدة لأ هو موضوع واحد بس موضوع المناقشة ركزوا على المشكلة ومش على الشخص يعنى تقول مثلا لو عندكوا مشكلة فى الفلوس هانركز دلوقتى ازاى نعمل ميزانية بدل مانقعد نشتم فى بعض وأنت بخيل وأنتى مبذرة لأ لأ لأ احنا نقعد نركز دلوقتى هانعمل ايه فى الميزانية مركزين على المشكلة مش على الشخص استعمل دايما رسالة الأنا بدل من الأنت يعنى ايه ؟ مش المطلوب انك تغتال شريك حياتك معنويا  وتفضل تقول له أنت دايما متأخر انتى مش مهتمة بيا أنت أنانى أنت مهمل كدة ماينفعش الرسالة لازم تكون أنا زعلانة او مجروحة علشان ما اتصلتش بيا تقولى انك هاتتأخر أكون مبسوطة لو أنت قولتلى مثلا ان احنا جايلنا ضيوف قبلها مثلا بيومين تلاتة مش تفاجئنى كدة ركز فى المشكلة بدل ما تقول ان الشخص بدل ما تتهم الشخص بحاجة يعنى ركز فى ان مثلا فى مشكلة ان العشاء مثلا برد بدل ما تقول ان الشخص غبى او غير مهتم بيك ركز فى مسألة ان هى مش حرب وفى خاسر وكسبان لأ انتوا بتوصلوا مع بعض لحل للمشكلة يعنى أنتوا مع بعض ضد المشاكل مش مع المشاكل ضد بعض افتكروا ان ممكن يكون فى سبب خارج عن الارادة دايما يعنى ممكن يكون الزوج مضايق وزعلان جدا بسبب ان حصل حاجة فى الشغل افتكروا دة دايما الخطوة الرابعة لازم تكونوا متسامحين وتغفروا لبعض الخطوة الخامسة تجاهلوا نهائى وتوقفوا تماما عن الشتائم والضرب او اى صورة من صور العنف والاهانة اتعلموا تتفاهموا من غير شتيمة وضرب دى اهم حاجة والا الحاجات دى لما بتحصل بتقتل حاجات فى العلاقة مش هاترجع تانى مش هاتتصلح تانى فامتعملوهاش من الاصل

اتمنى يكون الكلام دة مفيد تمنياتى بكل التوفيق تحياتى

المذاكرة الذكية

 

عاوزة أقول لكم 10 نصايح علشان تعرفوا تذاكروا. الفكرة من المذاكرة الناجحة أنك تذاكر بطريقة ذكية، مش بعدد ساعات المذاكرة

النصايح اللي هاقولها لكم بناء على دراسات علمية بالإضافة لخبرتي في المذاكرة

.١-     امشي او اتحرك في المكان أو اعمل أي رياضة في البيت لمدة ٢٠ دقيقة في اليوم. دا هينشط الدورة الدموية ويخليك قادر تستوعب أكتر علشان هيوفر أكسجين أكتر لمخك

٢- كل أكل صحي وامتنع تماما عن الچنك فوود. فاكهة وخضار مش حلويات ودهون. من الأكل الصحي سندوتش فول أحسن من هامبرجر على فكرة

خد أوميجا-٣ في صورة مكسرات بس ما تكترش (ملء كف اليد) أو سمسم أو كبسولات

اشرب مياه أو عصير مخفف كتير

٣- خلي مكان المذاكرة هادي ومرتب ومافيش حاجات تشتت انتباهك زي مجلات وفيديوز وكومبيوتر وموبايل. حط سماعة على ودنك واسمع موسيقى هادية، موتسارت أحسن حاجة

حط كمان زرعة في المكان اللي بتذاكر فيه علشان تنقي لك الجو وتزود الأكسجين، بس بالليل خرج الزرعة في البلكونة علشان بتعمل ثاني .أكسيد كربون. لو تقدر خد شاور واغسل أسنانك والبس حاجة مريحة قبل ما تذاكر

٤- اعرف أنت ذاكرتك من أي نوع سمعية ولا بصرية، وحاول تذاكر بالطريقة الأنسب لذاكرتك. يعني مثلا لو ذاكرتك سمعية سجل لنفسك الكلام واسمعه في الموبايل وأنت ماشي، ممكن تغنيه شوية علشان يبقى مش ممل. لو ذاكرتك بصرية يبقى اتفرج على فيديوز عن موضوع مذاكرتك في يوتيوب أو ارسم رسوم توضيحية على كروت (فلاش كاردز) وعلقها في كل مكان بتروحه بالذات فوق مكتبك وفي الحمام. ممكن تعمل الحاجتين، سمعية وبصرية

٥- لو مدمن إنترنت وشبكات تواصل، دور على جروبس مذاكرة للمواد اللي بتذاكرها وشجعوا بعض في الكلام عن الموضوع اللي بتذاكروه كل يوم. اتناقشوا فيه واكتبوا رأيكم وتعليقاتكم ونكت في الموضوع. هتفتكروا النكت أكتر من المادة آه بس هتفتكروا المادة برده

٦- اتعلم تعمل “نيمونيكس” – دي حاجات بتساعدك على تذكر المعلومات، ودا موضوع طويل محتاج فيديو منفصل. ممكن تدور على الكلمة في جوجل

٧- لو مدمن مواقع غير مفيدة، إباحية مثلا، في أبليكيشنز بتعمل بلوك للمواقع دي

٨- دور في جوجل ويتوتيوب كل يوم على موضوع مفيد لدراستك وشوفه. كل يوم كل يوم واجمعهم في ملف عندك

٩- اتعلم القراءة بهدف. هناك أنواع للقراءة بتركيز حسب هدفك منها، دا موضوع يطول شرحه

١٠ – جرب تذاكر لوحدك أو مع أصحابك في المكتبة إذا ممكن علشان مايبقاش في فرصة تتكلموا بصوت عالي

افتكر: ساعة كل يوم تحضر فيها الرسوم وتشوف فيها فيديوز للمواضيع اللي تهمك طول السنة هتوفر عليك رعب كتير آخر السنة

  • افتكر أن مذاكرة آخر السنة مش بتنفع cramming
  • التطبيق من غير نوم أسوأ حاجة ممكن تعملها في نفسك

مرض سكلر – فقر الدم المنجلي

إدمان الكحول

المشروبات الكحولية  استعملها الانسان على مدى آلاف السنين كنوع من النشاط الاجتماعى الشرب فى الحفلات والخروجات وكدة ولكن الاستعمال الزائد للكحول ممكن يسببلك مشاكل صحية واجتماعية وقانونية علشان كدة مهم انك  قبل ما تقرر انك تستعمل الكحول تعرف اخطاره عليك وتعرف بعض التعريفات المهمة قانونا وصحيا واجتماعيا بالنسبة لك

تصلنا اخبار مختلفة عن شرب الكحول هل هو حاجة Cool  ولا هل هو حاجة صحية ولا هو حاجة مضرة بالصحة المهم نعرف يعنى فى غلطة بيعملها الشباب بيفتكروا ان هو قادر انه يشرب زى ما يحب وقت ما يحب من غير ما يحصله مشكلة يعنى هو شرب مرة واثنين قبل كدة وما حصلش مشكلة فا فاكر ان يعنى دة هايفضل العادة على طول فى ناس بسهولة جدا بيقعوا فى فخ الادمان وسوء استخدام الكحول وعلشان كدة الفيديو دة للتحذير من المخاطر المحتملة من الكحول على اساس تبقى فاهم انت بتعمل ايه وانت بتشرب كحول

مبدأيا هاوريكم مخ شخص عنده 43 سنة استعمل كحول مقارنة بمخ انسان ماكنش بيشرب لو تلاحظوا مخ الشخص اللى يعنى بيشرب كحول او مدمن عليه او بيشربه كتير هتلاقى مخه منكمش عن الشخص اللى ما بيشربش يعنى حتى لو انت بتستعمل كحول فى الكميات العادية على المدى الطويل له تاثير على مخك

فى سياق استخدام المشروبات الكحولية عندنا ثلاثة تعريفات مهمة الاستخدام الطبيعى او العادى وسوء استخدام الكحول وادمان الكحول

فا الاستعمال العادى بنقول عليه  او الطبيعى اما انك ما تشربش خالص واما تشرب  Glass فى اليوم او للرجل اثنين Glass   بالكتير وللسيدة  Glass فى اليوم ولو ان دة له اخطاره برضه يعنى هما قاله انه كويس لصحة القلب لكن ابحاث تانية بتقول انه على المدى الطويل ممكن يسبب سرطانات فا بعض الناس بيقولوا ان اختيارهم انهم ما يشربوش خالص دة اكثر صحة

الاختيار التانى او طريقة الاستعمال التانية انك تبقى تسيئ استخدامه او Alcohol Abuse  يعنى ايه ؟ يعنى انك تشربه فى وقت وظروف ممنوع فيها تشربه كانك مثلا وانت اقل من 18 سنة او وانت بتسوق عربية او فى شغلك او تشرب كتير جدا فجأة او لو انت سيدة حامل كل دة سوء استخدام للكحول يعنى المفروض انك ما تشربش فى الوقت دة ودة بيوقعك فى مشاكل قانونية طبعا واجتماعية ممكن تعملك تفقدك وظيفتك او تعملك مشاكل اسرية او هكذا

المشكلة الثالثة او الطريقة الثالثة للاستخدام فى الحالة دى خاطئ جدا هو ادمان الكحول ادمان الكحول دة مرض وبيسبب فى الاخر تلف للكبد غير سرطانات او الاهم بقى ضمور فى المخ على المدى الطويل الكحول وادمانه لو سببلك ضمور فى المخ هو بيعمل كدة فى اغلب مدمنى الكحول بيغير شخصيتك بيخليك ماعندكش ضمير وبيخليك كذاب وبتفبرك قصص والموضوع دة منتشر لاسباب يعنى قد تكون اجتماعية فى بعض المجتماعات والشخص اللى عنده ظروف عائلية صعبة بيتحول لمدمن كحول لكن بنعتقد برضه انه لها علاقة جيجنية يعنى وراثية يعنى موجودة فى العائلات لكن العائلات كمان اللى عندهم مشاكل اسرية ويبتدى الواحد يشرب بدرى من وهو صغير فيها هتلاقى معرض لادمان الكحول اكثر

الشخص مدمن الكحول مريض هو اه ممكن يرتكب جرائم ونعتبره مجرم لكنه فى الاساس مريض ومحتاج علاج لو وقعت فى دائرة ادمان الكحول هناك علاجات محتاجة انك تمتنع تماما عن استعماله وبالتالى مطلوب منك احتمال تفضل فى مصحة لمعالجة الادمان لفترة

فى حاجة اسمها Blood Alcohol Concentration  يعنى تركيز الكحول فى الدم دة بيختلف من شخص للتانى مع انهم شربوا نفس الكمية هتلاقيهم مختلفة كمية الكحول فى دمهم بحسب اعتبارات معينة.

اهم ثلاثة  اعتبارات لكدة انك لو بتاكل وانت بتشرب كحول وبالذات حاجة فيها دهون هاتقلل او بالاصح هاتبطأ متصاص الكحول وبالتالى وانت قاعد بتشرب كحوليات مثلا وبتتعشى او بتاكل كتير هتلاقى ان مافيش اى تاثير لكن فجأة بعد ساعتين ثلاثة الاكل اتهضم وبعدين فجأة ظهر عليك تاثير الكحول فاخد بالك وانت بتاكل ومش بتظهر عليك اى اعراض بانك مثلا متسلطن من الشرب خد بالك بقى انك بعد شوية تتحول لشخص سخيف يعنى فاخد بالك وانت بتاكل ما تكترش من شرب الكحول

حاجة تانية لو الشخص الطويل العريض تاثير الكحول عليه بيبان اقل من شخص رفيع واصغر منه فا حسب البنية والوزن تاثير الكحول هايفرق عليكو فا ما تتوقعش انك لما تشرب نفس الكمية مع صاحبك اللى بنيته مختلفة عنك ان تصرفاتكم هاتبقى بنفس الطريقة

الـ Gender او الجنس بيختلف برضه السيدات بنفس الكمية بيتاثروا اسرع من الرجال

المشكلة من استعمال الكحول الغلط انه ممكن يعملك مشاكل صحية زى مثلا تاثير على عقلك او على كبدك او تسبيب مثلا سرطانات معينة فالاستعمال على المدى الطويل حتى لو  انت فى الحدود الطبيعية قد يكون خطر عليك فا انت حاول ان انت تكون مش معتمد على الكحول كعادة يومية

تاثير الكحول على جسمك بيعتمد برضه على الثلاث خطوات اللى هو اول حاجة امتصاص الكحول من المعدة والامعاء يعنى اول ما بتشرب الكحول بيروح معدتك ونمتص منه 20 % والباقى ال 80 % بنمتصوا فى الامعاء الدقيقة وبيروح على الكبد على شكل مركب اسمه ايثانول والايثانول دة الكبد بيكسره بالتدريج ويحوله لمواد تذوب فى الدم وبتطلع فى النفس اللى بنتنفسهم وفى العرق وفى البول  الكبد قادر على يعنى التعامل مع كمية معينة من الايثانول بسرعة معينة فا انت لما تزود عليه السرعة دى هاتزود تركيز الكحول اللى مستنى يعنى زحمة فى الدم مستنى دوره علشان يروح للكبد فى الحالة دى تصاب بقى بالاعراض اللى هى سخيفة بقى وسكر ونقول عليه Toxication يعنى كانك متسمم بالكحول فا معنى كدة انك لو مصمم تشرب كحول مهم اوى انك تشربوا ببطئ علشان تسمح لكبك بالتخلص منه يعنى كفاية علشان ما يبانش عليك اعراض سيئة

كمان مرضى الكبد لازم يعرفوا انهم شبه غير قادرين على التعامل مع الكحول فا لو انت عندك مشكلة فى الكبد او التهاب امتنع تماما عن شربه  مهم كمان نعرف انك لما بتشرب Glass بنقول عليه مثلا حسب الـ Glass اللى بتشربه يعنى لو شربت مثلا نص لتر بيرة ممكن يكون فيها كمية كحول اقل من حاجة Liquor مثلا هتلاقى انو البيرة انه لو انت شربت Glass بالحجم دة ممكن يكون تاثيرها اقل على تصرفاتك من Liquor Glass زى كدة تعرف ازاى ؟  تشوف على الازازة دائما هتلاقى مكتوب Volume هنا مثلا 4% Volume يعنى من كل 100 cc من كل 100 سنتى لتر  هاتشربهم هتاخد منهم 4 cc كحول

سوء استخدام الكحول فى النهاية يؤدى الى امراض مثل تليف الكبد وسرطانات فى البنكرياس وفى المريء وفى الامعاء مشاكل والاهم من دة كله انه ممكن يسبب انكماش فى المخ ودة بيضيعك كا انسان وبيضيع وظيفة مخك واهمها يعنى الضمير وبتتحول لانسان كذاب ومصاب بامراض اسمها مثلا الفبركة مرض الفبركة المشكلة التانية انك ممكن تحصلك مشاكل عائلية ممكن يعنى مشاكل اسرية تنتهى بالطلاق او انتك تبقى يعنى الكذب عموما مشاكل فى شغلك تتاخر عنه او  تهمل شغلك ايضا مشاكل قانونية يعنى تعمل حادثة بالعربية او تسرق بسبب مثلا الغش فى شغلك علشان تغطى على مشكلة الشرب او ممكن تقتل او ممكن تنتحر يعنى بيعمل مشاكل كتير يعنى احنا بنعتبره نوع من المخدرات ونوع خطير كمان لو انت اسأت استعماله

خدوا بالكم من صحتكم واى قرار تاخدوه باستعمال اى حاجة لازم الاول تعرفوا عيوبه علشان تبقوا واعيين لصحتكم

اتمنالكم كل الصحة والسعادة تحياتى

الدودة الدبوسية

الدودة الدبوسية او الدودة الخيطية او الدودة بتاعة قاعدة الحمام او الدودة اللى بتخلينا نهرش فى الـ popo كلها اسماء لنفس الدودة اسمها Enterobius vermicularis  الاسم العلمى او الـ Oxyuris دى دودة بتعيش فى امعاء الانسان وبتسببله مشاكل فى النوم فى اغلب الاحيان هى دى اهم مشكلة انها بتضايقه فى النوم وبتصحيه من النوم هانعرف ازاى دلوقتى هى بتصيب اغلب اطفال المدارس واحيانا بتعملهم مشاكل فى العملية التعليمية علشان بتضايقهم فى النوم فا بيبقوا صاحين تانى يوم ناقصهم نوم المشكلة كمان انها بتصيب الطفل وبتصيب اخواته ويمكن اهله مامته وباباه وكمان الاهل يعدوا ناس تانين والطفل يجيبها من المدرسة او يوديها المدرسة وينشرها كمان فى المدرسة فا المشكلة منتشرة فى البيت وفى المدرسة ويمكن فى بيوت الناس اللى احنا بنزورهم وهكذا فا احنا عايزين نعالج الدودة مش بس فى الطفل كمان فى كل العيلة والمدرسة فى فترة واحدة اللى بيحصل ان الطفل بياخد اكل فيه بيض الدودة او بيشرب من كوباية عليها البيض او بيقعد على تواليت عليه بيض الدودة وتعديه تدخل بقى فى فمه او هو يحط صباعه اللى فيه البيض لما حط ايده على قاعدة التواليت حط صباعه فى بقه وعادته البيضة

البيضة بتروح للامعاء وتفقس وتطلع ديدان صغيرة  Larval اللى هما Baby دودة الـBaby  دودة بيتعلق على الحائط بتاع الامعاء ويعيش بقى حياته ياكل بقى وبتاع ويعنى يكبر لحد اما يتحول لدودة بالغة

الدودة البالغة دى بتعمل ايه ؟ بتخرج بقى تبقى حامل وتخرج تمشى كدة لحد اما تروح على المستقيم والشرج بتاع الطفل وفى الحالة دى الحركة بتاعة الدودة دى هى اللى بتعمله بتجننه بقى بالليل لانها بتروح تعمل كدة بالليل بس بالذات يعنى فا تلاقيها خارجة حوالين الشرج علشان تضع البيوض بتاعتها فا اللى بيحصل ان الطفل بيصحى من النوم يعيط ويحكيلك انو عندوا كابوس ان فى ثعبان ماشى عليه هايقولك كدة غالبا يعنى احيانا كمان تلاقيها راحت على منطقة المهبل عند البنت وعملت التهاب وافرازات مهبلية ونبتدى بقى نشك ان حصل للبنت اعتداء جنسى او حاجة لكن تأكدوا الاول انه مش هى الدودة دى اللى عاملة المشكلة فا بتعمل التهاب بقى والطفل بيكون يعنى مش قادر ينام وعمال يعيط واحيانا كمان من كتر العياط يجيله حاجة اسمها Hyperventilation ان هو ما يبقاش قادر يتنفس من كتر الرعب

طريقة للاهالى ممكن يعملوها علشان يشوفوا اذا الديدان دى موجودة يجيبو كشاف صغير بالليل فى الضلمة والطفل نايم او صاحى بيعيط ويشوفوا بالكشاف كدة حوالين منطقة الشرج هتلاقوا الديدان الصغيرة احتمال يعنى هى حجمها حوالى نصف سنتى لو كبيرة اوى تبقى حجمها سنتى رفيعة اوى ولونها ابيض احتمال برضه ما تلاقوهاش بعض الاهالى بنطلب منهم يجيبوا شريط لاصق ويحطوه على منطقة الشرج عند الطفل وغالبا هايستلموا الدودة عليه ممكن ياخدوها للدكتور يوريهاله يشوفها تحت المايكروسكوب

يبقى الفكرة ان احنا نقدر نشخص المشكلة بان احنا نشوف الدودة ومن الاعراض كمان اللى على الطفل وبنشوف الدودة على الشريط اللاصق دة

طيب الطفل عمال يعيط باليل وانت مش عارفة تعملى ايه مافيش دكتور وعمال يعيط تعملى ايه ؟ اول حاجة يكون عندك دايما كريم اسمه Zinc Oxide او كريم زنك اطلبيه من الصيدلية خليه دائما عندك فى الصيدلية بتاعتك او كريم نيفيا الكريم السميك دة تاخدى منه شوية كريم وتحطيه حوالين منطقة الشرج كدة وجوة شوية بكمية وفيرة علشان الطفل يهدى شوية الالتهاب وكمان الدودة بتتلخبط فيه بتدخل فى الكريم وماتبقاش عارفة تمشى كويس على الجلد فا دة بيقلل الشعور بالحكة اللى بتيجى من زحف الدودة عليه دى هاتهديه وتخليه ينام على طول

لكن كدة الموضوع ما اتحلش احنا محتاجين نعالج الطفل علشان يخلص من الديدان اللى لسة جوة فى الامعاء مش كدة ؟

عند الدكتور او فى الصيدلية اسأليهم على دواء للديدان الدبوسية يستحسن طبعا انك تكونى واخدة تشخيص من الدكتور ان دة فعلا المشكلة اللى عند الطفل هاتدى الطفل الدواء وكل العيلة لازم تاخده كمان لان غالبا لو واحد عنده فى البيت هتلاقى كل العيلة عندها وكمان تعملى ايه اهم حاجة قص اظافر الطفل بأستمرار لان الظوافر الطويلة هى المركز اللى بيتجمع فيه البيض لانه بيهرش فى المؤخرة وبعدين يروح ياكل او ياكل مثلا ظوافره يعض ظوافره فلازم دائما تقصيها كويس وكمان ظوافرك انت الام بالذات الام واى حد بيعتنى بالطفل كمان ترشى بمطهر قاعدة التواليت ولعب الطفل دائما بالذات اللى بيمسكها بصوابعه الصغيرة مثلا الـ Lego وكدة دائما رشى كل يوم قاعدة التواليت وباستمرار او بانتظام الالعاب بتاعته كمان الملابس الداخلية من  فضلكم غيروها كل يوم والفوط وملايات السراير لازم تتغسل بأستمرار على الاقل مرتين فى الاسبوع على درجة حرارة عالية

طيب احنا حلينا المشكلة فى البيت وهتكررى الدواء يا تاخديه مرة واحدة وبعدين بعد اسبوعين هاتكرريه لكى وللطفل ولباقى العيلة كمان فى المدرسة لازم يحصل دة كلو فى نفس الاسبوع كمان يعنى ايه ؟ تبعتوا رسالة للمدرسة انو حصل العدوى دى وانكم بتحبوا تبلغوهم انهم يرشوا قواعد الحمام واللعب بالمطهر دة ويبعتوا رسالة لباقى الاهالى كمان اذا يحبوا يشوفوا اطفالهم اذا عندهم المشكلة انت بتعملى ايه ؟ انت بتساعدى اطفال تانيين انهم ما يعدوش طفلك تانى فا التعاون فى الموضوع دة يعنى روح الفريق كدة مطلوب

المشكلة دى منتشرة اوى واحنا مش عارفين بالظبط ايه تأثيرها على الاطفال على المدى الطويل يعنى احتمال يكون لها تأثير على الزنك فى جسم الطفل فا انا باقترح تدولوا اطعمة غنية الزنك وتقللوا الاطعمة السكريات و الحاجات الـ Junk Food  وكمان يقال انه الثوم لو اكل ثوم كتير بيطرد الدودة فا ثوم فى الاكل احنا بنحب نحط ثوم فى الاكل فى مصر فا دى حاجة كويسة اوى وغسل اليدين بعد الحمام دائما دائما وقبل الاكل اهم حاجة للقضاء على الدودة دى وعدم انتشارها ان احنا نغسل ايدينا دائما قبل الاكل وبعد الحمام وهايكونوا بخير

اتمنالكم كل الصحة تحياتى

التعامل الصحيح مع القمامة