مرض الصرع- ملاحظة النوبة

تشخيص مريض الصرع يعتمد بالأساس على مراقبة المريض ومعرفة النوبة اللى بتحصله بيكون شكلها ايه علشان نعرف نخمن ايه المشكلة فى المخ يعنى فى اي منطقة ابتدت المشكلة اثناء وجود الطبيب مع المريض مريض الصرع غالبا مش هاتحصل النوبة علشان كدة الطبيب مابيقدرش يحدد بالظبط ايه المشكلة الا لما يسمع من اهل المريض ايه الاعراض اللى حصلتله علشان كدة اهل المريض لازم يكونوا عارفين يوصفوا ايه للطبيب علشان يقدر يشخص المشكلة طبعا فى وسائل تشخيصية زى رسم المخ والحاجات اللى يعنى فى المستشفى لكن دى بتتعمل لما نشك مثلا ان فى ورم او اثناء النوبة نفسها ودة بيحصل نادر اوى يبقى اهم حاجة ان احنا نعرف نراقب ايه فى مريض الصرع علشان نقدر نشخصه فى المستشفى او عند الطبيب علشان كدة عاوزة اعلمكم ازاى تراقبوا مريض الصرع تشوفوا فيه ايه توصفوا ايه للطبيب علشان التشخيص والعلاج يكونوا سهلين اول حاجة لو انت شاكك ان عندك صرع او عند حد فى البيت عنده صرع عاوزة منكم يكون عندكم اجندة تكتبوا فيها نشاطاتكم اليومية تسجلوا فيها ايه فى الاجندة كل يوم مش لازم يكون حاجات معقدة يعنى تكتب بس كلمات بسيطة تكتب ايه فيها تكتب اكلت ايه ايه الانشطة اللى عاملتها فى اليوم خرجت روحت فين وركبت ايه وشوفت ايه وانت ماشى فى الطريق مشاعرك كانت ايه النهاردة حزين سعيد ممكن تحط علامة بس اتخانقت مع حد كدة اذا بتاخد ادوية او اي منبهات او بتستعمل مكيفات اكتب كمان يبقى اهم نقط عاوزين نعرفها منك أكلت ايه مارست ايه النهاردة من انشطة خرجت روحت فين ما هى مشاعرك واذا كنت بتستعمل ادوية الخمس نقط دى مهمة جدا فى تحديد مسار المرض عند المريض الاجندة دى هتساعدك جدا فى وصف حالتك للطبيب اذا كنت انت المريض او حد عندك فى البيت مريض او انت شاكك انه مريض تخلى عندك اجندة ليه كدة احنا بنعتمد على اربعة حالات او اربعة مراحل لنوبة الصرع ان احنا نوصفها مرحلة ما قبل النوبة بأيام بنقول عليها Prodrome المرحلة دى ممكن العيان يبتدى يبقى عصبى عدائى بيعمل حاجات غريبة مثلا بيعمل كدة بيهرش بيمضغ كدة فا انت تلاحظ فى مجموعة الايام اللى قبل النوبة طبعا انت مش عارف امتى النوبة هاتيجى فا انت بتسجل كل يوم علشان تشوف اذا كانت تصرفاته ابتدت تبقى غريبة قبل اليوم اللى جت فيه النوبة الحاجة التانية ان العيان يجيله حاجة اسمها الـ Aura Aura دى مرحلة ما قبل النوبة مباشرة بعدة دقايق او ساعات هتلاقى العيان بيقولك اه انا عندى الاحساس دة جاى حاجة احساس فى بطنه احيانا ممكن يشوف اضواء او يبتدى يعمل حاجات غريبة او يترعب يبقى خايف من حاجة او يمكن يقلع هدومه لكن الاحساس دة هو اللى بيسبق النوبة مباشرة Aura فا احنا عاوزين نعرف اذا كان العيان جاتله Aura ولا لأ وبعدين فى النوبة نفسها اثناء النوبة عاوزين اثناء نوبة الصرع عاوزينك تتابع حاجات معينة مع العيان وفى كمان متابعة لما بعد النوبة العيان هايعمل حاجات معينة عاوزين نعرفها منك طيب نبتدى نعرف اثناء مراقبة النوبة نفسها نراقب ايه اول حاجة اول ما تحس ان المريض ابتدى جاتله النوبة لو تحب ممكن تسجل بالموبايل بيحصل ايه دة يبقى اسهل جدا على الطبيب تجيب الموبايل وتبتدى تسجل تانى حاجة انت انت تسجل وقت وتاريخ حدوث النوبة يعنى مهم اوى نعرف ابتدت امتى وخلصت امتى وتاريخ النهاردة كام وهكذا تقول تسجل العيان كان بيعمل ايه بالظبط لما النوبة ابتدت هل كان بياكل حاجة بيشرب حاجة بيشوف حاجة فى التلفزيون بتعمل اضواء قوية او قاعد فى عربية والاضواء بين الشجر بتاعة الشمس بتعمل ومضات كدة فى وشه هو يمكن اتعرض لفلاش من كاميرا هل اثناء يعنى اول ما ابتدت النوبة ابتدى يتنفس بعمق يعمل كدة سجل كل دة هل كان بذل مجهود رهيب قبل النوبة كان مثلا بيجرى او كان بيشتغل جامد لو انت سيدة اكتبى علاقة النوبة بايام الحيض عندك شوفى اذا كانت لها علاقة بالحيض انها بتزيد قبل الحيض او مع الحيض واذا كنتى بتاخدى حبوب منع الحمل من فضلك سجليها طيب اثناء النوبة عايزاك تراقب الآتى راقب اى جزء فى جسمه ابتدت فيه النوبة يعنى افرض النوبة ابتدت عندى فى نصف المخ الايسر فاتلاقى جسمى النص الايمن ابتدى يعمل كدة وبعدين راحت النوبة الناحية التانية مثلا وبعدين تحولت لنوبة كاملة فا او مثلا العيان ابتدأ يعمل يبربش بعنيه او يعمل كدة اكتب كل حاجة ازاى ابتدت النوبة وفين وانتشرت فى اى اتجاه يعنى بعد ايدى راحت لرجلى ولا راحت فين عايزة كمان تراقب انك تراقب وعيه تسال العيان وسجل هو بيقولك ايه اسأله اسمه ايه ورد شوف اذا كان الرد بتاعه واضح ولا لأ اسأله عن مشاعره انت حاسس بأيه وسجل تعبيرات وجهه وشوف الانطباع اذا كان هو واع للوقت ولا لا انت عارف النهاردة كام احنا فين انت مين انا مين وهكذا شوف مستوى وعيه هل هو فاهم انت بتقول ايه هل هو واع للمكان والزمان هل مشاعره طبيعية وتعبيرات وجهه وسجل كل دة طيب كمان لاحظ اذا كان عنده شد فى حركات العضلات عنده يعنى هل الشد هو بس عامل كدة مثلا ولا عامل كدة شد وتراخى اكتب انت شايف ايه اذا قدرت فى بعض الحركات الاوتوماتيكية اللى هاتشوفها على العيان سجل من فضلك اذا لاحظتها الحركات الاوتوماتيكية زى ايه زى البلع مضغ فرك اليدين او خلع الملابس مشى او جرى يعنى هايعمل حاجة كدة اوتوماتيكية كأنه زى الالة يعنى كأنه Robot لاحظ ايضا على العيان اذا لون الجلد اتغير يعنى يزرق او بقى لونه احمر جامد او كدة سجل لاحظ ايضا اذا حدث تبول او تبرز لا ارادى وسجل ملاحظة الانشطة اليومية لمريض الصرع من اهم وانجح وسائل تشخيص المرض وعلاجه بدون مضاعفات كتير علشان كدة مطلوب منكم تتعلموا لو عندكم مريض صرع فى البيت انكم تراقبوه صح وتكتبوا فى اجندة انشطته اليومية او هو ياخد باله من نفسه اذا ممكن وتخدوا بالكم من الاربع مراحل دى مرحلة ما قبل النوبة بايام مرحلة الـ Aura اللى هى قبل النوبة على طول النوبة نفسها ومابعد النوبة التفاصيل دى هاتهم الطبيب جدا فى علاج المرض علشان نفهم المرض اكتر تابعوا معايا فى Videos  تانية عن النوبات نفسها بـ Videos  توضيحية علشان تفهموا اكتر ممكن نشوف ايه مع المريض

اتمنى لكم كل الصحة تحياتى

الإعداد للمدرسة- الملابس

الأطفال بيقضوا وقت طويل من اليوم في المدرسة علشان كدة لازم ملابسهم تكون مريحة إزاي نختار الملابس المريحة عندي لكم شوية نصائح أولا الجزم لازم تكون طرية وأنت بتشتري الجزمة لطفلك تأكد إن في مسافة أصبع منك في مقدمة الحذاء قدم الطفل مش فيها يعني في مسافة قد كدة أمام أصابع الطفل في مقدمة الحذاء كمان لازم يكون الحذاء مريح خد الفرشة طلعها برة وحط قدم الطفل على الفرش دة وتأكد إن المسافة دي أصابعه عليها حاجة تانية الرباط بتاع الجزمة أقترح إنكم تستبدلوه بالـ Velcro لأن الـ Velcro أأمن لهم البنطلونات بتاعة المدرسة هاتتقلع كتير وتتلبس علشان يروحوا الحمام فا أنا أقترح إنهم يكونوا مريحين بالطريقة دي يكون البنطلون فيه Elastic  كدة ولو في زرار أو كبسول أو Hook زي  دي يكون سهل الخلع للطفل ولو بنطلون رياضي يبقى أحسن برضه فيه المطاط دة التيشيرت بتاعة الأطفال أقترح تكتبوا اسمها على العلامة اللي جوه وإنها تكون مش بتخدش ظهرهم تأكدي إنها تكون طرية فا لو هي طرية يعني مش مضايقاه ممكن تحطي اسم الطفل عليها دة ها يسهل على المدرسة إنه لو الملابس ضاعت تلاقيها وتديها لكم ترجعها لكم وطبعا لأسباب الأمان كمان إدي طفلك غيار زيادة علشان في المدرسة ممكن يعمل على نفسه لأي سبب الدنيا برد أول مرة في المدرسة حد ضربه فا هو خاف عمل على نفسه فا أقترح دايما يكون معاه غيار زيادة في شنطة بلاستيك برضه لو الطفل عنده لابس حزام أقترح يكون الحزام مطاط علشان يكون سهل الخلع الملابس الداخلية للطفل لازم تكون مريحة أشرح لكم إزاي تأكدي أولا إنه الـ Tag  دي برضه يعني مش بتخدشه من ورا وحطي عليها اسمه علشان لو ضاعت يلاقوها وتكون الفتحة عند الرجلين تأكدي وهو لابسها إنها مش مضايقاه مش قافلة على رجليه جامد اكتبي اسم طفلك على Ticket كدة وحطيها على كل حاجة دة هايسهل على المدرسة إنها تلاقي الحاجات الضايعة وكمان لدواعي الأمان لو الطفل تاه يلاقوا الاسم موجود على اللبس أقترح تأخذي الشرابات بتاعة الطفل دايما تحطيها في سلة صغيرة كدة أنت عاملاها أو شنطة صغيرة دي للغسيل وكمان تحطيها في الدولاب بتاعه علشان دة ها يسهل عليكي أنك تلاقي الشرابات ما تضيعش أهم حاجه أنه الصبح ما يحصلش في دوشة ولخبطة وما تبقاش لاقين الحاجات فا أنا أقترح يكون عندكم صندوق تحطوا فيه الملابس اللي الطفل بيلبسها الصبح علشان دة ها يسهل عليكم جدا الصبح إن يعني تخرجوا في الوقت المناسب لما تبقى كل حاجة موجودة فيه

أتمنى لكم سنة سعيدة تحياتي

رياضة الأطفال في البيت

من أجل نمو سليم للأطفال لابد من أن يمارسوا الرياضة يوميا طبعا إحنا مشغولين وماعندناش وقت نروح النادي مثلا كل يوم علشان كدة بأقترح أطفالنا يمارسوا الرياضة في البيت إزاي نمارس الرياضة في البيت مع أولادنا في نوعين من الرياضة رياضة بنقول عليها Cardio يعني القلب تتسارع نبضاته لما نعملها بحيث الطفل نلاقيه عرقان الرياضة دي كويسة علشان بتحرق دهون وفي نوع تاني من الرياضة إنه بيشيل أوزان فا لما يشيل أوزان عضلاته تتبني صح مطلوب الطفل يعمل الحاجتين دول كل يوم يعملهم إزاي ؟ في فرصة ممتازة إن هو يمارس الرياضة عن طريق الـ Trampolines الـ Trampoline  دة زي ما أنتم شايفين هاتلاحظوا دايما إن أطفالكم بيحبوا يقفزوا على أى حاجة طرية زي سرير ولا كنبة علشان كدة بأقترح إن أنتم تجيبوا Trampoline  من نوعية كويسة وتحطوه في وسط مثلا Living  Room  هتلاقوا دايما الأطفال بيلعبوا عليها ودة رياضة ممتازة حتى الأخصائيين في العلاج الطبيعي بيستعملوه ساعات لعلاج بعض المشاكل الصحية أقترح إنه يكون من نوعية كويسة تتأكدوا إنه الحبال اللي رابطة الشبكة بالـ Frame مصنوعة كدة من حبال يعني مطاطية وليست سوست معدنية لأن دة بيخليها ألطف على المفاصل بتاعتهم وكمان صوتها مش مزعج لاعتبارات السلامة أقترح إنه يكون في مسافة كافية بين الـ Trampoline   وأي ترابيزات حواليه لها أطراف حادة وأنكم تحطوا دايما حواليه مخدات أو حاجات طرية شلت علشان الطفل لو وقع تيجي سليمة حاجة تانية إن إحنا ممكن نعمل بيها Cardio إن الأطفال يعملوا Video Games لو عندهم بيحبوا الـ Video Games اللي فيها حركة زي مثلا ألعاب التنس أو رقص أو أي Video Games تلاقوا فيها حركة اشتريها لهم لو هما بيحبوا الـ Video Games النوع التاني من الرياضة إنه يشيل أوزان مطلوب إنه يشيل أوزان كل يوم نعمل كدة إزاي ؟ أقترح تشتروا أو تعملوا أكياس رمل الأكياس دي يعني قماش ممكن تخيطوها وتملوها رمل إيه الوظيفة منها إنه يشيل الأوزان دي رايح جاي من مكان للتاني ممكن الأم كمان تعملها لعبة معاه ودة تمرين للأم كمان ( Can you come now take one by one? ) الطفل تطلب منه إنه يشيل واحد by واحد واحد واحد يوديه من مكان للتانى ( Put it here walk walk Noah ) لما يعمل كدة يبقى بيشيل أوزان ( Stand up sweety stand up thank you ) مثلا إنه يلعب إنه بيبني بيت مثلا أو إنه قرصان وبيشيل الكنز ينقله من مكان للتاني فا لما يقعد يشيل الأوزان دي واحدة بواحدة وهو رايح جاي هو كدة بيعمل مجهود عضلي إنه بيشيل أوزان دة مفيد جدا لبناء العضلات عنده وطبعا للبنات كمان هما دول النوعين أهم نوعين من الرياضة مطلوب إنه يعملهم في البيت حاولوا بأي طريقة إن الطفل يعمل رياضة كل يوم

تمنياتي بكل الصحة

كرة قدم في البيت

لعبة كرة القدم من أفيد الألعاب للأطفال لتنمية التوافق العصبي العضلي عندهم أقترح إنه تسمحوا لأطفالكم بلعب كرة القدم أولاد وبنات لو مافيش مكان إنه تروحوا النادي مثلا أو في الشارع مش أمان عليهم أو مافيش حديقة ممكن تلعبوها في البيت لو خايفين في البيت على حاجة تتكسر شيلوا كل الحاجات اللي ممكن تتكسر وحطوا مثلا مرتبة عند الشباك في مثلا وسائل أخرى زي إن تجيبوا من محل لعب أطفال زي ما أنتم شايفين كدة حزام مربوط فيه الكرة والطفل يحطها على نقطة معينة ترسمها له في الأرض ودايما يبقى بيلعب عندها بحيث المحيط اللي هو بيشوط فيه يكون كله أمان فكرة تانيه إنه الطفل يكون عنده الكرة مربوطة في قاعدة أنت ماليها رمل أو مياه في الحالة دي الكرة هاتكون برضه لو كل أما يشوطها يكون في أمان فكرة تانيه إنه الكرة نفسها تكون طرية ولما بيشوطها ما بتكسرش حاجة بسهولة في كمان كور قماش وكور طرية جدا من البلاستيك الناعم الحزام دة ممكن تشتروه من محلات لعب الأطفال وطريقة عمله الحقيقة سهلة فا لو مالقيتهوش ممكن تعملوه كمان الحركة للأطفال مهمة جدا وأحد أنواع الذكاء إن الطفل يكون بيقدر يتحرك بسهولة وتوافق عصبي عضلي فا علشان كدة مهم أوي إنكم تسمحوا لأطفالكم إنهم يتحركوا ومن أفيد الحاجات اللي يقدروا يعملوها في البيت أو برة البيت هي لعبة كرة القدم اسمحوا لهم بالحركة

أتمنى لكم كل الصحة

احترام مشاعر الأطفال

احترام مشاعر أطفالنا من أهم أسس التربية الناجحة علشان طفلك يكون حاسس أنك بتحترم مشاعره لازم تعمل حاجات معينة وتمتنع عن حاجات معينة ها ألخص لكم النصايح دي من كتاب عظيم جدا اسمه How to talk so kids will listen and listen so kids will talk  بيتكلم عن إزاي بالظبط نحترم مشاعر أطفالنا بحيث هما يتواصلوا معانا ويكلموا معانا بطريقة ناجحة يبقى التواصل بينا ناجح أول حاجة ها أتكلم عن الممنوع عمله في أثناء النقاش مع الطفل يعني طفلك جاي بيقولك حاجة ممنوع تعمل الحاجات التالية أول حاجة ممنوع تستنكر مشاعر طفلك يعني لما الطفل يقول أنا عيان أنت تقوله مثلا لا أنت مش عيان أنت ماعندكش حاجة دة استنكار مشاعر الطفل ممنوع تعمل كدة الحاجة التانية ممنوع أنك تتفلسف عليه يعني تقعد تقول له مثلا أنت لو أنت مش بتلبس الجاكت بتاعك هو دة السبب أنك على طول عيان يعني ما تقعدش تعمل عليه إن أنت عارف أكتر منه بكتير فا تحطمه نفسيا ممنوع الفلسفة الكتير الحاجة التالتة ممنوع أنك تدي نصيحة مش في وقتها يعني لو الطفل مثلا بيقولك أنا جعان فا تقول له روح كل لا ممنوع أنك تدي نصيحة في وقت مش مناسب الحاجة الرابعة ممنوع تشمت فيه يعني لما يقع ويعيط ممنوع تقول له أحسن أحسن دي أسوء كلمة ممكن تقولها لطفلك ممنوع الشماتة خامس حاجة ممنوع تستجوب طفلك لو هو مثلا ضيع قلمه في المدرسة راح فين وأنت ليه وآخر حاجة شوفت القلم دة فين آخر مرة ومين اللي كان معاك الاستجواب لما طفلك يكون بيحكيلك حكاية بيخلي الطفل يبطل يكلمك في الموضوع يعني يوقف الحديث معاك بعد كدة إن أنت تدافع عن الشخص اللي بيشتكيلك منه دة ممنوع برضه يعني لما يقولك مثلا صاحبي ضربني في المدرسة وأنا ضربته وبعدين فا أنت تقوله ما هو أنت علشان أنت جامد وعمال تضرب العيال طول الوقت فا هما أكيد ضربوك فا أنت لما تدافع عن الشخص التاني هو هايحس إن أنت يعني مش في صفه أو مش بتحبه الحاجة التانية إنه يصعب عليك فا أنت تحسسه إن هو غلبان طول الوقت ومكسور الخاطر فا لو هو قالك مثلا حد ضربني فا تقول له يا غلبان يا كدة أنت أصلك ضعيف كدة ما تحسسهوش إن هو قليل أو إن هو ضعيف أو ما يقدرش يدافع عن نفسه الحاجة اللي بعدها إنك ممنوع تحلله نفسيا يعني تقول له ما هو أصل أنت علشان خجول فا مابينفعش تتكلم مع الناس بالطريقة دي فا أنت كذا يعني تحلله نفسيا طول الوقت ممنوع تعمل كدة طيب بعد اللي قولته دة كله فا أنت تحس إنه الموضوع صعب أوي لا هو مش صعب في بقى الحاجات اللي نعملها ودي كويسة للطفل هما 4 خطوات أول حاجة إن إحنا نستمع بكل اهتمام للي الطفل بيقوله يعني لو أنت ماسك الموبايل أو بتتفرج على التليفزيون وطفلك جه يكلمك سيب كل حاجة واستمع لطفلك بصله في عينيه وأقعد استمع هو بيقول إيه أهم حاجة الاستماع بكل اهتمام الخطوة التانية إنك توضح إنك مدرك للمشاعر اللي عند طفلك يعني هو بيقولك مثلا النهاردة واحد في المدرسة ضربني فا أنت تسمع وتدرك المشاعر بصوت حنين جدا فا أنت تقول له ممممم  مممم  اااااه  اوووووه كدة فا أنت بس تتفاعل بوشك وبصوت يعني حنين كدة علشان يتكلم أكتر فا أنت ساكت أنت ساكت وهو بيتكلم فا لما أنت تسكت هو هايتكلم صح فا أنت قاعد بتسمع الحكاية مممممم  اااااه  اوووووه  هااااااا كل المشاعر دي تعملها بطريقة تعبيرية لكن من غير ما تتكلم الخطوة التالتة أنك تدي المشاعر اللي بيقولوها اسم يعني إيه ؟ يعني لما الطفل يقول لك أحمد ضربني النهاردة في المدرسة فا أنت تقول له ااااااه مممممم  دة أنت الظاهر زعلان أو غضبان أو مثلا عندك وجع في حتة أو يعني توصف اللي أنت بتشوفه من الطفل فا أنت بتوصف المشاعر بتاعة الطفل تديها اسم ودة كويس لأن الطفل بيفهم من كدة إنه يقدر يوصف مشاعره وإن الناس فاهمة مشاعره الحاجة الرابعة أنك تحقق لهم أمنية في خيالهم يعني إيه أنتم قاعدين مثلا في العربية وهو جعان والمرور زحمة ولسة البيت ماجاش يعني لسة مسافة طويلة عليه والطفل جعان وأنت مش معاك أكل وعمال يعيط وهو جعان فا أنت تقول له مثلا أه أنت جعان طيب تعالى نتخيل أن أنت بتاكل ساندويتش هامبرجر كبير وفيه سلطة وأي حاجة هو بيحبها وتقعد توصف وبعدين يجي معاك مثلا ديناصور يأكل معاك الساندويتش وتقعد تعمل له كدة فيلم عن الساندويتش فا هو هايبطل يعيط ويقعد يفكر في الحاجة اللي هو عايزها بحلم بطريقة حلم يعني فا تلاقيه بطل عياط ومبسوط إن أنت محترم مشاعره بتكلمه عن رغبته يبقى 4 خطوات استمع بكل اهتمام وضح إدراك المشاعر بصوت هادي مممممم ااااااه كدة أعطي مشاعرهم اسم يعني أوصف الطفل حاسس بإيه أنت زعلان غضبان جعان مبسوط متعور وعندك ألم وهكذا حقق أمنيتهم في الخيال يعني أقعد تخيل معاهم هما عاوزين إيه وأقعد أقعدوا اعملوا منها حكاية تضحك مثلا لو عملتوا الأربع خطوات دي هايحس طفلكم إن أنتم بتحبوه وتحترموه ودة من أهم أسباب إن الطفل بيبقى علاقته بيكم كويسة وفي تواصل بينكم وطبعا دة ها يحسن ثقته بنفسه وطبعا يعني ذكاءه وحاجات كتير

أتمنى لكم كل الصحة

طفلي يضربني.. ماذا أفعل؟

أحيانا أطفالنا بيتصرفوا تصرفات عدائية تضايقنا منهم وتخلينا نرد بعدائية عليهم دي فكرة مش كويسة المطلوب إنك لما طفلك يحاول يضربك أو يكون عدائي معاك أنك توقف العداء بطريقة سلمية لأنك لازم تعذره إنه مش قادر يعبر عن نفسه هو محبط ودي الطريقة الوحيدة لجذب الانتباه بالذات للأطفال اللي مش قادرين يتكلموا فا أقترح عليكم في 3 سيناريوهات إنك ترد على عنف طفلك بطريقة سلمية توقف العنف لكن ما تضربش أبدا في 3 حالات زي الضرب والعض وشد الشعر هتلاقي إن طفلك أنت تقدر توقف العدائية بتاعته بالطرق اللي هاشرحها حالا تخيل طفلك جاي عليك وبيضربك ( Can you hit me now? ) اللي أنت هاتعمله إن أنت هاتستلم ذراعه وتوقفه كدة وترفعه لفوق وتكلمه تقول له إن الضرب ما ينفعش ما ينفعش تضرب ماما أو بابا وتفضل ماسك ذراعه لفوق وضاغط شوية صغيرين اللي هايحصل إنه الطفل هايتعب ذراعه هايتعب وبالتدريج ها تلاقيه بطل يضرب لو عملت كدة كل مرة طفلك حاول يضربك أو يضرب أخوه تمسكه بس كدة من هنا من وسط الذراع فترة وتكلمه تقول له ما ينفعش تضرب ماما أو بابا أو أخوك بهدوء من غير عصبية هايعرف إنه لو كل مرة ضرب هايحصل كدة مش هايضرب في الآخر السيناريو التاني إنه لو طفلك حاول يعضك تعمل إيه

( Can you bite me now? ) لو طفلك حاول يعضك تضغط بأصابعك الاثنين بين الفكين على العضلة اللي بتسبب العض فا هي هاتفتح لوحدها وتقدر تطلع صباعك السيناريو التالت إن طفلك يحاول يشد شعرك الأم اللي هايحصل إن إنت تقرب ايده بحيث شعرك ما يوجعكش أو شعرِك وتضغط بصباعك على ظهر ايده من المنتصف تعمل كدة فا ايده هاتوجعه شوية بحيث إن العضلة ها تتفتح فا مش هايبقى بيشد وبعدين تقدر تسيب ايده الحركات دي بالتدريج كل مرة أما يحاول يعمل كدة يلاقي دة النتيجة هايتوقف وفي نفس الوقت مش هاتجرح مشاعره بأنك تضربه أو تهينه وبالتالي تبقى علاقتكم كويسة

تمنياتي بكل الصحة

الإعداد للمدرسة- الحقيبة المدرسية

الحقائب المدرسية من أهم أسباب تشوه ظهر الأطفال علشان كدة لازم نحرص على أن تكون الشنطة صحية عندي لكم بعض النصائح في هذا المجال الحقائب لما نشتريها لازم تكون من قماش أو بلاستيك خفيف مش مثلا جلد أو خشب لازم تكون سهلة الحمل وخفيفة على الطفل وهي فاضية تاني حاجة لازم يكون الجدول بتاع الطفل أنت عارفه وتحط فيه بس الكتب اللي الطفل محتاجها لما الطفل يحمل الحقيبة تأكد أنها مش سايبة فراغ بينها وبين ظهر الطفل يعني كدة علشان لما يبقى الحقيبة ثقيلة عليه ممكن تحصل مشاكل في شكل الظهر فا احرص أنك تتأكد إنه مافيش كدة مسافة كمان لما تشتري شنطة للألعاب مثلا هتلاقي فيها الحبال دي ممكن تكون خطر على الطفل لأنهم ممكن يخنقوا بيها بعض فا أنا أقترح إن أنت إما تستبدلها بشنطة أكثر أمانا مافيهاش الحبال أو تقصر الحبال جدا بحيث الطفل يبقى بس قادر يشيلها على ظهره لكن الحبل مايقدرش مثلا يلفه حوالين رأسه يخنقه فا تأكدوا من إن الحبال دي آمنة للأطفال لو المدرسة طالبة منكم شنط علشان تحطوا فيها حاجة وتسيبوها في المدرسة أقترح إنها يكون عليه اسم الطفل وتكون من القماش دة أنظف وكمان الحقائب دي بتمنع الاصابة بالقمل لأنها لو عندك ملابس جوه الحقيبة ومقفولة القمل مش هايجي على الملابس فا أنا أقترح لو الطفل سايب ملابس في المدرسة تحطوها في حقيبة مقفولة وعليها اسمه ما تنسوش إذا الطفل صغير يكون معاه شنطة فيها غيار شنطة بلاستيك لو مسموح بحقائب بعجل تكون الشنطة بارتفاع نصف الطفل تقريبا لحد بطنه ويكون الطفل وهو شايلها ( Come on get it ) وهو شايلها ظهره مستقيمة   you can go around ) لو الشنطة أنت عاوز تطولها وتقصرها بيكون فيها هنا هتلاقي شريط محطوط في حلقة كدة تقدر تقصر منها الشنطة وتطولها لا تنسوا أن صحة ظهر طفلك هي معتمدة على إن الشنطة تكون صحية

أتمنى لكم كل الصحة

غشاء البكارة

حديثي معكم عن غشاء البكارة الموضوع دة عامل زي الغول والعنقاء والخل الوفي زي ما يكون أسطورة فا أنا محتاجة أشرح الموضوع دة لأنه عامل مشاكل كتير من غير لازمة غشاء البكارة عبارة عن ثنية رقيقة جدا من الغشاء المخاطي اللي داخل في بداية المهبل يعني هو على بعد قليل جدا من  مدخل المهبل على جوة وفي ثقافات كتير بيشوفوا أن دة مقياس عذرية البنت فا تعالوا نشوف إذا كان دة حقيقي ولا لا هما بيتوقعوا أن البنت العذراء لازم تنزف في أول ليلة الزفاف علشان معنى كدة أن هي لم يحدث لها أبدا أي اتصال جنسي قبل ذلك هناك أنواع من غشاء البكارة كل نوع له شكل مختلف وحوالي نصف أنواع غشاء البكارة لا تنزف مع أول اتصال جنسي هما عملوا بحث على حوالي 40 فتاه تم اغتصابهم وكانوا حوامل من الاغتصاب يعني حصل اتصال جنسي كامل وشافوا غشاء البكارة عند البنات دول لاقوا إنه في حوالي 37 منهم من الـ 40 دول غشاء البكارة سليم معني كدة إنه الاتصال الجنسي ممكن يحدث ويفضل غشاء البكارة سليم تاني حاجة إنه غشاء البكارة اللي يعني مختفي تماما ممكن يكون أولا هي البنت مولودة من غيره أساسا مش موجود أو ممكن تكون معناها إنه حدثت ولادة يعني هي فقدته بالولادة مش بالاتصال الجنسي يعني معنى كدة إنه ممكن تبقى السيدة يعني حصل لها إنجاب قبل كدة من المهبل وفقدت غشاء البكارة لكن سيدة أخرى مثلا أنجبت بعملية قيصرية وغشاء البكارة سليم يعني معنى كدة إن هو مش مقياس خالص لعذرية البنت لو هي مقياس العذرية بأن إدخال قضيب في مهبل يعني وكمان المشكلة التانية إنه في ناس بيتحايلوا على الموضوع دة يقولوا خلاص يبقى لن نمارس الجنس المهبلي ونمارس الجنس الشرجي أو الفموي طب ما هو دول برضه لهم أخطار فا أنا أقترح بدل ما نخوف الشباب بحاجة هي إن هي مالهاش أي أهمية نوضح لهم أهمية إن الاتصال الجنسي بأي صورة من الصور ممكن ينقل أمراض دة أهم وأفيد لهم من الخزعبلة بتاعة غشاء البكارة الكتاب دة بيوضح أنواع غشاء البكارة هو متأسفة لو الصورة صادمة لكنها بتشرح كويس الموضوع شايفين هنا السيدة مستلقية على ظهرها وهنا المؤخرة بتاعتها والرجلين منفتحين كدة وشايفين الجزء الأعلى اللي هو الشعر اللي موجود على العانة وهنا الشفاه الغليظة والشفاه الرفيعة وإحنا بننظر لغشاء البكارة في مدخل مدخل المهبل هنا هنلاقي له أنواع هنا بيوضح الشكل في نوع اسمه الهلالي يعني على شكل هلال شايفين إن فيه فتحة والفتحة دي موجودة إحنا مولودين بيها يعني أساسا ممكن يبقى مطاطي ويسمح بدخول القضيب من غير ما ينزف خالص أكتر من نص البنات كدة في نوع تاني بيكون في حاجز في النص بيقولوا عليه Septate  النوع دة كأنه في فتحتين صغيرين كدة بس هو حاجز في النص دة ممكن ينزف شوية مع أول اتصال جنسي في واحد تالت بيكون اسمه Cribriform Cribriform يعني زي الغربال في فتحات صغيرة كدة ودة بينزف نسبيا بشدة مع أول اتصال جنسي في نوع أخير مش موجود في الرسمة دي اللي هو النوع المغلق تماما Imperforate  والنوع دة بيعمل مشاكل للبنت لأنه مع أول الدورة لما يبتدي ينزل دم الحيض هايتجمع مش هايقدر ينزل فا يسببلها انتفاخ في البطن وتجمع دموي في البطن ويفتكروها العيلة إنها حامل وفي ناس ممكن تموت في سوء التفاهم دة فا الموضوع دة محتاج طبيب لو البنت عندها مشكلة وشكل بطنها كبير أنت محتاج توديها لدكتور مش تقتلها أو تضربها لأنه ممكن تكون غالبا هي القصة كدة يعني لو هي لم يسبق لها الاتصال الجنسي قبل كدة النوع الأخير في الصورة دي زي ما أنتم شايفين هو المهبل بعد الولادة فا في الحالة دي هتلاقي إنه غشاء البكارة مش موجود خالص أو يعني جزء بسيط منه هو اللي فاضل فا معنى كدة إنه الطبيب لما يكشف الحقيقة بيقدر يكتشف إن البنت عذراء من الغشاء دة لو هي ولدت قبل كدة ولادة طبيعية عن طريق المهبل غير كدة يعني مافيش فرصة إنه نتأكد 100% إن عذرية البنت متعلقة بغشاء البكارة بتاعها تربية البنات كويس على الأخلاق الكويسة أحسن بكتير من تخويفهم بموضوع غشاء البكارة وعلموهم عن الأمراض الجنسية الثقافة الجنسية العلمية الصحيحة أفيد بكتير من الكلام المخيف اللي مالوش لازمة

تحياتي وتمنياتي بكل الصحة

ختان الإناث

ختان الإناث هو بتر الأعضاء التناسلية للأنثى بدون دواعي طبية.

الأمم المتحدة ومنظمة الصحة العالمية اعتبرت دي أسوء صور الاعتداء الجنسي على النساء في التاريخ وأعلنت يوم 6 فبراير من كل سنة إنه يوم For Zero Tolerance For FGM

 المشكلة في ختان الإناث إنه حواليه قصص كتير وكلام غلط فا علشان كدة حابة أحكي لكم الخلاصة عن الموضع في الفيديو دة.

هو منتشر أصلا في أفريقيا وأسيا لكن انتشر في العالم كله بسبب الهجرة طبعا والناس خدوا معاهم العادة دي لأوروبا فا هي مشكلة أيضا موجودة في أوروبا وأمريكا.

إيه أسباب الختان-  ليه الناس بيختنوا بناتهم؟ الناس بيقولوا إن دي عملية تجميل مثلا البعض بيقولوا كدة وأنا بتسائل إذا كنت متدين وأنت عارف إن التجميل حرام أو تغيير خلق الله فا مش عارفة ليه بتعملها يعني البنت مادام مش بتشتكي من حاجة يبقى مافيش أي داعي لها.

تاني حاجة في ناس بيقولوا إن دي نظافة! النظافة بتيجي من الغسل والتنظيف كويس بالمياه والتنشيف دة ممكن تعمله من غير أي قطع لأجزاء يعني أنت عاوز تحميها من قلة النظافة خليها تنظف نفسها.

في ناس بيقولوا بتحميها من الأمراض في المستقبل يعني أنا متخيلة إنه لو أنت عاوز تحمي طفلك من مثلا البرد اقطع له مناخيره؟ كدة ما ينفعش فا النظافة والاهتمام بالصحة ها يحميها من الأمراض عموما.

في ناس بيقولوا إن لها أسباب دينية لا أتخيل إن في دين يرضى على الناس إنهم يتعذبوا بسبب وجود حاجة طبيعية في جسمهم فا أنا لا أتخيل إن لها أي خلفية دينية.

في ناس بيقولوا ما نعرفش إحنا بنعملها علشان أهالينا عملوها وخلاص، فا أنا من رأيي إن إحنا نعمل عقلنا شوية ونشوف الممارسات القديمة هل هي دايما كويسة ولا لا والوحش منها نتخلص منه.

مشكلة الختان إن أعراضه أو مضاعفاته بتستمر مع البنت من أول يوم يحصل الختان لآخر يوم في عمرها يعني هأعرض عليكم الأنواع والمضاعفات علشان تفهموا إن دي مش عملية تأثيرها مؤقت دي مصيبة كبيرة.

عندنا 4 أنواع للختان في يعني خطوط عامة، لكن ها أشرح لكم الأول التشريح الخارجي للأنثى علشان نفهم العملية نفسها بتحصل إزاي هنا في الكتاب دة شايفين الأنثى مستلقية على ظهرها وفاتحة الرجلين وإحنا شايفين يعني دول الساقين كدة وهنا المؤخرة وهي نايمة على ظهرها دة هنا المؤخرة تحت ومن فوق شايفين شعر العانة كدة وهنا شايفين الشفاه الغليظة والشفاه الرفيعة وبعدين البظر هنا فوق وبعدين فتحة المهبل وفي جزء كمان هنا جوة اللي هو فتحة البول دلوقتي لو إحنا عارفين التشريح الطبيعي والوظائف كمان للأنسجة دي هي الأنسجة دي غنية جدا بالنهايات الأعصاب الحسية اللي طبعا مسئولة عن استقبال الحس أثناء المتعة الجنسية يعني أثناء العملية الجنسية فا هي وظيفتها الرئيسية إنها تشعر المرأة بالمتعة الجنسية غير إنها طبعا بتحمي الأجزاء الداخلية من جسمها لأنها بتبقى مقفولة كويس بتحميها من العدوى وكدة.

تعالوا نشوف بقى الأنواع بتاعة الختان ها أشرح لكم على اللوحة دي هنا الرسمة هنا الأنثى مستلقية برضه على ظهرها وهنا الشفاه الغليظة والشفاه الرفيعة وهنا البظر وفتحة البول ودة الشرج اللي بيحصل في النوع الأول إنهم بيقطعوا البظر أو الجلد الأمامي منه أو الجزء الأمامي منه فا بنقول على النوع الأول إنهم بيقطعوا جزء من البظر فا يبقى الجزء الأول أو النوع الأول بيقطعوا الجزء دة بنقول عليه Clitoridectomy يعني قطع البظر أو جزء منه النوع التاني بيسموه Excision الـ Excision دة بيقطوا منه الـ Labia Majora  أو Minora أو الاتنين وأحيانا البظر معاهم.

طبعا هنا المهبل.

طيب الأجزاء دي لما فقدتها البنت مبقاش عندها أي نوع من الإحساس في الجزء دة غير إنه بيبقى مكانها نسيج يعني لا يستطيع الشد فا دي مشكلة كبيرة لها في الزواج وفي الولادة.

طيب النوع التالت بعض الناس بيسموه الفرعوني أو الـ Infibulation  إنهم بيشيلوا كل الحاجات دي اللي قلناها البظر أحيانا أه وأحيانا لا لكن بالتأكيد بيشيلوا بيقطعوا الشفاه الغليظة والرفيعة وبعدين يربطوا رجلين البنت مع بعض بحيث يلتئم الجرح خط مقفول كدة يبقى البنت حتى مش قادرة تمشي كويس ويسيبوا زي مثلا عود كبريت أو حجرة صغيرة علشان يلتئم بفتحة معينة تقدر تعمل منها حمام يعني Urination تبول فا المشكلة إن البنت بتلتئم مقفولة خالص مافيش إلا جزء صغير جدا بيخرج منه البول وطبعا بيعاد جزرها تاني لما تيجي تتجوز.

في أنواع أخرى تبع النوع الرابع إنهم مثلا بيحطولها Piercing  مثلا أو بيكووا المنطقة دي بحيث تميت الأعصاب الحسية أو بيعملوا يعني عمليات غير معروفة لكن منتشرة في أفريقيا نوع من تشويه المنطقة دي عند البنت ومنحها صدمة عصبية وخوف من المكان دة من جسمها بعد العملية أو أثناء العملية بتحصل مشاكل للبنت منها إنها بتعاني طبعا من ألم شديد ممكن يحصل لها إنها تتنقل لها عدوى لأنهم ساعات بيعملوها في مجموعات فا بيقطعوا بنفس السكينة لكل البنات ساعات بيقطعوا بزجاج مكسور أو موس المشكلة كمان إنها بتجيلها طبعا صدمة عصبية وخوف وممكن يجيلها احتباس في البول ودة طبعا ممكن يسبب وفاتها أو التهاب في المثانة مزمن أو التهاب في الكلى يؤدي إلى فشل كلوي.

المشكلة كمان إنه ممكن يجيلها التهاب كبد وبائي من عدوى من الموس اللي مش نظيف دة أو صدمة عصبية تخليها تكره الجنس تماما وتبقى رافضاه ومش عاوزاه طول عمرها حتى لما تتجوز.

ممكن يجيلها سلس البول لأنه العضلة العاصرة حوالين الجزء اللي هو مخرج البول ممكن تتأثر فا يجيلها مشكلة في السيطرة على البول.

ممكن يجيلها تسمم في الدم ممكن يجيلها التصاقات في المستقبل تسبب صعوبة جدا في العلاقة الجنسية وطبعا مافيهاش عندها أي استمتاع بالجنس لأنها مش حاسة بحاجة غير أنها بتفتكر الصدمة العصبية دي فا تكرهه.

وهي بتولد ممكن الطفل ما يقدرش يخرج لأنه الأجزاء الندبات الموجودة في الأجزاء المصابة بتخليه مش Stretch  يعني مش Stretch مش واسعة كفاية ما بتتشدش كفاية علشان الطفل يخرج أيضا دة ممكن يسبب وفاة الأم والطفل.

ممكن للأسف الالتصاقات دي تسبب العقم وتسبب أيضا سلس البراز بعد الولادة لأنها ما بتلتئمش كويس وبتعمل فتحة بين المهبل والشرج.

بتسبب مشاكل كتير جدا بين الأزواج لأن الزوجة بتكون خايفة من الجنس وبترفضه لدرجة أنه ممكن يسبب لها امتناع تام عن ممارسة الجنس لأنها مش قادرة خالص المنطقة دي حد يلمسها من الألم أو الذكرى السيئة.

هل يوجد علاج للموضوع دة؟ نعم يوجد مبدئيا علاج نفسي بتتدرب فيه السيدة على أنها تنسى الذكرى السيئة دي وأيضا علاج طبي جراحي بدأته مستشفيات ألمانية في الفترة الأخيرة وأتمنى إنه يكون منتشر في الوطن العربي، عمليات تصحيحية للأجزاء دي نحاول نحسن في وضع الجزء المصاب أو المبتور عندها بحيث تعيد الإحساس شوية ويصبح أكثر يعني يكون طيع أكتر بحيث تستمتع بحياتها الزوجية ومايكونش عندها مشاكل مع الولادة.

أتمنى لكم كل الصحة والعافية وافتكروا إن جسمك ملكك وماحدش له حق يشوهه أنتِ حرة تختاري لنفسك أي عمليات تجميل لما تكبري لكن وأنتِ صغيرة ممنوع حد يلمسك أو يعتدي عليكي بأي صورة قلبي معاكي وأتمنى لكي كل الخير.

مبيدات حشرية آمنة للأطفال

المبيدات الحشرية ذات الرائحة القوية اللي بنستعملها في البيوت منتشرة أوي في مصر والدول العربية للأسف لها أضرار فظيعة على أطفالنا بالذات على جهازهم العصبي والتنفسي والمناعي والكبد يعني كل حاجة في جسمهم ممكن تتأثر سلبا بالمضادات الفظيعة دي علشان كدة أنا من رأيي إن إحنا بدل ما نستعمل مضادات السيئة جدا دي نختار حاجة تكون صديقة للبيئة وبالتالي مش خطر على أطفالنا.

عندي شوية اقتراحات في سلسلة من الـ Videos ها ابتدي بواحد منا في الفيديو دة إزاي نتغلب على مشكلة الحشرات الزاحفة زي النمل والصراصير وأحيانا البراغيث ممكن ينفع معاها شوية حاجات تانية .مبدئيا ممكن نستعمل حاجات طبيعية زي ها تستغربي أوي بس ممكن تستعملي قرفة أو بودرة تلك للتخلص من النمل لو رشتيها في طريقهم هي بتكسر مفاصلهم فا لو أنتِ استعملتي بودرة تلك أو قرفة في الأماكن اللي بيدخل منها النمل ها تلاقي إنه النمل بالتدريج قل في البيت لو رشتي Tabasco عند المكان اللي فيه الصراصير هتلاقي إن الصراصير ما بتحبهوش وما بتجيش في المكان اللي هو فيه ولو حطيتي فلفل أحمر بودرة فلفل أحمر على أماكن خروج الصراصير هتلاقيهم برضه مابقوش يجوا فيها فا الحاجات الطبيعية دي مش مضرة بلأطفال وممكن تستعمليها في البيت لمعالجة الحشرات الزاحفة.

حاجة كمان عاوزة أقترحها مبيد حشري ممتاز وبيتكون من ملح طبيعي بنلاقيه في الطبيعة اسمه مبيد Borax أو ملح حمض البوريك الـ Borax دة بنعمل منه محلول ممكن تطلبوه من الصيدلي هو مش بسهولة نلاقيه في الصيدليات للأسف لكن في الكبيرة يمكن نلاقيه نطلب من الصيدلي يعملنا محلول 20 -25% أو إحنا نعمله في البيت فا المطلوب إن إحنا علشان نعمل المحلول دة مطلوب كوباية إزاز أقماع حمض البوريك طبعا وإزازة Spray مستعملة من حاجة استعملناها قبل كدة بس نحط عليها علامة مبيد خطر ومياه دافية لطريقة تحضير المحلول ها تجيبي العلبة اللي فيها الـ Borax ودايما خلي فيها معلقة علشان تحضري فيها المحلول وتحطيه في الكوباية لحد ربع الكوباية تقريبا تقريبا خدي بالك مايكونش في أطفال في المكان وأنتِ بتشتغلي واغسلي إيديكي كويس بعدها واملي الكوباية لحد الآخر بمياه دافية هتلاقيه عمل فقاقيع كدة ممكن تستعملي المعلقة في التقليب لكن بعدها تنشفيها كويس بيأخذ وقت طويل شوية على ما يدوب لكن في الآخر ها يدوب خالص ها يبقى محلول متجانس لما تتأكدي إنه داب تماما لازم يبقى دايب تماما علشان تعرفي تصبيه في علبة الـ Spray تقدري تحطيه بعد كدة في علبة Spray  مستعملة حاجة قديمة زي مثلا كان Spray إزاز أو حاجة بس تكوني غسلتيها كويس استعملي قمع مناسب لحجم الإزازة وتصبيها خدي بالك إنه لو مش دايب كويس يمكن يبقى فيه مشكلة في الرش لو رشتي بالمحلول دة في الأركان وعند البلاعات هتلاقي إنه الحشرات قلت كتير أوي عن قبل كدة مش هاتموت تماما كلها لكن هي ممتازة لأنها آمنة للأطفال أحيانا بنرش كمان البودر دي على السجاد لو عندنا براغيث في البيت بس نقطة لو فيه أطفال بيزحفوا خدي باللك إن دة خطر عليهم فا بس لما يكون في البيت كبار ماحدش بحط إيده في الأرض وبعدين يأكل ممكن تستعمليه البودرة دي على السجاد علشان قتل البراغيث دي ملخص لبعض المبيدات الآمنة للحشرات بدل الضارة جدا بالأطفال اللي بنستعملها الكيماوية منها كلها طبيعية دة ملح ودي بودرة من حاجات نباتية

تمنياتي لكم بكل الصحة