مقالات

IBS القولون العصبي

القولون العصبي مشكلة تصيب بعض الناس، هي مشكلة مزمنة بتؤثر على القولون يعني الأمعاء الغليظة، وبتختلف أعراضها من شخص للتاني. لكن أهم الأعراض اللي ممكن نلاحظها إنه الشخص بيكون عنده ألم في البطن يعني مغص crumbs انقباضات إحساس بالانتفاخ وأحيانا خروج غازات اسهال وإمساك بيتبادلوا مع بعض أو اسهال مزمن أو إمساك مزمن وأحيانا مخاط مع البراز. فأغلب الناس هي مشكلة مزمنة لكن أحيانا بتيجي الأعراض عندهم وتروح لوحدها، وأحيانا يعني بتفضل معهم طول الوقت، مش عارفين بالظبط تحصل إزاي لكن كل ما تيجي الأعراض الشخص محتاج عناية خاصة علشان تتحل المشكلة. لكن في أعراض معينة محتاج ضروري تروح معها للدكتور، إنه مثلا يكون في نزيف من الشرج ألم في البطن يعني مغص يصحيك من النوم قوي جدا وعمال يزيد أو أنك تفقد وزن لدرجة تحس إن صحتك بقت ضعيفة. ممكن كمان تحصل يعني مضاعفات من المشكلة دي ها تخلي حياتك صعبة، إنه يكون عندك مثلا بسبب الإمساك المزمن ممكن بواسير، أو إنك بسبب سوء امتصاص الأغذية لأن عندك مثلا اسهال مزمن يجيلك سوء تغذية، وفي ناس كتير عندهم القولون العصبي مانعهم من حياة اجتماعية طبيعية، يعني مثلا سيدة عندها طول الوقت مغص فا مش عارفة تخرج تروح تزور أصحابها أو قرايبها، مش عاوزة تختلط بالناس، فطبعا لازم تشوف حل للمشكلة دي لأنها قد تسبب اكتئاب وانعزالية عن المجتمع.
التشخيص للقولون العصبي بيكون صعب شوية، ليه؟ لأن إحنا مش بنشوف أو بنسمع حاجة على جسمك، لا إحنا محتاجين منك الأعراض، وها نقعد بالمحاولة والخطأ نشوف إيه اللي يريحك لحد ما نوصل للحل. فا في بعض الحالات العيان بيفضل يروح للدكتور يرجع له تاني يقول طب أنا المشكلة ما اتحلتش عندي، أعمل إيه؟ وأحيانا بمرور الوقت بنكتشف إن عندك مرض آخر غير القولون العصبي، يعني في بعض الناس بنطلب منهم إن إحنا نعمل لهم تحليلات دم ويمكن أشعة وأحيانا منظار عملية، علشان نعرف أنت عندك إيه. لأننا مش عارفين سبب القولون العصبي فإحنا بنحاول على الأقل نعالج الأعراض علشان أنت تكون مستريح، علشان أمعائك تكون ما عندهاش الشكوى اللي بتجيلك كل مرة دي. الناس اللي عندهم شكوى بسيطة مغص بسيط غازات بسيطة بنحاول نحل معهم المشكلة بطريقة التغذية الصح، والناس اللي عندهم آلام جامدة أوي بنديهم أدوية. الدكتور ها يقول لك أبتدي غير أكلك، يعني أمتنع عن أكلات معينة بتسبب مثلا الغازات، زي مثلا المشروبات الغازية بالذات بعض الخضراوات والفاكهة اللي بتعمل غازات، زي كرنب البروكلي القرنبيط ويعني الفواكه النية اللي مش مطبوخة. كمان في ناس عندهم مشكلة مع الجلوتين، فالأبحاث أثبتت إنه القولون العصبي عند بعض الناس بيسترح لما نمتنع عن الحاجات اللي تحوي جلوتين زي القمح والشعير، الحاجات دي ممكن تكون عاملة عندك القولون العصبي.
في نظام تغذية اسمه Fodmap Low Diet، يعني يبقى الأكل بيحتوي على حاجات معينة، ويمتنع المريض عن حاجات معينة بتحتوي على سكريات بتتعبك. يمكن تاخد وقت علشان تجيب نتيجة أنك مثلا اتبعت نظام غذائي معين، لكن ها يعمل نتيجة في الأخر.
أنا عندي شوية نصائح لكم علشان تساعدكم في الموضوع دة، يبقى هدفنا إننا نلاقي حل طويل الأمد صحي من غير أدوية، نعمل إيه؟
أول حاجة إن إحنا نمضغ على الأكل ببطء، بحيث الأكل يبقى سائل قبل ما نبلعه، لأن بداية هضم الأكل بتبدأ مع اللعاب في الفم، فاللعاب مسئول عن تكسير حاجات معينة، فأنت بتحرم نفسك بعدم المضغ كدة بأنك تهضم حاجات معينة تروح القولون فاتتعبه. ابدأ استعمل الألياف بطريقة مدروسة، إزاي؟ الألياف كويسة لضبط حركة الأمعاء، بس ساعات بتعمل غازات، فالمشكلة إن أنت محتاج تزود الألياف لكنها ها تعمل لك غازات، فتعمل إيه؟ حاول تزودها بطريقة تدريجية، وتجنب الحاجات اللي بتحتوي على الألياف اللي بتتعبك، أعرف إيه هي ووقفها. في أغذية معينة ها تفضل تعباك دايما، دي لازم توقفها، تعرف كدة إزاي؟ أكتب كل يوم كلت وشربت إيه، وأعرف في اليوم دة أو اللي بعديه إذا كانت الأعراض زادت إذا الأعراض زادت، لو الأعراض زادت يبقى الأكل اللي أنت كلته يومها أو اليوم اللي قبلها هو اللي تعبك. الحاجات دي زي مثلا الكحوليات الشوكلاتة الحاجات اللي فيها كافيين سواء أدوية أو مشروبات، المشروبات الغازية كل الحاجات دي بتتعب الأمعاء. في ناس عندهم كمان مشاكل من منتجات الألبان واللحم الأحمر والسكريات الصناعية زي السوربيتول والمانيتول وكل الحاجات دي ممكن تتعب لك القولون. لو عندك غازات أمنع الأكل اللي بيجيب لك غازات، حتى لو صحي، زي مثلا بعض البقول البروكولي القرنبيط الكرنب وكل الحاجات دي. في ناس بيمضغوا علكة أو يشربوا بالشاليموه المصاصة، وهما بيشربوا بها بياخدوا غاز كتير يبلعوه، خلي بالك إن دي ممكن تكون أسباب لتكوين غاز في الأمعاء.
في ناس عندهم مشكلة بالذات مع منتجات الألبان، أغلب الناس في بلادنا عندهم مشكلة مع اللاكتوز، لاكتوز يعني سكر اللبن، سكر اللبن أو سكر الحليب محتاج أنزيم معين يهضمه اسمه لاكتيز، فإحنا ناقصنا الأنزيم دة. فعندك اختيارين إما تقلل أو تمنع الأطعمة اللي فيها لاكتوز، أو تاخد أدوية تحتوي على أنزيم اللاكتيز دة. طبعا أنت مش ها تعيش على طول بتاخد لاكتيز، فاستعملها بس لما تستعمل حاجة فيها منتجات ألبان كتير. نيجي لاختيار تقليل أو منع منتجات الألبان، دلوقتي أنت لو قللت منتجات الألبان أو اللبن على الأقل واستبدلته بزبادي مثلا ممكن يكون حل كويس، وفي ناس بيمنعوا خالص منتجات الألبان، وفي الحالة دي محتاج تعوض البروتين والكالسيوم وفيتامين B من مصادر أخرى غير منتجات الألبان.
الأعشاب بيقال إنها كويسة لراحة القولون العصبي، زي إيه؟ بالذات النعناع، لو أخدت نعناع طازج على السلطة مثلا أو شاي بالنعناع ها يريح عندك القولون العصبي في كثير من الأحيان فجربه. في اختيار كمان الـ Probiotics، الـ Probiotics دي البكتيريا الجيدة اللي بتساعد وظائف الأمعاء عندنا، بعض الناس اللي عندهم القولون العصبي مشكلتهم إن الـ Probiotics بتاعتهم قليلة، فإحنا عاوزين نساعدها بأنك تاخد Probiotics. هتلااقيها في مصادر طبيعية زي الزبادي، ولو مش عارف لها مصادر طبيعية ممكن تاخدها في أدوية يعني.
الناس اللي عندهم مشكلة مع المضادات الحيوية، خدوا فترة مضادات حيوية وجالهم بعدها القولون العصبي دة، بنقول إنه غالبا دة له علاقة بأنهم محتاجين Probiotics. أهم حاجة ممكن تعملها علشان تريح القولون أنك تكثر من السوائل، فأشرب سوائل كتير، المياه أحسن حاجة ممكن تشربها. امنع الكحول والمشروبات الغازية والتي تحتوي على كافيين، لأن دي بتتعب الأمعاء. أهم حاجة أنك تشرب سوائل أقرب للمياه، زي مثلا الشاي العشبي، يعني مثلا الكراوية والنعناع وكده كويسين. كل وجبات في مواعيد منتظمة، لو عندك اسهال مزمن كل وجبات صغيرة على فترات قريبة، لو عندك إمساك مزمن كل وجبات كبيرة وغنية بالألياف، دي ها تساعد على تحريك الطعام، علشان تقدر تروح الحمام. مهم أوي أنك تمارس الرياضة، الرياضة بتعمل حاجتين، بتساعدك على مقاومة الضغط العصبي في شغلك وحياتك اللي بيزود مشكلة القولون العصبي، تاني حاجة بتنظم بها حركة الأمعاء فبالذات لو عندك امساك مزمن ها تساعدك على أنك تروح الحمام أكتر.
مشكلة كمان أنك لما بيكون عندك القولون العصبي بتكون مكتئب، فيعني مالكش نفس تعمل حاجة، فالرياضة ها تحسن حالتك المزاجية جدا ودة مهم أوي. لكن لو عندك مرض مزمن زي ضغط الدم المرتفع، ضروري تتكلم مع الدكتور قبل ما تبدأ برنامج رياضي، لأنه مش كل الرياضات ها تناسبك. استعمال أدوية لعلاج الإمساك والاسهال ليس حلا على المدى الطويل، لازم تعرف إذا في حل غيرهم من غير أدوية. لأن الأدوية نفسهم لهم أعراض جانبية، وممكن في المستقبل يبقى عندك مشكلة جديدة من كتر استعمال الأدوية دي. فدايما لو ها تاخد أدوية تاخدها لفترات مش طويلة وتحت اشراف طبي واقرأ كمان النشرة اللي جاية مع الدواء، شوف الأعراض الجانبية اللي ممكن تحصل لك والجرعة الصح ما تتعدهاش وتفضل دايما مقتنع إنه أسهل حاجة وأحسن حاجة لعلاج القولون العصبي هي أسلوب الحياة الصحي. الأدوية علاج مؤقت لمشكلة مثلا تؤرقك دلوقتي النهاردة مثلا لكن مش تفضل تاخدها دايما لا. أهم حاجة أسلوب الحياة الصحي.
أتمنى لكم كل الصحة والتوفيق، تحياتي.

Thyroid الغدة الدرقية

الغدة الدرقية هي غدة صماء على شكل فراشة موجودة في قاعدة الرقبة بتفرز هرمونات بتنظم حرق الأكل في جسمنا يعني الطريقة اللي جسمنا بيستعمل بها الأكل علشان نعمل طاقة الهرمونات هي سعاة بريد كيماويين يعني مواد كيماوية بتخرج من الغدد الصماء دي وتروح في الدم وبتؤثر على الأعضاء والأنسجة اللي محتاجة تؤثر عليها الوظيفة اللي بتعملها هرمونات الدرقية بتسبب إن إحنا يبقى عندنا التنفس منتظم القلب دقاته منتظمة نشاط الجهاز العصبي صح الوزن نحافظ عليه صحي قوة العضلات انتظام الدورة الشهرية درجة حرارة الجسم ونسبة الكولسترول في الدم ووظائف أخرى أيضا الدرقية بتستعمل الـ Iodine أو اليود اللي بناخده من الأكل علشان تعمل منه هرمونين رئيسين T3 و T4 الـ T3 و T4 دول الهرمونات اللي مسئولة عن إن إحنا نحرق الأكل صح فا لما يبقوا زيادة أوي أو لما يبقوا أقل في الحالتين عندنا مشاكل في حرق الأكل طيب خلينا نتكلم عن التنظيم العصبي لموضوع الـ TSH الدرقية المدير بتاعها غدتين في المخ بتيجي الغدة النخامية تفرز هرمون يحفز الدرقية بنقول عليه TSH الغدة النخامية دي المدير بتاعها هو المهاد التحتاني الـ Hypothalamus بنقول إنه المدير الكبير خالص بيفرز هرمون يعمل بيه تأثير على الغدة النخامية اللي تفرز هرمون تحفز بيه الدرقية طيب لما الدرقية تبقى كسلانة وتعمل هرمون أقل فا يجي هرمون تحفيز الدرقية يزيد عليها علشان تعمل أكتر فا إحنا لما بنيجي نقيس نشاط الدرقية بنقيس T3 و T4 في الدم وكمان الهرمون اللي جاي من المخ اللي هو TSH اللي بيحفز نشاط الدرقية فا في أمراض مرتبطة بزيادة نشاط الدرقية أو قلته لو زاد بنقول عليه Hyperthyroidism أو زيادة نشاط الدرقية وفي الحالة دي الشخص بيكون عنده قلق وعصبية ويكون عرقان أوي مع أنه يعني الجو مش حر أوي ارتعاشات في الإيدين أو الأطراف فقدان للشعر الدورة الشهرية ها تختفي أو ها تقل بعض الناس قد تجحظ عيونهم وبنلاحظها ساعات على يعني ناس كتير ومنهم سيدات لاحظت مرة إنه ممثلة مشهورة حصل لها المشكلة دي وقعدوا الناس يتهموها بإنها بتستعمل مخدرات وكدة طبعا زعلت جدا إنه إزاي الناس مش عارفين إن دة مرض مرتبط بالدرقية ومالهوش علاقة بحاجة يعني هو كدة الإنسان بتجيله ساعات أمراض في حالة عكسية لو الإنسان بطئت عنده الدرقية ها يحصل عنده حاجات عكسية ها يجي له اكتئاب ويفقد الشعر والقدرة على التركيز ويبقى مش قادر يستحمل البرد والدورة الشهرية ها تيجي قوية وشديدة وآلام في العظام والعضلات تأكد إن أنت دايما بتأكل يود كفاية في أكلك وكميات صحية واتصل أو اتصلي بالدكتور دكتور أمراض باطنة وغدد صماء أول ما تحسوا إنه فيه الأعراض دي عندكم لأن قد تكون لها علاقة بنشاط الدرقية اللي لازم يكون طبيعي علشان لازم معاه تكون حياتكم كويسة
أتمنى لكم كل الصحة تحياتي