مقالات

Vaginismus التشنج المهبلي

التشنج المهبلي أو Vaginismus هي مشكلة صحية تواجه بعض السيدات أثناء ممارسة العلاقة الحميمة. قد يحدث أن المهبل يصبح كحائط سد، لا يمكن إدخال القضيب فيه أو يدخل القضيب بصعوبة شديدة، وتصاب السيدة بألم أو حرقان أو شعور بالثقل في الجزء الأسفل من البطن. أحيانا قد تصاب السيدة بآلام أثناء العلاقة الحميمة، لكن استمرارها طول الوقت أو عدم القدرة على إدخال القضيب إطلاقا داخل المهبل نتيجة انغلاقه تماما معنى كدة إن عندنا مشكلة ولازم نحلها طبيا، والمشكلة دي بنسميها تشنج المهبل أو Vaginismus. إذا ليس في كل الحالات تجد الزوجة صعوبة في إدخال القضيب، قد يدخل القضيب فعلا ولكن تشعر الزوجة بآلام وحرقان مستمر طول الوقت مع العلاقة الحميمة دي تقع برضه تحت مشكلات تشنج المهبل.
تشنج المهبل من أهم أسباب عدم حدوث العلاقة الحميمة في الزواج، وبيحدث كتير جدا في مجتمعاتنا نتيجة إن البنات عندهم أفكار سلبية عن العلاقة الحميمة، وسمعوا دايما إن الجنس عيب وحرام، فا تبتدي البنت يبقى عندها مشكلة في الزواج ترفض تماما ممارسة الجنس.
عندنا نوعين من التشنج المهبلي، النوع الأول اسمه أولي. يعني البنت عمرها ما مارست علاقة جنسية وعمر ما أمكن إدخال أي حاجة في المهبل، وغالبا بيكون سبب كدة حاجة نفسية عندها، فكرة خاطئة عن الجنس خوف من الجنس بسبب تربية متزمتة وهكذا. النوع التاني إن السيدة تكون تزوجت ومارست العلاقة الحميمة وأنجبت يمكن، ولكن فجأة بدأ التشنج المهبلي دة يحدث عندها، في الحالة دي بندور على مشكلة طبية إلى جانب التشنج، يعني مثلا يكون عندها حاجة مؤلمة حدثت بعد الولادة الجرح بيوجعها ورم في الرحم أو في المهبل، يعني لازم ندور على سبب طبي في الحالات الثانوية بالذات ولو شيلناه ها تروح مشكلة التشنج المهبلي.
علاج التشنج المهبلي، نعمله إزاي؟ عند الدكتور الأول عاوزين نعرف إذا في سبب تاني للتشنج، سبب مرضي نحله، لو مافيش أي سبب تاني ها نعمل برنامج بيتكون من أربعة خطوات، لا يحتاج أدوية ولا جراحة ولا أي برامج معقدة هو بس أربعة خطوات سهلين حتى أنتِ ممكن تحاولي مع نفسك تعالجيه بنفسك.
الخطوة الأولى أنك تفهمي التشريح ووظائف الأعضاء لجهازك التناسلي. في المدارس يمكن ما اتعلمناش بالتفصيل الحاجات دي، فا محتاجة تعرفي كعروسة جديدة جسمك بيتكون من إيه وفين مكان المهبل وكيف يمكن إدخال القضيب في المهبل، علشان كمان تساعدي جوزك على إنجاح العملية الجنسية. كمان لازم تتعلمي تلاقي عضلة قاع الحوض عندك.
الحاجة التانية إن إحنا محتاجين نعرف تاريخك الجنسي، يعني إيه؟ إذا كان عندك أي تجربة جنسية أو يعني تحرش حدث لكِ وأنتِ صغيرة، وخلاكِ تخافي من الرجال أو من العلاقة الحميمة، يعني مثلا حد ضايقك حد قال حاجة وحشة عن الجنس خوفك منه التربية المتزمتة في الأصل اللي بتقول دايما الجنس حرام وعيب ممكن تكون أثرت فيكِ سلبيا بحيث ما بقيتيش قادرة تمارسي الجنس حتى في إطار الزواج. يعني عاوزين نعرف إذا في سبب نفسي كامن جواكِ وأنتِ مش عارفاه، ونتعامل معاه.
الخطوة التالتة أنك تعملي تمرينات لقاع الحوض، وتعملي يعني انقباض للعضلة وارتخاء، تفضلي تعملي كدة تمرين كل يوم علشان تتعلمي السيطرة على العضلة دي وتتعلمي ترخيها بمزاجك.
الخطوة الرابعة نحاول تدريجيا إدخال أجسام في المهبل من رفيعة لأسمك شوية كل مرة، في أدوات لكده موجودة في المحلات الطبية، لكن أنتِ ممكن تبتدي بأصبعك أنتِ ولو قدرتي تدخلي الأصبع اللي بعده أصبعين وهكذا، لحد ما بالتدريج تتعودي على فكرة إدخال شيء في المهبل، وبعدين بعد كدة ننتقل لإدخال القضيب من الزوج.
طبعا في الحالة دي الزوج محتاج يكون متفهم إن العملية مش تحدث من أول مرة، وبيحصل إن إحنا شوفنا في المستشفيات في مصر مثلا أزواج سببوا لزوجاتهم جروح قطعية في منطقة العجان، اللي هي المنطقة التناسلية بين المهبل والشرج بسبب العنف في محاولة ممارسة العلاقة الحميمة. طبعا مش الهدف إن أنتِ تصابي بصدمة عصبية إضافية، محتاجين جدا تفهم الزوج وصبره. العلاج ها ياخد أسابيع ويمكن شهور، لكن بالتركيز وبالتدريج مع طبيب نسا ويمكن معالج نفسي تحاولي بالتدريج تتغلبي على المشكلة، وفي الآخر ها تنجحي. تذكري إن ممارسة الرياضة وتمارين الاسترخاء بالتنفس العميق إدخال وإخراج الهواء ها يساعدوكِ أوي، فا ماتنسيش دايما أنك أنتِ تكوني بتتنفسي طول الوقت أثناء ممارسة العلاقة الحميمة، دة ها يفرق كتير في يعني استرخاء العضلات. ممارسة الرياضة أيضا ها تساعدك على استرخاء العضلات، لا تهمليها 5-10 دقايق في اليوم من نوع معين من الرياضة تبذلي فيه مجهود كويس، ها تلاقي نتيجة كويسة في العلاقة الحميمة.
أتمنى لكِ كل الصحة والتوفيق. تحياتي.

Q & A | زوج يفعل أشياء تضايق الزوجة أثناء العلاقة الحميمة

السؤال من سيدة بتقول زوجي يقوم بأشياء تضايقني أثناء العلاقة الحميمة ماذا أفعل؟
مبدئيا الغلط أو العيب مش فيكِ ولا حتى فيه هو مجرد سوء تفاهم ولازم نحاول نحله بطريقة صحية لو خلتيه هو يتكلم عن الموضوع هتلاقيه هو برضه مش فاهم إن في حاجة بتضايقك هو مش قاصده يضايقك تذكري إن الرجال حساسين جدا ويعني الـ Ego بتاعهم بيوجعهم لو قولتِ لهم حاجة تجرح المشاعر فا تجنبي تماما أنك تقولي حاجة جارحة لمشاعر الرجولة عنده اختاري ألفاظك بعناية جدا وافتكري إنه اللفظ الغلط ممكن يجرحه لسنين ويسوء علاقتكم أطلبي منه بحب وحنان يعمل اللي أنتِ عاوزاه لما يعمل حاجة كويسة شجعيه وقولي له كدة جميل استمر ولو في حاجة مضايقاكِ قولي أنك بتتوجعي منها أو بلاش كدة أحسن وممكن تقترحي حاجة أنتِ أو تشجعيه لما يعمل حاجة كويسة تقولي له كدة بحب كدة استمر المهم تكوني حنونة ومهذبة معاه أثناء محاولة تغيير التصرف اللي مش عاجبك
أتمنى لكِ كل الحب والسعادة تحياتي

Q & A | Sex Headaches الصداع الجنسي

سؤال بيقول أنا رجل عمري 28 سنة أعاني من صداع فظيع بعد ممارسة الجنس ما هي المشكلة؟
دي حاجة اسمها صداع الجنس صداع الجنس دة ممكن يصيب ناس أغلبهم من الرجال وله نوعين احتمال يجيلك صداع بسيط كدة لكنه مزعج في الرأس والرقبة وبيزيد مع استثارتك الجنسية وأحيانا ممكن تصاب فجأة صداع ودماغك ها تنفجر وعاملة زي ما تكون بتنبض كدة بالذات مع لحظة الوصول للنشوة بعض الناس حظهم وحش أنهم يبقى عندهم النوعين من الصداع في أغلب الحالات لا داعِ للقلق على الصداع لكن في بعض الحالات ممكن تكون علامة إن في حاجة غلط في أوعية المخ يعني في الحالة دي بأقترح إنه لو الصداع دة جالك لأول مرة أنك تروح للدكتور الصداع دة ممكن يستمر دقايق أو ساعات أو يمكن أيام وبعض الناس بيصابوا به مرة واحدة أو عدة مرات في السنة أو دايما مع كل ممارسة جنسية يعني ما نقدرش نتوقع مسار المرض أوي لكن على أي حال هما في العموم مش علامة سيئة لكن في بعض الأحيان وعلشان كدة لازم لو أصبت به لأول مرة أنك تروح للدكتور دكتور مخ وأعصاب ها يعملك كشف أشعة على المخ علشان نعرف إذا كل حاجة كويسة أو محتاج علاج معين طيب لو الدكتور ملقاش حاجة إيه الحل؟ الصداع لسة موجود وأنت متضايق منه لو الصداع دايما مع كل مرة تمارس فيها الجنس فا أنا أقترح أنك تاخد مسكنات قبل ممارسة الجنس وأنك تمارس الرياضة حاجة مريحة للأعصاب زي اليوجا علشان تحسن من حالتك النفسية وتقلل التنشنة دي اللي بتيجي مع ممارسة الجنس
أتمنى لك كل الصحة والتوفيق تحياتي