مقالات

مريضة ونكدية؟ Sick and Troublemaker

أنا سيدة متزوجة منذ سنة. أصبت بالإنفلونزا بينما كان زوجي مسافرا في رحلة عمل.
قبيل عودته من السفر بذلت مجهودا كبيرا في تنظيف البيت وترتيبه استعدادا لاستقباله بالرغم من شعوري بالإرهاق والمرض.
عندما دخل البيت أراد أن يضمني ويقبلني، فقلت له أن من الأفضل ألا يفعل ذلك لأني لا أريد أن تنتقل له العدوى.
ذهبتُ لتحضير وجبة له، فرفض وقال أنه سيقوم بالطبخ بنفسه، فذهبت بعدها لتغيير ملاءات السرير فصرخ قائلا أن ملابسي مليئة بالميكروبات. قلت له أنني قد غسلت يدي، فقال بضيق أن ملابسي لا زالت تحمل المرض.
شعرت بجرح مشاعري وقلت له: “هل هذه طريقة تشكرني بها؟”
وتركت الغرفة.
فبدأ يتهمني بأنني نكدية.
لم يقل حتى سلامتك أو استريحي، وتركني أبكي وأشعر بالذنب.
هل أنا فعلا نكدية؟
هل الخطأ مني؟

عزيزتي،
قرأت القصة بالتفصيل كما كتبتيها لأوضح نقاط معينة أتوقع أن تتكرر كثيرا وتسبب مشاكل في أي علاقة زوجية جديدة.
تذكروا أن العلاقة الزوجية معناها تحول شخصين غريبين إلى قريبين في وقت قصير جدا. أنت حديثة الزواج، وأول سنوات من العلاقة الزوجية ستحدث تصادمات كثيرة أغلبها بسبب سوء تفاهم بين الشخصين نتيجة لعدم معرفة كل شخص بأفكار الآخر وطبيعته.
نحن نشبه جبال الجليد. جبل الجليد يظهر منه جزء بسيط على السطح بينما الجزء الأكبر منه لا نراه لأنه يختفي تحت الماء. مطلوب مننا أن نعرف ما تحت السطح لشريك الحياة. إذا عرفنا الأفكار الداخلية التي يخفيها الشخص، سنقدر على التعامل معه بصورة أفضل.
أيضا يجب أن نتعلم فن توجيه النقد البناء. تذكري دائما شعار: نحن معا ضد المشاكل لا مع المشاكل ضد بعض. كرريه كل يوم وكلما حدث بينكما خلاف تذكريه.
في أغلب الحالات تنشأ مشكلة بسبب أن الكلام الذي قيل فُهم على محمل سيء. خليني آخذ قصة هذا الخلاف كمثال:
أنت مريضة ومع ذلك رغبتِ في جعل زوجك سعيد باستقباله ببيت نظيف.
تعبتِ وأرهقتِ نفسك في التنظيف كعلامة على حبك له. هذه نقطة تُحسب لكِ.
الآن هو قادم ومتوقع أن تكوني في قمة السعادة والترحاب به بأن تضميه وتقبليه- هذا أهم عنده من المنزل. وهذه نقطة تُحسب له.
الآن: أنت رفضتِ أن تقتربي منه حفاظا على صحته، ولكنه غالبا شعر في قرارة نفسه أنك غير راغبة فيه. تقدري تقولي أن ثقته بنفسه اهتزت.
هو في هذه اللحظة غالبا فهم أنك ترفضينه، لا أنك تخافين عليه. واخدة بالك؟ هنا بدأ إحساسه بالضيق وعليه بدأ بالتصرف بنوع من الدفاعية وربما الطفولية قليلا: حاول عدة مرات التأكيد لنفسه -قبل أن يؤكد لك- أن رفضك له بسبب مرضك، لا بسبب شيء فيه هو شخصيا.
ففضل يؤكد عدة مرات: لا أنت مريضة لا تطبخي، أنت مريضة لا تغيري الملاءات وهكذا. لاحظي أنه يكرر نفس الشيء ليدفع عن نفسه فكرة أنك غير راغبة فيه شخصيا، وانشغل تماما بالفكرة لدرجة أنه نسي أنك مريضة ومحتاجة اهتمام.
أحيانا نكون- نساء أو رجال- في حالة من جرح المشاعر تستوجب على الطرف الآخر لعب دور: “خليني أنا الكبير”، ومحاولة تخطي التعبيرات الخطأ ومحاولة فهم مشاعر النقص أو الجرح التي وراءها.
زوجك أخطأ في اتهامك بأنك نكدية. في موقف كهذا يجب أن نترك اتهام الشريك أو الانتقاص منه، والتركيز على توضيح مشاعرنا نحن. يعني بدل ما يقول أنت نكدية يقول: أنا اتضايقت لأني حسيت أنك مش عاوزة تحضنيني.
الفن هنا أننا نتعلم الآتي:
١- نصف المشكلة بوضوح. المشكلة وليس الشخص.
٢- نصف مشاعرنا ونتجنب إهانة الآخر.
٣- نعذر الطرف الآخر، وأن نعطي الأولوية لحسن الظن. ولا ننام أبدا قبل أن نتصالح ونحضن بعض.
تصعيد الموقف وتعقيده أصعب بكثير من ابتسامة وحضن واعتذار وتأكيد على حبك له.

أقترح قراءة كتب معا أو زيارة استشاري علاقات أسرية لتعلم لغة التواصل.
كل الحب والتوفيق لكما.

Q & A | Mother In Law dislike me حماتي لاتحبني

انا متزوجة منذ 8 سنواوت عندي بنتين …زوجي إنسان محترم و يحبني و أنا أحبه.
مشكلتي في بيت العائلة! انا أسكن مع عائلته جوزي ولكن مايحدث لا يمت للعائلة بصلة! لو ساكنة مع اغراب كان أحسن.
السؤال: أنا نفسي أنقل البيت ولكن مش قادره و جوزي مش موافق لان ده بيت عائله ف عيب يخرج منه !! مع اني مش عارفه فين العيله دي !! أعمل ايه؟

عزيزتي
انطباعي أن الأم- حماتك- كانت مرتبطة جدا بإبنها وعندها صعوبة في تقبل وجود امرأة أخرى في حياته. ربما.
بما أنك غير قادرة على الاستقلال عن الأسرة والانتقال للعيش في مكان آخر، أقترح أن تتخلصي من فكرة التساؤل دائما: “لماذا لا يحبونني؟” لأن الحب مش بالعافية. أقترح أن تبني لنفسك حياة اجتماعية مستقلة عنهم فيها صديقات يزرنك مع أطفالهم، بحيث يصبح بيتك واحة جذابة للأصدقاء الذين تجدين فيهم تعويضا عن حرمان الأسرة. عندما ترى الأسرة الكبيرة والصغيرة أنك قادرة على إسعاد نفسك باستقلالية، ربما بمرور الوقت يصبح بيتك أنت واحة زيارة للأسرة. استقبليهم بترحاب وتسامح وربما تغيرت الأمور تدريجيا بطريقة إيجابية. لا تنسي طبعا أن تعزمي الأسرة.
نصيحة عن العزومات: أقترح طريقة الحفلة الأمريكية أو potluck / dish party .. اعزمي مثلا أمهات أصدقاء أولادك في المدرسة أو صديقاتك أنت مع أطفالهن أو حتى جروب أمهات وأطفالهن من فيسبوك وتبادلن الزيارات، واعمليها عادة اجتماعية لطيفة وستشعري بالإيجابية وعدم الرغبة في إرضاء بشر لا يبادلونك المشاعر الطيبة.
أخيرا، لو جاءت لك الشجاعة، اكتبي بطاقة لحماتك في مناسبة، مثلا العيد أو عيد ميلادها، تعبري فيه عن محبتك واحترامك للأسرة وأنك تعتبرينها مثل والدتك، وأنك تتمنين لها كل الخير، وارفقي معه هدية لطيفة. حتى وإن كانت لا تبادلك مشاعر إيجابية، فتذكري كل مرة تغضبي فيها أنها منحتك هدية جميلة في ابنها وأولادكم، وأنها لا تسبب لكم مشاكل عن عمد. أتمنى لك كل الحب والسعادة.

Vaginismus التشنج المهبلي

التشنج المهبلي أو Vaginismus هي مشكلة صحية تواجه بعض السيدات أثناء ممارسة العلاقة الحميمة. قد يحدث أن المهبل يصبح كحائط سد، لا يمكن إدخال القضيب فيه أو يدخل القضيب بصعوبة شديدة، وتصاب السيدة بألم أو حرقان أو شعور بالثقل في الجزء الأسفل من البطن. أحيانا قد تصاب السيدة بآلام أثناء العلاقة الحميمة، لكن استمرارها طول الوقت أو عدم القدرة على إدخال القضيب إطلاقا داخل المهبل نتيجة انغلاقه تماما معنى كدة إن عندنا مشكلة ولازم نحلها طبيا، والمشكلة دي بنسميها تشنج المهبل أو Vaginismus. إذا ليس في كل الحالات تجد الزوجة صعوبة في إدخال القضيب، قد يدخل القضيب فعلا ولكن تشعر الزوجة بآلام وحرقان مستمر طول الوقت مع العلاقة الحميمة دي تقع برضه تحت مشكلات تشنج المهبل.
تشنج المهبل من أهم أسباب عدم حدوث العلاقة الحميمة في الزواج، وبيحدث كتير جدا في مجتمعاتنا نتيجة إن البنات عندهم أفكار سلبية عن العلاقة الحميمة، وسمعوا دايما إن الجنس عيب وحرام، فا تبتدي البنت يبقى عندها مشكلة في الزواج ترفض تماما ممارسة الجنس.
عندنا نوعين من التشنج المهبلي، النوع الأول اسمه أولي. يعني البنت عمرها ما مارست علاقة جنسية وعمر ما أمكن إدخال أي حاجة في المهبل، وغالبا بيكون سبب كدة حاجة نفسية عندها، فكرة خاطئة عن الجنس خوف من الجنس بسبب تربية متزمتة وهكذا. النوع التاني إن السيدة تكون تزوجت ومارست العلاقة الحميمة وأنجبت يمكن، ولكن فجأة بدأ التشنج المهبلي دة يحدث عندها، في الحالة دي بندور على مشكلة طبية إلى جانب التشنج، يعني مثلا يكون عندها حاجة مؤلمة حدثت بعد الولادة الجرح بيوجعها ورم في الرحم أو في المهبل، يعني لازم ندور على سبب طبي في الحالات الثانوية بالذات ولو شيلناه ها تروح مشكلة التشنج المهبلي.
علاج التشنج المهبلي، نعمله إزاي؟ عند الدكتور الأول عاوزين نعرف إذا في سبب تاني للتشنج، سبب مرضي نحله، لو مافيش أي سبب تاني ها نعمل برنامج بيتكون من أربعة خطوات، لا يحتاج أدوية ولا جراحة ولا أي برامج معقدة هو بس أربعة خطوات سهلين حتى أنتِ ممكن تحاولي مع نفسك تعالجيه بنفسك.
الخطوة الأولى أنك تفهمي التشريح ووظائف الأعضاء لجهازك التناسلي. في المدارس يمكن ما اتعلمناش بالتفصيل الحاجات دي، فا محتاجة تعرفي كعروسة جديدة جسمك بيتكون من إيه وفين مكان المهبل وكيف يمكن إدخال القضيب في المهبل، علشان كمان تساعدي جوزك على إنجاح العملية الجنسية. كمان لازم تتعلمي تلاقي عضلة قاع الحوض عندك.
الحاجة التانية إن إحنا محتاجين نعرف تاريخك الجنسي، يعني إيه؟ إذا كان عندك أي تجربة جنسية أو يعني تحرش حدث لكِ وأنتِ صغيرة، وخلاكِ تخافي من الرجال أو من العلاقة الحميمة، يعني مثلا حد ضايقك حد قال حاجة وحشة عن الجنس خوفك منه التربية المتزمتة في الأصل اللي بتقول دايما الجنس حرام وعيب ممكن تكون أثرت فيكِ سلبيا بحيث ما بقيتيش قادرة تمارسي الجنس حتى في إطار الزواج. يعني عاوزين نعرف إذا في سبب نفسي كامن جواكِ وأنتِ مش عارفاه، ونتعامل معاه.
الخطوة التالتة أنك تعملي تمرينات لقاع الحوض، وتعملي يعني انقباض للعضلة وارتخاء، تفضلي تعملي كدة تمرين كل يوم علشان تتعلمي السيطرة على العضلة دي وتتعلمي ترخيها بمزاجك.
الخطوة الرابعة نحاول تدريجيا إدخال أجسام في المهبل من رفيعة لأسمك شوية كل مرة، في أدوات لكده موجودة في المحلات الطبية، لكن أنتِ ممكن تبتدي بأصبعك أنتِ ولو قدرتي تدخلي الأصبع اللي بعده أصبعين وهكذا، لحد ما بالتدريج تتعودي على فكرة إدخال شيء في المهبل، وبعدين بعد كدة ننتقل لإدخال القضيب من الزوج.
طبعا في الحالة دي الزوج محتاج يكون متفهم إن العملية مش تحدث من أول مرة، وبيحصل إن إحنا شوفنا في المستشفيات في مصر مثلا أزواج سببوا لزوجاتهم جروح قطعية في منطقة العجان، اللي هي المنطقة التناسلية بين المهبل والشرج بسبب العنف في محاولة ممارسة العلاقة الحميمة. طبعا مش الهدف إن أنتِ تصابي بصدمة عصبية إضافية، محتاجين جدا تفهم الزوج وصبره. العلاج ها ياخد أسابيع ويمكن شهور، لكن بالتركيز وبالتدريج مع طبيب نسا ويمكن معالج نفسي تحاولي بالتدريج تتغلبي على المشكلة، وفي الآخر ها تنجحي. تذكري إن ممارسة الرياضة وتمارين الاسترخاء بالتنفس العميق إدخال وإخراج الهواء ها يساعدوكِ أوي، فا ماتنسيش دايما أنك أنتِ تكوني بتتنفسي طول الوقت أثناء ممارسة العلاقة الحميمة، دة ها يفرق كتير في يعني استرخاء العضلات. ممارسة الرياضة أيضا ها تساعدك على استرخاء العضلات، لا تهمليها 5-10 دقايق في اليوم من نوع معين من الرياضة تبذلي فيه مجهود كويس، ها تلاقي نتيجة كويسة في العلاقة الحميمة.
أتمنى لكِ كل الصحة والتوفيق. تحياتي.

IBS القولون العصبي

القولون العصبي مشكلة تصيب بعض الناس، هي مشكلة مزمنة بتؤثر على القولون يعني الأمعاء الغليظة، وبتختلف أعراضها من شخص للتاني. لكن أهم الأعراض اللي ممكن نلاحظها إنه الشخص بيكون عنده ألم في البطن يعني مغص crumbs انقباضات إحساس بالانتفاخ وأحيانا خروج غازات اسهال وإمساك بيتبادلوا مع بعض أو اسهال مزمن أو إمساك مزمن وأحيانا مخاط مع البراز. فأغلب الناس هي مشكلة مزمنة لكن أحيانا بتيجي الأعراض عندهم وتروح لوحدها، وأحيانا يعني بتفضل معهم طول الوقت، مش عارفين بالظبط تحصل إزاي لكن كل ما تيجي الأعراض الشخص محتاج عناية خاصة علشان تتحل المشكلة. لكن في أعراض معينة محتاج ضروري تروح معها للدكتور، إنه مثلا يكون في نزيف من الشرج ألم في البطن يعني مغص يصحيك من النوم قوي جدا وعمال يزيد أو أنك تفقد وزن لدرجة تحس إن صحتك بقت ضعيفة. ممكن كمان تحصل يعني مضاعفات من المشكلة دي ها تخلي حياتك صعبة، إنه يكون عندك مثلا بسبب الإمساك المزمن ممكن بواسير، أو إنك بسبب سوء امتصاص الأغذية لأن عندك مثلا اسهال مزمن يجيلك سوء تغذية، وفي ناس كتير عندهم القولون العصبي مانعهم من حياة اجتماعية طبيعية، يعني مثلا سيدة عندها طول الوقت مغص فا مش عارفة تخرج تروح تزور أصحابها أو قرايبها، مش عاوزة تختلط بالناس، فطبعا لازم تشوف حل للمشكلة دي لأنها قد تسبب اكتئاب وانعزالية عن المجتمع.
التشخيص للقولون العصبي بيكون صعب شوية، ليه؟ لأن إحنا مش بنشوف أو بنسمع حاجة على جسمك، لا إحنا محتاجين منك الأعراض، وها نقعد بالمحاولة والخطأ نشوف إيه اللي يريحك لحد ما نوصل للحل. فا في بعض الحالات العيان بيفضل يروح للدكتور يرجع له تاني يقول طب أنا المشكلة ما اتحلتش عندي، أعمل إيه؟ وأحيانا بمرور الوقت بنكتشف إن عندك مرض آخر غير القولون العصبي، يعني في بعض الناس بنطلب منهم إن إحنا نعمل لهم تحليلات دم ويمكن أشعة وأحيانا منظار عملية، علشان نعرف أنت عندك إيه. لأننا مش عارفين سبب القولون العصبي فإحنا بنحاول على الأقل نعالج الأعراض علشان أنت تكون مستريح، علشان أمعائك تكون ما عندهاش الشكوى اللي بتجيلك كل مرة دي. الناس اللي عندهم شكوى بسيطة مغص بسيط غازات بسيطة بنحاول نحل معهم المشكلة بطريقة التغذية الصح، والناس اللي عندهم آلام جامدة أوي بنديهم أدوية. الدكتور ها يقول لك أبتدي غير أكلك، يعني أمتنع عن أكلات معينة بتسبب مثلا الغازات، زي مثلا المشروبات الغازية بالذات بعض الخضراوات والفاكهة اللي بتعمل غازات، زي كرنب البروكلي القرنبيط ويعني الفواكه النية اللي مش مطبوخة. كمان في ناس عندهم مشكلة مع الجلوتين، فالأبحاث أثبتت إنه القولون العصبي عند بعض الناس بيسترح لما نمتنع عن الحاجات اللي تحوي جلوتين زي القمح والشعير، الحاجات دي ممكن تكون عاملة عندك القولون العصبي.
في نظام تغذية اسمه Fodmap Low Diet، يعني يبقى الأكل بيحتوي على حاجات معينة، ويمتنع المريض عن حاجات معينة بتحتوي على سكريات بتتعبك. يمكن تاخد وقت علشان تجيب نتيجة أنك مثلا اتبعت نظام غذائي معين، لكن ها يعمل نتيجة في الأخر.
أنا عندي شوية نصائح لكم علشان تساعدكم في الموضوع دة، يبقى هدفنا إننا نلاقي حل طويل الأمد صحي من غير أدوية، نعمل إيه؟
أول حاجة إن إحنا نمضغ على الأكل ببطء، بحيث الأكل يبقى سائل قبل ما نبلعه، لأن بداية هضم الأكل بتبدأ مع اللعاب في الفم، فاللعاب مسئول عن تكسير حاجات معينة، فأنت بتحرم نفسك بعدم المضغ كدة بأنك تهضم حاجات معينة تروح القولون فاتتعبه. ابدأ استعمل الألياف بطريقة مدروسة، إزاي؟ الألياف كويسة لضبط حركة الأمعاء، بس ساعات بتعمل غازات، فالمشكلة إن أنت محتاج تزود الألياف لكنها ها تعمل لك غازات، فتعمل إيه؟ حاول تزودها بطريقة تدريجية، وتجنب الحاجات اللي بتحتوي على الألياف اللي بتتعبك، أعرف إيه هي ووقفها. في أغذية معينة ها تفضل تعباك دايما، دي لازم توقفها، تعرف كدة إزاي؟ أكتب كل يوم كلت وشربت إيه، وأعرف في اليوم دة أو اللي بعديه إذا كانت الأعراض زادت إذا الأعراض زادت، لو الأعراض زادت يبقى الأكل اللي أنت كلته يومها أو اليوم اللي قبلها هو اللي تعبك. الحاجات دي زي مثلا الكحوليات الشوكلاتة الحاجات اللي فيها كافيين سواء أدوية أو مشروبات، المشروبات الغازية كل الحاجات دي بتتعب الأمعاء. في ناس عندهم كمان مشاكل من منتجات الألبان واللحم الأحمر والسكريات الصناعية زي السوربيتول والمانيتول وكل الحاجات دي ممكن تتعب لك القولون. لو عندك غازات أمنع الأكل اللي بيجيب لك غازات، حتى لو صحي، زي مثلا بعض البقول البروكولي القرنبيط الكرنب وكل الحاجات دي. في ناس بيمضغوا علكة أو يشربوا بالشاليموه المصاصة، وهما بيشربوا بها بياخدوا غاز كتير يبلعوه، خلي بالك إن دي ممكن تكون أسباب لتكوين غاز في الأمعاء.
في ناس عندهم مشكلة بالذات مع منتجات الألبان، أغلب الناس في بلادنا عندهم مشكلة مع اللاكتوز، لاكتوز يعني سكر اللبن، سكر اللبن أو سكر الحليب محتاج أنزيم معين يهضمه اسمه لاكتيز، فإحنا ناقصنا الأنزيم دة. فعندك اختيارين إما تقلل أو تمنع الأطعمة اللي فيها لاكتوز، أو تاخد أدوية تحتوي على أنزيم اللاكتيز دة. طبعا أنت مش ها تعيش على طول بتاخد لاكتيز، فاستعملها بس لما تستعمل حاجة فيها منتجات ألبان كتير. نيجي لاختيار تقليل أو منع منتجات الألبان، دلوقتي أنت لو قللت منتجات الألبان أو اللبن على الأقل واستبدلته بزبادي مثلا ممكن يكون حل كويس، وفي ناس بيمنعوا خالص منتجات الألبان، وفي الحالة دي محتاج تعوض البروتين والكالسيوم وفيتامين B من مصادر أخرى غير منتجات الألبان.
الأعشاب بيقال إنها كويسة لراحة القولون العصبي، زي إيه؟ بالذات النعناع، لو أخدت نعناع طازج على السلطة مثلا أو شاي بالنعناع ها يريح عندك القولون العصبي في كثير من الأحيان فجربه. في اختيار كمان الـ Probiotics، الـ Probiotics دي البكتيريا الجيدة اللي بتساعد وظائف الأمعاء عندنا، بعض الناس اللي عندهم القولون العصبي مشكلتهم إن الـ Probiotics بتاعتهم قليلة، فإحنا عاوزين نساعدها بأنك تاخد Probiotics. هتلااقيها في مصادر طبيعية زي الزبادي، ولو مش عارف لها مصادر طبيعية ممكن تاخدها في أدوية يعني.
الناس اللي عندهم مشكلة مع المضادات الحيوية، خدوا فترة مضادات حيوية وجالهم بعدها القولون العصبي دة، بنقول إنه غالبا دة له علاقة بأنهم محتاجين Probiotics. أهم حاجة ممكن تعملها علشان تريح القولون أنك تكثر من السوائل، فأشرب سوائل كتير، المياه أحسن حاجة ممكن تشربها. امنع الكحول والمشروبات الغازية والتي تحتوي على كافيين، لأن دي بتتعب الأمعاء. أهم حاجة أنك تشرب سوائل أقرب للمياه، زي مثلا الشاي العشبي، يعني مثلا الكراوية والنعناع وكده كويسين. كل وجبات في مواعيد منتظمة، لو عندك اسهال مزمن كل وجبات صغيرة على فترات قريبة، لو عندك إمساك مزمن كل وجبات كبيرة وغنية بالألياف، دي ها تساعد على تحريك الطعام، علشان تقدر تروح الحمام. مهم أوي أنك تمارس الرياضة، الرياضة بتعمل حاجتين، بتساعدك على مقاومة الضغط العصبي في شغلك وحياتك اللي بيزود مشكلة القولون العصبي، تاني حاجة بتنظم بها حركة الأمعاء فبالذات لو عندك امساك مزمن ها تساعدك على أنك تروح الحمام أكتر.
مشكلة كمان أنك لما بيكون عندك القولون العصبي بتكون مكتئب، فيعني مالكش نفس تعمل حاجة، فالرياضة ها تحسن حالتك المزاجية جدا ودة مهم أوي. لكن لو عندك مرض مزمن زي ضغط الدم المرتفع، ضروري تتكلم مع الدكتور قبل ما تبدأ برنامج رياضي، لأنه مش كل الرياضات ها تناسبك. استعمال أدوية لعلاج الإمساك والاسهال ليس حلا على المدى الطويل، لازم تعرف إذا في حل غيرهم من غير أدوية. لأن الأدوية نفسهم لهم أعراض جانبية، وممكن في المستقبل يبقى عندك مشكلة جديدة من كتر استعمال الأدوية دي. فدايما لو ها تاخد أدوية تاخدها لفترات مش طويلة وتحت اشراف طبي واقرأ كمان النشرة اللي جاية مع الدواء، شوف الأعراض الجانبية اللي ممكن تحصل لك والجرعة الصح ما تتعدهاش وتفضل دايما مقتنع إنه أسهل حاجة وأحسن حاجة لعلاج القولون العصبي هي أسلوب الحياة الصحي. الأدوية علاج مؤقت لمشكلة مثلا تؤرقك دلوقتي النهاردة مثلا لكن مش تفضل تاخدها دايما لا. أهم حاجة أسلوب الحياة الصحي.
أتمنى لكم كل الصحة والتوفيق، تحياتي.

Preparing for Surgery 2 – التحضير للجراحة

ها يجيلك جواب من المستشفى أو الطبيب ها يتصل بك يفهمك مواعيد إن أنت تيجي أمتى للعمليات، ولازم توصل في معادك طبعا يعني أعمل حسابك على زحمة المرور لأنه بيبقى في جدول عمليات. وها يفهموك أي قسم تروحه، وها يستقبلك موظف يوديك للأوضة تستنى فيها لحد ما يجي معاد العملية. هتلاقي موظفين كتير يعني مثلا ممرضة وطبيب وجراح وطبيب تخدير، ناس كتير جم سألوك نفس الأسئلة. ليه؟ لأن التمريض له ملف والتخدير له ملف كل تخصص له ملف، ولازم كل المعلومات تكون عندهم صح منك، يعني مش ها ينقلوا من بعض لأنهم احتمال يكون حد سمعك خلط والغلطة تنتقل لهم كلهم، فلازم كلهم يسألوك نفس الأسئلة أحيانا لزيادة تأكيد سلامتك. لو هما ناسيين حاجة عن مثلا سؤالك عن أكلك أو خدت إيه من أسبرين أو كدة أنت دلوقتي واعي، وتقول لهم أنا أخدت مثلا أسبرين أمبارح لأن دة ممكن يؤثر على العملية وممكن يكون خطر على حياتك. فا أفتكر إن أنت تقولهم أي حاجة خدتها فكرهم يعني. لو الطبيب قال لك تاخد دواء قبل العملية خده، يعني تأكد من أنك خدت مثلا أو مطلوب تاخد مضاد حيوي خده قبل العملية، لو ماخدتهوش أو لو خدته لازم تقولهم يعني في الحالتين لازم تقولهم عملت إيه، علشان هما يظبطوا الجرعة اللي ها يدوها لك في الوريد بحسب أنت أخدت ولا لا.
لو أنت مريض سكر، أذكر ذلك بوضوح لكل العاملين اللي ها يشتغلوا معك. لو أنت عندك حساسية من التخدير، لازم تقول كدة لدكتور التخدير، بالذات لو لك تاريخ لكدة قبل كدة يعني حصل مثلا أنك بعد العملية قبل كدة رجعت كتير أو حد قريبك حصل له مشكلة صحية بعد العمليات والدتك والدك أخوك، فهم طبيب التخدير إيه اللي ممكن يكون حصل لك أو لقرايبك بعد العمليات الجراحية علشان يبقى هو مستعد يعني بالأدوية الصح المناسبة لك.
ها يلبسوك يعني Gown بتاع المستشفى، وها يشرحوا لك إجراءات العملية، وها يدوا لك تقرير موافقة منك تمضي عليه فيه مكتوب أنك تأذن لهم بعمل العملية. حسب نوع العملية كبيرة ولا صغيرة ها نقرر التخدير، يعني لو العملية كبيرة ها تحتاج تخدير كامل، يعني ها تبقى نايم تماما طوال فترة العملية، لو عملية صغيرة ممكن نختار تخدير موضعي، يعني الجزء بس اللي ها نعمل فيه العملية هو بس اللي مش ها تبقى حاسس فيه بالألم لكن أنت صاحي وواعي، أو تخدير نصفي يعني نصفك الأسفل أو الأعلى هو اللي مخدرين وغالبا أنت فايق يعني. اختيار التخدير غالبا حسب نوع العملية، بس كمان ممكن يكون حسب اختيارك أنت مع طبيب التخدير، فا أنت أتكلم مع طبيب التخدير في احتمالات أو الاختيارات الممكنة لحالتك.
بعد العملية ها تتنقل من غرفة العمليات لغرفة اسمها غرفة الإفاقة، ها تفضل هناك تحت الملاحظة لعدة ساعات للتأكد من إن التخدير خلص من جسمك وأنت فايق تماما. في غرفة الإفاقة ها تحس ببعض الدوخة، ولو حسيت إن أنت عاوز ترجع أو حسيت إن أنت عندك حرقان في الحنجرة أو فم جاف دي كلها حاجات طبيعية بعد التخدير. هتلاقي الممرضة دخلت كل شوية تطمئن عليك وتقيس لك الضغط وتاخد درجة الحرارة.
من أول ما تفوق بعد العملية، وكل ما تحاول تتحرك أسرع كل ما يكون أحسن. ليه؟ لأن الناس اللي بيتحركوا بسرعة بعد العملية بيقللوا فرصة إصابتهم بجلطة في الساق، جلطات الساق بعد العمليات ممكن تكون قاتلة. فعلشان كدة ضروري أوي إن إحنا نتحرك بسرعة بعد العمليات، علشان ننشط الدورة الدموية والجلطة دي ما تحصلش. نعمل إيه وإحنا في السرير؟ ونتحرك إزاي؟ لما أنت تبقى فايق وقادر تحرك القدمين، حرك القدمين بحيث يكونوا بيقتربوا لأعلى وحاول تثني الساقين قد ما تقدر. كرر الحركة دي باستمرار طول ما أنت نايم في السرير. أحيانا ممكن يدوك شرابات بتقلل احتمال الإصابة بالجلطة، أو يدوك حقن بتخلي الدم أكثر سيولة علشان ما تجيلكش الجلطة دي. في كل الحالات الحركة دائماً كويسة.
قبل ما تسيب المستشفى ها يدوك فريق التمريض أو الأطباء أو الاتنين نصائح عن إزاي تعتني بالجرح، واستعمالك للأدوية كل قد إيه؟ اسأل الأسئلة اللي أنت عاوزها، ودي اقتراحات ببعض الأسئلة اللي ممكن تسألها للطبيب قبل ما تمشي.
لما ترجع البيت هتلاقي نفسك مرهق أغلب اليوم، ودة حاجة طبيعية لأنه التخدير الكامل بالذات وعموماً التعافي وتجديد الأنسجة بياخد طاقة كبيرة من جسمك. فا استرح قد ما تقدر، بس برضه حاول تمشي شوية، لأن المشي بيقلل فرص حدوث الجلطة اللي في الساقين دي اللي ممكن تكون قاتلة. حاول ترجع للروتين اليومي بتاعك في أسرع فرصة، ودة ها يساعدك عليه أنك تأكل أكل صحي وتمارس المشي قليلاً إذا مسموح أو إذا مش مسموح تحاول بعض الحركة بنصف الجسم الأعلى إذا ممكن. وتوقف عن التدخين لأن التدخين بيعطل عملية تجديد الأنسجة عندك، فا التدخين أسوأ حاجة ممكن تعملها بعد عملياتك. بعد ما تخرج من المستشفى في فترة النقاهة في البيت مطلوب أنك تلاحظ على جسمك علامات معينة لأنها لو حصلت ممكن تكون خطر كبير على حياتك، لو لاحظت العلامات دي أتصل فورا بطبيبك وتوجه إلى المستشفى. إيه العلامات دي؟ أول حاجة في الساقين، لو لاحظت أنه في ألم في أحد الساقين أو تورم والألم بيزيد لما تثني قدمك باتجاه الركبة. كمان لاحظت أنه جلد الساق تغير لونه، يعني بقى مثلا أبيض أو أحمر أو أزرق كل دي علامات مش كويسة. كمان لو لاحظت إنه درجة حرارة ساق غير التانية، يعني واحدة سخنة أوي عن التانية. لو الأوردة في الساق بقت مليانة دم وقربت كدة من الجلد برضه دي علامة غلط. العلامات دي كلها علامات لحاجة اسمهاDVT ، يعني جلطة في أوردة الساق، لو أهملتها ممكن تحصل حاجة اسمها Pulmonary Embolism اللي هو كرة من جلطة راحت من الساقين إلى الرئة وسدت عندك القدرة على التنفس، فا هايحصل إيه بعدها؟ ها تبقى عندك علامات أنك مش قادر تتنفس، بالذات لما بتحاول تاخد نفس عندك ألم في الصدر بيزيد لما تعمل شهيق، واحتمال تفقد الوعي فجأة. فا دي علامات كلها بتبقى خطر، ومطلوب فوراً الاتصال بالمستشفى.
الطبيب ها يقولك على فترة النقاهة تستمر قد إيه، دة بيختلف بحسب العملية، يعني لو عملية صغيرة زي المرارة يمكن تحتاج أسبوع لو عملية كبيرة زي تغيير مفصل الفخذ مثلا ها تحتاج أشهر علشان تتعافى. في جميع الحالات مطلوب منك أنك تستمر شوية في الحركة علشان تقلل المضاعفات، وتأكل أكل صحي وتنام كفاية وتريح نفسك من الضغط العصبي.
أتمنى لك كل الصحة والتوفيق. تحياتي.

Preparing for Surgery التحضير للجراحة- 1

الخضوع لعملية جراحية قد تكون تجربة مخيفة عند الكثير من الناس، ودة بسبب إن عندكم مخاوف وأسئلة مش عارفين تسألوها لمين. لكن لما تزول المخاوف دي وتعرفوا الإجابات مش ها تكونوا خايفين من العملية، ومش بس كدة الأبحاث أثبتت إن الناس اللي عارفين ها يحصلهم إيه بيكونوا مستعدين نفسيا وجسديا للعمليات التشافي عندهم أو يعني التعافي بيكون عندهم أسرع من الناس اللي مش عارفين وداخلين عملية من غير استعداد. الحلقة دي علشان أشرح لكم فيها إيه المتوقع منكم واللي ها يحصل قبل وأثناء وبعد العمليات الجراحية بصورة عامة يعني.
أول حاجة بنكون مستعدين نفسياً طبعاً بأنه يعني إذا كان في حاجات لازم نعملها مع الأسرة ترتيبات مع الأسرة وفي البيت وكدة. لكن كمان الاستعداد جسمانيا بأنك عدة أسابيع قبل العملية يعني قول مثلا أسبوعين ثلاثة قبل العملية تستعد بحاجات معينة. تعمل إيه؟ توقف عن التدخين وشرب الكحوليات -لو بتشرب- كل أكل صحي يعني يكون مليء بالخضراوات والفاكهة الصحية. أمتنع تماما عن استعمال الأسبرين أو أي حاجة فيها Aspo زي أسبوسيد أو كدة. فيتامين E استعمال الفيتامينات والأوميجا 3 والحاجات دي، لأن كل الأدوية اللي ذكرتها ممكن تؤثرعلى تجلط الدم، فتسبب سيولة شوية في الدم، ودة يسبب إن جرح العملية ينزف أكتر ودة مش مطلوب. اتكلم مع طبيبك عن أي أدوية بتستعملها باستمرار إذا مسموح تستعملها قبل العملية أو التوقف عنها. مارس بعض الرياضة ها يفيدك أوي في التماثل للشفاء. عدة أيام قبل العملية ها يتصل بيك الدكتور علشان تتكلم مع طبيب تخدير أو الطبيب بتاعك اللي بيعالجك وها ياخدوا منك شوية معلومات، ها يسألوك شوية أسئلة، ويكشفوا عليك وممكن ياخدوا منك دم أو تحاليل بول أو حاجات حسب بقى المطلوب من العملية.
فهم طبيبك عن كل الأدوية اللي بتستعملها أو المهدئات أو المكيفات حتى الفيتامينات والأعشاب اللي بتستعملها، يعني حتى لو بتاخد مثلا زنجبيل كل يوم قل للطبيب برضه، دة بيؤثر على حالة يعني سيولة الدم عندك. الطبيب ها يفهمك معلومات عن الحاجات اللي ها تأكلها مسموحة أو ممنوعة، كمان إذا بتاخد أدوية ممنوع تستعملها ولا لا، يعني بيدوك معلومات عن أدوية لازم تاخدها وأدوية لازم تتوقف عنها، وكمان ها يقولوا لك هتاخد قد إيه وقت في المستشفى، ومحتاج تقعد كام يوم بعد العملية، تجيب معاك إيه للمستشفى، وكمان إذا محتاج حد يوصلك البيت بعد ما تخلص العملية لأنه في أغلب الأحيان مش ها تقدر تسوق بنفسك. لو الطبيب قال لك لازم تصوم قبل العملية، يبقى لازم تصوم قبل العملية. لأنه ممكن يكون خطر على حياتك لو حتى شارب شوية مياه قبل العملية. ليه؟ لأنه لما تكون في معدتك حاجة قبل العملية مع التخدير الكامل في فرصة أنك ترجع، فرصة عالية جدا، فا لو رجعت السوائل أو الأكل ممكن يدخلوا في الرئة ودي كارثة ممكن تسبب الوفاة. علشان كدة ضروري كل الجهاز الهضمي عندك يكون فاضي قبل العملية. فا ضروري أوي حتى لو بتاخد أدوية سكر طبيبك يكون عارف، ويقولك تأكل وما تأكلش إيه، بس غالبا برضه ها تكون صايم قبل العملية.
مطلوب من السيدات إنهم يشيلوا كل الـ Piercings في جسمهم، يعني مثلا الحلق زي كدة ومثلا الإكسسوارات الخواتم والسلاسل وكدة، وتروحي المستشفى من غير Makeup ولا طلاء أظافر. ليه؟ لأنه دكتور التخدير ضروري يكون قادر يشوف لون الوجه والأظافر عندك أثناء العملية، لأنه بيقرر منهم إذا كانت حالة الأكسجين في جسمك كويسة من لون جلدك ولون الأظافر. وضروري أوي تكوني مش حاطة Makeup ولاNail Polish . لو أنتِ قاعدة في المستشفى أو أنت لعدة أيام خدوا معكم شنطة فيها الحاجات اللي ها تحتاجوها الحاجات الشخصية يعني، علشان تبقوا جاهزين ما يبقاش بقى في طوارئ كل شوية حد رايح البيت يجيب حاجة. كمان اسألوا المستشفى إذا مسموح استعمال التليفونات أو الأجهزة الالكترونية زي الـ Computers ، لأن في بعض الأقسام ممنوع استعمالها لأنها بتؤثر على وظائف الأجهزة اللي حولك كمريض، وطبعا الزوار ممنوع يستعملوها كمان.
قبل العملية بيومين ثلاثة لو لاحظت إن عندك كحة أو حمى يعني زيادة في الحرارة أو إصابة بالبرد أعلم المستشفى أو الطبيب ضروري فورا، لأنه دة ممكن يخليهم يؤجلوا العملية، لأنه مطلوب تدخل العملية وأنت صحتك تمام.
اليوم اللي قبل العملية مسموح لك تأكل حاجات معينة وحاجات معينة تمتنع عنها، فا الطبيعي إن إحنا نقول إن الأكل اللي فيه ألياف أكل صحي معادا في اليوم اللي قبل العمليات. أشرب بس حاجات بنقول عليها شفافة، يعني شاي خفيف مثلا لكن أمتنع عن الحاجات اللي فيها ألياف كتير زي عصير البرتقال أو حاجة تقيلة على المعدة زي اللبن أو القهوة بكريمة. وكمان تأكد أنك مش بتاخد أي حاجة مثلا فيتامينات أو مواد بتسبب سيولة الدم زي ما قولت الأسبرين أول حاجة والفيتامينات زي فيتامين E.

Bartholin Gland التهاب غدة بارثولين

يصلني عدد كبير من الرسائل بسؤال من بنات شابات عن حاجة بتطلع لهم عند فتحة المهبل ومش عارفين إيه هي بيخافوا تكون سرطان أو حاجة فا أنا عاوزة أكلمكم في الحلقة دي عن مسألة الـ Bartholin Glands يعني إيه؟
غدد بارثولين غدد بارثولين غدتين موجودين على مدخل المهبل وظيفتهم إفراز سائل يلطف المنطقة اللي حوالين المهبل فا اللي بيحصل إنه الغدة دي ممكن تتسد بالسائل اللي جواها وتلتهب وأنتِ تلاحظي إن في ورم كدة وماتبقيش عارفة إيه هو في أغلب الأحيان التهاب غدة بارثولين ممكن ما تلاحظيهوش أبدا وأحيانا تلاحظي ورم عامل زي البسلاية وأحيانا تكبر أوي تبقى قد مثلا البلية قد الكرة الزجاجية وأحيانا تبقى كأنها يعني خراج كبير ومؤلم جدا لكِ اللي تلاحظ على جسمها إنه الخراج تكون وجالها حرارة وكدة مضطرة تروح للدكتور لكن اللي عندها الالتهاب بسيط ويعني بس ورم كدة مضايقها جربي أنك تقعدي في حمام مياه سخنة الحمام دة مثلا تملي البانيو مياه سخنة وتقعدي فيه 10 دقايق أو تملي الـ Bidet ها يساعد على خروج السائل من الغدة لخارج الجسم ويقل الورم فا كل ما تجيلك أعملي كدة لكن لو أستمر دائما وجه الالتهاب دة بصديد مضطرين نزور دكتور علشان يحاول إذا يخرج الصديد دة أو   يعمل عملية في الغدة بحيث يتخلص من المشكلة دي بأنه مثلا يقفل الغدة تماما
.السيدات كبار السن قد تكون علامة لورم سرطاني فعلشان كدة لازم دكتور يشوف عينة من الغدة دي علشان نعرف إذا كان سرطان أو لا وفي الحالة دي مضطرين نشيلها
.على أي حال ما تخافيش وما تتكسفيش من جسمك واعرفي إيه الطبيعي وإزاي نحل المشكلة؟ علشان تبقي مستعدة لها لو حصلت
.أتمنى لكِ كل التوفيق, تحياتي

Tips for Healthy Eyes الحفاظ على صحة العيون

لما بنكون نظرنا سليم شايفين كويس وما عندناش أي التهابات في العيون عمر ما بيجي في بالنا إن إحنا نروح لدكتور نطمئن على النظر عندنا ودي للأسف غلطة كبيرة لأنه مشاكل النظر لما بتبتدي أعراضها بيكون معنى كدة إنه عدى وقت طويل على بدأ المشكلة وبيكون من الصعب علاجها.
علشان كدة عندي لكم 7 نصائح علشان نحمي نظرنا من مشاكل النظر أول حاجة إن إحنا نعمل كشف على العيون بانتظام نبتديه من أول ما الطفل سنه 6 شهور لسنة نبتدي أول كشف نظر للطفل وفي سنين المدرسة كل سنة يروح يعمل كشف نظر علشان نكتشف إذا كان في تغيرات في النظر وفي الحالة دي محتاج نظارة بدري علشان ما تأخرش يعني قدرته في التحصيل الدراسي بعد سن الأربعين محتاجين نعمل كشف دائما على النظر وعلى قاع العين علشان في مشاكل صحية ممكن تسبب مشاكل في قاع العين للأسف ممكن في الآخر تؤدي إلى الإصابة بفقدان النظر يعني دايما قل لطبيب العيون عن لو عندك مشاكل أمراض مزمنة في الجسم كله عامة يعني أو في العيلة لو مثلا عندك سكر أو ارتفاع الضغط عندك أنت شخصيا أو في العيلة بلغ طبيب العيون أثناء الكشف عليك لأنه الأمراض دي بالذات بتعمل مشاكل في الأوعية الدموية في قاع العين وعدم اكتشافها بدري ممكن يؤثر على نظرك بصورة سيئة جدا كل ما تكبر في السن كمان لو بتشوف حاجات زي مثلا نقط سوداء أو أضواء أو حاجات طايرة في مجال نظرك كدة لازم تفهم طبيبك إن الأعراض دي موجودة علشان ممكن تكون أعراض لمشاكل صحية في البيت وفي الشغل لو أنت عندك تكييف أو تدفئة في الحالتين ممكن الجو يكون جاف ودة يؤذي العيون يخيلها جافة دائما ودة مضر بالنظر فا علشان كدة لو أنت قاعد في مكان مكيف أو في تدفئة دائمة أحرص إنه يكون في رطوبة كفاية مثلا خلي عندك جهاز بيعمل بخار مياه شوية أو استعمل نقط دائما اللي هي اسمها الدموع الصناعية دي كويسة لو عندك قطة أو كلب في البيت الشعر بتاعهم ممكن يكون مسبب لتهيج العيون فا التنظيف دائما باستمرار مهم أوي علشان مايبقاش له تأثير سيئ على العيون لو بتستعمل الكمبيوتر لفترة طويلة طول اليوم محتاج تعمل شوية حاجات أول حاجة أنك لو بتلبس نظارة أو عدسات أنهم يكونوا مظبوطين دائما بنقول عليه يعني Up to date يعني متقاس نظرك قريب والنظارة مظبوطة على مقاسك علشان ما تتعبش لو بتتعب من الانعكاس أو اللمعة اللي في الكمبيوتر يمكن تكون محتاج نظارة تحميك من المشكلة دي وضع الكمبيوتر في مستوى بحيث يكون عينك مش تعبانة مش منخفض أوي أو عالي أوي على العيون بحيث تبقى العيون مستريحة لو في انعكاس في الشاشة من شباك وراك مثلا أو أي ضوء مهم أوي إنه ما يكونش موجود فا حرك الكمبيوتر بحيث يكون مافيش انعكاس نازل عليه أو حط شاشة تحميك من اللمعة دي لو حاسس إن عينيك ناشفة أقفل عينيك وافتحها كدة في تمرينات عد لحد 10 وكل 20 دقيقة بص بعيد 20 متر لمدة 20 ثانية وكل ساعتين خد Break 15 دقيقة يعني أبعد عن الكمبيوتر وأعمل حاجة تانية كل أكل صحي مناسب لصحة العينين زي مثلا الخضراوات الورقية الخضراء والتوت البري والأسماك زي الأسماك المياه الباردة بيقولوا عليها والمكسرات زي عين الجمل كويسين أوي على الحفاظ على صحة العين أحمي عينيك من أشعة الشمس لو أنت قاعد في مكان مشمس فترة طويلة أستعمل نظارات شمس كويسة وكمان أحرص على أن أولادك أطفالك الصغيرين يكونوا برضه لابسين نظارات كويسة أو على الأقل لابسين Cap بيحمي عينيهم من الشمس القوية أحرص على نظافة العلبة اللي أنت بتحط فيها العدسات بتاعتك علشان العلبة دي لو مش نظيفة ها تبقى مركز لتجمع البكتيريا المضرة بالعدسات واللي ها تضر بعينيك فا بعد كل مرة تحط فيها العدسات في عينك فضي المحلول من العلبة وأغسلها كويس وحط محلول جديد السيدات استعملوا Makeup من أنواع كويسة وما تحطهوش في العينين جوة العينين أبدا ولو بتستعملوا ماسكارا اعملوها يعني أعرفوا إنه التاريخ عليها أكتبي تاريخ امتى فتحتيها وبعد 3 شهور ارمي الماسكارا واستعملي ماسكارا جديدة لو بتسافروا كتير الطائرة بتتعب العينين فا حطوا قطرة في العينين قبل السفر دي ها تساعد شوية على تحمل الجفاف اللي في الطائرة لو أنتم مسافرين وبتستعملوا نظارة أو Lenses خدوا معكم نظارة دائما ونظارة إضافية ممكن و Lenses إضافية لو أنتم رايحين مكان ها تعوموا فيه مثلا ما تعوموش أبدا بالـ Lenses في عينيكم علشان ممكن تجمع الكيماويات والبكتيريا اللي في المياه ودة مضر بعينيكم
أتمنى لكم كل الصحة والتوفيق. تحياتي

Child Rage نوبات غضب الٰأطفال

نوبات الغضب المدمرة عند الأطفال والمراهقين هي واحدة من أصعب المواقف اللي ممكن نتحط فيها كأهالي كآباء وأمهات ها يحصل إن إحنا نلاقي أولادنا بيصرخوا وبيكسروا حاجات وبيعملوا حاجات عنيفة في البيت إزاي نكون رد فعلنا؟ عندنا خطة من 7 خطوات لازم نلتزم بيها أول حاجة أطفالنا عندهم طاقة هائلة والطاقة دي لازم تطلع في اتجاه صح علشان كدة لازم يعملوا رياضة كل يوم خليهم ينضموا لنادي أو يعملوا رياضة في البيت وتأكدوا إنه الأوضة بتاعتهم والمكان حواليهم يعني أمان لو بيكسروا حاجات أو كدة هاتوا لهم حاجات بلاستيك يأكلوا فيها وكدة وهاتوا لهم كمان حاجة في أوضتهم يضربوها مثلا زي الـ Punching Bag بتاعة الملاكمة أرفضوا تكلموهم وهما عصبيين سيبيهم خالص يعملوا اللي هما عاوزينه بشرط إنهم يكونوا ما بيؤذوش حد لو شتموكوا أو قالوا لكم حاجات تضايقكم ما تردوش عليه سيبوهم خالص لحد ما يخلصوا الموقف اللي هما فيه لأن العنف ها يزود العنف يعني ها تبقى عنيف وتضربه احتمال ينتهي بكم المطاف إن هو يضربك أديهم أوامر أو طلبات محددة وقصيرة وهادية أنت ها تبطل صريخ ها أكلمك ها تفضل تصرخ مش ها أرد عليك روح أوضتك لحد ما تهدئ حاجات كدة يعني أتكلموا بعدين لما الطفل يهدئ أتكلموا اسأل الطفل أول حاجة تسألها له إيه اللي كان مضايقك وخلاك عصبي كدة؟ لازم تعرف ليه علشان عاوزه يعرف ويقول لأنه لما يعرف إيه اللي حصل ها يرد عليك بيعني السبب وتحاولوا تحلوه مع بعض بحيث ما يتكررش التصرف السيئ العصبي دة يبقى لازم هو يفهم إنه كل سبب للعصبية لازم نعرفه ونحاول نتعامل معاه قبل ما نوصل للموقف يعني الموقف المتفجر دة لو كسر حاجة لازم يدفع ثمنها لو كسر التليفزيون مثلا لازم يشتغل حاجة علشان يرجع ثمن التليفزيون سواء في البيت عندكم أو تشوفوا له شغل في مكان قريب لو أتكررت المسألة دي مهما حاولتم تكونوا لطاف معاه وتفهموه إن كدة ما ينفعش يبقى في حاجة صحيا غلط ومحتاج معالج نفسي فا مضطرين ترجعوا ليعني معالج نفسي تشوفوا إيه المشكلة وإذا علاجها محتاج علاج أدوية أو علاج نفسي اسمه سلوكي علاج سلوكي لكن المهم إن إحنا نلتزم بالخطة دي لو التزمنا بيها باستمرار في الأول مش ها تحسوا بفرق لكن لو فضلتم دايما ملتزمين بخطوات الخطة ها يهدئ الطفل ويتعلم إنه مايبقوش عندهم ثورات الغضب المدمرة دي لكم ولهم
أتمنى لكم كل التوفيق تحياتي

Child Talking Back ردود الأطفال غير المؤدبة

جزء من عملية النمو الطبيعي للطفل هو إنه أحيانا ها يرد علينا بطريقة غير مهذبة الرد أو التبجح في الرد ها يكون ملحوظ من أول الطفل يبتدي يقول لا ها تلاقيه مثلا بيقاوح بيقول كلام مش مؤدب يقلب عينيه كدة ويمشي أو يقول أوف ويمشي كلها حاجات طبيعية علشان هي دي جزء من عملية تطور شخصيته ومعرفة الصح من الغلط ليه هما بيعملوا كدة؟ لأنهم بيحاولوا يكونوا لهم شخصيتهم المستقلة ودي حاجة مش وحشة ساعات بيكونوا جعانين أو ناقصهم نوم أو تعبانين من المدرسة كلنا لنا حق إن إحنا نعبر عن ضيقنا بطريقة معينة أحيانا واجبنا كآباء ومدرسين إن إحنا نتعلم نتعامل إزاي مع الموقف دة بطريقة صح بحيث نعلمهم إزاي يكونوا مهذبين في الرد من غير ما نجرح مشاعرهم أو يعني نهينهم عندي لكم 7 نصائح في السياق دة أول حاجة إن إحنا نكون مثال كويس لهم فا أنا لو يعني شتمته أو رديت عليه بسخافة طب ما أنا بدي مثال وحش فا لما هو يكلمني بقلة زوق أحسن إن أنا أديله مثال كويس بأن أنا ما أردش كمان نفس الحاجة في تعاملي مع مثلا الأم مع الأب مع الجيران مع القرايب حتى مع الناس الأغراب في الشارع الأطفال بيشوفوا مننا كل حاجة ويقلدوها كمان لازم نقول للطفل بالظبط إيه الصح وإيه الغلط إيه الرد المقبول وإيه الرد الغير مقبول يعني مش بس نبقى إحنا مثال كويس إحنا أحيانا محتاجين نقول دة رد كويس ودة رد وحش لو بدأت المعركة وابتدئ الطفل يبقى سخيف حافظ على هدوءك هو مغري جدا إن لما الطفل يقولك حاجة مستفزة فا أنت عاوز ترد عليه بحيث يبقى لك الكلمة الأخيرة لكن الفكرة إن أنت تفضل أنت اللي مسيطر على الموقف بالهدوء فا الهدوء دة بتاعك ها يبقى معدي يعني الطفل لما يلاقيك هادئ ها يفضل هادئ بالتدريج يعني هي هتاخد وقت مش من أول موقف لكن بالتدريج هتلاقي نفسك علمته يبقى هادئ يعني ما تأكلش الوحش اللي بيفضل كل ما أنت ترد عليه ما هو ها يرد عليك فا أنت حافظ على هدوءك لما الطفل يتكلم أحترم رأيه وما تهينهوش لو بيقول رأيه في حاجة مش عاجباك أديله نقد بناء فا لما الطفل يسمع إن أنت محترمه مش ها يقل أدبه ها يرد بسخافة طبعا ها يفرق يعني لو صغيرين أوي مش ها يبقوا كدة لسة لكن بالتدريج ها تحصل حاول بهدوء تقولهم إيه المطلوب ولو هما معصبين أوي قولهم طيب نهدئ وبعدين نتكلم بعدين تجنب الصدام ولو حصل ابتدئ فعلا الطفل يبقى عنيف أو عصبي يعني تجاهل الموقف ويمكن لازم تسيب الأوضة أو تخليه هو يروح أوضته أفتكر دايما كل ما الطفل يبتدي يعمل كدة إن دة جزء من عملية النمو الطبيعي له هو مش مثلا يعني بيكرهك أو أنت فاشل أو هو فاشل لا هما تعبانين مع هرموناتهم وشعورهم بأنهم بيكبروا مش فاهمين الحياة أوي أحيانا ممكن يكونوا عصبين وأحيانا إحنا المفروض اللي نستحمل ونحترم العصبية دي حاول تعرف إذا في XXXXX إذا طريقة أو يعني مواقف معينة بتحصل معها عصبية الطفل تكون دي احتمال تكون مرتبطة بحاجة معينة مثلا لسة جاي من المدرسة هل وهو جعان ناقصه نوم يمكن لما بيقعد يعمل الواجب بيبقى متنرفذ في حاجة مضايقاه في الواجب حد بيضايقه في المدرسة في Video Games معينة بيلعبها بتخليه عنيف في حاجة في التليفزيون بيتفرج عليها مثلا برنامج فيه قلة أدب مثلا وهو بيتعلم منها شوف إيه السبب وحاول تبعده أو تعالجه أو تشوفه تحل الواجب معاه تساعده بطريقة لطيفة وأحيانا قد تحتاج إلى معالج نفسي يساعدك أحيانا محتاج تقعد معاه وتقوله إيه بالظبط التعبيرات اللي مش مقبولة يعني مثلا الثقافة عندنا مثلا في تعبيرات غير مهذبة ها يكون سمعها في الشارع وجه يقولها لك قوله إحنا مش بنقول كدة في البيت وأحيانا محتاج أنت تستعمل عقاب معين لو قالها ويكون هو عارف كدة إيه العقاب اللي ها يحصل لو قولت كذا يعني مثلا لو شتمت بحاجة معينة مش ها تشوف مثلا تليفزيون يومين أو ها تخليه مثلا ينظف الصالة مثلا لوحده وخليك دايما مستمر في تطبيق العقاب كل ما تحصل المشكلة دي فا علشان هو يبقى عارف إنه فيه عقاب جاي ممنوع منعا باتا العنف فقط العقاب بيكون بمنعه من حاجة مثلا تليفزيون أو كدة لما الطفل يقول حاجة مؤدبة أو يرد عليك بطريقة مؤدبة أفتكر أنت توضح له كدة شايف أنت بتشرح لي إزاي بهدوء وأنا مبسوطة من كدة من طريقة كلامك معايا وأنك أستنيت أني أشرح رأيي من غير ما تقاطعني أنا مبسوط منك لأن دي حاجة كويسة أنت عملتها كل ما شجعت الطفل على الحاجات الكويسة كل ما هو يعني زادت ثقته بنفسه واحترامه لنفسه ولك بالتدريج نعلم الأطفال لما يكونوا في سن صغير أوي أحيانا ممكن دة يحصل ما تتنرفذوش عليه وهما بالتدريج ها يتعلموا الصح من الغلط لما يشوفوكوا أنتم مثال كويس
أتمنى لكم كل التوفيق تحياتي