MS التصلب اللويحي

Multiple Sclerosis MS

هو مرض التصلب اللويحي المتعدد يعني إيه؟ هو مرض يصيب الجهاز العصبي عند الإنسان نتيجة أن جهازنا المناعي شاف حاجة إحنا مش عارفين إيه هي لحد دلوقتي لكن الحاجة دي الجسم المجهول دة الجهاز المناعي حاول يدمره فبالخطأ دمر طبقة الميالين في جهازنا العصبي إيه طبقة الميالين دي؟ في خلايا الجهاز العصبي هتلاقيها حوالين المحور بتاع الخلية. هي شبه الشجرة كدة والساق بتاع الشجرة حواليه طبقة من الدهون اسمها ميالين. اللي بيحصل إنه الجهاز المناعي بيهاجم الحاجة الغريبة اللي في جسمنا- اللي إحنا مش عارفين إيه هي- وبتدمر بسببها طبقة الميالين دي فاللي بيحصل إن إحنا هنلاقي في النهاية ندبات كتير في طبقة الميالين في كل مكان في جهازنا العصبي يعني Multiple يعني متعددة Sclerosis التصلب اللوحي يعني عدة ندبات في أماكن متعددة من طبقة الميالين دي ودة بيسبب إيه في النهاية إنه الكهرباء اللي بتعدي في خلايا الجسم اللي هي العصبية دي هي بتشتغل بالكهرباء زي الأجهزة الكهربائية هتتسرب لأن الطبقة العازلة دي عاملة زي الـ Coax بتاع أسلاك الكهرباء بتاع الكابل بتاع الكهرباء فلما يتدمر العازل دة هتلاقي تسرب للكهرباء وبالتالي الإنسان ما بيبقاش قادر يمشي الكهرباء صح في خلاياه وبالتالي هتلاحظ إنه مش قادر يسيطر على الحركات اللي المفروض يسيطر عليها من جهازه العصبي ودة ها يختلف بحسب المكان اللي حصل فيه الالتهاب أكتر العيانين بالمرض دة هما بين سن الـ 20 لـ 40 سنة والأعراض عندهم مختلفة خالص يعني يمكن اتنين عندهم MS عندهم شكاوى مختلفة تماما وكمان الـ Course بتاع المرض- إزاي المرض شكله بيستمر أو لا- مختلف خالص في شكل موجات، مرة يزيد أوي مرة يقل أوي مرة العيان يتحسن خالص وتروح الأعراض كلها ومرة ترجع تاني واحد أو اتنين منها أو كلها مرض التصلب اللويحي المتعدد ليس بالضرورة هو يسبب لك أنك تبقى مثلا في يعني مقعد على كرسي أو ماسك عصاية أو لابس نظارة، مش لازم، لكن هو بيبتدي بأعراض معينة زي أنك تشوف الحاجات مزغللة أو اتنين أو تبقى مش قادر تركز أوي أو مش قادر تمشي صح يعني تتوازن وعندك يعني زي تنميل في الجلد أو كأن حاجات بتزحف عليك ويمكن تقلصات في عضلات الساقين زي ما قلت مافيش اتنين لهم نفس الأعراض ممكن تلاقي واحد عنده عرض واحد وواحد عنده كل الأعراض، لكن أهم عرض بيلاحظوه العيانين إحساس الدبابيس دة اللي على جلدهم وكمان ممكن تحس إن ايديك ورجليك منملين أو الجلد عموما، وتحس أنك عاوز تهرش أو في حرقان على الجلد أو إحساس بأن في طعنات أو تمزقات على الجلد كمان ممكن تلاقي مشاكل في التبول يعني هتروح الحمام كتير أو بالليل بالذات أو عندك مشكلة أنك تفضي المثانة تماما، كمان ممكن تلاقي المشاكل في الأمعاء أنك يبقى عندك إمساك مزمن وممكن يكون عندك مشاكل في المشي يعني مش قادر تتوازن أوي ممكن تحس أنك ضعيف أو عندك تقلصات ممكن تقع وأنت ماشي كمان ممكن تحس بالدوخة للأسف يعني ممكن وأنت ماشي تحس أن رأسك خفيفة وممكن تقع لأنك مش حاسس إن الأرض مضبوطة تحتك. للأسف كمان بعض العيانين بيحسوا بالإرهاق الشديد حتى لو هم نايمين كفاية وواخدين راحتهم وكل حاجة مرهقين طول اليوم وطبعا دة هيؤثر على شغلهم ممكن يخليهم يفقدوا وظيفتهم. كمان في مشاكل في مسألة العلاقات الحميمة هتلاقي عند السيدات في جفاف في المهبل وعند الرجال في مشاكل في الانتصاب والرجال والسيدات عندهم مشاكل في الإحساس بالعلاقة الحميمة أو يمكن يفقدوا الرغبة الجنسية تماما. كمان في مشاكل في الحديث إنهم يتكلموا هيتكلموا بصعوبة أو الكلمات هتخرج يعني متقطعة أو بطيئة. ممكن كمان يلاقوا مشاكل في البلع فممكن العيان يشرق كتير فقرايبه لازم يأخذوا بالهم منه إنهم ينقذوه لو شرق.  للأسف كمان ممكن تلاحظ إن التفكير بقى أبطأ شوية وأنت مش قادر تركز في حاجة بتقرأها مع أنك ممكن تفضل فاهمها وكل اللي بتسمعه فاهمه وكل حاجة، بس مش قادر تركز أوي في المعنى فيمكن الناس محتاجين يكونوا أكثر صبرا معاك في توضيح الكلام. كمان حاجة ممكن تلاقي ارتعاش في الايدين أو في الرجلين ودة ممكن يؤثر طبعا على أنك لو أنت بتشتغل على كمبيوتر أو وأنت بتسوق العربية أو حاجة. المشاكل كمان في النظر: ممكن تلاقي الحاجات بقت مزغللة أو تلاقي بقع سوداء في الحاجات اللي أنت بتشوفها أحيانا ممكن تفقد النظر مؤقتا- أنك تبقى فجأة مش شايف حاجة- للأسف دة ممكن يحصل لأن أعراض الـ MS أو التصلب اللويحي المتعدد مختلفة أوي أوي من شخص للتاني، ماتقارنش نفسك بشخص تاني يعني ماتقولش أه دة فلان يعني بقى قاعد يعني في السرير مش قادر يتحرك فا أنا هابقى زيه لا لا إطلاقا ممكن تبقى طبيعي جدا ومافيش أي مشاكل عندك.

 

عاوزة أكلمكم هنا عن العلاج المتوفر للـ MS أهم حاجة إن إحنا لو في أدوية نأخذها لو في محتاجين أجهزة أو نظارة أو عكاز أو كدة كمان العلاج الطبيعي أرجوكم شوفوا إذا كان يقدر يساعدكم والعلاج الكلامي وأحيانا تحتاجوا جراحة لكن الفيديو دة بالخصوص عاوزة أركز لكم فيه على العلاج الحياتي أو اللي أنت تقدر تعمله في البيت واللي هو أهم عامل منه هو تغيير الأكل اللي أنت بتأكله في ناس كتير بيقولوا إنه المرض تحسن جدا لما بطلوا اللحمة الحمراء يعني منعوا اللحمة الحمراء من أكلهم ومنتجات الألبان، فلو بطلت تأكل لحمة حمراء ومنتجات الألبان لازم تلاقي لها بقى بدل فأنت ممكن تأكل بروتينات من مصادر أخرى زي مثلا الأسماك البقول المكسرات الحبوب كل دي فيها بروتينات كويسة أحيانا ممكن تأكل مثلا فراخ لأنها مش لحمة حمراء دة كويس برضه كمان في الأبحاث الجديدة بتقول إنه فيتامين د بتاع الشمس مهم جدا ومفيد للجهاز المناعي وعلى كدة مطلوب إنك يا إما تأخذ فيتامين د في صورة أدوية يعني نقط أو حبوب أو تقعد في الشمس على قد ما تقدر دة ممكن يكون له دور ممتاز في علاج التصلب اللويحي المتعدد أهم حاجة بقى اللي إحنا ممكن نتعامل بيها مع المرض إن إحنا نعوض المفقود من طبقة الميالين دي طبقة الميالين دي بتتكون من إيه؟ من دهون فا الدهون المفيدة لطبقة الميالين موجودة في الأوميجا 3 فا أوميجا 3 ممكن تأخذها في صورة كبسولات أو مكسرات أو أسماك ممكن يكون لها تأثير ممتاز على مسار المرض عندك فمن فضلكم ركزوا أو اتكلموا مع الدكتور في موضوع أنكم تأخذوا مع الأدوية أوميجا 3 كبسولات أو تأخذوه بقى في الأكل زيادة لو أخذت حوالي 3 جرام أوميجا 3 في اليوم ممكن يكون له تأثير ممتاز على مسار المرض عندك الإصابة بـ MS لا تعني نهاية حياتك أو أنك ستصاب بإعاقة لا أطلاقا ممكن تعيش حياة طبيعية جدا إذا عرفت إزاي تتعامل مع المرض وإذا غيرت أكلك اللي يصبح أكثر صحيا

أتمنى لكم كل الصحة والتوفيق، تحياتي