مقالات

C-Section الولادة القيصرية

الولادة القيصرية أو بنقول عليها Caesarean، هي عملية جراحية نفتح فيها جدار البطن عند الأم وجدار الرحم علشان نستخرج الجنين. أغلب الأحيان بنكون متفقين مع الأم إن إحنا نعمل ولادة طبيعية وبعدين ممكن تتغير الخطة ساعة الولادة ونقرر إنها تبقى قيصرية، وفي بعض الأحيان بنبقى ناوين نعمل ولادة قيصرية من الأول. إمتى الحالات دي؟ في حالة الولادة المهبلية الطبيعية لو في انقباضات في الرحم لكن عنق الرحم مش راضي يفتح في الحالة دي بنضطر نعمل ولادة قيصرية، لكن في بعض الأحيان الطفل نفسه ممكن يكون في عنده مشكلة إنه مثلا مش حاصل على كمية كفاية من الأكسجين، أو الحبل السري حصله عقدة أو ضغط عليه من رأس الجنين، فا في الحالة دي لازم ننزل الجنين بطريقة تانية غير الولادة المهبلية.
ساعات بنتفق مع الأم قبلها بفترة على ولادة قيصرية، لو مثلا الطفل مش في مكانه الصح يعني رأسه مش تحت، ولو أنتِ حامل في توائم أو لو المشيمة متقدمة عن الـ Baby فا منقدرش نولد المشيمة قبل الـ Baby، ماينفعش بنقول عليها مشيمة متقدمة لازم في الحالة دي قيصرية. لو عندك مشاكل صحية زي مثلا تسمم الحمل لازم ولادة قيصرية، أو عندك أي أمراض زي مثلا ارتفاع ضغط الدم مشاكل في القلب عدوى في الجهاز التناسلي ممكن تنتقل للـ Baby عن طريق الولادة الطبيعية في الحالات دي كلها لازم ولادة قيصرية. أحيانا بيكون الطريق مسدود للولادة، يعني مثلا عندك ورم ليفي سادد الطريق على الـ Baby إنه يتولد، أو رأس الـ Baby كبيرة أوي لدرجة مش قادرة تخرج من المهبل. لو عملتِ قيصرية قبل كدة ممكن يحصل مشاكل من الولادة الطبيعية بعد كدة فا احتمال يقولوا لك لأنك عملتِ قيصرية قبل كدة مضطرة تعملي قيصرية تانية، مش ضروري مش شرط لكن بعض الأطباء بحسب حالتك قد يقترحوا عليكِ كدة.
لازم تعرفي إنه اختيار القيصرية من غير سبب ممكن يعمل لكِ مشاكل في المستقبل في الولادات اللي بعدها، فا أنتِ لو مقررة تعملي قيصرية علشان أسهل أو يعني مش عاوزة تتألمي مع الولادة أو عاوزة المعاد بالظبط الـ Baby يتولد فيه، كل الحاجات دي لازم تعرفي إنه في المستقبل ها تؤثر على الحمل الذي يليه والذي بعده، فا بنقول للأم اللي عاوزة تولد قيصرية من غير سبب طبي أنك لازم تبقى مخططة أنك تولدي طفلين بالكتير أو يمكن 3 على أقصى حد.
لو إحنا قررنا نعمل ولادة قيصرية قبل الولادة بفترة ها نعمل كمان تحاليل دم علشان نتأكد من الـ Group بتاعتك، يعني فصيلة الدم والـ Haemoglobin يعني كمية الحديد في الدم وكدة. دة ها يساعدنا علشان إذا احتاجتِ نقل دم أثناء العملية، إن إحنا نساعدك بسرعة. لو الولادة أو يعني القيصرية خططناها قبل الأسبوع الـ 39 من الحمل، لازم ناخد عينة من السائل اللي حوالين الـ Baby السائل الأمنيوسي، علشان نعرف إذا رئة الـ Baby جاهزة للولادة لأن لو اتولد ورئته مش ناضجة كفاية ممكن يحصله مشاكل في التنفس وتبقى خطر عليه. حتى لو ها تولدي ولادة طبيعية، استعدي نفسيا إنه ممكن احتمال تعملي قيصرية، لازم تبقي واخدة دة في الاعتبار وعارفة عن القيصرية حتى لو أنتِ مخططة 100% أنك تولدي طبيعي. العملية نفسها بتختلف من سيدة لأخرى، مثلا في طريقة فتح الجرح أو في طريقة التخدير، لكن أغلب الولادات القيصرية ها نطلب من السيدات إنهم يعملوا حاجات معينة. أولاً في البيت خدي حمام وأغلسي الجسم كويس بالذات المنطقة التناسلية، لا تزيلي شعر المنطقة التناسلية لأنه لما يبقى مزال من جزوره ممكن يعمل عدوى مع العملية وتكون خطر عليكِ، فا إحنا ها نتصرف ها نعمل حلاقة لشعر المنطقة التناسلية قبل العملية.
في المستشفى ها ننظف البطن بسائل مطهر، وها نحط قسطرة في المثانة البولية، وها نضع كمان Intravenous Line يعني خط وريدي حقنة في الوريد علشان توصلك سوائل وأدوية أنتِ محتاجها في الدورة الدموية. احتمال نديكِ دواء مضاد للحموضة علشان ما تتعبيش من التخدير. أغلب الجراحات القيصرية ها نديكِ حقنة في الظهر للتخدير، وها تبقي فايقة يعني ها تبقي شايفة وسامعة اللي بيحصل، لكن فقط الجزء الأسفل من جسمك هو اللي مش حاسس بالألم. في بعض الحالات ممكن نضطر نستعمل التخدير الكامل لما تبقى حالات طوارئ. سيبدأ الجراح بعدها في عمل قطع في جدار البطن، بيكون أفقي في أغلب الحالات وبنقول عليه قطع البيكيني يعني خط البيكيني، في حالات الطوارئ أو لو الطفل محتاج قطع كبير علشان نطلعه منه أحياناً بنعمل قطع رأسي من تحت الصرة لحد خط العانة، بعد كدة ها يقطع الطبيب الطبقات اللي تحت الجلد من الدهون لحد ما يدخل للرحم ويعمل قطع في الأغلب أفقي. أحياناً بنعمل قطع مختلف شكله شوية بحسب وضعية المشيمة وحجم ووضعية الـ Baby. بعد كدة ها نستخرج الـ Baby، والدكتور ها ينظف وجه وأنف الـ Baby وبعد كدة هانحط مشبك على الحبل السري علشان نقفله ونقطعه، وبعد كدة ها نقفل الجروح ونخيطها.
لو أنتِ واخدة تخدير نصفي ها تخدي الـ Baby بعد الولادة، وها تقدري ترضعيه فورا بعد الولادة. بعد التخدير الكامل محتاجة فترة علشان تفوقي. ها تقعدي في المستشفى يومين أو 3 أيام، مهم أوي تخدي مسكنات علشان الألم ها يمنع أنك تعملي هرمون اسمه Exotoxin، والهرمون دة بيزود إدرار اللبن للـ Baby. كمان ها يطلبوا منك تشربي أو تأكلي بأسرع ما يمكن، وها يشوفوا كمان إذا عندك امساك أو عدم قدرة على التبول أو أي علامات لإن عندك حمى، كل العلامات دي ها يتابعوكِ فيها في اليومين اللي ها تكوني فيها في المستشفى. ها يطلبوا منك كمان الحركة بأسرع ما يمكن لمنع حدوث جلطة وريدية في الساق، وها يدوكِ حقن علشان برضه منع الجلطة دي.
لما توصلي البيت استريحي قد ما تقدري، وخلي حد يساعدك ويجيب لك كل حاجة ما تمشيش كتير أو تعملي حركات غريبة كتير، أتمشي بس لما تبقي قادرة ومستريحة، ما تشيليش أي حاجة أثقل من الـ Baby لعدة أسابيع بعد الولادة. حافظي على أن الجرح ما يكونش عليه ضغط شديد من جوة، يعني مثلا لما تعطسي أو تحزقي أو تشيلي الـ Baby خدي بالك إنه الجرح ما يكونش بيتضغط عليه لبرة، فا أنتِ مثلا لو أنتِ حاسة إنه أحسنلك أنك تضغطي على الجرح لما تيجي تعطسي يكون أحسن، خلي جنبك دايما مخدة وأضغطي بيها على الجرح كل ما تحسي إن في ضغط جاي من جوة، زي مثلا ساعات لما تروحي الحمام أو تعطسي أو تكحي. أشربي مياه وسوائل قد ما تقدري، دة مهم جدا لإدرار اللبن وكمان علشان يمنع الإمساك اللي ممكن يحصل بعد العملية. أغلب الأدوية اللي ها تخديها علشان الألم مهمة ومش بتعمل حاجة للـ Baby، بس ماعدا الأسبرين هو اللي مشكلة. تجنبي ممارسة العلاقة الحميمة لمدة 4-6 أسابيع بعد الجراحة، لكن افتكري إن دايما زوجك برضه محتاج اهتمامك ما تنسيهوش، فا أهتمي أوي أنك تكوني بتعبري عن حبك وحنانك له علشان ما يحسش إن الـ Baby خدك منه وطبعا دة ها يزعله.
أتصلي فورا بطبيبك لو عندك أي علامات إن في عدوى في الجرح أو في الرحم، يعني عندك مثلا حمى 38 درجة أو أعلى، أو عندك ألم فظيع في البطن أو احمرار أو يعني صديد خارج من مكان الجرح. لو عندك ألم في الصدر واحمرار وحمى وحاسة إنه في كلاكيع جامدة بتوجعك أوي في الصدر. لو عندك التبول مؤلم أو النزيف لا يتوقف وثقيل جدا. أو لو عندك علامات الاكتئاب ما بعد الولادة، ودة ممكن يسبب لك أنك تبقي عصبية جدا ومش عاوزة تاكلي ورافضة الـ Baby وحاسة أنك تعبانة أوي مش قادة تعملي أي حاجة، في الحالة دي أتصلي بطبيبك يمكن تكوني محتاجة مساعدة طبية.
أتمنى لكِ تشافي سريع من العملية وحياة سعيدة جميلة مع طفلك الجديد، تحياتي.

Hypertension ارتفاع ضغط الدم

مرض ارتفاع ضغط الدم أو ضغط الدم المرتفع هو حالة مرضية مزمنة نجد فيها أن الدم ضغطه على جدران الأوعية الدموية مرتفع طول الوقت مشكلتنا مع ارتفاع ضغط الدم المرضي إنه في أغلب الأحيان مالهوش أي أعراض ودي للأسف مشكلة كبيرة في الطب المشكلة بتحصل بقى إنه لما بعد كدة تبتدي تحصل منه مضاعفات ليه ممكن يحصل منه مضاعفات؟ زيادة ضغط الدم على جدران الأوعية الدموية باستمرار قد يسبب انفجارها في لحظة ما في مكان ما في الجسم وعليه بتنتج مضاعفات ممكن تكون قاتلة في أغلب الناس 90-95% من البشر اللي عندهم ارتفاع ضغط الدم بيكون السبب مش واضح غير إنهم أسلوب حياتهم غير صحي بنقول عليه أولي ارتفاع ضغط أولي في ارتفاع ضغط ثانوي يعني في سبب آخر مسبب الارتفاع الضغط دة يكون مرض مزمن آخر يعني مثلا مرض مزمن في الكلى مشاكل في الغدد يعني الهرمونية فا المشكلة بتكون سبب آخر مسبب ارتفاع ضغط الدم دة وعاوزين نحله في الثانوي دة للأسف في ناس بيفتكروا مثلا إن الواحد لما يبقى عصبي أو يعرق كتير أو عنده صعوبة في النوم أو وشه يحمر دي كلها أعراض لارتفاع ضغط الدم مش دايما في أحيان كتير أوي العيان بيبقى ماعندهوش أي حاجة علشان كدة قياس الضغط باستمرار مرة في السنة أو كل سنتين مهم علشان نعرف أخبار الضغط عندك إيه
لا تحاول تشخيص نفسك دايما روح لدكتور باطنة أو حتى قيسه في الصيدلية ضغط الدم عندك يوم عيد ميلادك مثلا واعرف إن الأعراض مش بالضرورة لها علاقة بضغط الدم لكن في بعض الأحيان في علامات خطر بتقولك لازم تروح فورا للدكتور تشوف إيه الموضوع لأنه احتمال يكون ارتفاع شديد في ضغط الدم أو ممكن يكون حاجة تانية زي مثلا لو شوفت علامات حمراء زي ذباب أحمر في العين كدة معنى كدة إن غالبا في مشكلة في الشبكية محتاجة علاج وقد يكون سببها ارتفاع شديد في ضغط الدم لو لاحظت إنه وشك بيحمر كتير من غير سبب ممكن يكون سببها ارتفاع في ضغط الدم ولو إنه مش دايما لكن كويس لو تقيس الضغط مع الحالة دي لو لاحظت أنك دايخ فجأة وفقدت توازنك ومش قادر يعني تحرك إيديك يعني زي ما أنت عاوز أو رجليك أو مش قادر تمشي بسهولة ممكن تكون دي علامات لسكتة دماغية نتيجة ارتفاع ضغط الدم
لو قيسنا ضغطك ولقيناه أكتر من 180 اللي فوق وأكتر من 110 اللي تحت أو واحد منهم دي حاجة اسمها أزمة ارتفاع ضغط دم حادة ومحتاجة ضروري تروح للدكتور أو المستشفى بالذات لو معها صداع فظيع أو لو فجأة بقيت خايف ونفسك قصير ومعك نزيف من الأنف دي علامات كلها لإن في مشكلة  محتاجة طوارئ في المستشفي
يبقى أهم حاجة إن إحنا نعيش حياتنا من وإحنا صغيرين وشباب وإن إحنا بنحرص على عدم حدوث ارتفاع ضغط الدم عندنا يعني مطلوب مننا إن إحنا نحافظ على وزننا الصحي أهم حاجة مارس الرياضة نصف ساعة في اليوم مثلا مشي أغلب أيام الأسبوع على قد ما تقدر لو كل يوم يبقى عظيم زود الأكل الطبيعي زي الفواكه والخضار وإن أنت تقلل الصوديوم في الأكل بتاعك يعني ملح المائدة قلله لو إحنا حافظنا على الحاجات دي لو أصبنا بضغط الدم المرتفع ممكن مانحتاجش أدوية بس بأسلوب الحياة الصحي ممكن نعالج المشكلة ودة كمان لمنع حدوثه في الأساس في بعض الحالات عندهم حاجة اسمها ضغط دم مرتفع مقاوم للعلاج يعني بندي له الأدوية وبرضه مش نافع ضغط الدم عنده لسة عالي في الحالة دي العيان غالبا عنده سبب وإحنا مش قادرين نكتشفه بسهولة يعني لازم نكشف على هرمونات تنظيم الضغط عنده في الجسم دي أول حاجة تاني حاجة لازم نشوف إذا عنده حاجة في شريان مسدودة يعني انسداد أو ضيق في شريان ما ودة بيرفع ضغط الدم زيادة حتى مع استعمال أدوية وفي حالة دي لازم جراحة علشان نحل المشكلة اللي في الشريان دي سبب ثالث إنه العيان ممكن يكون عنده اختناق أثناء النوم دة بيزود الضغط برضه زيادة الوزن وشرب الكحول برضه بتخليك مهما استعملت أدوية الضغط مش بينزل لأنه لازم  تقلل وزنك
.يبقى أهم حاجة نعرفها إنه ضغط الدم المرتفع لا نكتشفه بالأعراض بل نكتشفه بالكشف المنتظم يمكن الوقاية منه ومن مضاعفاته بأسلوب حياة صحي فا أهم استثمار في صحتك للوقاية من أمراض تسببها ارتفاعات ضغط الدم المرضية دي إن أنت تكشف باستمرار وتعيش أسلوب حياة صحي
.أتمنى لكم كل الصحة والتوفيق, تحياتي

Tips for Healthy Eyes الحفاظ على صحة العيون

لما بنكون نظرنا سليم شايفين كويس وما عندناش أي التهابات في العيون عمر ما بيجي في بالنا إن إحنا نروح لدكتور نطمئن على النظر عندنا ودي للأسف غلطة كبيرة لأنه مشاكل النظر لما بتبتدي أعراضها بيكون معنى كدة إنه عدى وقت طويل على بدأ المشكلة وبيكون من الصعب علاجها.
علشان كدة عندي لكم 7 نصائح علشان نحمي نظرنا من مشاكل النظر أول حاجة إن إحنا نعمل كشف على العيون بانتظام نبتديه من أول ما الطفل سنه 6 شهور لسنة نبتدي أول كشف نظر للطفل وفي سنين المدرسة كل سنة يروح يعمل كشف نظر علشان نكتشف إذا كان في تغيرات في النظر وفي الحالة دي محتاج نظارة بدري علشان ما تأخرش يعني قدرته في التحصيل الدراسي بعد سن الأربعين محتاجين نعمل كشف دائما على النظر وعلى قاع العين علشان في مشاكل صحية ممكن تسبب مشاكل في قاع العين للأسف ممكن في الآخر تؤدي إلى الإصابة بفقدان النظر يعني دايما قل لطبيب العيون عن لو عندك مشاكل أمراض مزمنة في الجسم كله عامة يعني أو في العيلة لو مثلا عندك سكر أو ارتفاع الضغط عندك أنت شخصيا أو في العيلة بلغ طبيب العيون أثناء الكشف عليك لأنه الأمراض دي بالذات بتعمل مشاكل في الأوعية الدموية في قاع العين وعدم اكتشافها بدري ممكن يؤثر على نظرك بصورة سيئة جدا كل ما تكبر في السن كمان لو بتشوف حاجات زي مثلا نقط سوداء أو أضواء أو حاجات طايرة في مجال نظرك كدة لازم تفهم طبيبك إن الأعراض دي موجودة علشان ممكن تكون أعراض لمشاكل صحية في البيت وفي الشغل لو أنت عندك تكييف أو تدفئة في الحالتين ممكن الجو يكون جاف ودة يؤذي العيون يخيلها جافة دائما ودة مضر بالنظر فا علشان كدة لو أنت قاعد في مكان مكيف أو في تدفئة دائمة أحرص إنه يكون في رطوبة كفاية مثلا خلي عندك جهاز بيعمل بخار مياه شوية أو استعمل نقط دائما اللي هي اسمها الدموع الصناعية دي كويسة لو عندك قطة أو كلب في البيت الشعر بتاعهم ممكن يكون مسبب لتهيج العيون فا التنظيف دائما باستمرار مهم أوي علشان مايبقاش له تأثير سيئ على العيون لو بتستعمل الكمبيوتر لفترة طويلة طول اليوم محتاج تعمل شوية حاجات أول حاجة أنك لو بتلبس نظارة أو عدسات أنهم يكونوا مظبوطين دائما بنقول عليه يعني Up to date يعني متقاس نظرك قريب والنظارة مظبوطة على مقاسك علشان ما تتعبش لو بتتعب من الانعكاس أو اللمعة اللي في الكمبيوتر يمكن تكون محتاج نظارة تحميك من المشكلة دي وضع الكمبيوتر في مستوى بحيث يكون عينك مش تعبانة مش منخفض أوي أو عالي أوي على العيون بحيث تبقى العيون مستريحة لو في انعكاس في الشاشة من شباك وراك مثلا أو أي ضوء مهم أوي إنه ما يكونش موجود فا حرك الكمبيوتر بحيث يكون مافيش انعكاس نازل عليه أو حط شاشة تحميك من اللمعة دي لو حاسس إن عينيك ناشفة أقفل عينيك وافتحها كدة في تمرينات عد لحد 10 وكل 20 دقيقة بص بعيد 20 متر لمدة 20 ثانية وكل ساعتين خد Break 15 دقيقة يعني أبعد عن الكمبيوتر وأعمل حاجة تانية كل أكل صحي مناسب لصحة العينين زي مثلا الخضراوات الورقية الخضراء والتوت البري والأسماك زي الأسماك المياه الباردة بيقولوا عليها والمكسرات زي عين الجمل كويسين أوي على الحفاظ على صحة العين أحمي عينيك من أشعة الشمس لو أنت قاعد في مكان مشمس فترة طويلة أستعمل نظارات شمس كويسة وكمان أحرص على أن أولادك أطفالك الصغيرين يكونوا برضه لابسين نظارات كويسة أو على الأقل لابسين Cap بيحمي عينيهم من الشمس القوية أحرص على نظافة العلبة اللي أنت بتحط فيها العدسات بتاعتك علشان العلبة دي لو مش نظيفة ها تبقى مركز لتجمع البكتيريا المضرة بالعدسات واللي ها تضر بعينيك فا بعد كل مرة تحط فيها العدسات في عينك فضي المحلول من العلبة وأغسلها كويس وحط محلول جديد السيدات استعملوا Makeup من أنواع كويسة وما تحطهوش في العينين جوة العينين أبدا ولو بتستعملوا ماسكارا اعملوها يعني أعرفوا إنه التاريخ عليها أكتبي تاريخ امتى فتحتيها وبعد 3 شهور ارمي الماسكارا واستعملي ماسكارا جديدة لو بتسافروا كتير الطائرة بتتعب العينين فا حطوا قطرة في العينين قبل السفر دي ها تساعد شوية على تحمل الجفاف اللي في الطائرة لو أنتم مسافرين وبتستعملوا نظارة أو Lenses خدوا معكم نظارة دائما ونظارة إضافية ممكن و Lenses إضافية لو أنتم رايحين مكان ها تعوموا فيه مثلا ما تعوموش أبدا بالـ Lenses في عينيكم علشان ممكن تجمع الكيماويات والبكتيريا اللي في المياه ودة مضر بعينيكم
أتمنى لكم كل الصحة والتوفيق. تحياتي

Blood Pressure ضغط الدم

لما بنروح للدكتور علشان نقيس الضغط أو ضغط الدم بنسمع رقمين مثلا الدكتور يقول ضغطك 120/80 يعني إيه الرقمين دول؟ علشان نفهم حكاية ضغط الدم وارتفاع ضغط الدم وهكذا لازم الأول نفهم معلومات عن الجهاز الدوري أو جهاز القلب والأوعية الدموية.
الجهاز الدوري بيتكون من مجموعة من الأعضاء بيشتغلوا مع بعض علشان يضخوا الدم في الجسم اللي هما القلب الرئتين الأوعية الدموية والدم نفسه القلب عبارة عن عضلة تضخ الدم في الأوعية الدموية الدم يحمل الأكسجين والمواد المغذية للأنسجة والعضلات وأعضاء في الجسم وبعد كدة بيحمل الفضلات ويخرجها عبر الكلية والكبد والرئة والجلد لما القلب بيشتغل كعضلة بيعمل حاجتين بينقبض وينبسط ينقبض وينبسط انقباض القلب يسبب إن الدم بيتدفق في الأوعية الدموية وانبساطه معناه إنه بيملئ جواه دم وبيقل تدفق الدم في الأوعية الدموية علشان كدة لما بنعوز نعرف ضغط الدم بنقول إنه كمية الضغط اللي بيمارسها الدم على جدران الأوعية الدموية نتيجة الضربة اللي بتجيله من القلب دي فا معنى كده إنه لما القلب بينقبض الضغط دة بيكون عالي ولما بيرتخي أو ينبسط الضغط دة بيقل علشان كدة عندنا قيمتين لضغط الدم واحدة أثناء انقباض القلب وواحدة أثناء انبساطه فا القيمة العليا هي اللي بتحدث أثناء انقباض القلب والسفلى هي اللي أثناء انبساطه.
طيب الدكتور بيقول القراءة 120/80 إيه ملم زئبق يعني إيه؟ يعني ضغط الدم في الأوعية الدموية يعادل ضغط عمود من الزئبق ارتفاعه مثلا 120 ملم أو 80 ملم أو حسب القراءة اللي إحنا شايفينها على الجهاز لقياس ضغط الدم نستعمل جهاز اسمه جهاز قياس ضغط الدم أو Sphygmomanometer الجهاز دة بنستعمله مع سماعة طبية ونحط الجهاز على زراع المريض بمستوى القلب تقريبا في أعلى الزراع نسأل المريض أن يستلقي مع ارتفاع بسيط من الظهر وبنضع الجهاز الحزام بتاعه بنحطه على ذراع المريض ثم نضع السماعة تحت الحزام دة في مكان معين بنسمع فيه شريان وتدفق الدم فيه نزيد الضغط بمضخة الهواء الملحقة بالجهاز لحد ما نوقف الدم اللي في الشريان في الذراع بعد كدة بنقلل الضغط يعني بنفرغ الهواء ونبتدي نسمع أصوات معينة لما يبدأ تدفق الدم في هذا الشريان أول ما تبدأ تسمع صوت التدفق هو دة الصوت اللي عنده العلامة بتاعة الضغط الانقباضي للقلب وبعدين الصوت ها يتوقف ساعتها هي دي قيمة الضغط الانبساطي للقلب أو الارتخائي علشان نتأكد من قراءة الضغط الانبساطي نضع الأصابع على الرسخ ونحس بها الشريان اللي هناك الشريان دة بيعرفنا قيمة الضغط الانبساطي لما نبتدي نحس فيه بتدفق الدم لو قيسنا ضغطك مرة ولقيناه عالي مش معنى ذلك بالضرورة إن عندك مرض ارتفاع ضغط الدم لكم لو قيسناه عدة مرات وراء بعض ولقيناه أكتر من 140/90 أو أكتر من 140 بس أو أكتر من 90 بس معنى كدة إن أنت عندك مشكلة في ضغط الدم الطبيب مضطر يديك أدوية لكن الأدوية دي مش بتنفع من غير أسلوب حياة صحي أكل صح وممارسة رياضة.
لو إحنا بنقيسلك الضغط ولاقيناه أعلى من 180 ملم زئبق أو أعلى من 110 اللي تحت معنى كدة إن إحنا لازم ندخلك المستشفى فورا لأن في حالة من ارتفاع ضغط الدم بتكون فيها يعني بنقول عليها أزمة ارتفاع ضغط الدم العيان بيكون فيها حياته في خطر كل الناس لازم يقيسوا ضغطهم من أول سن 20 سنة يقيسوه مرة كل سنتين تقريبا كون ضغطك صحي وكويس مش معنى كدة إن أنت تهمل في صحتك لازم تحافظ على الأكل الصحي والحياة يعني النشيطة الرياضية علشان دة استثمار في صحتك للمستقبل علشان في المستقبل ما تبقاش معرض أكتر لارتفاع ضغط الدم هي عملية تراكمية يعني لو اهتميت بصحة الأوعية الدموية من الأول بالأكل الصحي والرياضة أنت في المستقبل ها تقل فرصتك في الإصابة بضغط الدم المرتفع والأمراض المتعلقة به.
تابعونا في أفهم علشان نشوف أمراض ضغط الدم وعلاقتها بصحتنا عموما والمضاعفات اللي ممكن تحصل.
أتمنى لكم كل الصحة والتوفيق. تحياتي.